Pramāṇa · Search · About · API

Khandaprashastikavya 6

Khaṇḍapraśastikāvya 6

Language
Sanskrit

6.1

kiṃ chatraṃ kinnu ratnaṃ tilakamṛta tathā kuṇḍalaṃ kaustubho vā,
cakraṃ vā vārijaṃ vetyamarayuvatibhiryadbalidveṣidehe
ūrdhvaṃ maulau lalāṭe śravasi hṛdi kare nābhideśe ca dṛṣṭaṃ,
pāyāttadbho'rkabimbaṃ sa ca danujaripurvarddhamānaḥ krameṇa

6.2

kharvagranthivimuktasandhi vilasadvakṣaḥsphuratkaustubhaṃ,
niryannābhisarojakuḍmalapuṭīgambhīrasāmadhvaniḥ
pātrāvāptisamutsukena balinā sānandamālokitaṃ,
pāyādvaḥ kramavarddhamānamahimā''ścaryaṃ murārervapuḥ

6.3

brahmāṇḍacchatradaṇḍaḥ śatadhṛtibhavanāmbhoruho nāladaṇḍa ,
kṣoṇīnaukūpadaṇḍaḥ kṣaradamarasaritpaṭṭikāketudaṇḍaḥ
jyotiścakrākṣadaṇḍastribhuvanavijayastambhadaṇḍo'ṅghridaṇḍaḥ,
śreyastraivikramaste vitaratu vibudhadveṣiṇāṃ kāladaṇḍaḥ

6.4

haste śastrakiṇāṅkite'ruṇavibhākirmīritoraḥsthalo,
nābhipraiṅkhadalivilocanayugaprodbhūtaśītātapaḥ
bāhūrmiśritavahriraiṣa' taditi vyākṣipya vākyaṃ kavestārairadhyayanairharan balimanaḥ pāyājjagadvāmanaḥ

6.5

sphūrjadvyomamadhuvratīparivṛḍhavyālīḍhapādāmbujaḥ,
krīḍākrāntanirastasaptapavanaskandhaprabandho hariḥ
devaḥ pātu jagatsa vāmanatanuryenendravidrāvaṇo,
nītaḥ so'pi rasātalodarakuṭīkoṇādhivāsaṃ baliḥ

6.6

svastiḥ svāgatamarthyahaṃ vada vibho ! kiṃ dīyatāṃ medinī,
kā mātrā mama vikramatrayapadaṃ dattaṃ gṛhītaṃ mayā
mā dehītyuśanā'bravīdaririyaṃ pātraṃ kimasmātparaṃ,
yastvevaṃ balinā'rcito makhamukhe pāyāt sa vo vāmanaḥ

6.7

kutastvamaṇu‌kaḥ svataḥ svamapi bho ! na kiṃ yācyate,
kimicchasi padatrayaṃ tava bhuvā kimityalpayā
dvijasya śamino mama tribhuvanaṃ tadityāśayo,
harerjayati nihnutaḥ prakaṭitaśca vakroktibhiḥ

6.8

yasmādākrāmato dyāṃ garuḍamaṇiśilāketudaṇḍāyamānādādyotantī2 babhāse surasaridamalā vaijayantīva kāntā
bhūmiṣṭho yastathānyò bhuvanagṛhamahāstambhaśobhāṃ dadhānaḥ,
pātāmetau payojodaralalitatalau paṅkajākṣasya pādau

6.5-2

iti vāmanāvatāraḥ
2iti śrīguṇavinayaviracitāyāṃ khaṇḍapraśastivṛttau
vāmanāvatāraharivarṇanavyākhyā samāptā2

Linked texts (7)