[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [Mixed prose-and-verse narratives](https://indike.org/pramana/in.lit.campu) › [Romantic, fictional and courtly campūs](https://indike.org/pramana/in.lit.campu.katha) › [Mandaramaranda](https://indike.org/pramana/in.lit.campu.katha.mandaramaranda) › 7 # Mandaramaranda 7 Mandāramaranda 7 - **Language:** Sanskrit ### [7.1](https://indike.org/pramana/in.lit.campu.katha.mandaramaranda.7.1) jalajanijanijāyāpremapākena gopījanamanasijakelīlampaṭe lampaṭena guhapuranilayena proddhṛto vṛttabinduḥ surakusumamarande cārucampūprabandhe sārabinduḥ athātra sāravindau tu netāraṃ varṇayāmahe kartuḥ kāvyasya caujjvalyapratiṣṭhāmūlakāraṇam ### [7.2](https://indike.org/pramana/in.lit.campu.katha.mandaramaranda.7.2) atha sakalabhuvanamahitamahitaruṇi(ṇī)niṭilataṭatuhinakaṇakulatilakitasitamaṇigaṇaracitavarahimakiraṇaśataruciravaraṇam, amalasaralaniculapiculavidulakuvalavakulakulakatakakarakarucikapiñcukakarajakuṭajavaraṇasaraṇamadanamathanakhapurasupuracaladaladadhiphalaguḍaphalamadhurakamarubakakurabakamukhavividhaviṭapikulaparipihitasavidhabhuvam, amitanamadamalamahimamahitakamalabhavabhavaravividhuśatamakhamukhanikhilasuravaramukuṭataṭaghaṭitamaṇigaṇaghaṭanaguṇitarucinicayaparicitacaraṇanakharapaśupataruṇijanamadanakadanarasikasuranilayam, 'asau tridivaḥ, idaṃ nandanavanam, imā devavaravārakāntāḥ, tatra yathākāmamānandamanubhavantu bhavantaḥ' iti devadarśanāgatajanānāmahimakaramaṇḍalasaṅginā śṛṅgāgreṇa sūcayantamiva rājantaṃ devālayamavalokya nijaramaṇamapṛcchadasau sārasārasākṣī— 'kimidaṃ purataḥ paśya diśo dhavalayatyalam devagāramivābhāti devāgārasamadyuti ### [7.3](https://indike.org/pramana/in.lit.campu.katha.mandaramaranda.7.3) ko devaḥ kena vā pūrvaṃ pratiṣṭhāṃ prāpya pūjitaḥ narīnṛtīti taccitte śrotuṃ kānta kutūhalam' ### [7.4](https://indike.org/pramana/in.lit.campu.katha.mandaramaranda.7.4) evamanayā nayābhirāmāyā pṛṣṭaḥ kalagītastatraiva prasthāpya vimānavaramamitāmodabharitaḥ samūlaṃkaṣamudantaṃ pūrvaṃ vaktumupacakrāma— 'atraiva pūrvaṃ sarasīruhākṣi śāntaḥ kṛtajñaḥ priyavāgdvijendraḥ mukhyādananteśvarasaṃprasādāllebhe sutaṃ madhyagṛhābhidhānaḥ ### [7.5](https://indike.org/pramana/in.lit.campu.katha.mandaramaranda.7.5) tretāyāṃ rāmakāntāvirahadavahatasvāntasaṃtāpabhāro yenāśamyāśu laṅkāsthitajanakasutāsārasaṃdeśavākyaiḥ yena prāmardi dṛptaḥ subalasuduhiturdvāpare putravargastenāpi prārthitena tridaśapariṣadā madhyagehātmajatvam ### [7.6](https://indike.org/pramana/in.lit.campu.katha.mandaramaranda.7.6) prārodi bālasaraṇīmanusṛtya tena prāhārsi tanmukhamaloki pituḥ samīpe prācāli tatra karajānuniveśanena prābhāṣi viskhalitavarṇakarmabhakelau ### [7.7](https://indike.org/pramana/in.lit.campu.katha.mandaramaranda.7.7) vāsudevābhidhānasya bālasya madhyagehabhaṭṭaścakāra yadopanayanam tadaiva śāradā vijahāra rasanāgre tasya yathā brahmasabhāyāṃ sarvadevaiḥ saṃstutā ### [7.8](https://indike.org/pramana/in.lit.campu.katha.mandaramaranda.7.8) athātmaje tātaruciṃ vivitsurdṛṣṭuṃ gataḥ sarpamayaḥ surāriḥ tadaṅgulīpiṭatanustatāma sudurlabho'sminpitṛmārgagāmī ### [7.9](https://indike.org/pramana/in.lit.campu.katha.mandaramaranda.7.9) 'namaskriyā na kartavyā bhavacyāṃ sevakāya me kṛtā natirhi saivādya mamānujñāśramāptaye' ### [7.10](https://indike.org/pramana/in.lit.campu.katha.mandaramaranda.7.10) iti tena niruttarīkṛtau bahukhinnau svagṛhaṃ samīpatuḥ punareva pitā sutānanaṃ hṛdi saṃsmṛtya yayau sutāntikam ### [7.11](https://indike.org/pramana/in.lit.campu.katha.mandaramaranda.7.11) kadācidrūpyapīṭheśo namate'cyutabuddhaye tapaḥphalaṃ gṛhāṇeti kaṃcanāviśya taṃ dadau ### [7.12](https://indike.org/pramana/in.lit.campu.katha.mandaramaranda.7.12) atha sa tadadhipājñayā gatāyāṃ surasaritau(1) sarasīṃ samastalokaiḥ samamamitamatirvigāhate sma sphuṭamiha tasya viḍambanaṃ vicitram ### [7.13](https://indike.org/pramana/in.lit.campu.katha.mandaramaranda.7.13) tataḥ so'yamiṣṭasiddyākhyagranthaṃ sasaṃpradāyaṃ vyākhyāya prakārāntareṇa bhāgavatavācakāndvijān ‘neyaṃ vyāsakṛtiḥ’ ityabhidhāya, tataḥ ‘tvameva brūhi’ iti tenācyutaprekṣeṇa sākṣepamuktastatsarvamākhyāyātmānaṃ jetuṃ pravṛttānāmacyutaprekṣasapakṣaśiṣyāṇāmanumānānāṃ pratyanumānairutsāhanādanumānatīrthābhidhāmāsādya vidyābdhivādisiṃhau vādigrāmasiṃhau vijitya pūrvabhāṣyamapanudya prārthayate saṃtīrthyāya sūtrārthamabhidhāyātha dakṣiṇāṃ diśaṃ gatvā viṣṇumaṅgalakṣetre bhikṣānte parīkṣāyai bhakṣaṇārthaṃ dattaṃ kadalīphalacayaṃ kanyākumāryākhyatīrthe rāmasetau raṅganāthaṃ viṣṇusahasranāmnāmapi śatārthaṃ punaśca rūpyapīṭhaṃ bhuktvā gatvā snātvā dṛṣṭvoktvā samāgatya gītābhāṣyaṃ kṛtvā gurave dattvā badarikāśramagamanāyānujñāmādāya kauberīṃ diśamavatasthe tīrtvā jahnusutāṃ tato'ṇubadarīmāsādya nārāyaṇaṃ natvā bhāṣyamadādupāyanatayā śrīgītikāyā ayam tatrādau khalu śaktitaḥ paramasau protsādyayaṃkleśataḥ śabdaṃ tatra nidhāya pāṭhaya janānnityabravīttaṃ hariḥ ### [7.14](https://indike.org/pramana/in.lit.campu.katha.mandaramaranda.7.14) taṃ kāṣṭhamaunavratamācarantaṃ vyāso niśi svaprabhayā digantān prabhāsayanprāpya mamāśramāntamehītyudīryāntaradhānmahātmā ### [7.15](https://indike.org/pramana/in.lit.campu.katha.mandaramaranda.7.15) tadanantaramasau śiṣyebhyaḥ svagamanaṃ lekhanena nivedya marakatamaṇimayasahodhramahitamataṅgajakarataṭapāṭanapaṭutaranakharakaṇṭhīravamukharamukharitakandarāntarnilīnahariṇagaṇe'dbhutataraśabdayamānaśārdūlapotāvalokanaparitrāsadhāvallulāyagavayakule pratyantaparvatavatparidṛśyamānāvaśyāyasamudāyadūrīkṛtadinakarakṛtye prāvṛṭsamayakṛtajanapadasaṃcaraṇajanitāyāsaśamāya viśrāntamiva vāridavṛndaṃ vahati himavati gacchan svavirahāsahiṣṇutyā pṛṣṭhata eva prāptaṃ satyatīrthaṃ svahastavāyunaiva nijasthānaṃ prāpayya purato gatvā sakalamunigaṇamadhyamadhyāsīnamiva vṛndārakavṛndaparivṛtaṃ .parameṣṭhinamasamonaṃ vyāsaṃ natvā tena sakalapurāṇabhāratasūtrārthaṃ vijñāya tatraiva tapasā sthitamiva dharmaputraṃ praṇamya tena sūtrabhāṣyakaraṇāyānujñātaḥ kṛṣṇānumatyāṇubadarīmāsādya viracya kubhāṣyadūṣakaṃ hariguṇaprakāśapoṣakaṃ bhāṣyaṃ punarapi rajatapīṭhamāgatya sakhye'cyutaprekṣāya ca tadbhāṣyamācakhyau tato'mitamatiryajñavighnakartṛnnivārayan yājayāmāsa medhāvī svīyamadhyāpakātmajam ### [7.16](https://indike.org/pramana/in.lit.campu.katha.mandaramaranda.7.16) punarapi badarikāśramamāsādya vyāsamānamya rūpyapīṭhamājagāma | kadācidasau madhyemārga sāgasamīśvaradevaṃ paravaśakhananamakarot | kadācidasau svakaṭibhāgāvalambinaḥ śiṣyānabhighātisamāgatiśaṅkayāpagatoḍupāmagādhāpāmamarāpagāmatārayatsvayamapyatarat | atha bhaṭavṛndayavanarājayordaṇḍarājyayogyadhīviṣayo babhūva | kvāpi corāṇāṃ nijakarakṛtapaṭapiṇḍe rikthadhiyamyutpādya parasparamaghātayat | punaḥ kvāpyayamupendratīrthābhidhamaskariṇā taskaraśataṃ tiraskārayāṃcakāra | punaḥ kvāpi moṣakapurataḥ saśiṣyaiḥ samamaupalat śārdūlākāraṃ dānavaśārdūlaṃ karatalena jaghāna | pratimāḥ sitaśilāmayīrāpa nārāyaṇāt | mahābhāratatātparyanirṇayakṛtau vyāsānujñāmadade | hastinapuragatamaṭhasthaḥ saṃkalpārthamanalpākalpayā taruṇīrūpiṇyā dharaṇīṃ bhittvāgatayā gīrvāṇataraṅgiṇyā praṇuto'bhūt | kurukṣetre svīyāni kuntīkumārāvasthāyāṃ dhṛtānyāyudhāni kuntādīnyantevāsijanebhyo darśayāmāsa | tatra gaṅgottamāṅgenāṅgīkṛtaviprarūpeṇāṅgīcakāra kṣaṇena dattāṃ bhikṣām | kvaciccatuḥsahasragurumbhāphalāni triṃśatkumbhapūrṇapayasā saha parīkṣakeṇa dattāni bubhuje gānena śuṣkataruṃ saphalapuṣpamakarot | kiṃ bahunā | sakalaṛṣisametaḥ śeṣo'pi trivikramapaṇḍitapuṇḍarīkaśārdūlādisakalavādijanajetuḥ samastavedārthanirṇayakarturasyānandatīrthasyānandatīrthaṃ śrutvā nijalokamāsādya tatphalaṃ pṛcchadbhyaḥ sanakādibhyastridoṣavarjitamavikuṇṭhitānandābhivṛddhikaraṃ vaikuṇṭhamevaitadvyākhyāśravaṇādiphalamabhidadhe kalaṃ gātraṃ netraṃ kamalarucipātraṃ danujajidguṇaśreṇīvāṇī khalamatakṛpāṇīsahacarī satāṃ hṛdyā vidyā saraṇiranavadyābdhiduhituḥ patiryasyopāsyo himakarasamāsyo jayatu saḥ ### [7.17](https://indike.org/pramana/in.lit.campu.katha.mandaramaranda.7.17) muhurmadhvaṃ vidhvaṃsitakhaladuradhvaṃ sumanasāṃ manovṛnde saṃdehaharamiha vande guṇanidhim ramānāthe nāthe niratamapi nāthe mama harau dṛḍhā bhaktirbhuktistviha bhavatu muktistata iti ### [7.18](https://indike.org/pramana/in.lit.campu.katha.mandaramaranda.7.18) madhvenādvaitarāddhāntadhvāntavidhvaṃsanāvinā tena pratiṣṭhitāmetāṃ mūrtiṃ jānīhi mānini ### [7.19](https://indike.org/pramana/in.lit.campu.katha.mandaramaranda.7.19) purā pūrdvarikātrāsīddāśārhānandakārikā madhyevāridhi gopastrīlālasenābhipāritā ### [7.20](https://indike.org/pramana/in.lit.campu.katha.mandaramaranda.7.20) kadācittatra devakyā bālakelīḥ pradarśaya ityukto rukmiṇīkāntaḥ śuddhānte bālako'bhavat ### [7.21](https://indike.org/pramana/in.lit.campu.katha.mandaramaranda.7.21) tadaṅkamāruhya hasaṃstadāsyaṃ paśyanstanaṃ tatra papau mukundaḥ tadānabhijñā vivaśāntarā sā sukhāmburāśau vijahāra devī ### [7.22](https://indike.org/pramana/in.lit.campu.katha.mandaramaranda.7.22) dadhyamatraṃ vibhajyātha navanītaṃ prabhakṣayan biḍālebhyo dadadbhūyo vaiśākhaṃ netramāharat ### [7.23](https://indike.org/pramana/in.lit.campu.katha.mandaramaranda.7.23) kālamalpaṃ vihṛtyaivamatyajadvālakākṛtim hṛṣṭāṅgī devakī dṛṣṭvā vismayaṃ prayayau muhuḥ ### [7.24](https://indike.org/pramana/in.lit.campu.katha.mandaramaranda.7.24) vilokya bhaiṣmī bata bālarūpiṇaṃ sadā tadabhyarcanakāṅkṣayā satī kṛṣṇājñayā nirjaraśilpinā mudā nirmāyayāmāsa tadā tadākṛtim ### [7.25](https://indike.org/pramana/in.lit.campu.katha.mandaramaranda.7.25) rukmiṇyarcitakṛṣṇārcāmarjuno dvārakāsthitām kṛṣṇāvatāre'vasite'sthāpayadrukmiṇīvane ### [7.26](https://indike.org/pramana/in.lit.campu.katha.mandaramaranda.7.26) gopīcandanaliptāṃ tāṃ gopīcandanabuddhayaḥ sāṃyātrikāḥ samādāya samīpe'sya samāyayuḥ ### [7.27](https://indike.org/pramana/in.lit.campu.katha.mandaramaranda.7.27) nimajjadvāridhāvatra madhvāhvasya mahātmanaḥ munerdaśāntavātena tīraṃ prāpoḍupaṃ tadā ### [7.28](https://indike.org/pramana/in.lit.campu.katha.mandaramaranda.7.28) pragṛhyānandatīrthastāṃ pratiṣṭhāpya mudānvitaḥ nāgāsanasya nikaṭe'pūjayatpratiyātanām ### [7.29](https://indike.org/pramana/in.lit.campu.katha.mandaramaranda.7.29) pūjayatyadhunāpyenāṃ tasya śiṣyakulodbhavāḥ aṣṭau maskariṇaḥ śuddhā jānīhi ramaṇīmaṇe ## Linked texts (1) - [Mandāramaganda](https://indike.org/pramana/in.art.alamkara.sahitya.samgraha.other.mandaramaganda.5.2) — Kṛṣṇamiśra, Sanskrit --- Source: [https://indike.org/pramana/in.lit.campu.katha.mandaramaranda.7](https://indike.org/pramana/in.lit.campu.katha.mandaramaranda.7) · Pramāṇa