Vrajayuvavilasa 15
Vrajayuvavilāsa 15
- Language
- Sanskrit
15.1
tataḥ prabhāte sati paurṇamāsī sā vindamānā vrajarājadhāma
yaśodayānamya yaśodayāḍhyā sāmodayā bhavatyudayādanādi
15.2
hayastvannideśāddivasāvasāne mayā vadhūṃ preṣayituṃ viśiṣya
devi ? pravīṇāṃ mukharāṃ gṛhītvā nyamantri sākṣāt jaṭilā sakhī naḥ
15.3
ānetumetāmatha kā niyoktuṃ yuktātra tāṃ samprati saṃpratīhi
harerjananyāmiti saṃvadantyāṃ tatra drutaṃ kundalatāpyavindada
15.4
atulyamābhāvya tapasvinīyaṃ tasyāḥ prayogaṃ hṛdi tatra yogam
tāṃ riṃgayantīkṣaṇatuṅgabhaṃgayā vrajeśvarīuttarayāṃcakāra
15.5
jāyā subhadrasya yathaupanandeḥ kalyāṇi yā kundalatā badhūste
viśvāsinī sā jaṭilā yadaśyāmenāṃ tataḥ preṣaya kātra cintā
15.6
itīritāsau laghu paurṇamāsyā prāha svayaṃ kundalateva vilambam
viśvāsya vṛdhāṃ vṛṣabhānujāmānetuṃ vraja tvaṃ viditāsi pūrvam
15.7
yathāha pūjyeti mudā vadantīṃ visṛjya tāṃ kundamanojñadantīm
vrajeśvarīyaṃ satapasvinīkā jagāma sūnoḥ śayanālayāntaḥ
15.8
tāṃ haimapīṭhe viniveśya devīṃ paryaṅkasīmanyapi copaviśya
tanuṃ mṛjantī tanayasya mandaṃ jagāda sodgatvaragadgadaivam