[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The Śvetāmbara canon (Siddhānta)](https://indike.org/pramana/in.jaina.sveta) › [The Chedasūtras (disciplinary texts)](https://indike.org/pramana/in.jaina.sveta.cheda) › [Mahanisiha](https://indike.org/pramana/in.jaina.sveta.cheda.6) › 3.600 # Mahanisiha 3.600 Mahānisīha 3.600 - **Language:** Ardhamāgadhī Prakrit ### [3.600](https://indike.org/pramana/in.jaina.sveta.cheda.6.3.600) (1) se bhayavaṃ sudukkaraṃ paṃca-maṃgala-mahāsuyakkhaṃdhassa viṇaovahāṇaṃ pannattaṃ, mahatī ya esā niyaṃtaṇā, kahaṃ bālehiṃ kajjai (2) goyamā je ṇaṃ kei na icchejjā eyaṃ niyaṃtaṇaṃ, avinaovahāṇeṇaṃ ceva paṃcamaṃgalāi suya-nāṇamahijjiṇe ajjhāvei vā ajjhāvayamāṇassa vā aṇunnaṃ vā payāi| (3) se ṇaṃ na bhavejjā piya-dhamme, na havejjā daḍha-dhamme, na bhavejjā bhattī-jue, hīle-jjā suttaṃ, hīlejjā atthaṃ, hīlejjā sutta-ttha-ubhae hīlejjā guruṃ| (4) je ṇaṃ hīlejjā suttattho'bhae jāva ṇaṃ guruṃ, se ṇaṃ āsāejjā atītā'ṇāgaya-vaṭṭamāṇe titthayare, āsāejjā āyariya-uvajjhāya-sāhuṇo (5) je ṇaṃ āsāejjā suya-nāṇamarihaṃta-siddha-sāhū, se tassa ṇaṃ sudīhayālamaṇaṃta-saṃsāra-sāgaramāhiṃḍemāṇassa tāsu tāsu saṃkuḍa viyaḍāsu culasīi-lakkha-parisaṃkhāṇāsu sīosiṇamissa-joṇīsu timisaṃdhayāraduggaṃdhā'mejjhacilīṇakhāramuttojjha-siṃbha paḍahacchavasa-jalula-pūya duddiṇa-ciliccila-ruhira-cikkhalla-duddaṃsaṇa-jaṃbāla-paṃka-vībhacchaghora-gabbhavāsesu kaḍha-kaḍha-kaḍheṃta-cala-cala-calassa ṭala-ṭala-ṭalassa rajjhaṃtasaṃpiṃḍiyaṃgamaṃgassa suiraṃ niyaṃtaṇā| (6) je uṇa eyaṃ vihiṃ phāsejjā, no ṇaṃ maṇayaṃ pi aiyarejjā, jahutta-vihāṇeṇaṃ ceva paṃca-maṃgala-pabhii-suya-nāṇassa viṇaovahāṇaṃ karejjā| (7) se ṇaṃ goyamā no hīlejjā suttaṃ, no hīlejjā atthaṃ, no hīlejjā suttatthobhae| (8) se ṇaṃ no āsāejjā tikāla-bhāvī-titthakare, no āsāejjā tiloga-siharavāsī vihūya-raya-male siddhe, no āsāejjā, āyariya-uvajjhāya sāhuṇo| (9) suṭṭhu-yaraṃ ceva-bhavejjā piya-dhamme, daḍha-dhamme, bhattī-jutte, egaṃteṇaṃ bhavejjā suttatthānu-raṃjiyamāṇassa-saddhā-saṃvegamāvanne| (10) se esa ṇaṃ na labhejjā puṇo puṇo bhava-cārage gabbha-vāsāiyaṃ anegahā jaṃtanaṃ ti| - [Previous: 3.599](https://indike.org/pramana/in.jaina.sveta.cheda.6.3.599) - [Next: 3.601](https://indike.org/pramana/in.jaina.sveta.cheda.6.3.601) - [Up: 3](https://indike.org/pramana/in.jaina.sveta.cheda.6.3) ## Translations (2) - [Mahānisīha: Gujarati translation (Dīparatnasāgara, 2020)](https://indike.org/pramana/in.jaina.sveta.cheda.6~gu-deepratnasagar2020.3.600) — Gujarati - [Mahānisīha: Hindi translation (Dīparatnasāgara, 2019)](https://indike.org/pramana/in.jaina.sveta.cheda.6~hi-deepratnasagar2019.3.600) — Hindi ## Commentaries (1) - [Mahānisīha: ṭīkānusārī vivecana](https://indike.org/pramana/in.jaina.sveta.cheda.6!deepratnasagar.265) — Muni Dīparatnasāgara 2000, Gujarati --- Source: [https://indike.org/pramana/in.jaina.sveta.cheda.6.3.600](https://indike.org/pramana/in.jaina.sveta.cheda.6.3.600) · Pramāṇa