Rasikarmana 14
Rasikarmaṇa 14
- Language
- Sanskrit
Contents
- 14.39 — 1 part
14.1
athaikadā tāpasaṃghavandyaṃ
durvāsasaṃ jñānataponidhānam
śiṣyāḥ prabaddhāñjalayo'nvapṛcchajjijñāsavastattvamiti praṇamya
14.2
svāmiñjanānāṃ vividhā hi ceṣṭāḥ
kasmād bhavantīha munīśavandya
paṭcakrabhedaśca kathaṃ vibho naḥ
kutra sthitānīti vadasva śiṣyān
14.3
cakreṣu devāḥ kati santi yuktā
nāmnā ca ke tāpasaṃghasevya
jīvastvahorātramanuśvasanvai
śvāsānkarotīha katipramāṇān
14.4
iti sma pṛṣṭo munināyako'sau
śiṣyaiḥ sa tānāha suhṛṣṭacittaḥ
sukhaṃ sthito lokahitāya cakrabhedaṃ svadehānugataṃ mahātmā
14.5
śiṣyāḥ śṛṇudhvaṃ jagato hitāya
ṣaṭcakrabhedaṃ vidhivad bravīmi
yaṃ bhedamājñāya janaḥ sukhena
gacchetparaṃ brahma nirāmayaṃ vai
14.6
pattrāṇi cakreṣvapi śāstrato vai
yāvanti putrāḥ pratipāditā(ni)
ṣaṭsu pravakṣyāmi ca cakradevān
dehasthiteṣu kramaśaḥ śṛṇudhvam
14.7
sthānāni ṣaṇṇāṃ vidhivad bra(24a)vīmi
śiṣyāḥ śṛṇudhvaṃ śubhavāsanātaḥ
jāpyaṃ ca teṣu pratipāditaṃ cakāṇāṃ munīśā jagato hitāya
14.8
ṣaṭcakrasaṃsthānkhalu mātṛkārṇān
ṣaṭcakravarṇāśca viśuddhadehāḥ
bravīmyahorātrata eva jīvaḥ
śvāsāṃśca yāvatprakaroti haṃsaḥ
14.9
dhyānaṃ ca haṃsasya tapaḥsuniṣṭhāḥ
pravacmi śāstrānugataṃ śubhāṅgāḥ
śārīrakaṃ sarvamidaṃ śṛṇudhvaṃ
śrutvā ca yatpāpabhayātpramucyet
14.10
hṛtpaṅkajakṛtāvāso haṃso jīvaḥ parātparaḥ
haṃsa haṃseti haṃseti svātmānaṃ japate sadā
14.11
bahiryāti hakāreṇa sakāreṇa viśatyapi
mo'haṃ haṃseti haṃso'yaṃ jīvo japati sarvadā
14.12
ahorātreṇa jīvo'yamitisaṃkhyaṃ prajalpati
ekaviṃśatsahasraṃ tu ṣaṭśatairadhikaṃ vibhuḥ
14.13
hṛtpadmakṛtasaṃvāso haṃso nityaṃ prajalpati
imaṃ mantraṃ mahāmantraṃ sarvasiddhipradāyakam
14.14
mantradevānpravakṣyāmi tacchaktīśca vidhānataḥ
saṃkhyāṃ caiva tu mantrasya samarpaṇavidheḥ kramāt
14.15
etatsarvaṃ pravakṣyāmi śṛṇudhvaṃ kṛtasauhṛdāḥ
yattu sarvaṃ naro jñātvā kṛtakṛtyo'bhijāyate
14.16
guda ādhāracakraṃ syādraktavarṇaṃ caturdalam
caturmātṛkasaṃyuktaṃ daśakhaṃ samitikramāt
14.17
jñeyo gaṇapatirdevaḥ siddhibuddhī ca śaktike
atra cakre purā prokte munibhistattvadarśibhiḥ
14.18
atra devaṃ gaṇapatiṃ vidhivatpūjya sādhakaḥ
nivedayetṣaṭśataṃ vai japaṃ vighnopaśāntaye
14.19
svādhiṣṭhānaṃ tu cakraṃ syāliṅge (24b) ṣaṭdalasaṃyutam
pītavarṇaṃ ca ṣaḍbhistu mātṛkārṇairupaskṛtam
14.20
vakārādilakārāntairmastake bindubhūṣitaiḥ
atra brahmādhidavaṃ (devaḥ) syātsāvitrī śaktirucyate
14.21
atra saṃpūjya vidhivad brahmāṇaṃ sādhakottamaḥ
nivedayetṣaṭsahasraṃ japaṃ sṛṣṭacarthameva tu
14.22
nābhyāṃ ca tadvanmaṇipūrakākhyaṃ
cakraṃ tu nīlotpalasaṃnibhaṃ tat
dalairupetaṃ daśabhistu varṇaiḥ–
× × virājaddaśabhirdhaphāntaiḥ
14.23
atra devo mahāviṣṇurucyate śaktirindirā
saṃpūjayenmahābhaktyā viṣṇumatra ca mānavaḥ
14.24
saṃpūjya vidhivad bhaktyā mahāviṣṇuṃ narottamaḥ
nivedayetṣaṭsahasraṃ japamātmaviśuddhaye
14.25
hṛdaye'nāhataṃ cakraṃ śvetavarṇaṃ mahatprabham
dalairdvādaśabhiryuktaṃ dvādaśārṇaiḥ kaṭhāntagaiḥ
14.26
mātṛkāyā binduyuktairatra daivatamucyate
rudro bhavānī śaktiśca purā proktā mumukṣubhiḥ
14.27
śivamatra tu saṃpūjya vidhivanmunipuṃgavaḥ
nivedayetṣaṭsahasraṃ japaṃ sarvārthasiddhaye
14.28
kaṇṭhe viśuddhicakraṃ tu dhūmravarṇaṃ virājate
dalaiḥ ṣoḍaśabhiryuktaṃ taccakraṃ parikīrtitam
14.29
svaraiḥ ṣoḍaśabhiryuktaṃ jīvastatrādhidaivatam
avidyāśaktitaratroktā munibhistattvadarśibhiḥ
14.30
atra jīvaṃ vidhānena saṃpūjya munipuṃgavaḥ
japamekaṃ sahasraṃ tu jāpakaḥ saṃnivedayet
14.31
ājñācakraṃ ca bhrūmadhye sthitaṃ māṇikyasaṃnibham
dvidalaṃ haṃkṣamiti ca mātṛkārṇairapi (25a) śobhitam
14.32
devaḥ syātparamātmātra māyā śaktirudāhṛtā
munibhiḥ sanakādyaistu munibhistattvadarśibhiḥ
14.33
saṃpūjya paramātmānamatra cakre munīśvarāḥ
japamekaṃ sahasraṃ tu jāpakaḥ saṃnivedayet
14.34
golhāṭamaṇḍale (?) tadvad brahmarandhrākhyamuttamam
cakraṃ prakāśabahulaṃ sarvavarṇasamanvitam
14.35
sahasraistu dalairyuktaṃ mātṛkārṇairupaskṛtam
svaraiśca sarvaiḥ saṃyuktaṃ taccakraṃ parikīrtitam
14.36
atra devo gururjñeyo jñānaṃ śaktiḥ prakīrtitā
jñānibhirmunibhiścātra dehajñānaparāyaṇaiḥ
14.37
atra saṃpūjya vidhivad guruṃ tasmai munīśvaraḥ
nivedayetsahasraṃ tu japaṃ sarvārthasiddhaye
14.38
śarīracakrasthitimitthamatra
yo veda nityaṃ puruṣastu dhīmān
jīvasvarūpaṃ ca mahābhimantraṃ
jīvena nityaṃ parijapyamānam
14.39
sa jñānavānmuktasamastabandhaḥ
sukhena brahma pratiyāti siddhaḥ
yaścakrabhedaṃ ca pumān śṛṇoti
jīvanvimuktaḥ sa bhavenmṛṣā na
14.39.p1
iti śrīmahāmatisutasya durvāsasaḥ kāvye rasikaramaṇasaṃjñe kaviśrīraghunāthaviracite durvāsasā kṛtapaṭcakranirūpaṇo nāma caturdaśaḥ sargaḥ
Linked texts (1)
- Rasikaramana — Raghunātha, Sanskrit