Rasikaramana 8
Rasikaramana 8
- Language
- Sanskrit
Contents
- 8.26 — 1 part
8.1
athaudāryaṃ samālakṣya śrīmaddurvāsaso nṛpaḥ
vismitaḥ saṃbabhūvāsau taṃ mene'śaṃ harerbhuvi
8.2
evaṃ dvijavarasyārthaṃ saṃdhāya munipuṃgavaḥ
rājānaṃ pratyuvācedaṃ rājanme vacanaṃ śṛṇu
8.3
pūjopahāraḥ sarvastu gṛhīto me tavānagha
rathāśvanarayānāni śastāni nṛpatergṛhe
8.4
tasmād gṛhāṇa tatsarvaṃ mayā pratyarpitaṃ tava
pūjārthaṃ nṛpaśārdūla vayaṃ saṃnyāsino yataḥ
8.5
tatheti vacanaṃ tasya muneḥ sa śirasā dadhau
nṛpo gajapatirhṛṣṭaḥ provāca ca munīśvaram
8.6
svāmiṃstvaduktaṃ hi mayā gṛhītaṃ
tathāpi yāce kimapi praśastam
nṛyānamekaṃ munisiṃha me tvamaṅgīkuru snehatayārpitaṃ hi
8.7
tatheti tadvacaḥ sādhu jagṛhe munipuṃgavaḥ
durvāsāḥ prītiyuktātmā tuṣṭo gajapateryataḥ
8.8
tato'nuyātaḥ kṣitipena tena
pratāparudreṇa kṛpāsamudraḥ
cele jagannāthamukhāravindaṃ
draṣṭuṃ sa padbhyāṃ vidhipālanāya
8.9
gacchan padbhyāṃ munivaraśiraḥsaṃnatāṅghirmunīśo
reje mārge caraṇanalinanyāsato bhūṣayansaḥ
pīnoraskāyatabhujakaṭigrīvayā ramyamūrtirlīlāgāmī madarasavaśātkṣmātale satkarīva
8.10
itthaṃ mārgamatikramya durvāsāḥ sa munīśvaraḥ
sānugena nṛpeṇānuyātaḥ prāpa jagatpatim
8.11
durvāsā daṇḍavad bhūmau jagannāthaṃ praṇamya saḥ
pūjayāmāsa vidhivaddhūpadīpopahārakaiḥ
8.12
pūjayitvā jagannāthaṃ stutyā saṃtoṣya taṃ prabhum
bahirāgatya rājānaṃ gṛhāyānumatiṃ (13a) dadau
8.13
so'nujñātastu rājendro namaskṛtya munīśvaram
mahāmātyairyayau sadma samarghyaṃ vasu puṣkalam
8.14
durvāsāstu tataḥ śiṣyānpākasthityai samādiśat
pecurvai vividhānnāni śākajātīrmanoramāḥ
8.15
pakvānnāni suhṛdyāni śiṣyāste sma samabruvan
śiṣyavijñāpitaṃ śrutvā bhojanāyopacakrame
8.16
snātvābhyarcyaṃ jagannāthaṃ datvā dānāni buddhimān
bubhuje śiṣyavṛndaiḥ sa mahānnaṃ prītipūrvakam
8.17
bhuktvānnaṃ prītipūrvaṃ saḥ saha śiṣyairmahāmanāḥ
cakāra śuddhācamanaṃ dantadhāvanapūrvakam
8.18
kṛtvā ca vidhivacchuddhācamanaṃ munipuṃgavaḥ
mukhavāsaṃ tataścakre hastavāsādikaṃ ca saḥ
8.19
sa bhuktvāsanamāsīnaḥ śiṣyasaṃghairupāsitaḥ
cakāra śrutivyākhyānaṃ śiṣyavṛndaṃ tu bodhayan
8.20
itthaṃ sukhāsanasthasya śrutivyākhyāratasya ca
tasya sūryo jagāmāstaṃ saṃdhyākāla upasthitaḥ
8.21
saṃdhyākāle samāpanne snānaṃ kṛtvā mahāmuniḥ
sāyaṃsaṃdhyāmupāste sma śrutidharmaparāyaṇaḥ
8.22
upāsya vidhivatsaṃdhyāṃ japaṃ kṛtveṣṭadaivikam
suṣvāpa sa sukhaṃ śiṣyasaṃghena samupāsitaḥ
8.23
tato rātryāṃ vyatītāyāmuṣasyutthāya dharmavit
snātvā śuciḥ sa durvāsā nityakarma cakāra ha
8.24
nityakarma nivartyatha jagannāthamapūjayat
pūjayitvā jagannāthaṃ bubhuje'nnaṃ caturguṇam
8.25
tathaiva bhuktvā ca sukhāsanasthaścakāra carcāḥ smṛtivedasiddhāḥ
prabodhayan śiṣyasamūhamatra
kṣetre jaga(13 b)nāthanṛpasya siddhaḥ
8.26
durvāsasītthaṃ jagadekanāthakṣetre vasatyutsukabhūbhujā vai
saṃsevyamāne'rhaṇapāṇināsau
kālo'tyagānmāsacatuṣṭayākhyaḥ
8.26.p1
iti śrīmahāmatisutasya durvāsasaḥ kāvye rasikaramanasaṃjñe kaviśrīraghunāthaviracite durvāso jagannāthakṣetranivāso nāma aṣṭamaḥ sargaḥ
Linked texts (1)
- Rasikarmaṇa — Raghunāthanāyakuḍu 1539, Sanskrit