Rasikaramana 18
Rasikaramana 18
- Language
- Sanskrit
18.1
atha kalāvapi naimiṣakānane
sa karuṇākaramiśragṛhe'bhavat
abhidhayā tu tayaiva mahāmaterudararatnamanalapataponidhiḥ
18.2
pravrajya gehānmuninā ca yena
nṛsiṃhanāmnaḥ pragṛhīta āśu
bālena vai dvādaśavārṣikeṇa
saṃnyāsayogo mama so'stu tuṣṭaḥ
18.3
bhūlokatīrthāni kṛtāni yena
samuddhṛto yo bṛhadrathasaṃjñaḥ
gandharvaputro dvijaśāpatastu
so'yaṃ munirme'stu suhṛṣṭacittaḥ
18.4
yo yogamārgaṃ vidhivanmunīśo
vedātmasaṃsthāpitacittavṛttiḥ
śiṣyaiḥ parītaḥ satataṃ vibhāti
so'yaṃ munirme'stu suhṛṣṭacittaḥ
18.5
caturṣvapītthaṃ ca yugeṣu yo vai
śaśvatprakāśīkṛtadehayaṣṭiḥ
jñānāvabodhaikarase nimagnaḥ
soyaṃ munirme'stu suhṛṣṭacittaḥ
18.6
mukundamiśrasya śubhāśayena
dāridracaduḥkhaṃ hṛtamāśu yena
tīrthaṭināyānugatena nityaṃ
soyyaṃ munirme'stu suhṛṣṭacittaḥ
18.7
yaḥ kalpavṛkṣeṇa samo'sti loke
na nepsitārthādhikadānaśīlaḥ
prāṇasya mārgānvidhivacca veda
soyyaṃ munirme'stu suhṛṣṭacittaḥ
18.8
durvāsasā yena kṛtaṃ munibhyo
dānaṃ śubhānnasya tu dvārakāyām
audāryasindhurguṇavāridhiśca
soyyaṃ munirme'stu suhṛṣṭacittaḥ
18.9
dhanyeyaṃ jananī mahāmatiriti khyātā kṣitau sarvadā
yā (33 a) durvāsasamatra putramabalā sūte sma saṃvidgurum
prācīvoḍupamakṣikautukaraṃ doṣātamohāriṇaṃ
śaśvajjīvanikāyatāpaśamanaṃ pūrṇaṃ vinā lāñchanam
18.10
yo'sau kalpamahīruhastrijagati khyātaḥ phalākāṅkṣiṇāṃ
śaśvadyācakacātakeṣu viditaḥ pūrṇāmbuvarṣī ghanaḥ
dāridryādidurantaduḥkhaśamane vyaktaṃ vibhuḥ procyate
re re mūḍhajanā bhajadhvamaniśaṃ durvāsasaṃ taṃ munim
18.11
dhanyo'sau dvijanāyako'tra bhuvane yasyātmajo'bhūnmuniḥ
saṃnyāsābhirato nitāntaviditabrahmasvarūpaḥ prabhuḥ
durvāsāḥ karuṇākaro vasati vai vaikuṇṭhaloke sadā
putrasyogratapaḥsthitasya niyamātsākaṃ svapatnyāniśam
18.12
durvāsasaḥ santi guṇā hyanantāstānkaḥ samartho'sti bhuvi praśastān
vaktuṃ tato me matimānato'smin
granthe samuktāḥ satataṃ hi santi
18.13
yaddūṣaṇaṃ me'jjani paṇḍitāstadasminkṣamadhvaṃ praṇayātkavīndrāḥ
mūḍhena baddho'ñjalireṣa granthe
yuṣmabhyamatyalpadhiyā mayā hi
18.14
svapne śivenaiva guṇāḥ pradiṣṭā
durvāsaso mahyamanukrameṇa
khyātā mayā te tvata eva deyaṃ
no dūṣaṇaṃ me kavayaḥ pragalbhāḥ
18.15
yadakṣaraṃ vṛddhigataṃ samūnaṃ
yaccāpi jātaṃ mama buddhimohāt
kāvye munīśairabhivanditasya
durvāsaso'smin ta(smista)dalaṃ kṣamadhvam
18.16
svaro'dhikaḥ kvāpi ca ced bhavedvai
chandaḥ kvacit (33 b) syātskhalitaṃ kavīśāḥ
tatkṣāmaye dūṣaṇajātamatra
gacchanskhaledvai puruṣastato vaḥ
18.17
bho bho sabhyāḥ śṛṇuta vacanaṃ matsaro naiva kāryaḥ
śrīmaddurvāsaso me kṛtamiha ramaṇaṃ kāvyamatyadbhutaṃ ca
asmin hārdaṃ kvacidapi racitaṃ tatsadā cintanīyaṃ
doṣastyājyo'niśamamaratāmicchubhirvo guṇāḍhyāḥ
18.18
santaḥ svayaṃ parahiteṣu ratā bhavanti
pūjyāsta eva bhuvane'pi bhavanti nityam
tatsaṃgatastribhuvane'sti śubhaṃ ca nityaṃ
tebhyo namo'stu satataṃ mama mandabuddheḥ
18.19
sadvastuniṣṭhāḥ prabhavanti santo
haṃsā yathā kṣīrabhujastriloke
asatpumāṃso'pi bhavanti muktāścāpāyasaṃvidbhugasansuniṣṭhāḥ
18.20
× × bhāratīśrīnṛsiṃhasya śiṣyaṃ
namāmīha bhaktyā muniṃ tāpaseśam
tapoyoganiṣṭhaṃ svaśiṣyaiḥ parītaṃ
sadānandasaṃdohasaṃyuktacittam
18.21
yadvaktrasya nirīkṣaṇāttribhuvane puṃsāṃ palāyetkṣaṇādāridryaṃ paripūrṇacandrasurucastāmbūlapūrṇasya ca
śaśvaccandanacarcitasya sudatastaṃ tāpaseśaṃ mudā
bhaktyā naumi munīśvarārcitapadaṃ durvāsasaṃ nityadā
18.22
rasikaramaṇasaṃjñaṃ kāvyametaccakāra
kavivararaghunātho hyatra durvāsaso'ham
śubhaguṇasamudāyajñāpakaṃ tena kṛtvā
mama bhavatu sutuṣṭo'sau muniḥ pūrṇalakṣmīḥ
Linked texts (1)
- Rasikarmaṇa — Raghunāthanāyakuḍu 1539, Sanskrit