Rasikarmana 5
Rasikarmaṇa 5
- Language
- Sanskrit
Contents
- 5.24 — 1 part
5.1
[8a] gate bahutithe kāle durvāsasamakalmaṣam
kāyakleśaprakartāraṃ dayayā vyākulīkṛtaḥ
5.2
pratyakṣo nṛharirbhūtvā prāha kundendudīdhitiḥ
praphullavadanāmbhojaḥ śrīnivāsaḥ satāṃ gatiḥ
5.3
yugme kulakam
uttiṣṭha tāta tapasā pariśuddhacetāḥ
siddho'si, me varaya vāñchitasiddhimātra
tāvannarāḥ kila bhavanti na duḥkhapātraṃ
yāvad bhavāmi nayanāmburuhāgrago'ham
5.4
itthaṃ giraṃ śrīnṛharerniśamya
samādhyavasthāpitacittavṛttiḥ
śanaiḥ śanairlokamimaṃ prapadya
dṛṣṭvādidevaṃ śirasā vavande
5.5
praṇamya devadeveśaṃ sāṣṭāṅgamakhilārthadam
astauṣītpulakodbhinnapremagadgadayā girā
5.6
namo nṛsiṃhāmitavikramāya
namo namastīkṣṇanakhāyudhāya
namo'stu daṃṣṭrāvikaṭānanāya
namo namaste'stu sahasrakṛtvaḥ
5.7
pralayapayasi yo vai matsyarūpaṃ vidhāya
śrutigaṇamupakinye daityamāhatya śaṅkham
vidhimavanisunaukāsaṃsthitaṃ satyasaṃjñaṃ
manumitaguṇaṃ cātārayadvārirāśim
5.8
surāsurāṇāmudadhernimanthe
yo līlayā mandaramuddhāra
āsthāya kūrmākṛtimādidevaḥ
pṛṣṭhe surārthapratisiddhaye ca
5.9
vasuṃdharāmbhosi saṃnimagnāṃ
svadaṃṣṭrayoccairbhagavānbabhāra
vārāhamūrtiḥ pratiyoddhumagre
nihatya saṃgrāmajayena yo vai
5.10
kāyādhavaṃ vīkṣya ca pīḍyamānamanena pitrā vapuṣāvirāsīt
yo'ntaḥ kṛpābdhiḥ krakacāgratīkṣṇanakhāgrasaṃbhāvitadehayaṣṭiḥ
5.11
kṛtvā vapurvāmanaṃ kambale'ryo
yajñakṣitiṃ śakra (8b) yaśo'pahartum
kramatrayorvīcchalatastrilokīṃ
gato jahārāmarapakṣapātī
5.12
yo jāmadagnyākṛtirarjunāravyaṃ
hatvā sphuradbāhukuṭhāraśastraḥ
tri(:) saptakratvo'vanimācakāra
niḥkṣatriṇīmugratarasvabhāvaḥ
5.13
bhūtvā punardāśarathirjigāya
rakṣodhipaṃ yo'dbhutasetukārī
hetorvidehādhipakanyakāyā:
prodyatpratāpāmbudhirāryavandyaḥ
5.14
kṛṣṇāvatāraṃ bhuvi yo vidhāya
bhuvo bharaṃ cāpanayadrameśaḥ
kaṃsādiduṣṭakṣitipograsainyo–
dbhūtaṃ mahendrādyabhivāditāṅghriḥ
5.15
buddhasvarūpaṃ yaḥ kṛtvā mohayāmāsa dānavān
svarge'xn yajñakartṝṃśca pāṣaṇḍaśrutibhiḥ prabhuḥ
5.16
kalkisvarūpaṃ yaḥ kṛtvā karavālaṃ kare'karot
kalerante kadaryāṇāṃ kadanaṃ kṛtavānvibhuḥ
5.17
evaṃ daśākṛtikṛte narasiṃhāya te namaḥ
kecidāhuścaturviśadrūpāṇi tava ca prabho
5.18
itthaṃ stuto narahariḥ punarābabhāṣe
tvaṃ tāvadatra bhuvane'si bhamāvatāraḥ
ātmānamatribhavane kila pūrvajātaṃ
kiṃ na smarasyabhidhayā sumate'nayaiva
5.19
yo'haṃ sa tvaṃ ca tvaṃ cāhaṃ na tvaṃ bhedo'styāvayoḥ kvacit
itthaṃ sati kimūnaṃ te yadicchaṃstapasi sthitaḥ
5.20
nṛsiṃhagaditaṃ śrutvā durvāsāstamabhāṣata
smarāsmyevātmanātmānaṃ lokasthityai tapaścare
5.21
ityukto narasiṃhastu muninā tena satkṛtaḥ
antardadhe narahariḥ surāsuranamaskṛtaḥ
5.22
antarhite naraharau durvāsāḥ sa taponidhiḥ
tathaiva gurusānnidhye so'karodduścaraṃ tapaḥ
5.23
iti durvāsaso vṛttaṃ śrutvā gururatalpadṛk
sarveṣāṃ svātmaśiṣyāṇāṃ (9a) mukhyaṃ tamakarodvibhuḥ
5.24
itthaṃ kvacidyogaparāyaṇasya
kvacicca śiṣyapratibodhakasya
samāḥ samīyurbahavaḥ samīpe
gurornivāsābhiratasya tasya
5.24.p1
iti śrīmahāmatisutasya durvāsasaḥ kāvye rasikaramaṇasaṃjñe kaviśrīraghunāthaviracite durvāsā kṛtanṛsiṃhastutinirūpaṇo nāma pañcamaḥ sargaḥ
Linked texts (1)
- Rasikaramana — Raghunātha, Sanskrit