Khandaprashastikavya 7

Khaṇḍapraśastikāvya 7

Language: Sanskrit

7.1

līlonmūlitamaulisastacaraṇaṃ mūrddhasvapi kṣmābhṛtāmāskandādapabāhuśākhamabhitaḥ kṛtvā sahasrārjunam
yaścakre bhuvane tameva vijayastambhaṃ kuṭhārāyudho,
dhattāṃ vaḥ śivamāhavaikasiko rāmaḥ sa rājāntakaḥ

7.2

gotrācāravicārapāragatayā vṛddhābhirādiṣṭayā,
mātrā vastuṣu teṣu teṣu purataḥ prastāriteṣu kramāt
annaprāśanavāsare sarabhasaṃ vakṣobharotsarpiṇā,
yenāttaṃ dhanuriṅgitāśca sapadi kṣatrāvataṃsā diśaḥ

7.3

deve digvijayodyate dhṛtadhanuḥpratyarthisīmantinīvaidhavyavratadāyini pratidiśaṃ kruddhe paribhrāmyati
āstāmanyanitambinīratirapi prāyo na pauṣpaṃ kare,
bharturdhartumadānmadāndhamadhupānīlīnicolaṃ dhanuḥ

7.4

kiṃ dorbhyāṃ kimu kārmukopaniṣadā bhargaprasādena kiṃ,
kiṃ vedādhigamena bhāsvati bhṛgorvaṃśe ca kiṃ janmanā
kiṃ vā'nena mamādbhutena tapasā pīḍāṃ kṛtānto'pi cedviprāṇāṃ kurute kimapyanuśayo rāmasya puṣṇātu vaḥ

7.5

nāśiṣyaḥ kimabhūd bhavaḥ kimabhavannāputriṇī reṇukā,
nābhūd viśvamakārmukaṃ kimiti vaḥ prīṇātu rāmatrapā
viprāṇāṃ pratimandiraṃ manigaṇonmiśrāṇi daṇḍāhate,
nābdhīnāṃ sa mayā yamo'pi mahiṣeṇāmbhāṃsi nodgrāhitaḥ

7.6

kulācalā yasya mahīṃ dvijebhyaḥ,
prayacchataḥ sīmadṛṣadvamāpuḥ
babhūvurutsargajalaṃ samudrāḥ,
sa raiṇukeyaḥ śriyamātanotu

7.7

pāyādvo jamadagnivaṃśatilako vīravratālaṅkṛto,
rāmo nāma munīśvaro nṛpavadhe' bhāsvatkuṭhārāyudhaḥ
yenā'śeṣahatāhitāṅgarudhiraiḥ santarpitāḥ pūrvajāḥ,
bhaktyā cāśvamakhe samudravasanā bhūrhantakārīkṛtā

7.5-2

dvāre kalpatarūn gṛheṣu surabhīścintāmaṇīnaṅgaṇe,
pīyūṣaṃ sarasīṣu vaktrakamale vidyāścatasro diśaḥ
itthaṃ kartumayaṃ tapasyati bhṛgorvaṃśāvataṃso muniḥ,
pāyādvo'khilarājakadvayakaro bhūdevabhūṣāmaṇiḥ ||8

Linked texts (6)

Saduktikarṇāmṛta — Śrīdharadāsa, Sanskrit
Khaṇḍapraśasti — Hanūmān, Sanskrit
Subhāṣitaratnabhāṇḍāgāra — Kāśīnātha Pāṇḍuraṅga Paraba 1886, Sanskrit
Padyaracanā — Lakṣmaṇasūri, Sanskrit
Śārṅgadharapaddhati — Śārṅgadhara, Sanskrit
Sūktimuktāvalī — Jalhaṇa (Devagiri), Sanskrit