Rasikaramana 13
Rasikaramana 13
- Language
- Sanskrit
Contents
- 13.28 — 1 part
13.1
(22a) athāgato dvāravatīṃ purīṃ ca
catuṣpathe sarvanamaskṛto'sau
saṃśobhamānaṃ svamaṭhaṃ viveśa
śiṣyaiḥ parītaḥ khalu siddhavandyaḥ
13.2
tatra praviśyākhilasiddhavandyaḥ
snānādi sarvaṃ vidhivacca kṛtvā
trivikramaṃ devamapi praṇamya
śiṣyaiḥ parīto bubhuje muniḥ saḥ
13.3
bhuktvā svaśiṣyairupaśobhamāno'nnāni svarucyābhimatāni siddhaḥ
yāvatsa śuddhācamanaṃ cakāra
tāvattu siddhaiḥ kṛtamāsanaṃ sat
13.4
bhuktvopaklṛpte'dbhuta āsane'sau
sthitaścakāse kila śiṣyavṛndaiḥ
saṃsevyamāno vibudhairyathendraḥ
kaiścitstuvadbhiḥ stutibhiḥ suhṛṣṭaiḥ
13.5
ḷmatpaṭṭakūlādibhiḥ śobhamānaṃ
svaśiṣyaiḥ mamantācca maṃsevyamānam
samīyurnamaskartumenaṃ hi lokāḥ
purīdvārakāvāsinastyaktaśokāḥ
13.6
pratidinamakalaṅkaṃ dvārakāvāsinaste
tamupayayuradhīśaṃ bālavṛddhāḥ prahṛṣṭāḥ
namitumakhilayatīndrairvanditāṃghriṃ munīśaṃ
kanakamaṇisumuktopāyanāni pragṛhya
13.7
saṃpūjyamāne munisiddhavandye
durvāsasītthaṃ nṛpatistadānīm
taṃ pratyahaṃ nāgarikaiḥ prahṛṣṭaiḥ
siddheśvaraṃ hṛṣṭataro'śṛṇodvai
13.8
upāyanāni pratigṛhya hṛṣṭaḥ
śrutvā nṛpo'gānmaṭhamasya vipraiḥ
sākaṃ namaskartumanalpasiddhiṃ
durvāsasaṃ śiṣyagaṇairupetam
13.9
nṛpo maṭhadvāri vyatiṣṭhatāmuṃ
siddheśvaraṃ namituṃ mahātmā
āgatya taddarśanamatra nāpa
(22b) punaḥ supuṇyena janena dṛśyam
13.10
tatra sthitasyaiva nṛpasya tasya
sūryo'stamāgānnṛpatistato'sau
yayāvamātyairvahubhiḥ parīto
gṛhaṃ svakaṃ svāghamanusmaranvai
13.11
rātrau gatāyāṃ nṛpatiḥ prabhāte
kṛtvāhnikaṃ karma munīśvarasya
punarmaṭhadvāramupājagāma
durvāsaso darśanamāpa naiva
13.12
itthaṃ munīśaṃ nṛpatestu tasya
draṣṭuṃ prayatnaṃ munisiddhavandyam
prakurvato'sustriguṇāni sapta
dinānyamātyādigaṇairyutasya
13.13
dvārviṃśake'sau nṛpatirmaṭhasya
draṣṭuṃ sthito dvāri janānuyātaḥ
munarahorātramamuṃ mahātmā
durvāsasaṃ siddhagaṇānuyātam
13.14
prātaḥ samutthāya munistu yāvat
trivikramaṃ saṃnamituṃ sa yāti
tāvanmaṭhadvāri nṛpaḥ sthito'sau
durvāsaso darśanamāpa bhāgyāt
13.15
durvāsasaṃ taṃ nṛpatiḥ sa dṛṣṭvā
harṣāśrunetro munimānanāma
stuvansvabhāgyaṃ svajanānuyātaḥ
sūpāyanānyagrata eva muktvā
13.16
pratyarcito'sau muninā ca tena
nṛpo babhūvātitarāṃ prahṛṣṭaḥ
provāca taṃ cāpi munīśvaraṃ vai
rājeti vākyaṃ svagaṇānuyātam
13.17
anugrahaṃ kartumihārhasi tvaṃ
mahyaṃ mahātman śubhamantradānāt
rājño vacaścetthamanalpasiddhirmunirniśamyedamuvāca bhūpam
13.18
trivikramaṃ devamahaṃ prapūjya
dāsyāmi mantraṃ tvamiha kṣitīśa
tubhyaṃ hi tāvatsvajanānuyātaḥ
sthito bhavāmātyagaṇaiśca yuktaḥ
13.19
(23a) rājānamitthaṃ sa munistamuktvā
trivikramaṃ pūjayituṃ cacāla
śiṣyaiḥ parītaḥ sa nṛpaśca tatra
maṭhe sthito'bhūtsvagaṇopayuktaḥ
13.20
sa gomatīvāriṇi śiṣyavṛndaiḥ
snātvā samaṃ dvāravatīpatiṃ ca
trivikramaṃ devamapūjayadvai
munirmahātmā vividhopacāraiḥ
13.21
sa pūjayitvā vidhivattrilokīnāthaṃ munirdevamanalpasiddhiḥ
trivikramaṃ svaṃ maṭhamājagāma
śiṣyaiḥ parītaḥ kṣitipena dṛṣṭaḥ
13.22
tato maṭhaṃ svaṃ sa muniḥ praviśya
rājñe dadau mantramanalpasiddhim
dravyaṃ sa datvā gurudakṣiṇārthe
bahu, svakaṃ sadma yayau sa hṛṣṭaḥ
13.23
itthaṃ munīśasya babhūva śiṣyo
nṛpaḥ sa cāmātyagaṇānuyātaḥ
rājñārcito'sau svamaṭhe'vasadvai
svaśiṣyayuktaḥ paripūrṇalakṣmīḥ
13.24
munirmaṭhe sve tu vasaṃśca cakrenivāritānnasya suhṛṣṭacittaḥ
saṃkalpamārādakhilārthasiddhiḥ
kṣitīśvareṇānudinaṃ niyuktaḥ
13.25
sa dvārakāyāṃ svamaṭhe vasaṃstu
kṛtvānnadānasya muniḥ prahṛṣṭaḥ
saṃkalpamatrāpi cakāra dānamannasya siddheśvaravandyapādaḥ
13.26
vavarṣa so'nnena mahāguṇena
pakvena vā''mrena ca śiṣyayuktaḥ
yathāmbudo vāribhiratra loke
kṛpāsamudraḥ sakalārthasiddhiḥ
13.27
jane'psitārthaṃ pradadāti nityamaudāryavārāṃnidhirāryavandyaḥ
munīśvaraḥ śiṣyagaṇānuyātastrailokyaduḥkhāpahaśceśvaraśca
13.28
itthaṃ kurvaṃstri (23a) bhuvanajanaṃ saukhyapātraṃ munīśotyarthaṃ śiṣyaiḥ parita urubhiḥ sūpaviṣṭaistvaśobhan
durvāsāḥ śrīguṇagaṇayaśodhāmanāmādhipatyamadhyāste'sau tapasi nitarāṃ saṃsthitānāṃ munīnām
13.28.p1
iti śrīmahāmatisutasya durvāsasaḥ kāvye rasikaramaṇasaṃjñe kaviśrīraghunāthaviracite durvāsaso'nnāritānnadāno nāma trayodaśaḥ sargaḥ
Linked texts (1)
- Rasikarmaṇa — Raghunāthanāyakuḍu 1539, Sanskrit