[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [Poetry (mahākāvya, lyric, messenger poems, stotra, Prakrit kāvya)](https://indike.org/pramana/in.lit.kavya) › [Shorter narrative and descriptive poems](https://indike.org/pramana/in.lit.kavya.khanda) › [Musical poems after the Gītagovinda](https://indike.org/pramana/in.lit.kavya.khanda.gitakavya) › [Gītagovinda](https://indike.org/pramana/in.lit.kavya.khanda.gitakavya.gitagovinda-2) › [Commentary of Mananka](https://indike.org/pramana/in.lit.kavya.khanda.gitakavya.gitagovinda-2!mananka) › 26 # Gita Govinda 26 Commentary of Mānāṅka 26 - **Language:** Sanskrit ### [26.1](https://indike.org/pramana/in.lit.kavya.khanda.gitakavya.gitagovinda-2!mananka.26.1) rādhā hariṃ dadarśa| kimbhūtaṃ harim| ekarasam ¹⁰eko'dvitīyaścāsau rasa-śceti vartate yasmin sa tathā tam| atiśayakāmābhilāṣasaṃyuktamityarthaḥ| athavā ekasmin ratisukhe raso rāgo yasya sa tathā tam| punaḥ kimbhūtam| ciramabhilaṣitavilāsam| ciraṃ cirakālam āsādya abhilaṣito vilāso ratikeliryena sa tathā tam| punaḥ kimbhūtam| rādhāvadanavilokanavikasitavividhavikāravibhaṅgam| vividho nānāprakāraścāsau ¹khedādivikāraśceti| rādhāyāḥ vadanaṃ tasya vilokanaṃ darśanaṃ tena vikasitaḥ prakaṭitaḥ sa cāsau vividhavikāraśca tena vibhaṅgaṃ jṛmbhaṇādiryasmin sa tathā tam| kamiva| jalanidhimiva| kimbhūtam| vidhumaṇḍala-darśanataralitatuṅgataraṅgaṃ vidhoścandrasya maṇḍalaṃ tena taralitā vardhitāstuṅgāḥ| uccā-staraṅgāḥ ūrmayo yasmin sa tathā tam| punaḥ kimbhūtaṃ harim| guruharṣavaśaṃvada-vadanaṃ gururgariṣṭhaścāsau harṣaṃ ānandaśceti tasya vaśaṃvadam ²anusāri vadanam ānanaṃ yasya sa tathā tam| ³mukhaṃ svakīyaprasannatācihnavadphalajñāpakamityarthaḥ| punaḥ kimbhūtam| ⁴anaṅganivāsaṃ kandarpavasatisthānam| yadvā anaṅgavikāśaṃ prabuddhakandarpamityarthaḥ| hāramamaletyādi | ### [26.2](https://indike.org/pramana/in.lit.kavya.khanda.gitakavya.gitagovinda-2!mananka.26.2) punaḥ kimbhūtam| urasi vakṣasi hāraṃ dadhataṃ vahantam| kimbhūtam| amala-taratāram atiśayenāmalaḥ amalataraḥ sa cāsau tāro ⁶muktāśuddhiryasmin sa tathā tam| kiṃ kṛtvā dadhatam| parilambya avamucya| kathaṃ yathā bhavati| vidūraṃ atyadhaḥ yathā syāttathā| kamiva| yamunājalapūramiva yamunāyāḥ jalaṃ tasya pūraḥ samūhastam| kimbhūtam| sphuṭataraphenakadambakarambitaṃ sphuṭatarāśca te phenāśca teṣāṃ kadambaḥ samūhaḥ tena karambito yuktastam| śyāmaletyādi | ### [26.3](https://indike.org/pramana/in.lit.kavya.khanda.gitakavya.gitagovinda-2!mananka.26.3) punaḥ kimbhūtam| śyāmalamṛdulakalevaramaṇḍalaṃ śyāmalaṃ ca tanmṛdulaṃ komalaṃ ca evaṃ viśiṣṭaṃ kalevarasya śarīrasya maṇḍalaṃ yasya sa tathā tam| punaḥ kimbhūtam| adhigatagauradukūlam adhigataṃ parihitaṃ gauraṃ pītaṃ dukūlaṃ kauśeyaṃ yena sa tathā tam| kimiva| nīlanalinamiva nīlaṃ ca tat nalinaṃ ceti| kimbhūtam| pīta-parāgapaṭalabharavalayitamūlaṃ pītaścāsau parāgaśceti tasya paṭalaṃ nikurumbaṃ tasya bharaḥ ādhikyaṃ tena valayitaṃ pariveṣṭitaṃ mūlaṃ yasyaṃ sa tathā tam| nīlotpalaṃ yadā pītaparāgeṇa veṣṭitaṃ bhavati tadā nīlanalinaṃ bhavatītyāśayaḥ| upamālaṅkāraḥ| taraletyādi | ### [26.4](https://indike.org/pramana/in.lit.kavya.khanda.gitakavya.gitagovinda-2!mananka.26.4) punaḥ kimbhūtam | taraladṛgañcalacalanamanoharavadanajanitaratirāgaṃ manoharaṃ vadanaṃ ceti taralau ca tau cañcalau dṛgañcalau nayanaprāntau ca tayoścalanaṃ tena manoharaṃ vadanaṃ ca tena janitaḥ utpādito ratirāgo yena sa tathā tam | arthāt rādhāyāḥ | śaradi śaratkāle | taḍāgamiva sarovaramiva | kimbhūtam | sphuṭakamalodarakhelitakhañjanayugaṃ khañjanaḥ pakṣiviśeṣaḥ tasya yugaṃ yasmin taḍāge tattathā tat | vadanetyādi | ### [26.5](https://indike.org/pramana/in.lit.kavya.khanda.gitakavya.gitagovinda-2!mananka.26.5) punaḥ kimbhūtam | vadanakamalapariśīlanamilitamihirasamakuṇḍalaśobhaṃ mihiraḥ savitā tena same samāne kuṇḍale militavadanameva kamale yasyā sa tathā tam | punaḥ kimbhūtam | smitarucirucirasamullasitādharapallavakṛtaratilobhaṃ samullasitaḥ samyagvikasitaścāsau adharapallavaśca tasminnivaddhā smitaruciḥ śobhā tayā ruciraḥ sundaraścāsau samullasito'dharapallavaśca tena kṛto ratilobho yena sa tathā tam | śaśītyādi | ### [26.6](https://indike.org/pramana/in.lit.kavya.khanda.gitakavya.gitagovinda-2!mananka.26.6) punaḥ kimbhūtam | śaśikiraṇacchuritodarajaladharasundarakusumasukeśaṃ suṣṭhu śobhanā atisulolāśca te keśāśca kusumairyuktāḥ sukeśāḥ, śaśī candramāḥ tasya kiraṇā aṃśavaḥ taiḥ cchuritaṃ saṃghṛṣṭaṃ miśritam udaraṃ yasya sa tathā cāsau jaladharo meghaśca tadvat \[sundarāḥ\] sukumārāḥ kusumasukeśā yasya sa tathā tam | punaḥ kimbhūtam | timiroditavidhumaṇḍalanirmalamalayajatilakaniveśaṃ malayajaṃ candanaṃ tasya tilakaḥ timire ghane tamasi uditaṃ vidhoścandrasya maṇḍalaṃ tadvannirmalaścāsau malayajatilakaśca tasya niveśo yasya sa tathā tam | vipuletyādi | ### [26.7](https://indike.org/pramana/in.lit.kavya.khanda.gitakavya.gitagovinda-2!mananka.26.7) punaḥ kimbhūtam | vipulapulakabharadanturitaṃ vipulo mahān pulakaḥ tasya bharo romāñcātiśayaḥ tena danturitaḥ vyāptaḥ sa tathā tam | punaḥ kimbhūtam | maṇigaṇakiraṇasamūhasamujjvalabhūṣaṇaśubhagaśarīraṃ maṇīnāṃ gaṇo nicayaḥ tasya kiraṇāḥ aṃśavaḥ teṣāṃ samūhaḥ tena samujjvalāni ca tāni bhūṣaṇānyaṅgadavalayakirīṭādīni taiḥ subhagaṃ sundaraṃ śarīraṃ yasya sa tathā tam | ¹pāṭhāntare| kimbhūtam| bhūṣaṇa-maṇigaṇakiraṇaviśaṅkitavirahadahanaparivāraṃ bhūṣaṇānāṃ maṇigaṇaḥ samūhaḥ tasya kiraṇāḥ aṃśavaḥ taiḥ viśaṅkito viśeṣeṇa śaṅkāyukto virahadahano virahāgnistasya parivāro yasya sa tathā tam | śrījayadevetyādi | ### [26.8](https://indike.org/pramana/in.lit.kavya.khanda.gitakavya.gitagovinda-2!mananka.26.8) he bhaktajanāḥ hariṃ śrīkṛṣṇaṃ hṛdi antaḥkaraṇe suciraṃ nidhāya praṇamata| kimbhūtam| ²sundaramatiśayena atisundaraṃ śobhanaṃ vibhavavibhūṣaṇabhāram| bhūṣaṇānāṃ bhāraḥ samūho vibhava aiśvaryam atiśobhito vibhavavibhūṣaṇabhāro yasya sa tathā tam| punaḥ kimbhūtam| śrījayadevabhaṇitam| athavā śrījayadevabhaṇitavibhava-dviguṇīkṛtabhūṣaṇabhāram| śrījayadevasya bhaṇitaṃ gītaṃ tasya vibhavaḥ tena dviguṇīkṛto bhūṣaṇabhāro yasya sa tathā tam| punaḥ kimbhūtam| sukṛtodayasāraṃ puṇyodgamasya balamityarthaḥ| sukṛtasya puṇyasya udayaḥ utpattiḥ tasya sāraḥ sārabhūtaṃ kāraṇaṃ dadarśetyuktam| tatra darśanāntaraṃ jātamarthaṃ ślokābhyāṃ darśayannāha śrījayadevakaviḥ, atikramyeti| idānīṃ rādhāyāḥ akṣṇoḥ nayanayoḥ harṣāśrunikaraḥ papāta| harṣeṇa aśrūṇi teṣāṃ nikaraḥ ānandāśrusamūha ityarthaḥ| idānīmiti kim| iha priyatamasamāloka-samaye atiśayena priyo vallabhaḥ priyatamaḥ tasya āloko darśanaṃ tasya samayaḥ kṣaṇaḥ tasmin| ka iva| svedāmbuprasara iva| svedarūpaṃ ambu ⁵pānīyaṃ tasya prasara iva| keneva| apāṅgaṃ netrāntam atikramya śravaṇapathaparyantaprayāseneva| śravaṇayoḥ śrotrayoḥ panthā: śravaṇapathaḥ tasya paryantaḥ parisamāptiḥ tatra gamanaṃ tena prayāseneva prayāsajeneva| kathambhūtayoḥ akṣṇoḥ taralataratāraṃ yathā syāttathā patitayoḥ pātsayoḥ cañcalākṣikanīnikam| 'kūrcamastrī bhruvormadhyaṃ tārakākṣaṇaḥ kanīnikā' ityamaraḥ| bhajantyāstalpetyādi| ### [26.9](https://indike.org/pramana/in.lit.kavya.khanda.gitakavya.gitagovinda-2!mananka.26.9) sāyaṃkāle kathituṃ na śakyate| punarvadati kaviḥ| mṛgadṛśo rādhāyāḥ lajjāpi salajjā dūraṃ vyagamat| lajjayā saha vartata iti salajjā| kathambhūtāyāḥ rādhāyāḥ| kṛtakapaṭakaṇḍūti pihitasmitaṃ yathā syāttathā| talpāntaṃ śayyāsamīpaṃ bhajantyāḥ| kapaṭena dhūrtatvena kṛtā yā kaṇḍūtiḥ śravaṇakaṇḍūyanaṃ tayā pihitaṃ ca smitaṃ ca tad hāsyaṃ yasminkarmaṇi tattathā tat| anenoktena kiṃ prayojanam| kakṣāmūla-prakaṭaśithilāñcalaikastanapradeśaṃ darśayatītyarthaḥ| iṅgitakāmavikāradhvaniḥ| punaḥ kimbhūtāyā| priyasya śrīkṛṣṇasya āsyaṃ mukhaṃ paśyantyāḥ| kimbhūtamāsyam| smaraśara samākūtasubhagam| smarasya kandarpasya śarastena samākūtaḥ sābhiprāyaviśeṣaḥ tena subhagaṃ sundaram| tat| kasmin sati| avahitālīparijane sālambane sakhīsamūhe| gehāt nikuñjamandirāt bahiryāti sati| avahitaścāsau ālīparijanaśceti tasmin| ānandena saha vartamānaḥ sānando govindo gīyate'smin tattathā| iti śrīgītagovindaṭīkāyāṃ vāsa(e rādhā)keśavayorvarṇane sānandadāmodaro nāmaikādaśaḥ sargaḥ| suprītapītāmbaraḥ | gītāvatāraślokamāha-gatavatītyādi | ## Linked texts (1) - [Gītagovinda](https://indike.org/pramana/in.lit.kavya.khanda.gitakavya.gitagovinda-2.1.11.24) — Jayadeva, Sanskrit --- Source: [https://indike.org/pramana/in.lit.kavya.khanda.gitakavya.gitagovinda-2!mananka.26](https://indike.org/pramana/in.lit.kavya.khanda.gitakavya.gitagovinda-2!mananka.26) · Pramāṇa