Shubhodaya 4

Śubhodaya 4

Language: Sanskrit

4.6 — 1 part

4.2

iti pramāṇikāvargo dvādaśaḥ
iti śrīmatkavikulatilakatrivikramapaṇḍitācāryasutanārāyaṇapaṇḍitācāryaviracite
śubhodaye prādurbhāvakāṇḍo dvitīyaḥ

4.1

atha govindakāṇḍaḥ 3
romodgamo'ṅge pramadāśru netre
citte'ñjanābho'ñjalirātmamūrdhni
vaktre vikāso'tha sarasvatī ca
rarāja rājño rasanāgraraṅge

4.2-2

ābhyantaradhvāntamarīcimālāṃ
sallolalolambasarojamālām
svāmin svacintāmaṇimañjumālāṃ
tanuṣva govindavilāsamālām

4.3

viṣṇoḥ padasthena rute'muneti
dhārādhareṇeva dharādhareṇa
vāṇīṃ dvijendro'tha hareḥ padāntaṃ
nirīkṣamāṇo madhurāṃ sasarja

4.4

vṛndena vṛndārakapuṅgavānāmabhyarthito'bhyarthitado mukundaḥ
śūrātmajāhvekaputrikāyāṃ
matāviva prādurabhūnmunīndrāt

4.5

vidvānsutaṃ viśvapatiṃ sa śaurirmohāttu taṃ gokulamānināya
sadyo vrajantī nijabāndhavānāṃ
maheśamāyopakṛtiṃ vyadhāttām

4.6

astrī na bhīrurna kilāṃbalā yā
tāṃ pūtanāṃ pātitavānyadeṣaḥ
na strīvadhāṃdīnavadīnamasmādyaśo yaśodāśiśurāpa śubhram

4.7

kṣiptaṃ tvayā no vividhārthajātam
śiṣṭo'si lābho'yabhururbateti
trayyā layāsau śaraṇe kiśāryā
śiśuḥ śayāno madhuraṃ jage'sau

4.8

līlotsave riṅghaṇasambhrame ca
krodhodgame'pyātmani loṭhako'lam
sarvāṅgasaṅgaiḥ kṛtamaṅgalā bhūścirāya ramyaṃ cakame'sya bālyam

4.9

mṛtsāṃ kimatsītyavagūrṇayaṣṭermāturyadādatta bhayaṃ sarodam
vātyāsurārirvivṛte mukhābje
jagatpradarśyānu dadau sa tasyai

vatsānāṃ no vimokṣaṃ vitarati tarasā taskaro'ntaḥ praviṣṭo
bhuṅkte kṛṣṇo'rthasārthaṃ sakhiśiśusahito dṛśyate cetkathañcit
kāntaṃ kāntālakāntaṃ prakaṭayati śanairhāsi bimboṣṭhamāsyaṃ
sadyo dṛśyatvametītyabhidadhurajitaṃ gopikā vaidikāśca

4.11

iti antyapādopendravajrāvargaḥ prathamaḥ
nātho'rjunāvarjunanāmamaitryānnūnaṃ nipātyāpi divaṃ nināya
apārthavṛkṣo'parathā viṣograḥ
kasmātprabhagno narakaṃ praṇītaḥ

4.12

vatsokṣasattokṣavayoheyebhān
daityānnihatyākhyadasāvadhastāt
tathāpi kīrtirvyacarattrilokyāmāruhya tāneva hareḥ kathaṃ nu

4.13

kṛtvoccakaiḥ kāliyamūrdhni nṛttaṃ
pītvā viśannandavanānalogham
mudaṃ dadhe gopavadhūkaśoro
līlātapatrocitagotradhārī

4.14

kāṃścitprapannān pratilālayantamanyānupānūpamupāhvayantam
gavāṃ gaṇān kāṃścidrupāhvayantaṃ
viprapriyāḥ śrīpriyamarcicaṃstam

4.15

sa vyomavāvyavamimanuṣyadharmapreṣyograkālāhibhayāpanodī
vayasyatātākhilagovadhūḥ svaṃ
lokaṃ tadā''locayatāpi paścāt

4.16

kāntasya pāṇigrahaṇaprasaṅge
śrīveṇuyaṣṭeḥ sahasā'viśattām
madhudviṣaḥ sā madhurādharaṃ ca
lebhe vidagdhā muhurāśritainām

4.17

govindaveṇoḥ sma rutairvireje
saṃnirvṛtā citrasamā trilokī
vayo yayurmaunamudagrakarṇā
grastāgraśaṣpāḥ paśavo dvivargāḥ

4.18

gopāṅganā nātha sudarśanena
tvaṃ pāhi pāhīti yayurmukundam
viyoginīnāṃ kucakumbhaśatroḥ
pañceṣupañcānanato'tibhītāḥ

4.19

līlāvalokotsavamandahāsaśrīcārucāṭuḥ parirambhabhaṅgyām
ramābhirāmo ramayāmbabhūva
rāmānujastā ramaṇīyarāmāḥ

4.20

kṛṣṇau kṛṣṇau vadhūrbhāntyaruṇamaṇitanūrantareṇāpa rāsaṃ
vadhvau vadhvau ca kṛṣṇo maratakamaṇibhāḥ saṃsitānyonyahastam
anyattadvatnamālāvalayamavirataṃ śiñjinīmañjunṛttaṃ
madhyegāyanamadhurddhitaralamala Rushmabhūdbhūṣaṇaṃ bhūmibhīroḥ

4.21

iti tṛtīyapādopendravajrāvargo dvitīyaḥ
magnaṃ mahābhaktisudhāsamudre kadācidānītamihāsya vīcyā
abhyāgatābhyarcanayā'bhinandannakrūramakrūrasuhṛjjagāda

4.22

kaccitsakhe nau pitarau sukhaṃ sto na pīḍyamānau puri bhojarājā
apyāvayaustau virahāgnimugraṃ jñānāmṛtenaiva śamaṃ nayetām

4.23

kaccidramante'ndhakavṛṣṇibhojāḥ pure sadārā yadavo'pare'pi
āhosvidetānvihinasti kaṃso dharmānivādharmarato'tikāmaḥ

4.24

pṛṣṭastathā viṣṭapadhāriṇā'sābuvāca kiṃ viśvavide'tra vedyam
evañca kiñcidvacanena seve tvāṃ dīpadīpyeva jagatpradīpam

4.25

devarṣivākyena sa vāsudevaṃ viveda kaṃsaḥ svaripuṃ bhavantam
dhīrasya dhīrasya layāya vairaṃ dhatte'dhunā karkaṭakīva garbham

4.29

agrāhi tātastava hanta hantuṃ mṛgāriṇā gauriva nirghṛṇena
dīnaḥ smaraṃste smitamāsyacandraṃ muktaḥ kathañcinmunivāritena
dūye dayālo pitarau smaraṃste sadā sabāṣpau nigaḍe niruddhau
dyāvāpṛthivyorabhayāya jāto yābhyāṃ tvamābhyāmabhayaṃ diśāgre
svā bandhutā daivadhiyā dudhāva sa śalyakendraḥ śalalīrivoccaiḥ
āśā viśālā dvividhā bhajanti nāmāni te nātha vadantya etāḥ
saṅkandano vāyusakho jaleśo manuṣyadharmā śamanādayo'nye
tadvikramātikramatastrasanto nāmāni nīcārthatayā vahanti

4.30

kīrttiśrīḥ sphuratu mukunda kundagaurī
mandākṣaṃ tyajatu vilāsabhāsitā te
ākramya svaripuśiraḥ kramādratoccaiḥ
sannṛtyetsadasi sadasyaho divīti

4.31

iti dvitīyapādopendravajrāvargastṛtīyaḥ
niśamya śaureriti bhāvagarbhaṃ
vaktrāt smitaṃ sūtramivāvirāsīt
krodhāruṇākṣādbhrukuṭīkaṭhorādrāmānanādbhāṣyamivāṭṭahāsaḥ

4.32

niyacchataḥ svacchatarākṣatāyyain
padmāpatirdānapateḥ sarāmaḥ
bhānau prabhāte vimalaṃ viśālaṃ
yānaṃ ca cittaṃ ca samāruroha

4.33

vrajanvajastrīnayanaiḥ sa nehe
nīlotpalābhairnigaḍairivāṅgau
ālokanīlotpalahāsahārān
dattvā yatheṣṭaṃ mumuce kathañcit

4.34

anāthinīṃ nātha na māṃ tyajetthamākrandadīnāṃ karuṇairvirāvaiḥ
kṛṣṇāṃ sa kṛṣṇo'bhajadanyamūrtyā
samprekṣi yannā kathamandhathā'tra

4.35

prarocayantaṃ viṣayānanekān
kaiściddhṛtārghyaṃ paramādareṇa
ninye rathastūrṇamathopakaṇṭhaṃ
śauriṃ nagaryā ravimamburāśeḥ

4.36

viveśa devo madhurāṃ madhudviḍakrūrayānaṃ śanakairvihāya
saṃrambhadīptena balena yuktastasmin prasaṅge jaghaṭe tadeva

4.37

puraṃ purāṇaḥ puruṣo'bhyapaśyadramyaṃ navadvārakṛtābhirakṣam
tuṅgottamāṅgāyitasaudhaśṛṅgaṃ
sa prāṇabhājāmiva yādavānām

4.38

sa dṛṣṭavāṃstoraṇapārśvarājadūrdhvadhvajavyājabujadvayasya
lolatpatākāñjalibaddhamānaṃ
vādyasvanastotrasametamatra

4.39

sabhātalaṃ prekṣya sa bhāsamānaṃ
madhyepuraṃ bhaktamanomanojñam
āṃjanmamaṇistambhaguṇāvabhātasvākārakāntaṃ prabhurabhyanandat

4.40

anvāyāto kṣitipathipathe vallavairūllaladbhirlīlālolau kalabhalalitau jagmatuḥ kṛṣṇarāmau
paryait puryāṃ guṇagaṇamayī tatkathā jālikāvat
paurāḥ sarve sapadi dadṛśuste tayā kṛṣyamāṇāḥ

4.41

iti prathamapādopendravajrāvargaścaturthaḥ
nayasya vettrā viṣayīkṛtaṃ taṃ
śvaphalkaputreṇa yathā pravattā
purā parātmānamimaṃ nilīnaṃ
prāpustriyastrayya ivekṣituṃ drāk

4.42

nivṛttimetā yugapadbhajantyo
gṛhe pravṛttiṃ prakṛtāṃ vihāya
na hanta kāntātmajasaṅgacintāmākṛṣyamāṇāśca dadhuḥ kadācit

4.43

tāsāṃ drutānāṃ maṇimekhalānāṃ
pade pade śiñjitaśiñjinīnām
nigūhyamānaṃ ca sakaṅkaṇānāṃ
kolāhalaḥ sambhramamabhyadhatta

4.44

sakhīṣu yātāsu javādbhuje'dhāt
svakuṇḍalaṃ kaṅkaṇamāśu karṇe
vadhūḥ parā hāramadhatta kācit
pāde gale kāñcanaratnakāñcīm

4.45

vinottarīyastanapaṭṭikābhyāṃ
gatā'ṅganā'nyā sahasā vinidrā
smitena sakhyā viduṣī salajjā
sadyo'purastātsthitiraikṣatainam

4.46

nirasya raukmaṃ valayaṃ savegaṃ
mahāmaṇiśrīkaṭakabhrameṇa
babhāra śākhaṃ sumukhī na hāsyā
kṛṣṇaṃ gate cetasi kiṃ karotu

4.47

kṛtaikanetrāñjanamevamanyat
prasādhanaṃ sāmi vidhāya yāntyaḥ
babhuḥ parābhyo'dhikameva bhūṣā
bhaktiḥ parā (saṃ) sā bhramasūcitā''sām

4.48

nitambabimbairnibiḍairbabhāse
stanebhakumbhaiśca paraspareṇa
sumadhyamānāṃ pathi madhyamasyapādāravindaistanubhirna jātu

4.49

mukundasaundaryasudhā'kṣiprītā
tadantarāpūrya bahirjagāla
smitodayollāsavikāsabhāvavyājena vaktāṅgavilocaneṣu

4.50

ālokādapi kevalān kila gatāḥ sarvendriyānandanaṃ
sadyo dakṣakaṭākṣahāsalalitaiḥ kṛṣṇasya kāmāturāḥ
brahma brahmasuveditaṃ harirayaṃ hanteti cintācitāstāṃ saṃyogaviyogayogaguṇitāṃ tulyaṃ sudatyo dadhuḥ

4.51

iti caturthapādendravajrāvargaḥ paṃcamaḥ
maheśayostatra mahīśamārge
parasparaṃ saṃvalitā vibhā'bhāt
gaṅgauṣṇagavyoriva vāridhārā
satāṃ mahāṃho bhajatāṃ harantī

4.52

puraiva nirṇejananirmalāni
nihatya nirṇejakamugradarpam
vīryaśriyā'tyullasitāni śauriḥ
samaṃ vayasyairvasanānyadhatta

4.53

alaktakāktaiśca nisargaraktaiḥ
padairnakhādyai rahite viśeṣe
vyarthaṃ na mene nijakarma kṛṣṇe
parānvarānnāpita āpya tasmāt

4.54

parārcanena sphuṭamātmanaḥ śrīḥ
śriyeva baimbyā pratibimbalakṣmīḥ
mālākṛdasyāpa hi saukhyamālāṃ
jano'nurāgaṃ vihitānurogā

4.55

hariḥ salīlaṃ harinīlanīlaḥ
sametya śṛṅgāritamaṅgalāṅgaḥ
hastena hastīndra ivekṣudaṇḍaṃ
nṛpasya kodaṇḍamakhaṇḍayattasaḥ

4.56

uvāca bhaṅgaṃ dhanuṣo virāvo
jagattraye dūtavaco vṛthā''sīt
svedaprakampau nṛpaterabhūtāṃ
bhayānnu kopānnu samuccayānnu

4.57

prapālitaṃ vīravarairanekairarjayaśriye pūjitamīśadhāryam
cāpaṃ ca cakraṃ ca niśamya kaṃsastatāma govindabalāvaḷūnam

4.58

daraḥ sacinto'stiparti viveśa
sabhaktiruccaiḥ sujanaṃ pramodaḥ
nandasthalaṃ nandasutaḥ sakīrtiḥ
sahasrarociśca sarocirabdhim

4.59

praṇamya cāṇūrapurassareṣu
puraḥsthiteṣu praṇataḥ pratāpī
malleṣu lakṣatsu kilācacakṣe
viṣādinaṃ bhojapatiṃ niṣādī

4.61

dabhrairbhrūvibhramaiste yayuramṛtabhujaḥ kāndiśīkā nideśyā
gopīstanyāśyudanyaḥ kimapi bhayakaraḥ ko'pi māyāvipotaḥ
tvajjāmeyāttvamenāṃstava bhaṭakaṭakān pālayeḥ kālakalpādrājan varmeva vāñchaṃ kimiha bahugirā kāryaśeṣe niyuṅkṣva
iti tṛtīyapādendravajrāvargaḥ ṣaṣṭhaḥ
niśamya mallairanumanyamānaṃ
sādhiṣṭhamambaṣṭhavaco'pi dabhram
nṛpaḥ prayātaḥ prakṛtiṃ bhujau svau
nirīkṣya rūkṣo nyagadatsahāsam

4.62

idaṃ bhavantaḥ śṛṇutātmatatvaṃ
no gopyamapyalpamupāsakeṣu
avetya yogī samadṛk samastaṃ
rahasyaho nārada ityavocat

4.63

na martyamātraṃ svamavehi rājan
jāto bhavānatra mahāsurendraḥ
tato'si tejasvitamo yathā'gniḥ
pradīptadāruḥ prahatānyadāruḥ

4.64

abhūdabhūtābhibhavaḥ surāriḥ
pratyastakālaḥ khalu kālanemiḥ
dhanurgraheṇaiva diśo daśāśu
pradudruvuryasya surāḥ śarāśca

4.65

sahasramūrdhā dvisahasrahasto
devān vicitrāvayavān vijitya
asūyati smāsurasūdanāya
sahasraśīrṇe puruṣāya vīraḥ

4.66

sa gosurāṇāmapi bhūsurāṇāmudbhāsurāṇāṃ vidadhe vighātam
mukundamūlaṃ tadavetya mānī
samūlaghātaṃ hi paraṃ jighāṃsuḥ

4.67

mataṅgajendro hariṇeva mattaścakrāyudhena praticaskare'sau
parākramo'yaṃ kriyeyeti kecit
svamāyayaiveti pare paṭhanti

4.68

vraje'tha śauristava pūrvavairī
bālaiva sā vikrayamūlyamasya
tviṣā hasantī harinīlamālāṃ
kṣaṇaṃ tvayā bhūpa parīkṣitā yā

4.69

sa devatārirnaradevapatnyāṃ
naivograsenādrumilādudaistvam
na śālibījādavanītale'sminnaho mahāvṛkṣa upaiti janma

4.70

vidheriti suto'bhyadhānmama hitaṃ hi tathyaṃ vaco
na bandhuriha ko'pi me kimuta nityavairī hariḥ
karṇaṃ ca kaṭumutkaṭaṃ jagati kṛṣṇasarpaṃ sphuṭaṃ
layaṃ nayata tānasāviti nigadya veśmāviśat

4.71

iti dvitīyapādendravajrāvargaḥ saptamaḥ
lolānurāgaṃ niyatānurāgaḥ
sadodito hanta tadodayantam
sahasratejaskamanantatejā
hariṃ hariḥ sarvaguṇairjigāya

4.72

tāntaṃ nitāntaṃ tamasodite'smin
prabuddhamuccaiḥ sumanogaṇena
jalairdhṛtenoṣṇarucau vidagdhairdhṛtena viṣṇāviyatā viśeṣaḥ

4.73

agre piśaṅgīṃ kadalīṃ nipātya
gajānane vardhitamātra eva
madhudviṣo dakṣiṇamācakampe
vilocanaṃ prāstipatestu savyam

4.74

nāgākṛtiṃ kāṇḍapaṭīṃ nirasya
vikīrya phullaṃ nayanaprasūnam
sa kaiṭabhārirnaṭavannarāṇāṃ
kathāprasaṅgāya viveśa raṅgam

4.75

pauraiḥ paraṃ draṣṭumupeyivadbhiradhiṣṭhitaṃ vaiṣayikairanekaḥ
rasena raṅgaṃ parito'surāriḥ
samañcitaṃ praikṣata mañcavṛndam

4.76

mañcāvaleraikṣata rājamañcaṃ
mahiṣṭhaśobhaṃ mahitaṃ sa madhye
sitātapatravyajanāṃśugauraṃ
sitatviṣo bimbamivoḍumadhye

4.77

tatra trilokīvijayaṃ nu mūrtaṃ
satāṃ samudriktamadravaṃ nu
aghaṃ nu ghoraṃ yaduvaṃśajānāṃ
sa bhojarājaṃ nu harirdadarśa

4.78

krūrakrudhāṃ kāmamadotkaṭānāṃ
suradviṣāmā(ka)kulitaṃ kulena
viṣaṇṇasatvaṃ sa pupoṣa raṅgaṃ
praviśya hṛtpadmamivātmapuṃsām

4.79

rāmaṃ ramātikramalolahelaṃ
nisargagauraṃ madamanyutāmram
kṣaṇaṃ kaṭākṣeṇa śanairniyacchaṃścacāra raṅge sayaśā rameśaḥ

4.81

līlāpadmacchalena svanadaliguṇavaccārucāpaṃ dadhānaḥ
kānto'laṃ kṛṣṇakāmaḥ sphuṭamiṣudhipade mālatīmālabhārī
kṛtvomāmaiśamardhaṃ dadhadarivijayaṃ khyāpayanbindumaulerhṛtvā maulīndukhaṇḍaṃ dviradaradanibhenotsavo'bhūdvadhūnām
iti prathamapādendravajrāvargo'ṣṭamaḥ
govindasaundaryarasaikatānā
vibhrājitā locanavibhrameṇa
striyaḥ kṛtālaṅkṛtayaḥ kilocuḥ
samandahāsā iva jātavidyāḥ

Shubhodaya 4

Contents