Bhaktimanjari (Svati Tirunal Ramavarma Maharaja) 8: atha saptamaśatakam
Bhaktimañjarī (Svāti Tirunāḷ Rāmavarma Mahārāja) 8
- Language
- Sanskrit
Contents
- 8.100 — 1 part
atha saptamaśatakam
8.1
ambhojanābha ! kathayāmyatha tāṃ tṛtīyāṃ
bhaktiṃ hatākhilamalāṃ smaraṇātmikāṃ te
śaure ! vidhehi sahasā kṛpayā tadarthaṃ
vāṇīṃ mameśa ! nitarāṃ caturāmidānīm
8.2
puṃsāṃ sakṛt smaraṇamātrakṛtāmaghaughaṃ
sadyo yato harasi tena budhairajasram
saṅkīrtyase hariritīśa ! tathāvidhasya
kaṃ vā smṛtirna bhavataḥ kurute kṛtārtham
8.3
kiṃ vā smṛtairbahubhiracyuta ! bandhahetubhūtaiḥ phalaṃ vrajati vastubhiratra dehī
yaṃ saṃsmaran na patatīśa ! punarbhavābdhau
tasya smṛtiḥ kila tavaiva sadā vidheyā
8.4
nūnaṃ manaścapalameva nṛṇāṃ kṣaṇārdhamapyekaitaḥ sthirayituṃ sutarāmaśakyam
yadyapyananta ! bhavadīyaniṣevayāthāpyabhyāsadastadidamāśu vaśaṃ nayeta
8.5
naisargike varada ! satyapi mānavānāmambhoruhākṣa ! manasaḥ sphuṭamasthiratve
yadyat prabho ! priyatamaṃ khalu tatra tatra
ceto viśiṣya ramate svayameva nūnam
8.6
tasmānnaraḥ priyatamaṃ khalu vastu yadyat
tattad bhavatparamaho satataṃ vidadhyāt
tenākhileśa ! labhate smaraṇaṃ taveha
yatnaṃ vinaiva jagatīha vidhūtaśaṅkam
8.7
gīte yadīha ramate hṛdayaṃ manojñe
tantrīninādasukhadāyini tarhi martyaḥ
gīteṣu tāvakacaritrarrasojjvaleṣu
yuñjīta mānasamajasramanantaśāyin !
8.8
yadyambujākṣa ! ramate hṛdayaṃ kathāsu
ramyāsru tarhi manujaḥ satataṃ prabho ! te
nānāvatāraguṇakīrtanasambhṛtāsu
saktaṃ manaḥ khalu kathāsu sadā vidadhyāt
8.9
ālekhyakarmasu tathaiva sakautukaṃ cet
cetohareṣu hṛdayaṃ manujastadāsau
netrotsavān madhuripo ! tava mūrttibhedānālikhya tatra viniyojya manaḥ prahṛṣyet
8.10
ceto jagattrayapate ! pratimāsu citrāsvāmodabhāg yadi tadā pratimāstvadīyāḥ
kṛtvā suvarṇamaṇibhūṣaṇabhāsamānā
yuñjīta tatra hṛdayaṃ karuṇaikasindho !
8.11
etādṛśād muraripo ! manujaḥ susādhādabhyāsataḥ smṛtimavāpya vibho ! tvadīyām
loke bhavet sakalapāpakulād vimukto
yatnaṃ vinaiva dhutasaṃśayaleśamatra
8.12
kāryā na caiva bhuvaneśa ! vicāraṇātra
smṛtvā yathāruci bhavantamanantaśāyin !
pāpāt kathaṃ bhavati mukta itīha yat tvaṃ
svasmarturaṅga ! śubhado'si hi sarvathāpi
8.13
loke smaranti sudhiyo hi bhavantamīśaṃ
jñātvā svarūpamamalaṃ tava vedavedyam
smartuṃ tathā kathamamī prabhavanti bhūman !
lakṣmīpate ! jaḍadhiyo nanu mādṛśo'pi
8.14
tasmānnijāṃ samanusṛtya manaḥpravṛttiṃ
tvāmambujākṣa ! satataṃ smaratāṃ janānām
tulyaṃ prasīdasi kiletyayi boddhumasti
kāruṇyabhārajaladhe! bahu naḥ pramāṇam
8.15
gopyastvanāratamihāmburuhākṣa! vākyairvedyaṃ hyakṛtrimagirāṃ paracitsvarūpam
tvāṃ jāra ityakhilanātha! hṛdajamadhye
smṛtvā yayuḥ paramahaṃsagatiṃ kṣaṇena
8.16
dhanyau hi devakasukānakadundubhī tau
tvāṃ putravatsalatayā hṛdi bhāvayitvā
samprāpatuḥ kila paraṃ tava dhāma nityaṃ
sammodasāndramamalaṃ vinivṛttihīnam
8.17
gopāstathā jalajanābha! vayasyabhāvamālambya sādhu satataṃ hṛdaye nidhāya
tvāṃ prāpuramburuhanetra! bhavāmburāśeḥ
pāraṃ paraṃ bhuvananātha! vinā śrameṇa
8.18
caidyādayaḥ sakalagarhatamāḥ sumūḍhāḥ
smṛtvākhileśa! ripubhāvanayā bhavantam
nityaṃ carācarajagannivahaikabandhuṃ
muktā babhūvuracirāt kimito'pi citram
8.19
bhītyā ca bhojannṛpatiḥ prapibaṃśca khādan
gacchan svapannatha lapan hṛdaye'nucintya
tvāmeva santatamagād bhuvanaikabandho!
sāyujyamāśu tava khalvasurāṃśajo'pi
8.20
tasmād vibho ! kathamapīha bhavantameva
yo vai naraḥ smarati mādhava ! sarvadāpi
so'yaṃ vimukta iha pāpakulādaśeṣāt
tvāmāpnuyād vihagavāhana ! nirviśaṅkam
8.21
rāgeṇa vatsalatayāpi ca sauhṛdena
dveṣeṇa hanta bhayabhāvanayā smṛto'pi
yastvaṃ prasīdasi nṛṇāṃ sa kathaṃ na bhūyāstuṣṭo'niśaṃ kalayatāṃ hṛdi pūrṇabhaktyā
8.22
tasmānnaro jagati durjayabhīmabhīmaṣaḍvairirūpapṛthusattvasamākulaṃ tam
śaure ! titīrṣurakhileśa ! bhavāmburāśiṃ
nityaṃ bhavatsmaraṇameva hi śī nayeta
8.23
viśvaikanātha ! kathayāmyadhunāhamatra
tvaddhyānayogamaravindadalāyatākṣa !
sarvāghajātaśamanaikanidānabhūtaṃ
bhaktaikagamya ! kṛpayā hi tavaiva bhūman !
8.24
mitre ripau varada ! pāpiṣu puṇyavatsu
svīye pare ca samabuddhiralaṃ praśāntaḥ
tulyāśmaloṣṭakanakaśca sarojanābha !
dhyānecchuracyuta ! bhavet tava sarvadāpi
8.25
sarvatra nispṛhamatiśca viviktadeśasevī yatātmahṛdayastvaparigrahaśca
bhūtvāsanaṃ dṛḍhataraṃ parikalpayecca
deśe śucau na khalu tuṅgamaho na nīcam
8.26
kṛtvāmbareṇa bhagavannathavājinena
yadvā kuśairvimalamāsanamatra tiṣṭhen
prekṣyātmano'tha sahasā khalu nāsikāgraṃ
maunī jitendriyagaṇaśca diśo naipaśyan
8.27
sandhārayannapi ca varṣma śiraśca kaṇṭhaṃ
svaṃ sthāṇuvat sthirataraṃ ca samaṃ nikāmam
bhūtvāniśaṃ nanu mitāśananidra īśa !
dhyāyed bhavantamaravindadalākṣamevam
8.28
paidmāsanastha iha mādhava ! mānavo'sau
kṛtvonmukhaṃ vidhunibhaṃ praṇavena sadyaḥ
hṛtpadmamacyuta ! tato'nu vikāsayet taṃ
tvaddhyānalipsurajita ! triguṇairmurāre !
8.29
tasyopari dyumaṇisomaśucīn krameṇa
smṛtvā tatastaduparīha kalāyabhāsam
śaṅkhāripaṅkajagadānvitapāṇipadmaṃ
śrīvatsakaustubhadharañca vicintayet tvām
8.30
yattvavyayaṃ varada ! dhāma tavātidivyaṃ
śāntaṃ praśāntamatibhirmunibhirniṣevyam
smṛtvā pumān prathamametadadhokṣajātha
dhyāyediheśvara ! bhavantamacintyaśaktim
8.31
lakṣmīpate ! jagati yānti mahānubhāvāḥ
santo yadacyuta ! paraṃ tava dhāma nityam
sarvottamaṃ jayati tad vinivṛttihīnaṃ
vaikuṇṭhasaṃjñitamanantasukhaikasāndram
8.32
bhaktottamā vidhutamatsararāgavairā
yasminnanāratamaho nivasanti puṇyāḥ
tat tādṛśaṃ tava padaṃ tu vikuṇṭhasaṃjñaṃ
cetasyaho na janayenmudamīśa ! kasya
8.33
bhātyetadīśa ! vividhairnayanābhirāmairjuṣṭaṃ punarjanpadairatha hṛṣṭapuṣṭaiḥ
yatrāmbujākṣa ! vasatāṃ sadanāni vīkṣya
lajjāṃ vahatyapi purī tridaśādhibhartuḥ
8.34
rathyāpaṇyālyajiraniṣkuṭaveśmavartmanyudyānagoṣṭhahayasindhuradhānyaśālāḥ
yatrāniśaṃ mukharitāḥ śravaṇābhigamaistvatkīrtanairmuraripo ! vilasantyabhīkṣṇam
8.35
prākārapaṅktirabhito'sya vikuṇṭhalokasyoccairlasatyajita ! ratnamayī vicitrā
rūpaṃ svamīkṣitumananta ! digaṅganānāṃ
kuḍyārpiteva navadarpaṇacārupaṅktiḥ
8.36
śobhānuṣaṅgavaśato bhuvaneśa ! tasyā
ratnācalena samatāmiha hemamadrim
prāptaṃ nirīkṣya mihiraḥ kva nu meruratretyevaṃ saśaṅkahṛdayo bhavatīti manye
8.37
kiñca bhraman sa paritaḥ khalu hāṭakādriṃ
nānāmaṇivrajalasaddyuticitrarūpam
jñātuṃ paṭurna bhavati svamapīha varṇaṃ
nairmalyabhāji nanu tatra nirīkṣitātmā
8.38
ekatra paśyati nijāṃ tanumeva gaurīmanyatra pāṭalatāṃ kvacidīśa ! kṛṣṇaactionm
eko yathā jagati tāvadupādhibhedairnānātvamāpta iva bhāti kilāyamātmā
8.39
māṇikyavāsavadṛṣannavahīrasāndrāt
prākāratastata iha prasṛtā marīciḥ
gaṅgāṃ kalindatanayāṃ ca sarasvatīṃ ca
jetuṃ vibhāti yugapad vihitodyameva
8.40
lakṣmīpate ! valayite nanu tādṛśena
prākāramaṇḍalavareṇa vikuṇṭhadhāmni
rājanti bhāsuravimānavarāṇi bhaktairadhyāsitāni tava dhanyatamairnikāmam
8.41
bhāsā tathonnatatayā ca mitho nitāntamutkarṣamacyuta ! vahatsvatha teṣu bhūman !
svairaṃ dināni kamalākṣa ! sadā nayanto
modaṃ kamapyanubhavanti hi tāvakīnāḥ
8.42
kiñcātivelamaniśaṃ bhavadīyagāthānāmāmṛtairmukharitānanapaṅkajāste
tvatkīrttimacyuta ! mithaḥ parikīrtayantaḥ
pūtaṃ prabho ! vidadhate jagadantarālam
8.43
rājatsuvarṇanavaratnamayā vicitrā
harmyā nijonnatatayā girirājatulyāḥ
ābhānti tatra bhuvaneśa ! dhaneśagarvasarvaṅkaṣāṃ varada ! sampadamāvahantaḥ
8.44
āpiñjareṣu maṇibhirnanu pañjareṣu
sañjātamodamaniśaṃ śukaśārikāśca
svairaṃ vasanti bhagavan ! bhavadīyanāmānyuccaistarāṃ śrutisukhāni samudgṛṇantyaḥ
8.45
śrotradvayādhikasukhapradavādyayuktatauryatrikeṇa bhagavan ! muditā nitāntam
bhāvatkadivyacaritāmṛtasambhṛtena
svairaṃ nayanti nanu tatra dināni santaḥ
8.46
nānāmaṇivrajamayeṣvayi deva ! teṣu
saudheṣu hanta vicarannatha ko na sadyaḥ
sarvatra vīkṣya pṛthagātmana eva dehaṃ
bāhulyamīśa ! manute vapuṣo nijasya
8.47
dhārāgṛhebhya iha tāsvayi saudharājiṣvaddhā nipatya sahasā sphuṭitāmbudhārā
tatratyahīramayakuḍyaruco'nuṣaṅgāt
tārātateranukaroti marīciveṇīm
8.48
udyānabhūmiṣu ca tatra mahīruhaughā
yat te vahanti kusumodgamamapyakāle
naitadvicitramakhileśvara ! mādhave tvayyaśrāntamacyuta ! lasatyayi śeṣaśāyin !
8.49
jyotsnānvitāsu rajanīṣu nijaṃ śarīraṃ
saṃvīkṣya ratnamayakuḍyataleṣu tatra
āsāditā svadayiteti niśīthakāle'pyaddhā bhrameṇa parituṣyati cakravākaḥ
8.50
saṃphullasārasasamūhalasatparāgasaṃvāsitaḥ sakalatāpaharāmbupūrṇaḥ
vāpītaṭākanikaraśca saroruhākṣa !
ceto na kasya śiśirīkurute nu tatra
8.51
madhye tu tasya bhagavan ! nagarī vibhāti
sādhyeti kāpi paramasya vikuṇṭhadhāmnaḥ
bhrājiṣṇubhūrimaṇitallajahemarūpā
prākāratoraṇavṛtā nayanābhirāmā
8.52
sā nāma dikṣu catasṛṣvatulairviśālairdvāraiścaturbhirakhileśa ! lasatyatīva
atyunnataiḥ surucirairmaṇigopuraiśca
gehaistathā parivṛtā khalu bhaktajuṣṭaiḥ
8.53
paryantabhāsivalabhinmaṇimecakābhasāmodadivyatulasīvananirjihānaḥ
santāpahṛnnanu jagattritayasya puryāṃ
tasyāṃ tu kaiṭabharipo ! mṛdu vāti vāyuḥ
8.54
bhūman ! bhavatpraṇayabhājanabhūtatādṛgviśvābhirāmatulasī makarandalobhāt
govinda ! hanta viharanta iha dvirephā
vindanti saukhyamadhiyo'pyatha yogibhogyam
8.55
pīyūṣadīdhitisitacchavigarvabhārasarvaṅkaṣasphaṭikatallaja nirmitābhiḥ
sopānapālibhiratīva samullasantyo
vāpyaśca tatra vilasanti manojñatoyāḥ
8.56
paṅkacchidāpaṭutayā rasasambhṛtatvāt
tāpotkarapraśamanaikapaṭutvataśca
lakṣmīpate ! paramahaṃsaniṣevitatvād
vāpyastu tāstava kathā iva bhānti nityam
8.57
caṇḍādibhirbhuvananāyaka ! rakṣiteyaṃ
dvāreṣu cakradhara ! sannihitaiścaturṣu
sādhyā nagaryvahitaiḥ śitahetihastairdivyasvarūpasahitaiḥ parrāṣṭasaṅkhyaiḥ
8.58
caṇḍāhvayo nanu rameśa ! tathā pracaṇḍaḥ
prāg dvāri yāmya iha bhadrasubhadrakau ca
tadvajjayo'tha vijayo'pi ca paścime tu
saumye sthitāvajita ! dhātṛyuto vidhātā
8.59
kiñcākhileśa ! kumudo'pyatha puṇḍarīkaḥ
śaure ! tathaiva kumudākṣakaśaṅkukarṇau
tadvacca vāmanasamāhvayasarvanetrau
puryyāṃ sthitāvatha tathā sumukhādvayaśca
8.60
proktā ime varada ! dikpatayaḥ purasya
tasyāsya kaiṭabhaniṣūdana ! nistulasya
rakṣanti te satatamīśa ! puraṃ tadetadakṣīṇanityavibhavaikaniketabhūtam
8.61
tasyātha madhyabhuvi bhāti samastalokanetradvayānupamakautukadāyi divyam
antaḥpuraṃ tava vibho ! navaratnabhāsiprākāratoraṇayutaṃ bhuvanaikaramyam
8.62
prākārapaṅktibhiratīva samucchritaiśca
tadvimānanivahairhṛdayābhirāmaiḥ
juṣṭaṃ vibhāti tadidaṃ bhavadīyabhaktairadhyāsitairbhuvananāyaka ! dhanyadhanyaiḥ
8.63
madhye tu tasya vilasatya̍tidivyarājasthānaṃ sutuṅgamayi maṇḍapamambujākṣa !
bālārkakoṭisuṣamojjvalapadmarāgastambhottamaiḥ śatasahasramitaiḥ sametam
8.64
divyasragambaravibhūṣitanākanārīyuktairaśeṣadivijaiśca niṣevyamāṇam
yuktaṃ ca muktanivahai ratha bhāti sāmagānopaśobhitamidaṃ madhukaiṭabhāre !
8.65
tasyāpi madhyabhuvi bhāti rameśa ! divyaṃ
siṃhāsanaṃ sakalavedamayaṃ tvadīyam
dharmādidaivatagaṇairvidhṛtaṃ tadīyapādatvamīśa ! gamitairmuktaikabandho !
8.66
jñānaṃ ca dharma iha deva ! tathā viraktiraiśvaryamityabhihitāḥ khalu devatāstāḥ
sārdhaṃ vahanti nanu vedacatuṣṭayena
siṃhāsanaṃ sarasijākṣa ! paraṃ tadetat
8.67
ādhāraśaktirakhileśa ! tathaiva śaktiścicchaktiracyuta ! tathaiva sadāśivākhyā
ityambujākṣa ! kathitāḥ ! khalu śaktayo vai
dharmādidaivatagaṇasya paraṃ murāre !
8.68
madhye ca tasya nivasanti rathāṅgapāṇe !
siṃhāsanasya ravivahnisudhāmayūkhāḥ
kūrmastathā phaṇivihaṅgapatī ca vedāḥ
pīṭhatvamīśa ! gamitāśca samastamantrāḥ
8.69
sarvākṣarākalitamīśa ! vadanti santo
yad yogapīṭhamiti mādhava ! divyadivyam
tanmadhyato'ṣṭadalamīśa ! vibhāti padmamudyatsahasrakiraṇacchavi kaiṭabhāre !
8.70
etādṛśaṃ madhuripo ! tava dhāma śāntaṃ
dhyātvā naraḥ prathamamacyuta ! yogisevyam
paścācca tatkamalamadhyagakarṇikāyāṃ
bhāntaṃ smared yatamatiśca bhavantamīśam
8.71
no jāyate bhuvi nṛṇāṃ manasaḥ pravṛttirvastunyasaṃśayamadṛṣṭacare parokṣe
dhyātuṃ tatastvasukaraṃ tadidaṃ vikuṇṭhadhāmeti kecana vadeyuraśeṣabandho !
8.72
śrotratvagīkṣaṇamukhaiḥ karaṇaistu yadyadyairyeḥ prabho ! samucitaṃ nanu bhoktumatra
taistaistu tānyananubhūya tadīyatattvaṃ
no vetti ceti vacanaṃ khalu satyameva
8.73
loke sitāsitaharinmukhavarṇabhedaṃ
jānāti naiva bahudhā nanu bodhito'pi
vākyaiḥ savistaratarairayi daityavairinnājanmanetravikalo manujo hi nūnam
8.74
tadvacca karṇavikalo'tra naraḥ kathaṃ vā
tantrīninādarasamiśritagānasaukhyam
jānāti hanta bhuvaneśa ! kavīśvarāṇāṃ
vaktrābjaneirgalitasatkavitārasaṃ vā
8.75
martyo jagatyatidaridratamaḥ kathañcit
bhikṣāṭanārjitakadannabhṛtātmakukṣiḥ
boḍhuṃ prabho ! kathamahārhati hanta saukhyaṃ
vitteśabhogyamatulaṃ bhujagendraśāyin !
8.76
vandhyā vadhūrbhuvananātha ! kathaṃ nu vetti
pīḍāṃ prasūtisamaye kila jāyamānām
tadvajjaḍaḥ kathamavaiti pariśramaṃ taṃ
vidyāptibaddhamanasā tvanubhūyamānam
8.77
tasmādadṛṣṭacaramīśa ! tathā parokṣaṃ
tad dhāma divyamakhileśa ! vikuṇṭhasaṃjñam
dhyātuṃ, janairna khalu śakyamiti tridhāman !
vārttā ca naiva sudhiyā puruṣeṇa heyā
8.78
tat paṅkajākṣa ! sakalaiḥ śramaleśavarjaṃ
dhyātuṃ vibho ! varada ! dhāma taveha loke
kāruṇyavārinidhinā bhavataiva so'yaṃ
lakṣmīpate ! viracitaḥ sukaro'styupāyaḥ
8.79
bhāgyaṃ jagatyayi satāmiva puñjabhūtaṃ
yat te paraṃ priyatamaṃ ca vikuṇṭhatulyam
taddhāma śāśvatamihāśramataḥ smaret syānandūrasaṃjñamaniśaṃ puruṣo murāre !
8.80
dhyātvā purā puramidaṃ kamalākṣa ! paścāt
tatratyamandiragate nanu pāvanākhye
ramye vimānavarasīmni sadā śayānaṃ
tvāṃ bhāvayediha pumān bhujagendratalpe
8.81
ādau sahasrakiraṇāyutadivyakāntisandohajiṣṇumaṇimaṇḍalamaṇḍitena
bhāntaṃ jagattrayaguro ! makuṭena tat te
dhyāyet suniścitamatiḥ paramuttamāṅgam
8.82
paścād rameśa ! tulasīvakulāmbujātamandārakundasumanomayamālikāsu
lobhacchalena makarandaniṣevaṇasya
dhyāyennataṃ madhukairastava keśapāśam
8.83
bhūyaḥ smaredajita ! śāradapūrṇacandrabimbacchaviprakaṭagarvaharaṃ manojñam
sāphalyadāyi jagatāmiha netrasṛṣṭerlakṣmīpate ! tava vibho ! vadanāravindam
8.84
atyantamecakatarālakasaṃvṛtaṃ te
dhyāyet tataḥ śiśuśaśāṅkasamānaśobham
astokasaurabhatatākhiladigvitānakastūrikātilakitaṃ nanu phāladeśam
8.85
asmādṛśeṣvalamananyaparāyaṇeṣu
nityaṃ pradarśitakṛpāmayavārirāśeḥ
kallolarūpamaniśaṃ yatadhīḥ smaret te
cillīyugaṃ tadanu nātha! rathāṅgapāṇe!
8.86
samphullasārasadalacchavi netrayugmaṃ
śaure! dvivarṇamapi dṛśyatarāvivarṇam
ākarṇadīrghamakhileśa! tataḥ smaret te
bhaktārttibhañjanakaṭākṣasudhārasārdram
8.87
dhyāyet tataśca manasā madhukaiṭabhāre!
tāṃ nāsikāṃ tava vibho! jagadādhihantuḥ
rājattilaprasavatallajagarvabhārasarvaṅkaṣānupamitadyutilobhanīyām
8.88
rāgaṃ samastajagatāmapi vidyamānamātmanyatho bahirapi prakaṭaṃ vidhātum
udyogavāniva ya īśa! barībharīti
rāgaṃ tamacyuta! tatastvadharaṃ smaret te
8.89
lakṣmīpate! daravikāsavirājamānakundāvadātaradvṛndarucā sanātham
mandasmitaṃ tribhuvanaikavimohanaṃ te
dhyāyeta tataḥ sarasijākṣa ! kṛpātisāndram
8.90
dhyāyet tataḥ śravaṇayugmalasanmanojñaratnaughayuṅmakarakuṇḍalakāntiveṇyāḥ
saṃśīlanād dviguṇitānupameyaśobhaṃ
gaṇḍadvayaṃ tava vibho! maṇidarpaṇābham
8.91
ārūḍhapūrvadharaṇīdharavāsreśakoṭiprabhānilayakaustubharatnabhāsā
sañjātapāṭalarucaṃ tadanu smaret te
grīvāṃ prabho! rucirakambusamānaśobhām
8.92
saṃgrāmadurjayataratridaśārivīraprauḍhāsuvātagaṇabhugbhujagāyitau tau
bāhū mahārghamaṇikaṅkaṇamaṇḍitau te
dhyāyet tato bhuvananāyaka ! bhaktipūrvam
8.93
rājanyaho yadaniśaṃ trijagajjananyā
lakṣmyāstu nityanilayāyitamārttabandho !
dhyāyet tadetadatha ramyamurassthalaṃ te
śrīvatsalakṣma vilasannavavanyamālam
8.94
yatrāmbujākṣa! nivasanti jaganti hanta
bhūmaṃścaturdaśa carācaravanti śaure !
taṃ saṃsmarediha tato jaṭharaṃ tvadīyaṃ
lakṣmīpate ! nanu valitrayaśobhamānam
8.95
aśrāntamāsyajalajairbhagavaṃścaturbhirāghoṣyamāṇanigamena paraṃ vidhātrā
adhyāsitaṃ nanu rameśa ! tataḥ smaret te
nābhīpuṭoṭṭhavamaśeṣaguro ! sarojam
8.96
atyuttamacchaviniketanabhūtaratnaparyuptayā madhuripo ! kaladhautakāñcyā
dhyāyedalaṅkṛtamaho tava madhyadeśamasthūlamapyakṛśayātha rucā sanātham
8.97
sandhyābhravarṇalasitena tato manojñapītāmbareṇa pariveṣṭitamūruyugmam
jaṅghe ca kekivarakaṇṭhasamānaśobhe
dhyāyet tava trijagadekapatermurāre !
8.98
ambhojagarbhasukumārapayodhikanyapāṇidvayena parilālitamīśa ! nityam
bhaktaughavāñchitaphalapradamārttabandho !
dhyāyet padāmbujayugaṃ tava yogisevyam
8.99
aṅgeṣu deva ! sakaleṣu tavātiramye
tatrāṅghripaṅkajayuge viniyojya cetaḥ
santyaktasarvaviṣayaspṛha eṣa martyaḥ
samprāpnuyād dṛḍhamanirvacanīyasaukhyam
8.100
tasmāt prabho ! nalinapatragatāmbubindulolaṃ tvavāpya narajanma bhuvīha dehī
tvāmeva cakradhara ! śāśvatamodalabdhyai
dhyāyedameyakaruṇānidhimacyutaivam
8.100.p1
iti svātiśrīrāmavarmavañcimahārājaviracitāyāṃ bhaktimañjaryāṃ saptamaśatakam