Manavedacampu 14
Mānavedacampū 14
- Language
- Sanskrit
Contents
- 14.61 — 1 part
14.1
iti śrīmānavedaviracite campubhārate
ambopākhyāne ekādaśaḥ stavakaḥ
ambopākhyānaṃ samāptam
dvādaśaḥ stavakaḥ
vicitravīryastu vidhivadupoḍhābhyāmūḍharājābhyāmanusaraṇacāturīdhurīṇābhyāmakhilamadanatantrahṛdayavedayābhyāmābhyāmambikāmbālikābhyāṃ
saha vividhataravibhavavisarairupasurapure puravare kusumabāṇabāṇavārajarjaritadhairyasārabāṇavāro'yamaticiramanavaratamapi navaratamanubobhūyate sma
mānanīyaguṇakāminīyugalakāmanīyakavilokanādantarācitadurantarāgaracitāndhatākulitacetanaḥ
vāsarānapi ca vatsarānapi ca bhāsurākṛtirasau nṛpo·
na kyabuddha bata! navyaratnagaṇabhavyapattanagato gatān
14.2
evaṃ raṃramyamāṇaṃ bhūśataravilasanmaṇḍalaṃ rājyakīrtijyotsnāniṣyandasaṃsthāpitanikhiladiśaṃ medinīśītabhānum
vidhvastasphītabhogo viṣamagatiratho rājayakṣmābhidhānaḥ
svarbhānuḥ kṣipramenaṃ prabalavidhibalādgṛhīdugrūpaḥ
14.3
rogeṇānena guruṇā tadaiva sa dharāpatiḥ
vyasanād vanitānāmno durnivārā'nyavāri ca
14.4
gadānāmadhirājena kṣetriyeṇāśu yakṣmaṇā
nṛpāṇāmadhirājo'yaṃ spardhayevāsyabhūyata
14.5
alaṅghyavṛttermama yo vidhuḥ prāgavandhyayad vṛttimamuṣya gotram
unmūlayāmīti vicintya nūnaṃ sa sānugo'stuṃ vidhurīcakāra
14.6
bhuvanaviditamenaṃ hṛdyamāhlāditāśaṃ
kuruvṛṣabhamanaipīdeṣa śoṣo'tiśoṣam
iha nikhilajanānāṃ śaśvadālambabhūtaṃ
ghanarasamiva loke sārasaṃ gharmakālaḥ
14.7
viśvāgadaṅkāragaṇaṃ vitanvannanvarthatāhīnamahīnaśokam
agādabhipretapuraṃ gato'pi bhūyo'pyabhi pretapuraṃ sa bhūpaḥ
14.8
anantaramanantaśokabhārabhāgayaṃ bhāgīratheyo bhrāturetasya paretasya
pāralaukikāni karmāṇi viditadharmā vidhivadeva vitatāna
athātiśokākulitāśayāpi vānasya santānataroḥ praroham
sā vāsavī sādhu vicintayantī prābocadāhūya ca vāhineyam
14.9
sagarbhyaste diṣṭāt suta sapadi diṣṭāntamagamat
tato gotraṃ naṣṭaṃ samajani ca naḥ kaṣṭamadhunā
manīṣin jānīṣe vidhimapi ca kucchrocitamataḥ
prajāvatyostyaktvā vratamidamapatyāni janaya
14.10
sa tu māturyathāvatyāḥ satyavatyā niśamya gām
sadyastāmavihastātmā satyodyamidamuktavān
14.11
mātarmā tāpabhāk svāśvijagati bhagavānīśvaraḥ kālarūpī
viśveṣāṃ dehabhājāṃ sukhamasukhamapi vyātanotīha nūnam
14.11-2
saddharmālambabhūtaṃ bharatakulamidaṃ naiva naśyedavaśyaṃ
bebhīye'haṃ jagatsākṣikasamayavaronsardanādeṣa pāpād
14.12
evamukto'pi me putryostvamevotpādyātsajān
iti nirbandhatīsenāṃ punarapyayamabhyadhāt
14.13
gandhaṃ jātu vasundharāpi visṛjeduṣṇāṃśumapyuṣṇatāṃ
śītāṃśuḥ sa tu śītatāmapi paraṃ dharmaṃ tathā dharmāt
bhīṣmaḥ śantanunandanaḥ punarayaṃ prājñe pratijñāsinā
jīvan jātvapi na tyajet sumahitāṃ trailokyahetorapi
14.14
yathā ca tanayāḥ sadyaḥ sampadyeran kulāṅkurāḥ
kathayāmi tathā nītiṃ kṣātraṃ dharmamanusmaran
14.15
purā khalu dharāpativanadhūmaketunā nihitanikhilasetunā khalakuladhūmaketunā bhṛgukulaketunā muninā pāraśvadhikena nijaparaśvadhakūradharānalavaṣaṭkṛteṣu nikhilakṣatrakuleṣu punaḥ kṣatrakulapurandhrīṣu sādarasupannitirvasundharāsuravaistanayā janayāmbabhūvire
api ca prācucyatanayaḥ prājyamahā dīrghatamā nāma māmateyo
mahitapaḥsvāpateyo munipuṅgavaḥ svadveṣiṇīṃ pradveṣiṇīṃ nāma gṛhiṇīṃ
gautamāditanayodayātyarthacaritārthāṃ nijadainyajainyajātyandhatādijanitātyantanirvedāṃ śaraṇapoṣaṇādivimukhāmimāṃ parapuruṣābhiṣaṅgiṇīmapi
vidhāya roṣasarabhasacetāḥ parapuruṣajātāmilāṣāṃ yoṣāṃ rauraveṣu niyataṃ
patāpatā bhavedityaṃśapśat
krodhāndhā śaminaṃ muniṃ daśaminaṃ pāśairapāśyaśaṃ
baddhvā dāruṇi dāruṇā śivaśiva krandantamandhaṃ khataḥ
gambhīre jalajantujālagahane gaṅgāhṛde putrakairuddhṛtya svabaśairapāsyamatha sā vegādapākṣītpatim
14.16
tataḥ sa tapodhano'syāmaravāhinyāṃ kādambinyāmiva śatahṛdālambinyāṃ tata itaḥ bhraman niruddhaniḥśvāsamaraistaraṅgaviśairastāḍyamāno
ghoratarapātairalaṃ pīḍyamāno jalajantujālairitastato daśyamānaḥ
śilātalāsphālanaviśīrṇanikhilapavanaḥ kenāpyanusūtacaramādhibharasevanubodhūyamāno sajjanāyāgatatratā baliriti vijñātanāmnā rājñā
diṣṭabalena dṛṣṭaḥ karuṇāviṣṭacetasā karāvalambamavilambamevācchatarāṃ
kacchabhuvamupanīya vipāśya śanairapanītapariśramaḥ parikalitasakalatadavasthena punaḥ parītādaraṃ parītāpaharaṃ puravaramupānīya sukhataramupaveśito
girayā jagadekamadhurayā jagade
sanmārgaiṃkarata! tvayā samadhiyā sādhīyasā jyāyasā
puṇyātmanniyamanvabhūyata daśā hāhanta! ghorā'tikā
ko vā daivagatiṃ ruṇaddhi vacasā kiṃ bhūyasāḥ paraṃ
sāmodaṃ mama pattane'tra nivasan gotraṃ pavitrīkuru
14.17
kāruṇyābdhe! namaste janaya mama tanūjaṃ sudeṣṇābhidhāyāmudyattṛṣṇābharāyāṃ sutajananavidhau drāgamuṣyāṃ mahiṣyām
varṇānāmāśramāṇāṃ nigamahṛdi nigūḍhaṃ paraṃ dharmaguhyaṃ
sākṣādevekṣase tvaṃ sakalamapi mune! jñānavijñānasindho!
14.18
śrutvā vācaṃ sa vācyamanivahavaro aṅgisarvasvamaṅgaṃ
spṛṣṭvā tasyāḥ praśasyaṃ tanayamajanayat sadya evāṅgasaṅgam
hantācintyo 'nubhāvastapasa iti muniṃ vandamāno'bhinandan
sānandaṃ nandanaṃ taṃ sapadi punarasāvādareṇādade ca
14.19
tadevamevānayoḥ kāśirājatanayayoḥ kenacidatimahitābhijanmanā
tapovijitakamalajanmanā mahitānubhāvena dvijanmanā janani! tanayā
janayitavyāḥ
lokānāṃ kṣemakāre śiśirakiraṇasantānasantānaśākhimauḍhakṣemaṅkare me mahitasamayasetorapi sthairyakāre
karmaṇyalaiva dharmye śubhavati bhavatī dhīmatī yāyatītu
prāpte pīyūṣayūṣe punarapi vata! kā jīvanopāyacintā
14.20
gāṅgāyanerasya susaṅgatāṃ gāṃ niśmaya dharmyāṃ śucaikaramyām
vasoḥ sutā sā caramaṃ vayūnāṃ trīḷāgrihastā śanakaistamūce
14.21
vatsa! purā khalu kadācana purāntakapadāmbujavirājitaparāgaparidhautaceto śukkarakarabadarāyitadiṣṭaviṣṭapatrayāvaśo nigamapārāvārapārecaro viśadataravibodhasudhārasāliptamahitacittabhittilikhitanikhilaśāstrārthasāraḥ viditavedyapārāyaṇaḥ parāśaranāmā pārikāṅkṣivaraḥ
pārāyaṇāya taraṇitanayātīramacātarat
atra tātājñayā taraṇitāraṇaparāyaṇāṃ kumāritarāṃ sāmabhigamya
bhiyā hiyā ca divaśatarāmapi vacasāṃ prasaraiḥ samabhamabhimukhīkṛtya
tapomahimavihite himapihite antarīpe sadya evācyutānubhāvasadbhutākāraṃ kamapi kumāramudabhāvayat
sa punararthako nirbharaśaktibhāranamratareṇa śirasā tarasā mama caraṇayoḥ
praṇipatya 'ayi mātaḥ! stṛtamātra eva netramārgāvighnastavābhīṣṭamakhilamahamabhipūrayiṣyāmi' ityabhibhāṣya yathecchameva vicchāyati sma
vedān vyasya hitāya viśvajagatāṃ nityaṃ tapasyannasau
nūnaṃ saumya! mayā tathaiva bhavatā ātmāpi ca prārthitaḥ
bhrātuḥ kṣetrayuge javena janayet putrānaśilārdanāṃstat tubhyaṃ yadi rocate niyamināmādyaṃ kharājyadya tat
14.22
ityuktaḥ satyavatyā kurukulabhūṣaṇaḥ so'tha toṣākulātmā
pāde tasyā namasyāṃ vidadhadabhidadhe śāradādareṇa
he mātaḥ! sāmprataṃ naḥ kula iha kuśalaṃ vidyate nānyadasmāt
tasmādasmātpriyambhāvukamidamadhunaivādarādādadhīthāḥ
14.23
gāṅgena gaditāṃ gāṃ tāmākarṇyaudīrṇasammadā
sadyaḥ satyavatī putramasārṣīdapisattamam
14.24
mātrā so'tha svagotrakṣatimahitarucā saṃsmṛto nirbharodyatkāruṇyādrāntaraṅgo calamathanamaṇicchedasacchāyakāyaḥ
bibhrat koṭīrabhāraṃ vikacamukhasarojo vanamālyamālāṃ
vedavyāsaḥ svabhāsā sapadi kurusabhāṃ bhāsayan prādurāsīt
14.25
puraḥ prādurbhūya khapadayugalānte nipatitaṃ
putrapremāveśādrutahṛdayamāśliṣya vipraśā
sutaṃ dhanyā mānyaṃ sapadi patitairaśruvisaraiḥ
stanaiḥ stanyaiścāsau muhurabhiṣiṣecāsya śirasi
14.26
cirāpātyanijāpatyadarśanasparśanodbhavāt
vāsavī sammadāveśāt sahasātha mumoha sā
14.27
jalārdreṇa karāgreṇa pārārghyaḥ parāmṛśan
āśvevāśvāsya jananīmasthādatrāyamāsthayā
14.28
purodhasā tadārghyaiḥ pūjitaḥ purumedhasā
prājño māturanujñāto viṣṭare copāviṣṭavān
14.29
tadā pārāśaryaṃ paramapuruṣasyaiva hi kalāṃ
vilokya trailokyaprathitayaśasaṃ bhūritapasam
anānandīdindīvaranibharucīkandalamimaṃ
samāsaṃsthā bhaktiprasaravinatā viśvajanatā
14.30
prādurbhūtaṃ purastāt prasamadhisabhaṃ māturuddhānubhāvaṃ
gūḍhaṃ brahmaiva sākṣājjagadupakṛtaye vyaktimāpannamenam
kṛṣṇadvaipāyanākhyaṃ munikulakukudaṃ nandano viṣṇupadyāḥ
sākṣātkṛtyaiṣa bhaktiprasaravivaśadhīścintayāmāsa caivam
14.31
yo lokānalasānihālpadhiṣaṇānpāyuṣo lokayan
vidyāḥ sthāpayituṃ mahīmupagato vyāsthad giro'kramimāḥ
bhūyo vedasamāhṛtārthanivahān vegādgādhiṣṭa vā
dharmān sādhu vibodhayannurudayānonudyamānāśayaḥ
14.32
viśvaiḥ sāccatasaccamairiha sadā saṃsevyamānaṃ mudā
niśśeṣāgamasārabhūtamamalaṃ svāsyāravindasrutam
āpāte'pi manoharaṃ madhu navaṃ yo vā samāsvādayannātmāṅghridvayasevanaikarasikaṃ lokaṃ vidhattetarām
14.33
ātmājñānapratītād guṇaphaṇisamitādviśvato'nyad viśuddhaṃ
buddhaṃ bhedena hīnaṃ guṇagaṇarahitaṃ nityamuktaṃ nirīham
pūrṇānandaikarūpaṃ nigamaśirasi vidyotamānaṃ paraṃ tad
rūpaṃ yo bānvaśāt svaṃ svayamiha sa harirdṛśyate'sau batātre
14.34
iti sa prasarīsṛpyamāṇabhaktirasāplutaḥ
puṣṭādaramuṃ paśyan hṛṣṭaromā samasthita
14.25-2
pravaṇo'dhisabhaṃ vyāsaḥ praṇamyainatha tāṃ jagau
jananīṃ śāradāmevamanunītiviśāradaḥ
14.26-2
ayi janane! jano'yaṃ nītimatyā bhavatyā
smṛta iha sahasāgādīpsitaṃ te vidhāsyan
tanujamambumataratvaṃ śādhi māṃ nirviśaṅkaṃ
jagati gurujanājñā pūrṇapūrṇairhi labhyā
14.27-2
atha sā vāsavī satyavatīti ramyāṃ niśamya gām
sammadāveśavivaśā sādaraṃ giramādade
14.28-2
he vatsa! viśvajagatīhitajāgarūka!
naṣṭaṃ samuddhara kulaṃ mahanīyametat
māturgamārya! vacasā tvamadīnasattvān
bhrātuḥ kalatrayugale janayestanūjān
14.29-2
vratānna devavrata eṣa saṃśrutāmitāntadhīro vicalet kathañcana
tadetadādhivyathitātmano mama
tvadīyakāruṇyamihāvalambanam
14.40
iti sa tu nijamātrā arthitaḥ satyavādīdayi! vitaritumāyāṃ vāñchitaṃ sāmprataṃ te
avakalpayasi yā tvaṃ dharmatattvaṃ samastaṃ
matamiha tava tasyāḥ ko nu śaknota kartum
14.41
tadambikāsvālikyorahasālambahīnayoḥ
anayostanayānamba! janayāmi janāhatām
14.42
kintvābhyāṃ vratamārabhyasekāṃ śaradamādarāt
vratādipakkamanasāseva spṛśyo'si yoṣitām
14.43
evamuktā satyavatīyam "ayi nandana! kandalitayauvanasya
nijadayitasya samāgamavihīnenānunā viraheṇa kulavināśaviśaṅkyā ca
viśaṅkaṭadainyavivaśe kathamime saṃpa janyau vratametaddātanvātām
tadanayostanayodayāya sadyo bhatrānudyoyujyatām" iti tamudājahāra
parāśaratanūjo'tha parāvaravidāṃ varaḥ
manāgiva vicāryaināmanākulamanā jagau
14.44
satyaṃ vrataṃ janani kartumise na śakne
sandheya eṣa ca sudhākaravaṃśatantuḥ
tanse'dya dussahataraṃ kimapi kṣametāṃ
vairūpyametadapi śasyataraṃ vrataṃ syāt
14.45
tadadyaiva pratīkṣeta sadabhyāgamasambhikā
nigadeti nijāmbāṃ sapadeṣa tirodadhe
14.46
atha viśvalokānāsamimatayā bharatakulaśśreyasaikaniratayā
nikaṭayātayā nijayā tayā śvaśśrā dvaipāyanoditamakhilasupaśrāviṣā
viṣādabhayavicārasaravikṣamānasā punaḥ priyahitairnijairabhihitairapi
kathamapi vaśaṃvadīkṛtāmbikāvilambayevātaskulamavalambayantī vihitasajjanā mahitamajjulālaṅkaraṇā nijameva kāntamantarañjucintayantī
dyunivarāgamapi pratipālayantī sahanīyaṃ śayanīyamadhiśayānā jhaṭiti
purataḥ prādurbhūtaṃ tāmrataraparyaṅkulavipamajaṭāpaṭalabhayānakaṃ raktataradvayanetrayugalavyajyamānadīnabhāvaṃ dhūmrataraśmaśrukāntāramadhyadṛśyamānadanodarasanirgatāttamalapaṅkoccāvacaradanoccayoccaṇḍarūpaṃ śirāsthicayadanturitavisaṃsthulasannivandhātyantadurgandhaparamaparuṣamalinaśālyāmavaṇanistutāvilatarayiṣṭhapūyābhiṣiktanediṣṭhasūmimatibībhatsamadhikabhīṣaṇaṃ durnirīkṣaṃ
nijakulābhyudayaikakāṅkṣiṇamu pārikāṅkṣiṇamīkṣamāṇā bhayajugupsātirekasaṃkucitaciratanuvallarī tatkṣaṇameva nimīlitākṣiyugalamavatasthe
tathābhūtāmapi sa tāṃ tarasā mātṛgauravāt
upagamya nidhāyāṅkāṃ vīryavantarhito muniḥ
14.47
sadyaḥ sā janayāmbabhūva tanayaṃ naṣṭaṃ kharāṃśuṃ dhṛtaṃ
yasmāt tena tato jagatsu dhṛtarāṣṭrāmikhyayā niśrutam
arucyotanmadakuñjarāyutabalaṃ jātyandhamatyantadhīvijñātākhilavedyasārasadhikāmodamadaṃ dehinām
14.48
śuśoca netrahīnaṃ taṃ śiśumālokya vāsavī
nāna hetuṃ vijānīmo netrahīnā hi bālakāḥ
14.49
kulodayaikakṛtadhīrayāpūrṇamanorathā
putraṃ sā punarapyūce smṛtamālasamāgatam
14.50
andho'yaṃ dīnabandho bata niyatibalādarthako nastadakṣin
ātuḥ kṣetre parakṣikapi parakṛpāpūrṇāntaraṅgaḥ
putro gotrābhigoptā sapadi janayitavyo nikāyyo guṇānāmityukto vyākulāyāḥ savidhasuvasagāt so'yamambālikāyāḥ
14.51
tataḥ sa pūrvacadeva parigṛhītabībhatsarūpaḥ parāśarasutaḥ śraśrūditaśravaṇena parikalitamaṅgalaveṣabhūpāyāṃ paryākulameva śayyātale niṣaṇṇāyāṃ
jhaṭiti nijanirīkṣaṇādativiṣaṇṇāyāṃ darātirekeṇa dauhṛdāt pūrvasevāpatitapāṇḍubhāvāyāmbālikāyāṃ tanayamapi tādśaṃ pāṇḍunāmakaṃ
kurukulakīrtisantānavallarīmūlakandamābhoditapaurandaṃ samutpādya sadya eva
tirohito'bhūt
taṃ śītāṃśukulāvataṃsamagryanairambālikāyāṃ sutaṃ
sajjātaṃ guṇajātamūlasadanaṃ dṛṣṭvā mahāśayā
anyasyāmapi śasyatejasamapogaṇḍaṃ jaganmaṇḍanaṃ
kāṅkṣantī tanayaṃ sanīḍagamitaṃ vyāsaṃ jagau cāsavī
14.52
madīyātaṅkapaṅkaughaviśoṣaṇavirocana
ambikāyāṃ kulālambaṃ lipse rājyārhamātmajam
14.53
iyaṃ babhāṣe punarambikāmayi
prasādayādyaiva jugupsayā vinā
munīndramāyātamatandrameva taṃ
sa devaro dāsyati te varaṃ sutam
14.54
iti savijñā svasya śāśvataratanayodayasyāyuktayā niyuktayāpi
aviṣahyatadīyavirūpatānirūpaṇodyadudvegavegavivaśamānasayā kāśirājatanayayā paramabhāgadheyā kācana paricārikā svakīyairalaṅkārairalamalaṅkṛtya
nibhṛtamaśanaiḥ śayanagṛhaṃ prati preṣayāmāse
atha sahasaiva samāpatitaṃ munimupagamya sahelamasau
tribhuvanavandyamavandata taṃ vinatamukhī trapayā sumukhī
14.55
tadanu maṅgalāyatanamiyamaṅganā hṛdayaṅgamairadhikādaravidhīyamānairvividhairanusaraṇairvilobhayantī viśranthitadhairyabandhamenaṃ kṛṣṇamapi dhavalamivārīṇarāgamarīramat
bhūyo'naṃsīt bhūyobhaktyā topādeṣā yoṣābhūṣā
vikasitasarasijavilasitamukhamatha rahasi tamavasitamanasijaraṇamiha
14.56
tāpasendrastyā sākaṃ śarvarīṃ nirviśannimām
prahṛṣṭadhīrabhāṣiṣṭa prakṛṣṭasukṛtāṃ sa tām
14.57
mantraprasādena niyataṃ nāganāsoru| jāyate
medurājñānabhiduro viduro nāma te sutaḥ
14.58
itthaṃ nigadya nikaṭaṃ laghu satyavatyāstasmin gate munivare laghu satyavadye
dharmaprakāśananidānamasau tamonudvīryaṃ hi dauhṛdamuvāha puraiva saṃjñā
14.59
tataḥ sa khalu sakalalokasya śubhāśubhaphalānubhāvayitā mahitānubhāvo bhagavān dharmarāja etya, gurujanānupālye bālye vihitasya
daṃśapṛṣṭhadeśeṣīkāpraveśanajanyaduṣkṛtasya niṣkṛtyai śūlamāropitasya tāpasaprakāṇḍasyāṇimāṇḍavyasya śāpamanububhukṣurakhiladikṣu vidura iti
vidito'syāmāviḥ pramodāyāmāvirbabhūva
itthaṃ taṃ dhṛtarāṣṭramakṣivikalaṃ rāṣṭrābhisaṃvardhanaṃ
kīrtiprasravapāṇḍurīkṛtadiśaṃ pāṇḍuṃ ca puṇyāmbudhim
vedyānāṃ viduraṃ tathaiva viduraṃ kṣemaṅkaro dehināṃ
vyāso'yaṃ janayan javena jananīmāmantrya cāntardadhe
14.60
tadanu tattadapatyodayaśravaṇadattatattatpadārthalabdhatattādaśapramodavihastīkṛtasamastalokaḥ manorathaśatālakṣitānāmāhitanikhilalakṣaṇānāmāhitalakṣaṇānāṃ mañjurucimandirāṇām indukulakandalānāmakhilajanahṛdayānandanānāṃ nandanānāṃ vadanāravindāni nirnimeṣeṇa cakṣupā
nipīya vidhūtavadhūsaṅgo'pi purupramadopasaṅgī gāṅgāyanirāpluta āplutānaviplutayaunapauṃsnādisamastakarmasaṃskṛtānastokatvinayapariṣkṛtānaśiśidānān avaśyadānīyān samagrānudagrābhijanmano'grajanmanaḥ sthūlalakṣo'sau vittavisaraṃ tūlakṣaṃ lakṣayan santānamahimāvahairapi santānalaghimāvahairdānasantānairalaṃ santoṣayan varīyasā purodhasā yathāvadvagatakulocitakarmajātena saha jātakarma vidhivadeva vitatāṉa
itthaṃ te khalu jātakarmakṛtasaṃskārāḥ kumārāstrayastrākṣin hastinānāmni pattanavare babhrejire nirbharam
śaśvatsaṃśritabhūtitāyanaparāḥ sambhāvanīyāḥ satāṃ
madhyevedi samitsamiddhamahasattetātrayaste yathā
14.61
evaṃ devopameṣu triṣu sapadi kumāreṣu jāteṣu teṣu
vyāsāt sā kāsavī so'pi ca surataṭinīnandanaste ca devyau
nānandāmāsurāsvaditahṛdayarujaḥ pūrṇakāmāḥ kimuktbhūyobhirmodabhāro nikhilatanubhṛtāṃ meduraḥ prādurāsīt
14.61.p1
śrīmatkṛṣṇābhidhagurukṛpāsāramādhvīrasārdraiḥ
hṛdyairudyatparimalabharairgadyapadyābhidhānaiḥ
kālodbuddhastabakalasitairviśvavaryā saparyā
puṣpatrātairiha viracitā nandasūnormayaiṣā
sānandānantabhogipravaraparilasanmañjulottuṅgamūrtiḥ
śrīmadvatsaṃ dadhāno mahitataravṛṣaskandhadedīpyamānaḥ
vāsaṃ tanvannaśokopapadapuravare sarvado mādhavo me
pādāmbhojanmabhājaḥ sapadi vitanutāmuttamāṃ muktilakṣmīm
Commentaries (1)
- Mānavedacampūṭīkā — Kṛṣṇamiśra, Sanskrit
Linked texts (1)
- Pūrvabhāratacampū — Mānaveda 1618, Sanskrit