Pramāṇa · Search · About · API

Mandaramarda 10

Mandāramarda 10

Language
Sanskrit

10.1

jalajanijanijāyāpremapākena gopījanamanasijakelīlampaṭe lampaṭena
guhapuranilayena proddhṛto bandhabinduḥ surakusumamarande cārucampū prabandhe
guptabinduḥ
adhunā guptavindau tu kriyādergopyagumphanam
nirūpyate samāsena vibudhānandavṛddhaye
bhaṅgaśleṣādyupāyena kriyādergopanaṃ bhavet
athavā caraṇāntādiṣvakṣarāṇāṃ niveśanāt
tatra kriyāguptaṃ yathāgṛhadvāragatasyāsya puṃsaḥ kāmārtacetasaḥ
vilāsairgaṇikāṃ sakhyo vittākarṣaṇanirmarām

10.2

ālolanayanāṃ kṛṣṇo liṃpantīṃ vīkṣaṇairdiśaḥ
gacchantīṃ sajhasaṃketaṃ timire rādhikāṃ mudā

10.3

herambacaraṇāmbhojaṃ mahadbhaṅginiṣevitam
dāvāgniṃ vighnadāvasya vaṃdārūṇāṃ vayaṃ sadā

10.4

jitakāñcanakumbhaśrī sughṛṇāyatanaṃ dyuteḥ
tādṛkṣamasyā vakṣojadvandvaṃ so'timudā hariḥ

10.5

ramāsamānayā kṛṣṇaḥ sahāsā rādhayā tayā
nikuṃjanikurambeṣu kālindīvilasattaṭe

10.6

añcito'pi nikuñjo'sau kuñcatkaṇṭakivīrudhā
svairiṇyāścirarātrāya luṭhantyāḥ kāminaḥ kṛte

10.7

vasantaṃ prāṇināṃ dehe vasattaste surottama
pāde spṛśye tvayīvācā vayaṃ bhaktiṃ sadā tayā

10.8

iti kriyāgopanam
sarpātkrūratarāndaityānanekānavadhīdyudhi
kamalāpatividveṣaparidūṣitamānasān

10.9

dṛptānāmātmanārīṇāṃ sarvasāmrājyasaṃbhavaḥ
tādṛśo darpabhāro'yaṃ vyabhañjītyavadanmudā

10.10

anye bhedāḥ pūrvavat
iti kartṛgopanam
karmaguptaṃ yathāśaṃkaraḥ kurutācchrīmānbhaktasya mama te sadā
nijāśritakadambasya nilimpaviṭapopamaḥ

10.11

manojasya parīhāsairāme rādhayā tayā
ahāri gopakantānāṃ rāsakrīḍāmahotsave

10.12

anye bhedāḥ pūrvavat
iti karmagopanam
saṃbandhaguptaṃ yathābālevayasya mudyuktā mukhamālokase sadā
tamadya kāmasaṃtaptaṃ gāḍhāliṅganasaṃbhramaiḥ

10.13

pūrvavadanye bhedāḥ
padaguptaṃ yathānālaṃkṛtakulaṃ krūraṃ viharantaṃ sarastaṭe
dudrāva dūrato dṛṣṭvā cakrī bhītiyuto javāt

10.14

yomadhyamaṃ ca sukṛtaṃ lebhe tvattaḥ purā nṛpaḥ
adya dhatte smarārtā sā naivaṃ kavacamākulam

10.15

'idamevārthaguptam' iti kecit
padārthobhayaguptaṃ yathā—
saṃniṣiddho'pyagarājaḥ kucopamāyāṃ punaśca gativaṇyoḥ (?)
yogyo'bhūdupamāyāṃ sarve dhātropayuktamiha sṛṣṭam

10.16

kartṛkarmobhayaguptaṃ yathā—
nārīnāśodayaddhūlīpālīpihitapūṣaṇi
khāntare khaṇḍayāmāsa khaṅgenaikena khaṇḍaśaḥ

10.17

bhāvaguptaṃ yathā—
māranārācanirbhinnamānasā mattakāśinī
mandaraṃ mṛgaśāvākṣī muhurnindati luṇṭhati

Linked texts (3)