Rasikarmana 7

Rasikarmaṇa 7

Language: Sanskrit

7.1

gandharvarājatanayaṃ bṛhadaśvasaṃjñamudgṛtya kautukasamākulaśiṣyavṛndaiḥ
śāpādyau parivṛtaḥ pathi kautukāni
kṣetraṃ munirviracayanpuruṣottamākhyam

7.2

yatra kṣetre jagannātho devastribhuvaneśvaraḥ
sthitaḥ sākṣātsatāṃ siddhacai surāsuranamaskṛtaḥ

7.3

rājā gajapatī rudrapratāpākhyo virājate
yatra devī ramā nityaṃ ramate svavibhūtibhiḥ

7.4

tatrāgato'sau durvāsāḥ śiṣyasaṃghasamāvṛtaḥ
reje sākṣātsvayaṃ rudro jagannāthaṃ vilokayan

7.5

pratāparudro nṛpatirniśamya
durvāsasaṃ svaṃ viṣayaṃ prapannam
upāyanāni pratigṛhya hṛṣṭaḥ
pratyujjagāmātmani dhanyatādhṛk

7.6

tathā hi-vāsāṃsi navānyanarghyaṃśobhānyamūlyāni ca ratnajātīḥ
rathadvipāśvānnarayānapaṃktīdravyaṃ caturlakṣasuvarṇasaṃkhyam

7.7

hāraṃ ca muktāmaṇiśobhamānaṃ
sphuratprabhāmaṇḍaladīpyamānam
kastūrikācandanakesarāṇi
tāmbūlapuṣpāṇi lavaṅgadhānāḥ

7.8

pūjopahāraṃ vividhaṃ pragṛhya
nṛpaḥ padātiḥ svajanānuyātaḥ
svajanma dhanyaṃ bahu manyamānaḥ
kṛtāñjaliḥ pūrvamupaśrutaṃ tam

gacchanmārge kujadhanatasthāyasaṃsthaṃ (?) munīśaṃ
śiṣyaiḥ kaiścidvacajanakaradhūtaiḥ sādaraṃ vījyamānam
śiṣyaiḥ kaiścitpraṇayoyutavacorāśibhirhasyamānaṃ
tejodīptaṃ prakaṭamiva nṛpaśrīdineśaṃ vyacakṣat

7.10

dūrādurvāsasaṃ dṛṣṭvā nṛpo gajapatistadā
daṇḍavannamanaṃ kurvanyathau pārśve mahāmuneḥ

7.11

dadau saṃgamya vidhivat (11b) dhṛtvopāyanamagrataḥ
muktāhāraṃ samarpyātha caturlakṣaṃ suvarṇakam

7.12

dhṛtvā bhakṣyaṃ ca bhojyaṃ ca muneragre mahāmatiḥ
apūjayanmuniṃ taṃ sa tāmbūlatilakādibhiḥ

7.13

evaṃ durvāsasaṃ pūjya paścātsarvānmunīnnṛpaḥ
pūjayāmāsa vidhivad hṛṣṭaromā mahāmanāḥ

7.14

saṃpūjya vidhivad bhaktyā kṛtāñjalipuṭo nṛpaḥ
gṛṇan vācāsima dhanyo'hamiti taṃ saṃnanāma saḥ

7.15

durvāsāstaṃ samutthāpya datvāśivamaninditām
papraccha kuśalaṃ rājye rājānaṃ prītipūrvakam

7.16

sa pṛṣṭaḥ kuśalaṃ tena muninā nṛpatirjagau
astyeva me śivaṃ yasya prasādābhimukho bhavān

7.17

ityanyonyaṃ samabhavatprītistāpasabhūpayoḥ
cakratuḥ supaviṣṭau tau kathāśca vividhā śubhāḥ

7.18

durvāsaḥ purastasmin sthite rājñi dvijo'gamat
cintāvyākulacittaścaiko vavande sa taṃ munim

7.19

dṛṣṭvā vipraṃ mahaccintāśuṣyadvadanapaṅkajam
kṛpāpariplutaḥ sāntvapūrvaṃ komalayā girā

7.20

kastvaṃ kimarthamatrādya brahmaṃstvaṃ samupāgataḥ
cintayā vyākulo'si tvaṃ kuta ityavadanmuniḥ

7.21

yugmam
iti durvāsasā pṛṣṭaḥ karuṇāsāgareṇa saḥ
tamuvāca muniṃ tasmādarthasiddhiṃ vicintayan

7.22

itthaṃ sa pṛṣṭastamabhāṣatedaṃ
svāmindvijo'haṃ haradāsanāmā
putrīvivāhākulacittavṛttiḥ—
daridradhāmāsmi tapasvinātha

7.23

dravyārjanāyādhvani tāpaseśa
gacchaṃstu dṛṣṭvāhamupāgato'smi
tvāṃ vai namaskartumanalpasiddhe
cintāṃ mama cchettumihārhasi tvam

7.24

ityukto muniśārdūlaḥ (12a) prahasanniva taṃ jagau
asmākaṃ nyāsināṃ brahman kuto dravyaṃ yadicchasi

7.25

durvāsasa punaḥ prāha dvijo'sau svārthasiddhaye
munestasya kṛpālutvaṃ cintayanmanasi prabhum

7.26

āvṛto bhasmanā vahniḥ svarśaktiṃ ki vimuñcati
munirūpadhare padmanābhau śaktistathā sthirā

7.27

ityukto muniśārdūlo durvāsāḥ punarabravīt
taṃ dvijaṃ bho dvijaśreṣṭha kiyad dravyaṃ vilokyate

7.28

iti pṛṣṭaḥ sa hṛṣṭātmā prāñjaliḥ prāha taṃ munim
durvāsasaṃ dvijavarastaddarśanamahotsavaḥ

7.29

svāmin suvarṇalakṣaṃ tu pāribarhaṃ vilokyate
tadvatsuvarṇalakṣaṃ tu bhojyāya munipuṃgava

7.30

suvarṇalakṣakaṃ tadvatkanyābharaṇasiddhye
etāvadyadi dravyaṃ syāttanme cintā vinaśyati

7.31

mama cintā gataivādya siddhasya tava darśanāt
udite dyumaṇau loke tamaḥ kiṃ pratibādhate

7.32

iti tasya vacaḥ śrutvā durvāsāḥ karuṇānidhiḥ
audāryavāridhiḥ prāha dvijaṃ taṃ premapūrvakam

7.33

yadi te svarṇalakṣāṇāṃ tritayaṃ hi vilokyate
taddattaṃ bhūbhujā svarṇacaturlakṣaṃ gṛhāṇa me

7.34

ityuktvādād dvijendrāya caturlakṣasuvarṇakam
karuṇāvāridhirnityaṃ parakaṣṭavibhañjanaḥ

7.35

itthaṃ dvijaḥ pūrṇamanoratho'sau
durvāsāsākāri munīśvareṇa
tena dvijenāpi ca tatpadābjaṃ
praṇamya yātaṃ nagaraṃ svakaṃ hi

Linked texts (1)

Rasikaramana — Raghunātha, Sanskrit