[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [Poetry (mahākāvya, lyric, messenger poems, stotra, Prakrit kāvya)](https://indike.org/pramana/in.lit.kavya) › [Messenger poems (sandeśakāvya)](https://indike.org/pramana/in.lit.kavya.duta) › [Meghadūta](https://indike.org/pramana/in.lit.kavya.duta.meghaduta) › [Vulgate (Mallinatha's text)](https://indike.org/pramana/in.lit.kavya.duta.meghaduta*vulgate) › 2 # Meghaduta 2: uttarameghaḥ Vulgate (Mallinātha's text) 2 - **Language:** Sanskrit ## Contents - [2.45](https://indike.org/pramana/in.lit.kavya.duta.meghaduta*vulgate.2.45) — 1 part ### uttarameghaḥ ### [2.1](https://indike.org/pramana/in.lit.kavya.duta.meghaduta*vulgate.2.1) vidhunvantaṃ lalitavanitāḥ sendracāpaṃ sacitrāḥ $ saṃgītāya prahatamurajāḥ snigdhagambhīraghoṣam & antastoyaṃ maṇimayabhuvas tuṅgam abhraṃlihāgrāḥ % prāsādās tvāṃ tulayitum alaṃ yatra tais tair viśeṣaiḥ ### [2.2](https://indike.org/pramana/in.lit.kavya.duta.meghaduta*vulgate.2.2) haste līlākamalam alake bālakundānuviddhaṃ $ nītā lodhraprasavarajasā pāṇḍutām ānane śrīḥ & cūḍāpāśe navakuravakaṃ cāru karṇe śirīṣaṃ % sīmante ca tvadupagamajaṃ yatra nīpaṃ vadhūnām ### [2.3](https://indike.org/pramana/in.lit.kavya.duta.meghaduta*vulgate.2.3) yatronmattabhramaramukharāḥ pādapā nityapuṣpā $ haṃsaśreṇīracitaraśanā nityapadmā nalinyaḥ & kekotkaṇṭhā bhuvanaśikhino nityabhāsvatkalāpā % nityajyotsnāḥ prahitatamovṛttiramyāḥ pradoṣāḥ ### [2.4](https://indike.org/pramana/in.lit.kavya.duta.meghaduta*vulgate.2.4) ānandotthaṃ nayanasalilamyatra nānyair nimittair $ nānyas tāpaṃ kusumaśarajād iṣṭasaṃyogasādhyāt & nāpy anyasmāt praṇayakalahād viprayogopapattir % vitteśānāṃ na ca khalu vayo yauvanād anyad asti ### [2.5](https://indike.org/pramana/in.lit.kavya.duta.meghaduta*vulgate.2.5) yasyāṃ yakṣāḥ sitamaṇimayāny etya harmyasthalāni $ jyotiśchāyākusumaracitāny uttamastrīsahāyāḥ & āsevante madhu ratiphalaṃ kalpavṛkṣaprasūtaṃ % tvadgambhīradhvaniṣu śanakaiḥ puṣkareṣv āhateṣu ### [2.6](https://indike.org/pramana/in.lit.kavya.duta.meghaduta*vulgate.2.6) mandākinyāḥ salilaśiśiraiḥ sevyamānā marudbhir $ mandārāṇām anutaṭaruhāṃ chāyayā vāritoṣṇāḥ & anveṣṭavyaiḥ kanakasikatāmuṣṭinikṣepagūḍhaiḥ % saṃkrīḍante maṇibhiramaraprārthitayā yatra kanyāḥ ### [2.7](https://indike.org/pramana/in.lit.kavya.duta.meghaduta*vulgate.2.7) nīvībandhocchvāsitaśithilaṃ yatra bimbādharāṇāṃ $ kṣaumaṃ rāgādanibhṛtakareṣv ākṣipatsu priyeṣu & arcistuṅgān abhimukham api prāpya ratnapradīpān % hrīmūḍhānāṃ bhavati viphalapreraṇā cūrṇamuṣṭiḥ ### [2.8](https://indike.org/pramana/in.lit.kavya.duta.meghaduta*vulgate.2.8) netrā nītāḥ satatagatinā yadvimānāgrabhūmīr $ ālekhyānāṃ salilakaṇikādoṣam utpādya sadyaḥ & śaṅkāspṛṣṭā iva jalamucas tvādṛśā jālamārgair % dhūmodgārānukṛtinipuṇā jarjarā niṣpatanti ### [2.9](https://indike.org/pramana/in.lit.kavya.duta.meghaduta*vulgate.2.9) yatra strīṇāṃ priyatamabhujocchvāsitāliṅgitānām $ aṅgaglāniṃ suratajanitāṃ tantujālāvalambāḥ & tvatsaṃrodhāpagamaviśadaś candrapādair niśīthe % vyālumpanti sphuṭajalalavasyandinaś candrakāntāḥ ### [2.10](https://indike.org/pramana/in.lit.kavya.duta.meghaduta*vulgate.2.10) akṣayyāntarbhavananidhayaḥ pratyahaṃ raktakaṇṭhair $ udgāyadbhir dhanapatiyaśaḥ kiṃnarair yatra sārdham & vaibhrājākhyaṃ vibudhavanitāvāramukhyasahāyā % baddhālāpā bahirupavanaṃ kāmino nirviśanti ### [2.11](https://indike.org/pramana/in.lit.kavya.duta.meghaduta*vulgate.2.11) gatyutkampād alakapatitair yatra mandārapuṣpaiḥ $ putracchedaiḥ kanakakamalaiḥ karṇavisraṃśibhiś ca & muktājālaiḥ stanaparisaracchinnasūtraiś ca hārair % naiśo mārgaḥ savitur udaye sūcyate kāminīnām ### [2.12](https://indike.org/pramana/in.lit.kavya.duta.meghaduta*vulgate.2.12) vāsaś citraṃ madhu nayanayor vibhramādeśadakṣaṃ $ puṣpodbhedaṃ saha kisalayair bhūṣaṇānāṃ vikalpam & lākṣārāgaṃ caraṇakamalanyāsayogyaṃ ca yasyām % ekaḥ sūte sakalam abalāmaṇḍanaṃ kalpavṛkṣaḥ ### [2.13](https://indike.org/pramana/in.lit.kavya.duta.meghaduta*vulgate.2.13) patraśyāmā dinakarahayaspardhino yatra vāhāḥ $ śailodagrās tvam iva kariṇo vṛṣṭimantaḥ prabhedāt & yodhāgraṇyaḥ pratidaśamukhaṃ saṃyuge tasthivāṃsaḥ % pratyādiṣṭābharaṇarucayaś candrahāsavraṇāṅkaiḥ ### [2.14](https://indike.org/pramana/in.lit.kavya.duta.meghaduta*vulgate.2.14) matvā devaṃ dhanapatisakhaṃ yatra sākṣād vasantaṃ $ prāyaś cāpaṃ na vahati bhayān manmathaḥ ṣaṭpadajyam & sabhrūbhaṅgaprahitanayanaiḥ kāmilakṣyeṣv amoghais % tasyārambhaś caturavanitāvibhramair eva siddhaḥ ### [2.15](https://indike.org/pramana/in.lit.kavya.duta.meghaduta*vulgate.2.15) tatrāgāraṃ dhanapatigṛhān uttareṇāsmadīyaṃ $ dūrāl lakṣyaṃ surapatidhanuścāruṇā toraṇena & yasyopānte kṛtakatanayaḥ kāntayā vardhito me % hastaprāpyastavakanamito bālamandāravṛkṣaḥ ### [2.16](https://indike.org/pramana/in.lit.kavya.duta.meghaduta*vulgate.2.16) vāpī cāsmin marakataśilābaddhasopānamārgā $ haimaiśchannā vikacakamalaiḥ snigdhavaidūryanālaiḥ & yasyās toye kṛtavasatayo mānasaṃ saṃnikṛṣṭaṃ % nādhyāsyanti vyapagataśucas tvām api prekṣya haṃsāḥ ### [2.17](https://indike.org/pramana/in.lit.kavya.duta.meghaduta*vulgate.2.17) tasyās tīre racitaśikharaḥ peśalair indranīlaiḥ $ krīḍāśailaḥ kanakakadalīveṣṭanaprekṣaṇīyaḥ & madgehinyāḥ priya iti sakhe cetasā kātareṇa % prekṣyopāntasphuritataḍitaṃ tvāṃ tam eva smarāmi ### [2.18](https://indike.org/pramana/in.lit.kavya.duta.meghaduta*vulgate.2.18) raktāśokaś calakisalayaḥ kesaraś cātra kāntaḥ $ pratyāsannau kuruvakavṛter mādhavīmaṇḍapasya & ekaḥ sakhyās tava saha mayā vāmapādābhilāṣī % kāṅkṣaty anyo vadanamadirāṃ dohadacchadmanāsyāḥ ### [2.19](https://indike.org/pramana/in.lit.kavya.duta.meghaduta*vulgate.2.19) tanmadhye ca sphaṭikaphalakā kāñcanī vāsayaṣṭir $ mūle baddhā maṇibhir anatiprauḍhavaṃśaprakāśaiḥ & tālaiḥ śiñjāvalayasubhagair nartitaḥ kāntayā me % yām adhyāste divasavigame nīlakaṇṭhaḥ suhṛd vaḥ ### [2.20](https://indike.org/pramana/in.lit.kavya.duta.meghaduta*vulgate.2.20) ebhiḥ sādho hṛdayanihitair lakṣaṇair lakṣayethā $ dvāropānte likhitavapuṣau śaṅkhapadmau ca dṛṣṭvā & kṣāmacchāyāṃ bhavanam adhunā madviyogena nūnaṃ % sūryāpāye na khalu kamalaṃ puṣyati svāmabhikhyām ### [2.21](https://indike.org/pramana/in.lit.kavya.duta.meghaduta*vulgate.2.21) gatvā sadyaḥ kalabhatanutāṃ śīghrasaṃpātahetoḥ $ krīḍāśaile prathamakathite ramyasānau niṣaṇṇaḥ & arhasy antarbhavanapatitāṃ kartum alpālpabhāsaṃ % khadyotālīvilasitanibhāṃ vidyudunmeṣadṛṣṭim ### [2.22](https://indike.org/pramana/in.lit.kavya.duta.meghaduta*vulgate.2.22) tanvī śyāmā śikharīdaśanā pakvabimbādharauṣṭhī $ madhye kṣāmā cakitahariṇīprekṣaṇā nimnanābhiḥ & śroṇībhārād alasagamanā stokanamrā stanābhyāṃ % yā tatra syād yuvatīviṣaye sṛṣṭir ādyaiva dhātuḥ ### [2.23](https://indike.org/pramana/in.lit.kavya.duta.meghaduta*vulgate.2.23) tāṃ jānīthāḥ parimitakathāṃ jīvitaṃ me dvitīyaṃ $ dūrībhūte mayi sahacare cakravākīm ivaikām & gāḍhotkaṇṭhāṃ guruṣu divaseṣv eṣu gacchatsu bālāṃ % jātāṃ manye śiśiramathitāṃ padminīṃ vānyarūpām ### [2.24](https://indike.org/pramana/in.lit.kavya.duta.meghaduta*vulgate.2.24) nūnaṃ tasyāḥ prabalaruditocchūnanetraṃ priyāyā $ niḥśvāsānām aśiśiratayā bhinnavarṇādharoṣṭham & hastanyastaṃ mukham asakalavyakti lambālakatvād % indor dainyaṃ tvadanusaraṇakliṣṭakānter bibharti ### [2.25](https://indike.org/pramana/in.lit.kavya.duta.meghaduta*vulgate.2.25) āloke te nipatati purā sā balivyākulā vā $ matsādṛśyaṃ virahatanu vā bhāvagamyaṃ likhantī & pṛcchantī vā madhuravacanāṃ sārikāṃ pañjarasthāṃ % kaccid bhartuḥ smarasi rasike tvaṃ hi tasya priyeti ### [2.26](https://indike.org/pramana/in.lit.kavya.duta.meghaduta*vulgate.2.26) utsaṅge vā malinavasane saumya nikṣipya vīṇāṃ $ madgotrāṅkaṃ viracitapadaṃ geyam udgātukāmā & tantrīm ārdrāṃ nayanasalilaiḥ sārayitvā kathaṃcid % bhūyo bhūyaḥ svayam api kṛtāṃ mūrcchanāṃ vismarantī ### [2.27](https://indike.org/pramana/in.lit.kavya.duta.meghaduta*vulgate.2.27) śeṣān māsān virahadivāsasthāpitasyāvadher vā $ vinyasyantī bhuvi gaṇanayā dehalīdattapuṣpaiḥ & sambhogaṃ vā hṛdayanihitārambham āsvādayantī % prāyeṇaite ramaṇaviraheṣv aṅganānāṃ vinodāḥ ### [2.28](https://indike.org/pramana/in.lit.kavya.duta.meghaduta*vulgate.2.28) savyāpāram ahani na tathā pīḍayed viprayogaḥ $ śaṅke rātrau gurutaraśucaṃ nirvinodāṃ sakhīṃ te & matsandeśaḥ sukhayitum alaṃ paśya sādhvīṃ niśīthe % tām unnidrām avaniśayanāṃ saudhavātāyanasthaḥ ### [2.29](https://indike.org/pramana/in.lit.kavya.duta.meghaduta*vulgate.2.29) ādhikṣāmāṃ virahaśayane saṃniṣaṇṇaikapārśvāṃ $ prācīmūle tanum iva kalāmātraśeṣāṃ himāṃśoḥ & nītā rātriḥ kṣaṇa iva mayā sārdham icchāratair yā % tām evoṣṇair virahamahatīm aśrubhir yāpayantīm ### [2.30](https://indike.org/pramana/in.lit.kavya.duta.meghaduta*vulgate.2.30) pādān indoramṛtaśiśirāñjalamārgapraviṣṭān $ pūrvaprītyā gatamabhumukhaṃ saṃnivṛttaṃ tathaiva & cakṣuḥ khedāt salilagurubhiḥ pakṣmabhiśchādayantīṃ % sābhre.ahnīva sthalakamalinī na prabhuddhāṃ na suptām ### [2.31](https://indike.org/pramana/in.lit.kavya.duta.meghaduta*vulgate.2.31) niḥśvāsenādharakisalayakleśinā vikṣipantīṃ $ śuddhasnānāt paruṣamalakaṃ nūnamāgaṇṇdalambam & matsaṃbhogaḥ kathamupanamet svapnajo.apīti nidrām % ākāṅkṣantīṃ nayanasalilotpīḍaruddhāvakāśam ### [2.32](https://indike.org/pramana/in.lit.kavya.duta.meghaduta*vulgate.2.32) ādye baddhā virahadivase yā śikhā dāma hitvā $ śāpasyānte vigalitaśucā tāṃ mayodveṣṭanīyām & sparśakliṣṭām ayamitanakhenāsakṛtsārayantīṃ % gaṇḍābhogāt kaṭhinaviṣamām ekaveṇīṃ kareṇa ### [2.33](https://indike.org/pramana/in.lit.kavya.duta.meghaduta*vulgate.2.33) sā saṃnyastābharaṇam abalā peśalaṃ dhārayantī $ śayyotsaṅge nihitam asakṛd duḥkhaduḥkhena gātram & tvām apy asraṃ navajalamayaṃ mocayiṣyaty avaśyaṃ % prāyaḥ sarvo bhavati karuṇāvṛttir ārdrāntarātmā ### [2.34](https://indike.org/pramana/in.lit.kavya.duta.meghaduta*vulgate.2.34) jāne sakhyās tava mayi manaḥ saṃbhṛtasnehamasmād $ itthaṃbhūtāṃ prathamavirahe tām ahaṃ tarkayāmi & vācālaṃ māṃ na khalu subhagaṃmanyabhāvaḥ karoti % pratyakṣaṃ te nikhilam acirād bhrātar uktaṃ mayā yat ### [2.35](https://indike.org/pramana/in.lit.kavya.duta.meghaduta*vulgate.2.35) ruddhāpāṅgaprasaram alakair añjanasnehaśūnyaṃ $ pratyādeśād api ca madhuno vismṛtabhrūvilāsam & tvayy āsanne nayanam uparispandi śaṅke mṛgākṣyā % mīnakṣobhāc calakuvalayaśrītulām eṣyatīti ### [2.36](https://indike.org/pramana/in.lit.kavya.duta.meghaduta*vulgate.2.36) vāmaś cāsyāḥ kararuhapadair mucyamāno madīyair $ muktājālaṃ ciraparicitaṃ tyājito daivagatyā & saṃbhogānte mama samucito hastasaṃvāhamānāṃ % yāsyaty ūruḥ sarasakadalīstambhagauraś calatvam ### [2.37](https://indike.org/pramana/in.lit.kavya.duta.meghaduta*vulgate.2.37) tasmin kāle jalada yadi sā labdhanidrāsukhā syād $ anvāsyaināṃ stanitavimukho yāmamātraṃ sahasva & mā bhūd asyāḥ praṇayini mayi svapnalabdhe kathaṃcit % sadyaḥ kaṇṭhacyutabhujalatāgranthi gāḍhopagūḍham ### [2.38](https://indike.org/pramana/in.lit.kavya.duta.meghaduta*vulgate.2.38) tām utthāpya svajalakaṇikāśītalenānilena $ pratyāśvastāṃ samam abhinavair jālakair mālatīnām & vidyudgarbhaḥ stimitanayanāṃ tvatsanāthe gavākṣe % vaktuṃ dhīraḥ stanitavacanair māninīṃ prakramethāḥ ### [2.39](https://indike.org/pramana/in.lit.kavya.duta.meghaduta*vulgate.2.39) bhartur mitraṃ priyam avidhave viddhi mām ambuvāhaṃ $ tatsaṃdeśair hṛdayanihitair āgataṃ tvatsamīpam & yo vṛndāni tvarayati pathi śramyatāṃ proṣitānāṃ % mandrasnigdhair dhvanibhir abalāveṇimokṣotsukāni ### [2.40](https://indike.org/pramana/in.lit.kavya.duta.meghaduta*vulgate.2.40) ity ākhyāte pavanatanayaṃ maithilīvonmukhī sā $ tvām utkaṇṭhocchvasitahṛdayā vīkṣya sambhāvya caiva & śroṣyaty asmāt param avahitā saumya sīmantinīnāṃ % kāntodantaḥ suhṛdupanataḥ saṃgamāt kiṃcid ūnaḥ ### [2.41](https://indike.org/pramana/in.lit.kavya.duta.meghaduta*vulgate.2.41) tām āyuṣman mama ca vacanād ātmanaś copakartuṃ $ brūyā evaṃ tava sahacaro rāmagiryāśramasthaḥ & avyāpannaḥ kuśalam abale pṛcchati tvāṃ viyuktaḥ % pūrvābhāṣyaṃ sulabhavipadāṃ prāṇinām etad eva ### [2.42](https://indike.org/pramana/in.lit.kavya.duta.meghaduta*vulgate.2.42) aṅgenāṅgaṃ pratanu tanunā gāḍhataptena taptaṃ $ sāsreṇāśrudrutam aviratotkaṇṭham utkaṇṭhitena & uṣṇocchvāsaṃ samadhikatarocchvāsinā dūravartī % saṃkalpais tair viśati vidhinā vairiṇā ruddhamārgaḥ ### [2.43](https://indike.org/pramana/in.lit.kavya.duta.meghaduta*vulgate.2.43) śabdākhyeyaṃ yadapi kila te yaḥ sakhīnāṃ purastāt $ karṇe lolaḥ kathayitum abhūd ānanasparśalobhāt & so 'tikrāntaḥ śravaṇaviṣayaṃ locanābhyām adṛṣṭas % tvām utkaṇṭhāviracitapadaṃ manmukhenedam āha ### [2.44](https://indike.org/pramana/in.lit.kavya.duta.meghaduta*vulgate.2.44) śyāmāsv aṅgaṃ cakitahariṇīprekṣaṇe dṛṣṭipātaṃ $ vaktracchāyāṃ śaśini śikhināṃ barhabhāreṣu keśān & utpaśyāmi pratanuṣu nadīvīciṣu bhrūvilāsān % hantaikasmin kvacid api na te caṇḍi sādṛśyam asti ### [2.45](https://indike.org/pramana/in.lit.kavya.duta.meghaduta*vulgate.2.45) tvām ālikhya praṇayakupitāṃ dhāturāgaiḥ śilāyām $ ātmānaṃ te caraṇapatitaṃ yāvad icchāmi kartum & asrais tāvan muhur upacitair dṛṣṭir ālupyate me % krūras tasminn api na sahate saṃgamaṃ nau kṛtāntaḥ ### [2.45.p1](https://indike.org/pramana/in.lit.kavya.duta.meghaduta*vulgate.2.45.p1) dhārāsiktasthalasurabhiṇas tvanmukhasyāsya bāle $ dūrībhūtaṃ pratanum api māṃ pañcabāṇaḥ kṣiṇoti & gharmānte 'smin vigaṇaya kathaṃ vāsarāṇi vrajeyur % diksaṃsaktapravitataghanavyastasūryātapāni // 2.45a // ### [2.46](https://indike.org/pramana/in.lit.kavya.duta.meghaduta*vulgate.2.46) mām ākāśapraṇihitabhujaṃ nirdayāśleṣahetor $ labdhāyās te katham api mayā svapnasandarśaneṣu & paśyantīnāṃ na khalu bahuśo na sthalīdevatānāṃ % muktāsthūlās tarukisalayeṣv aśruleśāḥ patanti ### [2.47](https://indike.org/pramana/in.lit.kavya.duta.meghaduta*vulgate.2.47) bhittvā sadyaḥ kisalayapuṭān devadārudrumāṇāṃ $ ye tatkṣīrasrutisurabhayo dakṣiṇena pravṛttāḥ & āliṅgyante guṇavati mayā te tuṣārādrivātāḥ % pūrvaṃ spṛṣṭaṃ yadi kila bhaved aṅgam ebhis taveti ### [2.48](https://indike.org/pramana/in.lit.kavya.duta.meghaduta*vulgate.2.48) saṃkṣipyante kṣana iva kathaṃ dīrghayāmā triyāmā $ sarvāvasthāsv ahar api kathaṃ mandamandātapaṃ syāt & itthaṃ cetaś caṭulanayane durlabhaprārthanaṃ me % gāḍhoṣmābhiḥ kṛtam aśaraṇaṃ tvadviyogavyathābhiḥ ### [2.49](https://indike.org/pramana/in.lit.kavya.duta.meghaduta*vulgate.2.49) nanv ātmānaṃ bahu vigaṇayann ātmanaivāvalambe $ tatkalyāṇi tvam api nitarāṃ mā gamaḥ kātaratvam & kasyātyantaṃ sukham upanataṃ duḥkham ekāntato vā % nīcair gacchaty upari ca daśā cakranemikrameṇa ### [2.50](https://indike.org/pramana/in.lit.kavya.duta.meghaduta*vulgate.2.50) śāpānto me bhujagaśayanād utthite śārṅgapāṇau $ śeṣān māsān gamaya caturo locane mīlayitvā & paścād āvāṃ virahaguṇitaṃ taṃ tam ātmābhilāṣaṃ % nirvekṣyāvaḥ pariṇataśaraccandrikāsu kṣapāsu ### [2.51](https://indike.org/pramana/in.lit.kavya.duta.meghaduta*vulgate.2.51) bhūyaścāha tvam api śayane kaṇṭhalagnā purā me $ nidrāṃ gatvā kim api rudatī sasvaraṃ viprabuddhā & sāntarhāsaṃ kathitam asakṛt pṛcchataś ca tvayā me % dṛṣṭaḥ svapne kitava ramayan kām api tvaṃ mayeti ### [2.52](https://indike.org/pramana/in.lit.kavya.duta.meghaduta*vulgate.2.52) etasmān māṃ kuśalinam abhijñānadānād viditvā $ mā kaulīnād asitanayane mayy aviśvāsinī bhūḥ & snehān āhuḥ kim api virahe dhvaṃsinas te tv abhogād % iṣṭe vastuny upacitarasāḥ premarāśībhavanti ### [2.53](https://indike.org/pramana/in.lit.kavya.duta.meghaduta*vulgate.2.53) āśvāsyaivaṃ prathamavirahodagraśokāṃ sakhīṃ te $ śailād āśu trinayanavṛṣotkhātakūṭān nivṛttaḥ & sābhijñānaprahitakuśalais tadvacobhir mamāpi % prātaḥ kundaprasavaśithilaṃ jīvitaṃ dhārayethāḥ ### [2.54](https://indike.org/pramana/in.lit.kavya.duta.meghaduta*vulgate.2.54) kaccit saumya vyavasitam idaṃ bandhukṛtyaṃ tvayā me $ pratyādeśān na khalu bhavato dhīratāṃ kalpayāmi & niḥśabdo 'pi pradiśasi jalaṃ yācitaś cātakebhyaḥ % pratyuktaṃ hi praṇayiṣu satām īpsitārthakriyaiva ## Linked texts (14) - [Sarasvatīkaṇṭhābharaṇa (alaṅkāra)](https://indike.org/pramana/in.art.alamkara.sahitya.sarasvatikanthabharana.4.1066.1) — Bhoja, Sanskrit - [Mahāsubhāṣitasaṃgraha](https://indike.org/pramana/in.lit.subhasita.subhasita.mahasubhasitasangraha.6647) — Sanskrit - [Rasārṇavasudhākara](https://indike.org/pramana/in.art.natya.rasarnavasudhakara.2.179) — Siṃhabhūpāla, Sanskrit - [Vakroktijīvita](https://indike.org/pramana/in.art.alamkara.dhvani.vakroktijivita.56.3) — Kuntaka, Sanskrit - [Kāvyamīmāṃsā](https://indike.org/pramana/in.art.alamkara.kavisiksa.kavyamimamsa.585) — Rājaśekhara, Sanskrit - [Śṛṅgāraprakāśa](https://indike.org/pramana/in.art.alamkara.rasa.srngaraprakasa.8.p1.1) — Bhoja, Sanskrit - [Kāvyasaṅgraha](https://indike.org/pramana/in.lit.subhasita.subhasita.kavyasangraha.38.70) — Sanskrit - [Śīladūtakāvya](https://indike.org/pramana/in.lit.kavya.duta.jaina.siladutakavya.2.77) — Cāritrasundara, Sanskrit - [Tarkakaumudī](https://indike.org/pramana/in.darsana.nyaya_vaisesika.tarkakaumudi.5.77) — Laugākṣi Bhāskara 1600, Sanskrit - [Rasasudhākara](https://indike.org/pramana/in.art.alamkara.rasa.rasasudhakara.2.197) — Sanskrit - [Meghadūta (Vikrama) (ed. Mahopadhyaya Vinaysagar)](https://indike.org/pramana/in.jaina.post.kavya.laghu.meghaduta-vikrama*vinaysagar1958.3.73) — Sanskrit - [Kavicintāmaṇi](https://indike.org/pramana/in.art.alamkara.sahitya.kavicintamani.19.30) — Gopīnātha Kavibhūṣaṇa, Sanskrit - [Alaṅkāramahodadhi](https://indike.org/pramana/in.art.alamkara.sahitya.alankaramahodadhi.5.215) — Narendraprabha, Sanskrit - [Kāvyānuśāsana](https://indike.org/pramana/in.art.alamkara.sahitya.kavyanusasana-vagbhata.2.p5) — Vāgbhaṭa (I), Sanskrit --- Source: [https://indike.org/pramana/in.lit.kavya.duta.meghaduta*vulgate.2](https://indike.org/pramana/in.lit.kavya.duta.meghaduta*vulgate.2) · Pramāṇa