[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [Poetry (mahākāvya, lyric, messenger poems, stotra, Prakrit kāvya)](https://indike.org/pramana/in.lit.kavya) › [Miscellaneous short works](https://indike.org/pramana/in.lit.kavya.misc) › [Rasikarmana](https://indike.org/pramana/in.lit.kavya.misc.rasikarmana) › 9 # Rasikarmana 9 Rasikarmaṇa 9 - **Language:** Sanskrit ### [9.1](https://indike.org/pramana/in.lit.kavya.misc.rasikarmana.9.1) prayāgavāsī narasiṃhanāmā durvāsaso'sau gururāryavandyaḥ samādhiyogena jahau svakaṃ hi kalevaraṃ tīrthavaraprayāge ### [9.2](https://indike.org/pramana/in.lit.kavya.misc.rasikarmana.9.2) kṣetre sthitaḥ saḥ puruṣottamākhye śrutvā tanutyāgamatho vicitram cakre'nnabhakṣye niyamaṃ mahātmā gurormaṭhaṃ cāpi cacāla śīghram ### [9.3](https://indike.org/pramana/in.lit.kavya.misc.rasikarmana.9.3) atikramya sa panthānamekaviṃśatibhirdinaiḥ prayāgasthaṃ gurumaṭhamavāpa munipuṃgavaḥ ### [9.4](https://indike.org/pramana/in.lit.kavya.misc.rasikarmana.9.4) guroḥ samādhisthānaṃ sa dṛṣṭvā premaplutāśayaḥ yatibhojyasya saṃkalpaṃ durvāsāḥ samacīkalpat ### [9.5](https://indike.org/pramana/in.lit.kavya.misc.rasikarmana.9.5) pūjayitvā guroḥ sthānaṃ candanairdhūpadīpakaiḥ daṇḍavatpraṇipātyātha yatibhojyaṃ cakāra saḥ ### [9.6](https://indike.org/pramana/in.lit.kavya.misc.rasikarmana.9.6) pāyasaiḥ śarkarāyuktairghṛtaughena pariplutaiḥ modakaiścaiva pūpābhiḥ śākaiśca vividhaiḥ pṛthak ### [9.7](https://indike.org/pramana/in.lit.kavya.misc.rasikarmana.9.7) āḍhyaudanasaṃyuktadadhimiśraiḥ pratāpavān yatīnsaṃbhojayāmāsa guruprīṇanahetave ### [9.8](https://indike.org/pramana/in.lit.kavya.misc.rasikarmana.9.8) tāmbūlapuṣpaiḥ saṃpūjya yatīnsarvaniśeṣataḥ brāhmaṇebhyo mahātmāsau dadau dānāni mantravit ### [9.9](https://indike.org/pramana/in.lit.kavya.misc.rasikarmana.9.9) guroḥ samādhisthalasevayetthaṃ durvāsaso'guḥ katicida(14a)ttu māsāḥ tīrthānyaṭasveti tato babhūva durvāsasa gīrnabhasaḥ pragalbhā ### [9.10](https://indike.org/pramana/in.lit.kavya.misc.rasikarmana.9.10) śrutvā vācaṃ gaganajanitāṃ śuddhabhāvaḥ prasanno durvāsāḥ śrīgurupadalasatpaṅkajaṃ cintayitvā kṛtvā bhojyaṃ vratavidhilasaddehaśobhādharāṇāṃ kartuṃ tīrthānyakṛta niyamaṃ pātramekaṃ guṇānām ### [9.11](https://indike.org/pramana/in.lit.kavya.misc.rasikarmana.9.11) namaskṛtya guroḥ sthānaṃ kartuṃ tīrthāni mantravit śiṣyasaṃghaparītastu tasmātsthānāccacāla saḥ ### [9.12](https://indike.org/pramana/in.lit.kavya.misc.rasikarmana.9.12) sa gataḥ prathamaṃ kāmarūpākhyaṃ deśamuttamam taddeśasthāni tīrthāni cakāra munināyakaḥ ### [9.13](https://indike.org/pramana/in.lit.kavya.misc.rasikarmana.9.13) kurvaṃstaddeśatīrthāni durvāsāḥ śiṣyasaṃvṛtaḥ nagaraṃ mallapuryāhvaṃ yayau yādṛcchiko muniḥ ### [9.14](https://indike.org/pramana/in.lit.kavya.misc.rasikarmana.9.14) brahmaputro hrado nāmnā tīrthaṃ paramapāvanam cakāsti svacchapāthobhiḥ pūrṇo yatra tamopahaḥ ### [9.15](https://indike.org/pramana/in.lit.kavya.misc.rasikarmana.9.15) yatra nīlastu nāmnā vai parvataḥ śobhate sadā nānādrumalatākīrṇo nirjharairupaśobhitaḥ ### [9.16](https://indike.org/pramana/in.lit.kavya.misc.rasikarmana.9.16) yasmistu nagare ramye taddeśādhipatirmahān śrīrāmākhyo nṛpo nityaṃ vasati śrīpatipriyaḥ ### [9.17](https://indike.org/pramana/in.lit.kavya.misc.rasikarmana.9.17) tasminmallapure śiṣyaiḥ parito munināyakaḥ snātvā brahmahrade tīrthe tatkaṇṭhe samupāviśat ### [9.18](https://indike.org/pramana/in.lit.kavya.misc.rasikarmana.9.18) tīrthopakaṇṭhe sthita eva tasmin mukundamiśro dvijapuṃgavastu snātuṃ samabhyāgata enamatra durvāsasaṃ vai sthitamaikṣatāsau ### [9.19](https://indike.org/pramana/in.lit.kavya.misc.rasikarmana.9.19) durvā(sa)saṃ sthitaṃ vīkṣya śiṣyasaṃghopasevitam kṛtāñjalipuṭo bhūtvā praṇanāma sa daṇḍavat ### [9.20](https://indike.org/pramana/in.lit.kavya.misc.rasikarmana.9.20) kastvaṃ durvāsetyukto dvijanmātmānamādarāt kathayāmā(14a)sa munaye idaṃ ca tamayācata ### [9.21](https://indike.org/pramana/in.lit.kavya.misc.rasikarmana.9.21) svāminmadīyaṃ bhavanaṃ tvamadya pavitrayasvāgamanena nātha jātaṃ madīyaṃ saphalaṃ hi janma tvaddarśanātpāvaya me kuṭumbam ### [9.22](https://indike.org/pramana/in.lit.kavya.misc.rasikarmana.9.22) iti vijñaptimākarṇya durvāsāstu dvijanmanaḥ tatheti jagṛhe tasya vacanaṃ tāpaseśvaraḥ ### [9.23](https://indike.org/pramana/in.lit.kavya.misc.rasikarmana.9.23) sa tadrśitamārgeṇa tasya sadma cāpa tāpasaḥ kautukāviṣṭacetobhirmanuṣyaiḥ pathi vīkṣitaḥ ### [9.24](https://indike.org/pramana/in.lit.kavya.misc.rasikarmana.9.24) mukundamiśro'pi ca sadma nītvā durvāsasaṃ svaṃ vividhopahāraiḥ pādyārghadhūpādibhirarcayattaṃ śiṣyāṃstathā bhojanatarpaṇaiśca ### [9.25](https://indike.org/pramana/in.lit.kavya.misc.rasikarmana.9.25) durvāsasaṃ toṣayitvā śiṣyasaṃghasamāvṛtam tāmbūlatilakaścaiva puṣpairabhyarcayattu saḥ ### [9.26](https://indike.org/pramana/in.lit.kavya.misc.rasikarmana.9.26) pratyahaṃ tena vipreṇa pūjitastadgṛhe'vasat itthaṃ sa muniśārdūlo durvāsāḥ karuṇālayaḥ ### [9.27](https://indike.org/pramana/in.lit.kavya.misc.rasikarmana.9.27) durvāsasi sthite tatra lokā arhaṇapāṇayaḥ ājagmustaṃ namaskartuṃ yathā śrīpatimādarāt ### [9.28](https://indike.org/pramana/in.lit.kavya.misc.rasikarmana.9.28) mukundamiśrasya tu sadmamārgo babhūva lokasya gatāgataistu ābālavṛddhasya samākulo'laṃ taṃ vai namaskartumupeyuṣaśca ### [9.29](https://indike.org/pramana/in.lit.kavya.misc.rasikarmana.9.29) tāmbūlapuṣpairmunināyakaṃ taṃ durvāsasaṃ sarvajano'bhipūjya na prāpa tṛptiṃ paripaśyamāno durvāsaso vaktrasarojaśobhām ### [9.30](https://indike.org/pramana/in.lit.kavya.misc.rasikarmana.9.30) durvāsasaṃ vilokyaiva prahṛṣyantaḥ parasparam militvā tasya māhātmyaṃ procuḥ kāruṇyavāridheḥ ### [9.31](https://indike.org/pramana/in.lit.kavya.misc.rasikarmana.9.31) rājā śrīrāmanāmāsau durvāsasamakalmaṣam nagaraṃ svaṃ samāpannaṃ śrutvānandapluto'bhavat ### [9.32](https://indike.org/pramana/in.lit.kavya.misc.rasikarmana.9.32) dhanyaṃ svajanma manvānaḥ protsāheṇa (?) samanvi(15a)taḥ upāyanāni saṃgṛhya taṃ namaskartumāyaau ### [9.33](https://indike.org/pramana/in.lit.kavya.misc.rasikarmana.9.33) koṭīdvayasuvarṇasya nirmitaṃ pādukādvayam tadvad dvādaśakoṭacāhvasvarṇamūlyaṃ dukūlakam ### [9.34](https://indike.org/pramana/in.lit.kavya.misc.rasikarmana.9.34) hāraṃ ca sumahattāramuktāphalavirājitam maṇihastyaśvadravyāṇi śobhanāni bahūni ca ### [9.35](https://indike.org/pramana/in.lit.kavya.misc.rasikarmana.9.35) svarṇiṣṭādaśakoṭībhirnirmitāṃ sumahāmanāḥ śayyāṃ tasmai samarpyārtha daṇḍavattaṃ nanāma saḥ ### [9.36](https://indike.org/pramana/in.lit.kavya.misc.rasikarmana.9.36) saṃpūjya vidhivadrājā śrīrāmākhyastu tāpasam durvāsasaṃ tataḥ śiṣyānpūjayāmāsa sādaram ### [9.37](https://indike.org/pramana/in.lit.kavya.misc.rasikarmana.9.37) pūjayitvā saśiṣyaṃ taṃ śrīrāmo nṛpatistataḥ kṛtāñjalipuṭo bhūtvā samuvāca taponidhim ### [9.38](https://indike.org/pramana/in.lit.kavya.misc.rasikarmana.9.38) adya me saphalaṃ janma jīvitaṃ mama sārthakam dhanyo'smyanugṛhīto'smi tvayā kāruṇyavāridhe ### [9.39](https://indike.org/pramana/in.lit.kavya.misc.rasikarmana.9.39) kṛtāñjalipuṭo bhūtvā tvāmahaṃ prārthayāmi bho (:) idaṃ samṛddhaṃ rājyaṃ me gṛhāṇa tapasāṃ nidhe ### [9.40](https://indike.org/pramana/in.lit.kavya.misc.rasikarmana.9.40) no cetputraṃ guṇanidhiṃ dehi kṛtvā dayāṃ mune kiṃ rājyena mama svāminvinā putraṃ samṛddhimat ### [9.41](https://indike.org/pramana/in.lit.kavya.misc.rasikarmana.9.41) tvaddarśanātpūrṇamanorathāḥ syujīvāḥ kimatra pratibhāti citram kalyantadaṃ prāpya punaḥ prabhūtaśokāya kiṃ bho(:) prabhavanti dīnāḥ ### [9.42](https://indike.org/pramana/in.lit.kavya.misc.rasikarmana.9.42) māṃ tārayāptaṃ tava pādapadmanāvaṃ sucintābdhimanantapāram tvaṃ tāpasairvanditapādapadmaḥ siddho'si, siddhiṃ mama dehi nātha ### [9.43](https://indike.org/pramana/in.lit.kavya.misc.rasikarmana.9.43) pūrvajaiḥ saha gacchantaṃ tamondhaṃ karuṇānidhe tvamarhasi samuddhartuṃ mune saṃtatidānataḥ ### [9.44](https://indike.org/pramana/in.lit.kavya.misc.rasikarmana.9.44) iti rājño'tikaruṇaṃ niśamya vacanaṃ muniḥ prahasya prāha rājendra vaco (15b)me'vahitaḥ śṛṇu ### [9.45](https://indike.org/pramana/in.lit.kavya.misc.rasikarmana.9.45) sastrīkastu mayā dattaṃ mantraṃ yadi bhavānbhavet dhartuṃ kṣamastadā putraprāptistava bhaviṣyati ### [9.46](https://indike.org/pramana/in.lit.kavya.misc.rasikarmana.9.46) iti durvāsaso vākyamākarṇya nṛpatistataḥ kṛtāñjalipuṭo bhūtvā tatheti pratyapadyata ### [9.47](https://indike.org/pramana/in.lit.kavya.misc.rasikarmana.9.47) tathetyaṅgīkṛte rājñā durvāsāstamabhāṣata prātardāsyāmi te mantramadya yāhi svakaṃ gṛham ### [9.48](https://indike.org/pramana/in.lit.kavya.misc.rasikarmana.9.48) durvāsasetyanujñātaḥ śrīrāmo nṛpatistadā daṇḍavattaṃ namaskṛtya yayau suhṛdanuvrataḥ ### [9.49](https://indike.org/pramana/in.lit.kavya.misc.rasikarmana.9.49) gate rājñi sa durvāsāḥ śiṣyasaṃghairupāsitaḥ sāyaṃsaṃdhyāmupāsyātha talpe rājñārpite'svapat ## Linked texts (1) - [Rasikaramana](https://indike.org/pramana/in.lit.kavya.rasikaramana.9.1) — Raghunātha, Sanskrit --- Source: [https://indike.org/pramana/in.lit.kavya.misc.rasikarmana.9](https://indike.org/pramana/in.lit.kavya.misc.rasikarmana.9) · Pramāṇa