[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [Poetry (mahākāvya, lyric, messenger poems, stotra, Prakrit kāvya)](https://indike.org/pramana/in.lit.kavya) › [Miscellaneous short works](https://indike.org/pramana/in.lit.kavya.misc) › [Laghukavyani](https://indike.org/pramana/in.lit.kavya.misc.laghukavyani) › 5 # Laghukavyani 5 Laghukāvyāni 5 - **Language:** Sanskrit ### [5.1](https://indike.org/pramana/in.lit.kavya.misc.laghukavyani.5.1) iti śrīnīlakaṇṭhadīkṣitaviracitaḥ śāntivilāsaḥ saṃpūrṇaḥ śrīḥ kaliviḍambanam na bhetavyaṃ na boddhavyaṃ na śrāvyaṃ vādino vacaḥ jhaṭiti prativaktavyaṃ sabhāsu vijigīṣubhiḥ ### [5.2](https://indike.org/pramana/in.lit.kavya.misc.laghukavyani.5.2) asambhramo nirlajjatvamavajñā prativādini hāso rājñaḥ stavaśceti pañcaite jayahetavaḥ ### [5.3](https://indike.org/pramana/in.lit.kavya.misc.laghukavyani.5.3) uccairudghoṣya jevyaṃ madhyasthaścedapaṇḍitaḥ paṇḍito yadi tatraiva pakṣapāto'dhiropyatām ### [5.4](https://indike.org/pramana/in.lit.kavya.misc.laghukavyani.5.4) lābho heturdhanaṃ sādhyaṃ dṛṣṭāntastu purohitaḥ ātmotkarṣo nigamanamanumāneṣvayaṃ vidhiḥ ### [5.6](https://indike.org/pramana/in.lit.kavya.misc.laghukavyani.5.6) abhyāsyaṃ lajjamānena tattvaṃ jijñāsunā ciram jigīṣuṇā hriyaṃ tyaktvā kāryaḥ kolāhalo mahān pāṭhanairgranthanirmāṇaiḥ pratiṣṭhā tāvadāpyate evaṃ ca tathyavyutpattirāyuṣo'nte bhavenna vā ### [5.7](https://indike.org/pramana/in.lit.kavya.misc.laghukavyani.5.7) stotāraḥ ke bhaviṣyanti mūrkhasya jagatītale na stauti cetsvayaṃ ca svaṃ kadā tasyāstu nirvṛtiḥ ### [5.8](https://indike.org/pramana/in.lit.kavya.misc.laghukavyani.5.8) vācyatāṃ samayo'tītaḥ spaṣṭamagre bhaviṣyati iti pāṭhayatāṃ granthe kāṭhinyaṃ kutra vartate ### [5.9](https://indike.org/pramana/in.lit.kavya.misc.laghukavyani.5.9) agavitvamatiśraddhā jñānābhāvena tṛptatā trayaḥ śiṣyaguṇā hyete mūrkhācāryasya bhāgyajāḥ ### [5.10](https://indike.org/pramana/in.lit.kavya.misc.laghukavyani.5.10) yadi na kvāpi vidyāyāṃ sarvathā kramate matiḥ māntrikāstu bhaviṣyāmo yogino yatayo'pi vā ### [5.11](https://indike.org/pramana/in.lit.kavya.misc.laghukavyani.5.11) avilambena saṃsiddhau māntraiḥ prāpyate yaśaḥ vilambe karmabāhulyaṃ vikhyāpyāvāpyate dhanam ### [5.12](https://indike.org/pramana/in.lit.kavya.misc.laghukavyani.5.12) sukhaṃ sukhiṣu duḥkhaṃ ca jīvanaṃ duḥkhaśāliṣu anugrahāyate yeṣāṃ te dhanyāḥ khalu māntrikāḥ ### [5.13](https://indike.org/pramana/in.lit.kavya.misc.laghukavyani.5.13) yāvadajñānato maunamācāro vā vilakṣaṇaḥ tāvanmāhātmyarūpeṇa paryavasyati māntrike ### [5.14](https://indike.org/pramana/in.lit.kavya.misc.laghukavyani.5.14) cārānvicāyyaṃ daivajñairvaktavyaṃ bhūbhujāṃ phalam grahacāraparijñānaṃ teṣāmāvaśyakaṃ yataḥ ### [5.15](https://indike.org/pramana/in.lit.kavya.misc.laghukavyani.5.15) putra ityeva pitari kanyaketyeva mātari garbhapraśneṣu kathayandaivajño vijayī bhavet ### [5.16](https://indike.org/pramana/in.lit.kavya.misc.laghukavyani.5.16) āyuḥpraśne dīrghamāyurvācyaṃ mauhūrtikairjanaiḥ jīvanto bahu manyante mṛtāḥ prakṣyanti kaṃ punaḥ ### [5.17](https://indike.org/pramana/in.lit.kavya.misc.laghukavyani.5.17) sarvaṃ koṭidvayopetaṃ sarvaṃ kāladvayāvadhi sarvaṃ vyāmiśramiva ca vaktavyaṃ daivacintakaiḥ ### [5.18](https://indike.org/pramana/in.lit.kavya.misc.laghukavyani.5.18) nirdhanānāṃ dhanāvaptiṃ dhanināmadhikaṃ dhanam bruvāṇāḥ sarvathā grāhyā lokairjyautiṣikā janāḥ ### [5.19](https://indike.org/pramana/in.lit.kavya.misc.laghukavyani.5.19) śatasya lābhe tāmbūlaṃ sahasrasya tu bhojanam daivajñānāmupālambho nityaṃ kāryaviparyaye ### [5.20](https://indike.org/pramana/in.lit.kavya.misc.laghukavyani.5.20) api sāgaraparyantā vicetavyā vasuṃdharā deśo hyaratnimātro'pi nāsti daivajñavarjitaḥ ### [5.21](https://indike.org/pramana/in.lit.kavya.misc.laghukavyani.5.21) vārānkecidgrahānkecitkecidṛkṣāṇi jānate tritayaṃ ye vijānanti te vācaspatayaḥ svayam ### [5.22](https://indike.org/pramana/in.lit.kavya.misc.laghukavyani.5.22) naimittikāḥ svapnadṛśo devatopāsakā iti nisargaśatravaḥ sṛṣṭā daivajñānāmamī trayaḥ ### [5.23](https://indike.org/pramana/in.lit.kavya.misc.laghukavyani.5.23) svasthaira sādhyarogaiśca jantubhirnāsti kiṃcana kātarā dīrgharogāraśca bhiṣajāṃ bhāgyahetavaḥ ### [5.24](https://indike.org/pramana/in.lit.kavya.misc.laghukavyani.5.24) nātidhairyaṃ pradātavyaṃ nātibhītiśca rogiṇi naiścintyānnādime dānaṃ nairāśyādeva nāntime ### [5.25](https://indike.org/pramana/in.lit.kavya.misc.laghukavyani.5.25) bhaiṣajyaṃ tu yathākāmaṃ pathyaṃ tu kaṭhinaṃ vadet ārogyaṃ vaidyamāhātmyādanyathātvamapathyataḥ ### [5.26](https://indike.org/pramana/in.lit.kavya.misc.laghukavyani.5.26) nidānaṃ roganāmāni sāmyāsādhye cikitsitam sarvamapyupadekṣyanti rogiṇaḥ sadane striyaḥ ### [5.27](https://indike.org/pramana/in.lit.kavya.misc.laghukavyani.5.27) jṛmbhamāṇeṣu rogeṣu mriyamāṇeṣu jantuṣu rogatattveṣu śanakairvyutpadyante cikitsakāḥ ### [5.28](https://indike.org/pramana/in.lit.kavya.misc.laghukavyani.5.28) pravartanārthamārambhe madhye tvauṣadhahetave bahumānārthamante ca jihīrṣanti cikitsakāḥ ### [5.29](https://indike.org/pramana/in.lit.kavya.misc.laghukavyani.5.29) lipsamāneṣu vaidyeṣu cirādāsādya rogiṇam dāyādāḥ saṃprarohanti daivajñā māntrikā api ### [5.30](https://indike.org/pramana/in.lit.kavya.misc.laghukavyani.5.30) rogasyopakrame sāntvaṃ madhye kiṃciddhanavyayaḥ śanairanādaraḥ śāntau jñāto vaidyaṃ na paśyati ### [5.31](https://indike.org/pramana/in.lit.kavya.misc.laghukavyani.5.31) daivajñatvaṃ māntrikaṃtā bheṣajyaṃ cāṭukauśalam ekaikamarthalābhāya dvitriyogastu durlabhaḥ ### [5.32](https://indike.org/pramana/in.lit.kavya.misc.laghukavyani.5.32) anṛtaṃ cāṭuvādaśca dhanayogo mahānayam satyaṃ vaiduṣyamityeṣa yogo dāridryakārakaḥ ### [5.33](https://indike.org/pramana/in.lit.kavya.misc.laghukavyani.5.33) kātryaṃ durvinītatvaṃ kārpaṇyamavivekatām sarvaṃ mārjanti kavayaḥ śālīnāṃ muṣṭikiṃkarāḥ ### [5.34](https://indike.org/pramana/in.lit.kavya.misc.laghukavyani.5.34) na kāraṇamapekṣante kavayaḥ stotumudyatāḥ kiṃcidastuvatāṃ teṣāṃ jihvā phuraphurāyate ### [5.35](https://indike.org/pramana/in.lit.kavya.misc.laghukavyani.5.35) stutaṃ stuvanti kavayo na svataḥ guṇadarśinaḥ kīṭaḥ kaścidbalirnāma kiyatī tatra varṇanā ### [5.36](https://indike.org/pramana/in.lit.kavya.misc.laghukavyani.5.36) ekaiva kavitā puṃsāṃ grāmāyāśvāya hastine antato'nnāya vastrāya tāmbūlāya ca kalpate ### [5.37](https://indike.org/pramana/in.lit.kavya.misc.laghukavyani.5.37) śabda|khyamaparaṃ brahma saṃdabhaiṇa pariṣkṛtam bikrīyate katipayairdhṛtānyairviniyujyate ### [5.38](https://indike.org/pramana/in.lit.kavya.misc.laghukavyani.5.38) varṇayanti narābhāsānvāṇīṃ labdhvāpi ye janāḥ labdhvāpi kāmadhenuṃ te lāṅgale viniyuñjate ### [5.39](https://indike.org/pramana/in.lit.kavya.misc.laghukavyani.5.39) praśaṃsanto narābhāsānpralapanto'nyathānyathā kathaṃ tarantu kavayaḥ kāmapāramyavādinaḥ ### [5.40](https://indike.org/pramana/in.lit.kavya.misc.laghukavyani.5.40) yatsaṃdarbha yadullekhe yadyaktaye nibhṛtaṃ manaḥ samādherapi tajjyāyaḥ śaṃkaro yadi varṇyate ### [5.41](https://indike.org/pramana/in.lit.kavya.misc.laghukavyani.5.41) gṛhiṇī bhaginī tasyāḥ śvaśurau śyāla ityapi prāṇināṃ kalinā sṛṣṭāḥ pañca prāṇā ime'pare ### [5.42](https://indike.org/pramana/in.lit.kavya.misc.laghukavyani.5.42) jāmātaro bhāgineyā mātulā dārabāndhavāḥ ajñātā eva gṛhiṇāṃ bhakṣayantyākhuvadgṛhe ### [5.43](https://indike.org/pramana/in.lit.kavya.misc.laghukavyani.5.43) mātulasya balaṃ mātā jāmāturduhitā balam śvaśurasya balaṃ bhāryā svayamevātitherbalam ### [5.44](https://indike.org/pramana/in.lit.kavya.misc.laghukavyani.5.44) jāmāturvakratā tāvadyāvacchyālasya bālatā prabudhyamāne sāralyaṃ prabuddhe'sminpalāyanam ### [5.45](https://indike.org/pramana/in.lit.kavya.misc.laghukavyani.5.45) bhāryā jyeṣṭhā śiśuḥ śyālaḥ śvaśrūḥ svātantryaśālinī śvaśurastu pravāsīti jāmāturbhāgyadhoraṇī ### [5.46](https://indike.org/pramana/in.lit.kavya.misc.laghukavyani.5.46) bhūṣaṇairvasanaiḥ pātraiḥ putrāṇāmupalālanaiḥ sakṛdāgatya gacchantī kanyā nirmārṭi mandiram ### [5.47](https://indike.org/pramana/in.lit.kavya.misc.laghukavyani.5.47) gṛhiṇī svajanaṃ vakti śuṣkāhāraṃ mitāśanam patipakṣyāṃstu bahvāśānkṣīrapāṃstaskarānapi ### [5.48](https://indike.org/pramana/in.lit.kavya.misc.laghukavyani.5.48) bhārye dve putraśālinyau bhāgenī pativarjitā aśrāntakalaho nāma yogo'yaṃ gṛhamedhinām ### [5.49](https://indike.org/pramana/in.lit.kavya.misc.laghukavyani.5.49) bhārye dve bahavaḥ putrā dāridryaṃ rogasaṃbhavaḥ jīrṇau ca mātāpitarāvekaikaṃ narakādhikam ### [5.50](https://indike.org/pramana/in.lit.kavya.misc.laghukavyani.5.50) smṛte sīdanti gātrāṇi dṛṣṭe prajñā vinaśyati aho mahadidaṃ bhūtamṛttamarṇābhiśabditam ### [5.51](https://indike.org/pramana/in.lit.kavya.misc.laghukavyani.5.51) antako'pi hi jantūnāmantakālamapekṣate na kālaniyamaḥ kaściduttamarṇasya vidyate ### [5.52](https://indike.org/pramana/in.lit.kavya.misc.laghukavyani.5.52) na paśyāmo mukhe daṃṣṭrāṃ na pāśaṃ vā karāñcale uttamarṇamavekṣyaiva tathāpyudvijate manaḥ ### [5.53](https://indike.org/pramana/in.lit.kavya.misc.laghukavyani.5.53) śatrau sāntvaṃ pratīkāraḥ sarvarogeṣu bheṣajam mṛtyormṛtyuṃjayadhyānaṃ dāridrye tu na kiṃcana ### [5.54](https://indike.org/pramana/in.lit.kavya.misc.laghukavyani.5.54) śaktiṃ karoti saṃcāre śītoṣṇe marṣayatyapi dīpayatyudare vahniṃ dāridryaṃ paramauṣadham ### [5.55](https://indike.org/pramana/in.lit.kavya.misc.laghukavyani.5.55) giraṃ skhalantīṃ mīlantīṃ dṛṣṭiṃ pādau visaṃsphuṭau protsāhayati yācñāyāṃ rājājñeva daridratā ### [5.56](https://indike.org/pramana/in.lit.kavya.misc.laghukavyani.5.56) jīryanti rājavidveṣā jīryantyavihitānyapi ākiṃcanyabalāḍhyānāmantato'śmāpi jīryati ### [5.57](https://indike.org/pramana/in.lit.kavya.misc.laghukavyani.5.57) nāsya corā na piśunā na dāyādā na pārthivāḥ dainyaṃ rājyādapi jyāyo yadi tattvaṃ prabudhyate ### [5.58](https://indike.org/pramana/in.lit.kavya.misc.laghukavyani.5.58) prakāśayatyahaṃkāraṃ pravartayati taskarām protsāhayati dāyādāṃlakṣmīḥ kiṃciṃdupasthitā ### [5.59](https://indike.org/pramana/in.lit.kavya.misc.laghukavyani.5.59) viḍambayanti ye nityaṃ vidagdhāndhanino janāḥ ta eva tu viḍambyante śriyā kiṃcidupekṣitāḥ ### [5.60](https://indike.org/pramana/in.lit.kavya.misc.laghukavyani.5.60) prāmāṇyabuddhiḥ stotreṣu devatābuddhirātmani kīṭabuddhirmanuṣyeṣu nūtanāyāḥ śriyaḥ phalam ### [5.61](https://indike.org/pramana/in.lit.kavya.misc.laghukavyani.5.61) śṛṇvanta eva pṛcchanti paśyanto'pi na jānate viḍambanāni dhanikāḥ stotrāṇītyeva manvate ### [5.62](https://indike.org/pramana/in.lit.kavya.misc.laghukavyani.5.62) āvṛtya śrīmadenāndhānanyonyakṛtasaṃvidaḥ svairaṃ hasanti pārśvasthā bālonmattapiśācavat ### [5.63](https://indike.org/pramana/in.lit.kavya.misc.laghukavyani.5.63) stotavyaiḥ stūyate nityaṃ sevanīyaiśca sevyate na bibheti na jihveti tathāpi dhaniko janaḥ ### [5.64](https://indike.org/pramana/in.lit.kavya.misc.laghukavyani.5.64) kṣaṇamātraṃ grahāveśo yāmamātraṃ surāmadaḥ lakṣmīmadasta mūrkhāṇāmādehamanuvartate ### [5.65](https://indike.org/pramana/in.lit.kavya.misc.laghukavyani.5.65) śrīrmāsamardhamāsaṃ vā ceṣṭitvā vinivartate vikārastu tadārabdho nityaṃ laśunagandhavat ### [5.66](https://indike.org/pramana/in.lit.kavya.misc.laghukavyani.5.66) kaṇṭhe madaḥ kodravajo hṛdi tāmbūlajo madaḥ lakṣmīmadastu sarvāṅge putradāramukheṣvapi ### [5.67](https://indike.org/pramana/in.lit.kavya.misc.laghukavyani.5.67) yatrāsīdasti vā lakṣmīstatronmādaḥ pravartatām kule'pyavataratyeṣa kuṣṭhāpasmāravatkatham ### [5.68](https://indike.org/pramana/in.lit.kavya.misc.laghukavyani.5.68) adhyāpayanti śāstrāṇi tṛṇīkurvanti paṇḍitān vismārayanti jātiṃ svāṃ varāṭāḥ pañcaṣāḥ kare ### [5.69](https://indike.org/pramana/in.lit.kavya.misc.laghukavyani.5.69) bibhartu bhṛtyāndhraniko dattāṃ vā deyamarthiṣu yāvadyācakasādharmyaṃ tāvalloko na mṛṣyati ### [5.70](https://indike.org/pramana/in.lit.kavya.misc.laghukavyani.5.70) dhanabhāro hi lokasya piśunaireva dhāryate kathaṃ te taṃ laghūkatuṃ yatante'parathā svataḥ ### [5.71](https://indike.org/pramana/in.lit.kavya.misc.laghukavyani.5.71) śramanānurūpaṃ piśune kimupakriyate nṛpaiḥ dviguṇaṃ triguṇaṃ caiva kṛtānto lālayiṣyati ### [5.72](https://indike.org/pramana/in.lit.kavya.misc.laghukavyani.5.72) gokarṇe bhadrakarṇe ca japo duṣkarmanāśanaḥ rājakarṇejapaḥ sadyaḥ sarvakarmavināśanaḥ ### [5.73](https://indike.org/pramana/in.lit.kavya.misc.laghukavyani.5.73) na svārthaṃ kaicidicchanti na preryante ca kenacit parārtheṣu pravartante śaṭhāḥ santaśca tulyavat ### [5.74](https://indike.org/pramana/in.lit.kavya.misc.laghukavyani.5.74) kālāntare hyanarthāya gṛdhro gehopari sthitaḥ khalo gṛhasamīpasthaḥ sadyo'narthāya dehinām ### [5.75](https://indike.org/pramana/in.lit.kavya.misc.laghukavyani.5.75) śuṣkopavāso dharmeṣu bheṣajyeṣu ca laṅghanam japayajñaśca yajñeṣu rocate lobhaśālinām ### [5.76](https://indike.org/pramana/in.lit.kavya.misc.laghukavyani.5.76) kiṃ vakṣyatīti dhaniko yāvadudvijate manaḥ kiṃ prakṣyatīti lubdho'pi tāvadudvijate tataḥ ### [5.77](https://indike.org/pramana/in.lit.kavya.misc.laghukavyani.5.77) sarvamātithyaśāstrārthaṃ sākṣātkurvanti lobhinaḥ bhikṣākavalamekaikaṃ ye hi paśyanti meruvat ### [5.78](https://indike.org/pramana/in.lit.kavya.misc.laghukavyani.5.78) dhanapālaḥ piśāco hi datte svāminyupasthite dhanalubdhaḥ piśācastu na kasmaicana ditsati ### [5.79](https://indike.org/pramana/in.lit.kavya.misc.laghukavyani.5.79) dātāro'rthibhirarthyante dātṛbhiḥ punararthinaḥ kartṛkarmavyatīhārādaho nimnonnataṃ kiyat ### [5.80](https://indike.org/pramana/in.lit.kavya.misc.laghukavyani.5.80) svasminnasati nārthasya rakṣakaḥ saṃbhavediti niścityaiva svayamapi bhuṅkte lubdhaḥ kathaṃcana ### [5.81](https://indike.org/pramana/in.lit.kavya.misc.laghukavyani.5.81) prasthāsyamānaḥ praviśetpratiṣṭheta dine dine vicitrānullikhedbhittīṃstiṣṭhāsurātithiściram ### [5.82](https://indike.org/pramana/in.lit.kavya.misc.laghukavyani.5.82) pradīyate viduṣyekaṃ kavau daśa naṭe śatam sahasraṃ dāmbhike loke śrotriye tu na kiṃcana ### [5.83](https://indike.org/pramana/in.lit.kavya.misc.laghukavyani.5.83) ghaṭakaṃ samyagārādhya vairāgyaṃ paramaṃ vahet tāvadarthāḥ prasidhyanti yāvaccāpalamāvṛtam ### [5.84](https://indike.org/pramana/in.lit.kavya.misc.laghukavyani.5.84) ekataḥ sarvaśāstrāṇi tulasīkāṣṭhamekataḥ vaktavyaṃ kiṃcidityuktaṃ vastutastulasī parā ### [5.85](https://indike.org/pramana/in.lit.kavya.misc.laghukavyani.5.85) vismṛtaṃ bāhaṭenedaṃ tulasyāḥ paṭhatā guṇān viśvasaṃmohinī vittadāyinīti guṇadvayam ### [5.86](https://indike.org/pramana/in.lit.kavya.misc.laghukavyani.5.86) kaupīnaṃ bhasitālepo darbhā rudrākṣamālikā maunamekāsikā ceti mūrkhasaṃjīvanāni ṣaṭ ### [5.87](https://indike.org/pramana/in.lit.kavya.misc.laghukavyani.5.87) vāsaḥ puṇyeṣu tīrtheṣu prasiddhaśca mṛto guruḥ adhyāpanāvṛttayaśca kīrtanīyā dhanārthibhiḥ ### [5.88](https://indike.org/pramana/in.lit.kavya.misc.laghukavyani.5.88) mantrabhraṃśe saṃpradāyaḥ prayogaścyutasaṃskṛtau deśadharmastvanācāre pṛcchatāṃ siddhamuttaram ### [5.89](https://indike.org/pramana/in.lit.kavya.misc.laghukavyani.5.89) yathā jānanti bahavo yathā vakṣyanti dātari tathā dharmaṃ caretsarvaṃ na vṛthā kiṃcidācaret ### [5.90](https://indike.org/pramana/in.lit.kavya.misc.laghukavyani.5.90) sadā japapaṭo haste madhye madhye'kṣimīlanam sarvaṃ brahmeti vādaśca sadyaḥ pratyayahetavaḥ ### [5.91](https://indike.org/pramana/in.lit.kavya.misc.laghukavyani.5.91) āmadhyāhnaṃ nadīvāsaḥ samāje devatārcanam satataṃ śuciveṣaścetyetaddambhasya jīvitam ### [5.92](https://indike.org/pramana/in.lit.kavya.misc.laghukavyani.5.92) tāvaddīrghaṃ nityakarma yāvatsyāddṛṣṭamelanam tāvatsaṃkṣipyate sarvaṃ yāvaddraṣṭā na vidyate ### [5.93](https://indike.org/pramana/in.lit.kavya.misc.laghukavyani.5.93) ānandabāṣparomāñcau yasya svecchāvaśaṃvadau kiṃ tasya sādhanairanyaiḥ kiṃkarāḥ sarvapārthivāḥ ### [5.94](https://indike.org/pramana/in.lit.kavya.misc.laghukavyani.5.94) daṇḍyamānā vikurvanti lālyamānāstatastarām durjanānāmato nyāyyaṃ dūrādeva visarjanam ### [5.95](https://indike.org/pramana/in.lit.kavya.misc.laghukavyani.5.95) kaliviḍambanam adānamīṣadvānaṃ ca kiṃcitkopāya durdhiyām saṃpūrṇadānaṃ prakṛtivirāmo vairakāraṇam ### [5.96](https://indike.org/pramana/in.lit.kavya.misc.laghukavyani.5.96) jyāyānaprastave duṣṭairauṣadhyai saṃbhavaḥ punaḥ apatyasaṃbandhavidhiruttānarthāyaiva kevalam ### [5.97](https://indike.org/pramana/in.lit.kavya.misc.laghukavyani.5.97) jñātitvaṃ jñānahīnatvaṃ piśunatvaṃ daridratā milanti yadi catvāri taddiṣṭe'pi namo namaḥ ### [5.98](https://indike.org/pramana/in.lit.kavya.misc.laghukavyani.5.98) paracchidreṣu hṛdayaṃ paravārtāsu ca śravaḥ paramarmasu vācaṃ ca khalānāmasṛjadvidhiḥ ### [5.99](https://indike.org/pramana/in.lit.kavya.misc.laghukavyani.5.99) viṣeṇa pucchalagnena vṛścikaḥ prāṇināmiva kalinā daśamāṃśena sarvaḥ kālo'pi dāruṇaḥ ### [5.100](https://indike.org/pramana/in.lit.kavya.misc.laghukavyani.5.100) yatra bhāryāgiro vedā yatra dharmo'rthasādhanam yatra svapratibhā mānaṃ tasmai śrīkalaye namaḥ ### [5.101](https://indike.org/pramana/in.lit.kavya.misc.laghukavyani.5.101) kāmamastu jagatsarvaṃ kālasyāsya vaśaṃvadam kālakālaṃ prapannānāṃ kālaḥ kiṃ naḥ kariṣyati ### [5.102](https://indike.org/pramana/in.lit.kavya.misc.laghukavyani.5.102) kavinā nīlakaṇṭhena kaleretadviḍambanam racitaṃ viduṣāṃ prītyai rājāsthānānumodanam ## Linked texts (2) - [Kaliviḍambana](https://indike.org/pramana/in.lit.kavya.satire.kalividambana.1) — Nīlakaṇṭha Dīkṣita 1620, Sanskrit - [Subhāṣitaratnākara (Kṛṣṇanātha)](https://indike.org/pramana/in.lit.subhasita.subhasita.subhasitaratnakara-krsna.132.1) — Kṛṣṇanātha, Sanskrit --- Source: [https://indike.org/pramana/in.lit.kavya.misc.laghukavyani.5](https://indike.org/pramana/in.lit.kavya.misc.laghukavyani.5) · Pramāṇa