[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [Poetry (mahākāvya, lyric, messenger poems, stotra, Prakrit kāvya)](https://indike.org/pramana/in.lit.kavya) › [Messenger poems (sandeśakāvya)](https://indike.org/pramana/in.lit.kavya.duta) › [Meghadūta](https://indike.org/pramana/in.lit.kavya.duta.meghaduta) › [Vulgate (Mallinatha's text)](https://indike.org/pramana/in.lit.kavya.duta.meghaduta*vulgate) › 1 # Meghaduta 1: pūrvameghaḥ Vulgate (Mallinātha's text) 1 - **Language:** Sanskrit ## Contents - [1.19](https://indike.org/pramana/in.lit.kavya.duta.meghaduta*vulgate.1.19) — 1 part - [1.66](https://indike.org/pramana/in.lit.kavya.duta.meghaduta*vulgate.1.66) — 1 part ### pūrvameghaḥ ### [1.1](https://indike.org/pramana/in.lit.kavya.duta.meghaduta*vulgate.1.1) kaścit kāntāvirahaguruṇā svādhikārāt pramattaḥ $ śāpenāstaṃgamitamahimā varṣabhogyeṇa bhartuḥ & yakṣaś cakre janakatanayāsnānapuṇyodakeṣu % snigdhacchāyātaruṣu vasatiṃ rāmagiryāśrameṣu ### [1.2](https://indike.org/pramana/in.lit.kavya.duta.meghaduta*vulgate.1.2) tasminn adrau katicid abalāviprayuktaḥ sa kāmī $ nītvā māsān kanakavalayabhraṃśariktaprakoṣṭhaḥ & āṣāḍhasya prathamadivase megham āśliṣṭasānuṃ % vaprakrīḍāpariṇatagajaprekṣaṇīyaṃ dadarśa ### [1.3](https://indike.org/pramana/in.lit.kavya.duta.meghaduta*vulgate.1.3) tasya sthitvā katham api puraḥ kautukādhānahetor $ antarbāṣpaś ciram anucaro rājarājasya dadhyau & meghāloke bhavati sukhino 'py anyathāvṛtti cetaḥ % kaṇṭhāśleṣapraṇayini jane kiṃ punar dūrasaṃsthe ### [1.4](https://indike.org/pramana/in.lit.kavya.duta.meghaduta*vulgate.1.4) pratyāsanne nabhasi dayitājīvitālambanārthī $ jīmūtena svakuśalamayīṃ hārayiṣyan pravṛttim & sa pratyagraiḥ kuṭajakusumaiḥ kalpitārghāya tasmai % prītaḥ prītipramukhavacanaṃ svāgataṃ vyājahāra ### [1.5](https://indike.org/pramana/in.lit.kavya.duta.meghaduta*vulgate.1.5) dhūmajyotiḥsalilamarutāṃ saṃnipātaḥ kva meghaḥ $ sandeśārthāḥ kva paṭukaraṇaiḥ prāṇibhiḥ prāpaṇīyāḥ & ity autsukyād aparigaṇayan guhyakas taṃ yayāce % kāmārtā hi prakṛtikṛpaṇāś cetanācetaeṣu ### [1.6](https://indike.org/pramana/in.lit.kavya.duta.meghaduta*vulgate.1.6) jātaṃ vaṃśe bhuvanavidite puṣkarāvartakānāṃ $ jānāmi tvāṃ prakṛtipuruṣaṃ kāmarūpaṃ maghonaḥ & tenārthitvaṃ tvayi vidhivaśād dūrabandhur gato 'haṃ % yācñā moghā varam adhiguṇe nādhame labdhakāmā ### [1.7](https://indike.org/pramana/in.lit.kavya.duta.meghaduta*vulgate.1.7) saṃtaptānāṃ tvamasi śaraṇaṃ tat payoda priyāyāḥ $ saṃdeśaṃ me hara dhanapatikrodhaviśleṣitasya & gantavyā te vasatir alakā nāma yakṣeśvarāṇāṃ % bāhyodyānasthitaharaśiraścandrikādhautaharmyā ### [1.8](https://indike.org/pramana/in.lit.kavya.duta.meghaduta*vulgate.1.8) tvām ārūḍhaṃ pavanapadavīm udgṛhītālakāntāḥ $ prekṣiṣyante pathikavanitāḥ pratyayād āśvasantyaḥ & kaḥ saṃnaddhe virahavidhurāṃ tvayy upekṣeta jāyāṃ % na syād anyo 'py aham iva jano yaḥ parādhīnavṛttiḥ ### [1.9](https://indike.org/pramana/in.lit.kavya.duta.meghaduta*vulgate.1.9) tvāṃ cāvaśyaṃ divasagaṇanātatparām ekapatnīm $ avyāpannām avihatagatir drakṣyasi bhrātṛjāyām & āśābandhaḥ kusumasadṛśaṃ prāyaśo hy aṅganānāṃ % sadyaḥ pāti praṇayi hṛdayaṃ viprayoge ruṇaddhi ### [1.10](https://indike.org/pramana/in.lit.kavya.duta.meghaduta*vulgate.1.10) mandaṃ mandaṃ nudati pavanaś cānukūlo yathā tvāṃ $ vāmaś cāyaṃ nadati madhuraṃ cātakas te sagandhaḥ & garbhādhānakṣaṇaparicayān nūnam ābaddhamālāḥ % seviṣyante nayanasubhagaṃ khe bhavantaṃ balākāḥ ### [1.11](https://indike.org/pramana/in.lit.kavya.duta.meghaduta*vulgate.1.11) kartuṃ yac ca prabhavati mahīm ucchilīndhrām avandhyāṃ $ tac chrutvā te śravaṇasubhagaṃ garjitaṃ mānasotkāḥ & ā kailāsād bisakisalayacchedapātheyavantaḥ % saṃpatsyante nabhasi bhavato rājahaṃsāḥ sahāyāḥ ### [1.12](https://indike.org/pramana/in.lit.kavya.duta.meghaduta*vulgate.1.12) āpṛcchasva priyasakham amuṃ tuṅgam āliṅgya śailaṃ $ vandyaiḥ puṃsāṃ raghupatipadair aṅkitaṃ mekhalāsu & kāle kāle bhavati bhavato yasya saṃyogam etya % snehavyaktiś ciravirahajaṃ muñcato bāṣpamuṣṇam ### [1.13](https://indike.org/pramana/in.lit.kavya.duta.meghaduta*vulgate.1.13) margaṃ tāvac chṛṇu kathayatas tvatprayāṇānurūpaṃ $ saṃdeśaṃ me tadanu jalada śroṣyasi śrotrapeyam & khinnaḥ khinnaḥ śihariṣu padaṃ nyasya gantāsi yatra % kṣīṇaḥ kṣīṇaḥ parilaghu payaḥ srotasāṃ copabhujya ### [1.14](https://indike.org/pramana/in.lit.kavya.duta.meghaduta*vulgate.1.14) adreḥ śṛṅgaṃ harati pavanaḥ kiṃ svid ity unmukhībhir $ dṛṣṭotsāhaś cakitacakitaṃ mugdhasiddhāṅganābhiḥ & sthānād asmāt sarasaniculād utpatodaṅmukhaḥ khaṃ % diṅnāgānāṃ pathi pariharan sthūlahastāvalepān ### [1.15](https://indike.org/pramana/in.lit.kavya.duta.meghaduta*vulgate.1.15) ratnacchāyāvyatikara iva prekṣyametatpurastād $ valmīkāgrāt prabhavati dhanuḥkhaṇḍam ākhaṇḍalasya & yena śyāmaṃ vapur atitarāṃ kāntim āpatsyate te % barheṇeva sphuritarucinā gopaveṣasya viṣṇoḥ ### [1.16](https://indike.org/pramana/in.lit.kavya.duta.meghaduta*vulgate.1.16) tvayy āyantaṃ kṛṣiphalam iti bhrūvikārān abhijñaiḥ $ prītisnigdhairjanapadavadhūlocanaiḥ pīyamānaḥ & sadyaḥsīrotkaṣaṇasurabhi kṣetram āruhya mālaṃ % kiṃcit paścād vraja laghugatir bhūya evottareṇa ### [1.17](https://indike.org/pramana/in.lit.kavya.duta.meghaduta*vulgate.1.17) tvām āsārapraśamitavanopaplavaṃ sādhu mūrdhnā $ vakṣyaty adhvaśramaparigataṃ sānumān āmrakūṭaḥ & na kṣudro 'pi prathamasukṛtāpekṣayā saṃśrayāya % prāpte mitre bhavati vimukhaḥ kiṃ punar yas tatthoccaiḥ ### [1.18](https://indike.org/pramana/in.lit.kavya.duta.meghaduta*vulgate.1.18) channopāntaḥ pariṇataphaladyotibhiḥ kānanāmrais $ tvayy ārūḍhe śikharam acalaḥ snigdhaveṇīsavarṇe & nūnaṃ yāsyaty amaramithunaprekṣaṇīyām avasthāṃ % madhye śyāmaḥ stana iva bhuvaḥ śeṣavistārapāṇḍuḥ ### [1.19](https://indike.org/pramana/in.lit.kavya.duta.meghaduta*vulgate.1.19) sthitvā tasmin vanacaravadhūbhuktakuñje muhūrtaṃ $ toyotsargadrutataragatis tatparaṃ vartma tīrṇaḥ & revāṃ drakṣyasy upalaviṣame vindhyapāde viśīrṇāṃ % bhakticchedair iva viracitāṃ bhūtim aṅge gajasya ### [1.19.p1](https://indike.org/pramana/in.lit.kavya.duta.meghaduta*vulgate.1.19.p1) {adhvaklāntaṃ pratimukhagataṃ sānumānāmrakūṭas $ tuṅgena tvāṃ jalada śirasā vakṣyati ślāghamānaḥ & āsāreṇa tvam api śamayes tasya naidāgham agniṃ % sadbhāvārdraḥ phalati na cireṇopakāro mahatsu // 1.19a} // ### [1.20](https://indike.org/pramana/in.lit.kavya.duta.meghaduta*vulgate.1.20) tasyās tiktair vanagajamadair vāsitaṃ vāntavṛṣṭir $ jambūkuñjapratihatarayaṃ toyam ādāya gaccheḥ & antaḥsāraṃ ghana tulayituṃ nānilaḥ śakṣyati tvāṃ % riktaḥ sarvo bhavati hi laghuḥ pūrṇatā gauravāya ### [1.21](https://indike.org/pramana/in.lit.kavya.duta.meghaduta*vulgate.1.21) nīpaṃ dṛṣṭvā haritakapiśaṃ kesarair ardharūḍhair $ āvirbhūtaprathamamukulāḥ kandalīś cānukaccham & jagdhvāraṇyeṣv adhikasurabhiṃ gandham āghrāya corvyāḥ % sāraṅgās te jalalavamucaḥ sūcayiṣyanti mārgam ### [1.22](https://indike.org/pramana/in.lit.kavya.duta.meghaduta*vulgate.1.22) ambhobindugrahaṇacaturāṃś cātakān vīkṣamāṇāḥ $ śreṇībhūtāḥ parigaṇanayā nirdiśanto balākāḥ & tvām āsādya stanitasamaye mānayiṣyanti siddhāḥ % sotkampāni priyasahacarīsaṃbhramāliṅgitāni ### [1.23](https://indike.org/pramana/in.lit.kavya.duta.meghaduta*vulgate.1.23) utpaśyāmi drutamapi sakhe matpriyārthaṃ yiyāsoḥ $ kālakṣepaṃ kakubhasurabhau parvate parvete te & śuklāpāṅgaiḥ sajalanayanaiḥ svāgatīkṛtya kekāḥ % pratudyātaḥ katham api bhavān gantum āśu vyavasyet ### [1.24](https://indike.org/pramana/in.lit.kavya.duta.meghaduta*vulgate.1.24) pāṇḍucchāyopavanavṛtayaḥ ketakaiḥ sūcibhinnair $ nīḍārambhair gṛhabalibhujām ākulagrāmacaityāḥ & tvayy āsanne pariṇataphalaśyāmajambūvanāntāḥ % saṃpatsyante katipayadinasthāyihaṃsā daśārṇāḥ ### [1.25](https://indike.org/pramana/in.lit.kavya.duta.meghaduta*vulgate.1.25) teṣāṃ dikṣu prathitavidiśālakṣaṇāṃ rājadhānīṃ $ gatvā sadyaḥ phalam avikalaṃ kāmukatvasya labdhā & tīropāntastanitasubhagaṃ pāsyasi svādu yasmāt % sabhrūbhaṅgaṃ mukham iva payo vetravatyāś calormi ### [1.26](https://indike.org/pramana/in.lit.kavya.duta.meghaduta*vulgate.1.26) nīcairākhyaṃ girim adhivases tatra viśrāmahetos $ tvatsamparkāt pulakitam iva prauḍhapuṣpaiḥ kadambaiḥ & yaḥ puṇyastrīratiparimalodgāribhir nāgarāṇām % uddāmāni prathayati śilāveśmabhir yauvanāni ### [1.27](https://indike.org/pramana/in.lit.kavya.duta.meghaduta*vulgate.1.27) viśrāntaḥ san vraja vananadītīrajānāṃ niṣiñcann $ udyānānāṃ navajalakaṇair yūthikājālkāni & gaṇḍasvedāpanayanarujāklāntakarṇotpalānāṃ % chāyādānāt kṣaṇaparicitaḥ puṣpalāvīmukhānām ### [1.28](https://indike.org/pramana/in.lit.kavya.duta.meghaduta*vulgate.1.28) vakraḥ panthā yadapi bhavataḥ prasthitasyottarāśāṃ $ saudhotsaṅgapraṇayavimukho mā sma bhūr ujjayinyāḥ & vidyuddāmasphuritacakritais tatra paurāṅganānāṃ % lolāpāṅgair yadi na ramase locanair vañcito 'si ### [1.29](https://indike.org/pramana/in.lit.kavya.duta.meghaduta*vulgate.1.29) vīcikṣobhastanitavihagaśreṇikāñcīguṇāyāḥ $ saṃsarpantyāḥ skhalitasubhagaṃ darśitāvartanābhaḥ & nirvindhyāyāḥ pathi bhava rasābhyantaraḥ saṃnipatya % strīṇām ādyaṃ praṇayavacanaṃ vibhramo hi priyeṣu ### [1.30](https://indike.org/pramana/in.lit.kavya.duta.meghaduta*vulgate.1.30) veṇībhūtapratanusalilā tām atītasya sindhuḥ $ pāṇḍucchāyā taṭaruhatarubhraṃśibhirjīrṇaparṇaiḥ & saubhāgyaṃ te subhaga virahāvasthayā vyañjayantī % kārśyaṃ yena tyajati vidhinā sa tvayaivopapādyaḥ ### [1.31](https://indike.org/pramana/in.lit.kavya.duta.meghaduta*vulgate.1.31) prāpyāvantīn udayanakathākovidagrāmavṛddhān $ pūrvoddiṣṭām upasara purīṃ śrīviśālāṃ viśālām & svalpībhūte sucaritaphale svargiṇāṃ gāṃ gatānāṃ % śeṣaiḥ puṇyair hṛtam iva divaḥ kāntimat khaṇḍam ekam ### [1.32](https://indike.org/pramana/in.lit.kavya.duta.meghaduta*vulgate.1.32) dīrghīkurvan paṭu madakalaṃ kūjitaṃ sārasānāṃ $ pratyūṣeṣu sphuṭitakamalāmodamaitrīkaṣāyaḥ & yatra strīṇāṃ harati surataglānim aṅgānukūlaḥ % śiprāvātaḥ priyatama iva prārthanācāṭukāraḥ ### [1.33](https://indike.org/pramana/in.lit.kavya.duta.meghaduta*vulgate.1.33) hārāṃs tārāṃs taralaguṭikān koṭiśaḥ śaṅkaśuktīḥ $ śaṣpaśyāmān marakatamaṇīn unmayūkhaprarohān & dṛṣṭvā yasyāṃ vipaṇiracitān vidrumāṇāṃ ca bhaṅgān % saṃlakṣyante salilanidhayas toyamātrāvaśeṣāḥ ### [1.34](https://indike.org/pramana/in.lit.kavya.duta.meghaduta*vulgate.1.34) pradyotasya priyaduhitaraṃ vatsarājo 'tra jahre $ haimaṃ tāladrumavanam abhūd atra tasyaiva rājñaḥ & atrodbhrāntaḥ kila nalagiriḥ stambham utpāṭya darpād % ity āgantūn ramayati jano yatra bandhūn abhijñaḥ ### [1.35](https://indike.org/pramana/in.lit.kavya.duta.meghaduta*vulgate.1.35) jālodgīrṇair upacitavapuḥ keśasaṃskāradhūpair $ bandhuprītyā bhavanaśikhjibhir dattanṛtyopahāraḥ & harmyeṣv asyāḥ kusumasurabhiṣv adhavakhedaṃ nayethā % lakṣmīṃ paśyaṃl lalitavanitāpādarāgāṅkiteṣu ### [1.36](https://indike.org/pramana/in.lit.kavya.duta.meghaduta*vulgate.1.36) bhartuḥ kaṇṭhacchavir iti gaṇaiḥ sādaraṃ vīkṣyamāṇaḥ $ puṇyaṃ yāyās tribhuvanaguror dhāma caṇḍīśvarasya & dhūtodyānaṃ kuvalayarajogandhibhir gandhavatyās % toyakrīḍāniratayuvatisnānatiktair marudbhiḥ ### [1.37](https://indike.org/pramana/in.lit.kavya.duta.meghaduta*vulgate.1.37) apy anyasmiñ jaladhara mahākālam āsādya kāle $ sthātavyaṃ te nayanaviṣayaṃ yāvad atyeti bhānuḥ & kurvan sandhyāvalipaṭahatāṃ śūlinaḥ ślāghanīyām % āmandrāṇāṃ phalam avikalaṃ lapsyase garjitānām ### [1.38](https://indike.org/pramana/in.lit.kavya.duta.meghaduta*vulgate.1.38) pādanyāsaiḥ kvaṇitaraśanās tatra līlāvadhūtai $ ratnacchāyākhacitavalibhiś cāmaraiḥ klāntahastāḥ & veśyās tvatto nakhapadasukhān prāpya varṣāgrabindūn % āmokṣyante tvayi madhukaraśreṇidīrghān kaṭakṣān ### [1.39](https://indike.org/pramana/in.lit.kavya.duta.meghaduta*vulgate.1.39) paścād uccairbhujataruvanaṃ maṇḍalenābhlīnaḥ $ sāṃdhyaṃ tejaḥ pratinavajapāpuṣparaktaṃ dadhānaḥ & nṛttārambhe hara paśupater ārdranāgājinecchāṃ % śāntodvegastimitanayanaṃ dṛṣṭabhaktir bhavānyā ### [1.40](https://indike.org/pramana/in.lit.kavya.duta.meghaduta*vulgate.1.40) gacchantīnāṃ ramāṇavasatiṃ yoṣitāṃ tatra naktaṃ $ ruddhāloke narapatipathe sūcibhedyais tamobhiḥ & saudāmanyā kanakanikaṣasnigdhayā darśayorvīṃ % toyotsargastanitamuharo mā ca bhūrviklavāstāḥ ### [1.41](https://indike.org/pramana/in.lit.kavya.duta.meghaduta*vulgate.1.41) tāṃ kasyāṃcid bhavanavalabhau suptapārāvatāyāṃ $ nītvā rātriṃ ciravilasanāt khinnavidyutkalatraḥ & dṛṣṭe sūrye punarapi bhavān vāhayedadhvaśeṣaṃ % mandāyante na khalu suhṛdāmabhyupatārthakṛtyāḥ ### [1.42](https://indike.org/pramana/in.lit.kavya.duta.meghaduta*vulgate.1.42) tasmin kāle nayanasaliaṃ yoṣitāṃ khaṇḍitānāṃ $ śāntiṃ neyaṃ praṇayibhir ato vartma bhānos tyajāśu & prāleyāstraṃ kamalavadanāt so.api hartuṃ nalinyāḥ % pratyāvṛttastvayi kararudhi syādanalpabhyasūyaḥ ### [1.43](https://indike.org/pramana/in.lit.kavya.duta.meghaduta*vulgate.1.43) gambhīrāyāḥ payasi saritaś cetasīva prasanne $ chāyātmāpi prakṛtisubhago lapsyate te praveśam & tasmād asyāḥ kumudaviśadāny arhasi tvaṃ na dhairyān % moghīkartuṃ caṭulaśaphorodvartanaprekṣitāni ### [1.44](https://indike.org/pramana/in.lit.kavya.duta.meghaduta*vulgate.1.44) tasyāḥ kiṃcit karadhṛtam iva prāptvāīraśākhaṃ $ hṛtvā nīlaṃ salilavasanaṃ muktarodhonitambam & prasthānaṃ te katham api sakhe lambamānasya bhāvi % jñātāsvādo vivṛtajaghanāṃ ko vihātuṃ samarthā ### [1.45](https://indike.org/pramana/in.lit.kavya.duta.meghaduta*vulgate.1.45) tvanniṣyandocchvasitavasudhāgandhasamparkaramyaḥ $ srotorandhradhvanitasubhagaṃ dantibhiḥ pīyamānaḥ & nīcair vāsyaty upajigamiṣor devapūrvaṃ giriṃ te % śīto vāyuḥ pariṇamayitā kānanodumbarāṇām ### [1.46](https://indike.org/pramana/in.lit.kavya.duta.meghaduta*vulgate.1.46) tatra skandaṃ niyatavasatiṃ puṣpameghīkṛtātmā $ puṣpāsāraiḥ snapayatu bhavān vyomagaṅgājalārdraiḥ & rakṣāhetor navaśaśibhṛtā vāsavīnāṃ camūnām % atyādityaṃ hutavahamukhe saṃbhṛtaṃ tad dhi teyaḥ ### [1.47](https://indike.org/pramana/in.lit.kavya.duta.meghaduta*vulgate.1.47) jyotirlekhāvalayi galitaṃ yasya barhaṃ bhavānī $ putrapremṇā kuvalayadalaprāpi karṇe karoti & dhautāpāṅgaṃ haraśaśirucā pāvakes taṃ mayūraṃ % paścād adrigrahaṇagurubhir garjitair nartayethāḥ ### [1.48](https://indike.org/pramana/in.lit.kavya.duta.meghaduta*vulgate.1.48) ārādyainaṃ śaravaṇabhavaṃ devam ullaṅghitādhvā $ siddhadvandvair jalakaṇabhayād vīṇibhir muktamārgaḥ & vyālambethāḥ surabhitanayālambhajāṃ mānayiṣyan % srotomūrtyā bhuvi pariṇatāṃ rantidevasya kīrtim ### [1.49](https://indike.org/pramana/in.lit.kavya.duta.meghaduta*vulgate.1.49) tvayy ādātuṃ jalam avanate śārṅgiṇo varṇacaure $ tasyāḥ sindhoḥ pṛthum api tanuṃ dūrabhāvāt pravāham & prekṣiṣyante gaganagatayo nūnam āvarjya dṛṣṭir % ekaṃ bhuktāguṇam iva bhuvaḥ sthūlamadhyendranīlam ### [1.50](https://indike.org/pramana/in.lit.kavya.duta.meghaduta*vulgate.1.50) tām uttīrya vraja paricitabhrūlatāvibhramāṇāṃ $ pakṣmotkṣepād uparivilasatkṛṣṇaśāraprabhāṇām & kundakṣepānugamadhukaraśrīmuṣām ātmabimbaṃ % pātrīkurvan daśapuravadhūnetrakautūhalānām ### [1.51](https://indike.org/pramana/in.lit.kavya.duta.meghaduta*vulgate.1.51) brahmāvartaṃ janapadam atha cchāyayā gāhamānaḥ $ kṣetraṃ kṣatrapradhanapiśunaṃ kauravaṃ tad bhajethāḥ & rājanyānāṃ śitaśaraśatair yatra gāṇḍīvadhanvā % dhārāpātais tvam iva kamalāny abhyavarṣan mukhāni ### [1.52](https://indike.org/pramana/in.lit.kavya.duta.meghaduta*vulgate.1.52) hitvā hālām abhimatarasāṃ revatīlocanāṅkāṃ $ bandhuprītyā samaravimukho lāṅgalī yāḥ siṣeve & kṛtvā tāsām adhigamam apāṃ saumya sārasvatīnām % antaḥ śuddhas tvam api bhavitā varṇamātreṇa kṛṣṇaḥ ### [1.53](https://indike.org/pramana/in.lit.kavya.duta.meghaduta*vulgate.1.53) tasmād gaccher anukanakhalaṃ śailarājāvatīrṇāṃ $ jāhnoḥ kanyāṃ sagaratanayasvargasopānapaṅktim & gaurīvaktrabhrukuṭiracanāṃ yā vihasyeva phenaiḥ % śambhoḥ keśagrahaṇam akarod indulagnormihastā ### [1.54](https://indike.org/pramana/in.lit.kavya.duta.meghaduta*vulgate.1.54) tasyāḥ pātuṃ suragaja iva vyomni paścārdhalambī $ tvaṃ ced acchasphaṭikaviśadaṃ tarkayes tiryag ambhaḥ & saṃsarpantyā sapadi bhavataḥ srotasi cchāyayāsau % syād asthānopagatayamunāsaṃgamevābhirāmā ### [1.55](https://indike.org/pramana/in.lit.kavya.duta.meghaduta*vulgate.1.55) āsīnānāṃ surabhitaśilaṃ nābhigandhair mṛgāṇāṃ $ tasyā eva prabhavam acalaṃ prāpya gauraṃ tuṣāraiḥ & vakṣyasy adhvaśramavinayena tasya śṛṅge niṣaṇṇaḥ % śobhāṃ śubhrāṃ trinayanavṛṣotkhātapaṅkopameyam ### [1.56](https://indike.org/pramana/in.lit.kavya.duta.meghaduta*vulgate.1.56) taṃ ced vāyau sarati saralaskandhasaṃghaṭṭajanmā $ bādhetolkākṣapitacamarībālabhāro davāgniḥ & arhasy enaṃ śamayitum alaṃ vāridhārāsahasrair % āpannārtipraśamanaphalāḥ saṃpado hy uttamānām ### [1.57](https://indike.org/pramana/in.lit.kavya.duta.meghaduta*vulgate.1.57) ye saṃrambhotpatanarabhasāḥ svāṅgabhaṅgāya tasmin $ muktādhvānaṃ sapadi śarabhā laṅghayeyur bhavantam & tān kurvīthās tumulakarakāvṛṣṭipātāvakīrṇan % ke vā na syuḥ paribhavapadaṃ niṣphalārambhayatnāḥ ### [1.58](https://indike.org/pramana/in.lit.kavya.duta.meghaduta*vulgate.1.58) tatra vyaktaṃ dṛṣadi caraṇanyāsam ardhendumauleḥ $ śaśvat siddhair upacitabaliṃ bhaktinamraḥ parīyāḥ & yasmin dṛṣṭe karaṇavigamād ūrdhvam uddhūtapāpāḥ % kalpiṣyante sthiragaṇapadaprāptaye śraddadhānāḥ ### [1.59](https://indike.org/pramana/in.lit.kavya.duta.meghaduta*vulgate.1.59) śabdāyante madhuram anilaiḥ kīcakāḥ pūryamāṇāḥ $ saṃraktābhis tripuravijayo gīyate kiṃnarābhiḥ & nirhrādas te muraja iva cet kandareṣu dhvaniḥ syāt % saṃgītārtho nanu paśupates tatra bhāvī samagraḥ ### [1.60](https://indike.org/pramana/in.lit.kavya.duta.meghaduta*vulgate.1.60) prāleyādrer upataṭam atikramya tāṃs tān viśeṣān $ haṃsadvāraṃ bhṛgupatiyaśovartma yat krauñcarandhram & tenodīcīṃ diśam anusares tiryag āyāmaśobhī % śyāmaḥ pādo baliniyamanābhyudyatasyeva viṣṇoḥ ### [1.61](https://indike.org/pramana/in.lit.kavya.duta.meghaduta*vulgate.1.61) gatvā cordhvaṃ daśamukhabhujocchvāsitaprasthasaṃdheḥ $ kailāsasya tridaśavanitādarpaṇasyātithiḥ syāḥ & śṛṅgocchrāyaiḥ kumudaviśadair yo vitatya sthitaḥ khaṃ % rāśībhūtaḥ pratidinam iva tryambakasyaṭṭahāsaḥ ### [1.62](https://indike.org/pramana/in.lit.kavya.duta.meghaduta*vulgate.1.62) utpaśyāmi tvayi taṭagate snigdhabhinnāñjanābhe $ sadyaḥ kṛttadviradadaśanacchedagaurasya tasya & śobhām adreḥ stimitanayanaprekṣaṇīyāṃ bhavitrīm % aṃsanyaste sati halabhṛto mecake vāsasīva ### [1.63](https://indike.org/pramana/in.lit.kavya.duta.meghaduta*vulgate.1.63) hitvā tasmin bhujagavalayaṃ śambhunā dattahastā $ krīḍāśaile yadi ca vicaret pādacāreṇa gaurī & bhaṅgībhaktyā viracitavapuḥ stambhitāntarjalaughaḥ % sopānatvaṃ kuru maṇitaṭārohaṇāyāgrayāyī ### [1.64](https://indike.org/pramana/in.lit.kavya.duta.meghaduta*vulgate.1.64) tatrāvaśyaṃ valayakuliśoddhaṭṭanodgīrṇatoyaṃ $ neṣyanti tvāṃ surayuvatayo yantradhārāgṛhatvam & tābhyo mokṣas tava yadi sakhe gharmalabdhasya na syāt % krīḍālolāḥ śravaṇaparuṣair garjitair bhāyayes tāḥ ### [1.65](https://indike.org/pramana/in.lit.kavya.duta.meghaduta*vulgate.1.65) hemāmbhojaprasavi salilaṃ mānasasyādadānaḥ $ kurvan kāmaṃ kṣaṇamukhapaṭaprītim airāvatasya & dhunvan kalpadrumakisalayān yaṃśukānīva vātair % nānāceṣṭair jaladalalitair nirviśes taṃ nagendram ### [1.66](https://indike.org/pramana/in.lit.kavya.duta.meghaduta*vulgate.1.66) tasyotsaṅge praṇayina iva srastagaṅgādukūlāṃ $ na tvaṃ dṛṣṭvā na punar alakāṃ jñāsyase kāmacārin & yā vaḥ kāle vahati salilodgāram uccair vimānā % muktājālagrathitam alakaṃ kāminīvābhravṛndam ### [1.66.p1](https://indike.org/pramana/in.lit.kavya.duta.meghaduta*vulgate.1.66.p1) {ūttarameghaḥ} ## Linked texts (8) - [Sarasvatīkaṇṭhābharaṇa (alaṅkāra)](https://indike.org/pramana/in.art.alamkara.sahitya.sarasvatikanthabharana.3.565.1) — Bhoja, Sanskrit - [Śṛṅgāraprakāśa](https://indike.org/pramana/in.art.alamkara.rasa.srngaraprakasa.5.p2.4) — Bhoja, Sanskrit - [Mahāsubhāṣitasaṃgraha](https://indike.org/pramana/in.lit.subhasita.subhasita.mahasubhasitasangraha.6611) — Sanskrit - [Vakroktijīvita](https://indike.org/pramana/in.art.alamkara.dhvani.vakroktijivita.29.3) — Kuntaka, Sanskrit - [Meghadūta (Vikrama) (ed. Mahopadhyaya Vinaysagar)](https://indike.org/pramana/in.jaina.post.kavya.laghu.meghaduta-vikrama*vinaysagar1958.3.2) — Sanskrit - [Kāvyānuśāsana](https://indike.org/pramana/in.art.alamkara.sahitya.kavyanusasana-vagbhata.1.p22) — Vāgbhaṭa (I), Sanskrit - [Śabdakalpadruma](https://indike.org/pramana/in.art.kosa.sabdakalpadruma.1048.16) — Rājā Sir Rādhākānta Deb, Sanskrit - [Rasakalpadruma (Jagannātha Miśra)](https://indike.org/pramana/in.art.alamkara.rasa.rasakalpadruma-jagannathamisra.7.2135) — Jagannātha Miśra 1600, Sanskrit --- Source: [https://indike.org/pramana/in.lit.kavya.duta.meghaduta*vulgate.1](https://indike.org/pramana/in.lit.kavya.duta.meghaduta*vulgate.1) · Pramāṇa