<!-- Pramāṇa, a library of Indian primary sources · https://indike.org/pramana/in.lit.mahabharata.bhasa.kumaravyasa.1.4 -->

[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [The Mahābhārata and its versions](https://indike.org/pramana/in.lit.mahabharata) › [Mahābhāratas in Indian regional languages](https://indike.org/pramana/in.lit.mahabharata.bhasa) › [Karnata Bharata Kathamanjari](https://indike.org/pramana/in.lit.mahabharata.bhasa.kumaravyasa) › 1.4

# Karnata Bharata Kathamanjari 1.4: ಸಟೀಕಾ (ಪರ್ವ-೧::ಸಂಧಿ-೩)

Karṇāṭa Bhārata Kathāmañjarī 1.4

- **Language:** Kannada

### ಸಟೀಕಾ (ಪರ್ವ-೧::ಸಂಧಿ-೩)

### [1.4.p1](https://indike.org/pramana/in.lit.mahabharata.bhasa.kumaravyasa.1.4.p1)

\<ಕುಮಾರವ್ಯಾಸಭಾರತ-ಸಟೀಕಾ

### [1.4.p2](https://indike.org/pramana/in.lit.mahabharata.bhasa.kumaravyasa.1.4.p2)

ಕುಮಾರವ್ಯಾಸ ಭಾರತ/ಸಟೀಕಾ (೧.ಆದಿಪರ್ವ::ಸಂಧಿ-೩)

### [1.4.p3](https://indike.org/pramana/in.lit.mahabharata.bhasa.kumaravyasa.1.4.p3)

ಆದಿಪರ್ವ - ಮೂರನೆಯ ಸಂಧಿ:

### [1.4.p4](https://indike.org/pramana/in.lit.mahabharata.bhasa.kumaravyasa.1.4.p4)

ಸೂಚನೆ:

### [1.4.p5](https://indike.org/pramana/in.lit.mahabharata.bhasa.kumaravyasa.1.4.p5)

ಚಂಡಮುನಿ ಮಂತ್ರಾಹ್ವಯದಿ ಬರೆ  
ಚಂಡಕರ ತತ್ತೇಜನಾಹವ  
ಚಂಡ ವಿಕ್ರಮನವನಿಯಲಿ ಜನಿಸಿದನು ಕಲಿಕರ್ಣ ||

### [1.4.p6](https://indike.org/pramana/in.lit.mahabharata.bhasa.kumaravyasa.1.4.p6)

ಧೃತರಾಷ್ಟ್ರ - ಪಾಂಡು - ವಿದುರರ ಜನನ

### [1.4.1](https://indike.org/pramana/in.lit.mahabharata.bhasa.kumaravyasa.1.4.1)

ಅರಸ ಕೇಳೈ ಕೆಲವು ಕಾಲಾಂ  
ತರಕೆ ನಿಮ್ಮ ವಿಚಿತ್ರವೀರ್ಯನು  
ನೆರೆದನಮರಸ್ತ್ರೀಯರಲಿ ಬಳಿಕೀ ನದೀಸುತನ ||  
ಕರೆದು ನುಡಿದಳು ಮಗನೆ ರಾಜ್ಯವ  
ಧರಿಸು ನೀನಿನ್ನುತ್ತರದ ಹಿಮ  
ಕರಕುಲವ ಬೆಳಗೆಂದು ಯೋಜನಗಂಧಿ ಬೆಸಸಿದಳು || ೧ ||

### [1.4.2](https://indike.org/pramana/in.lit.mahabharata.bhasa.kumaravyasa.1.4.2)

ತಾಯೆ ನಿಮ್ಮೋಪಾದಿ ರಾಜ್ಯ  
ಸ್ತ್ರೀಯಳೆಂದಾ ನುಡಿಯೊಳಗೆ ಗಾಂ  
ಗೇಯ ಮುಳುಗನು ಭೀಷ್ಮವಚನಕೆ ಬೇರೆ ಮೊಳೆಯುಂಟೆ ||  
ಕಾಯಕಲ್ಪ ಸುಖಕ್ಕೆ ಘನ ನಿ  
ಶ್ರೇಯಸವ ಕೆಡಿಸುವೆನೆ ಯೆಲವದ  
ಕಾಯಿಗೋಸುಗ ಕಲ್ಪವೃಕ್ಷವ ಕಡಿವನಲ್ಲೆಂದ || ೨ ||

### [1.4.3](https://indike.org/pramana/in.lit.mahabharata.bhasa.kumaravyasa.1.4.3)

ಮರುಗಿ ಯೋಜನಗಂಧಿ ಚಿಂತೆಯ  
ಸೆರೆಗೆ ಸಿಲುಕಿದಳೊಂದು ರಾತ್ರಿಯೊ  
ಳರಿದು ನೆನೆದಳು ಪೂರ್ವಸೂಚಿತ ಪುತ್ರಭಾಷಿತವ ||  
ಮುರಿದ ಭರತಾನ್ವಯದ ಬೆಸುಗೆಯ  
ತೆರನು ತೋರಿತೆ ಪುಣ್ಯವೆನುತೆ  
ಚ್ಚರಿತು ನುಡಿದಳು ಮಗನೆ ವೇದವ್ಯಾಸ ಬಹುದೆಂದು || ೩ ||

### [1.4.4](https://indike.org/pramana/in.lit.mahabharata.bhasa.kumaravyasa.1.4.4)

ಕೆಂಜೆಡೆಯ ಕೃಷ್ಣಾಜಿನದ ಮೊನೆ  
ಮುಂಜೆರಗಿನುಡಿಗೆಯ ಬಲಾಹಕ  
ಪುಂಜಕಾಂತಿಯ ಪಿಂಗತರಮುಖ ಕೇಶದುನ್ನತಿಯ ||  
ಕಂಜನಾಭನ ಮೂರ್ತಿ ಶೋಭಾ  
ರಂಜಿತನು ಜನದುರಿತ ದಶಮದ  
ಭಂಜಕನು ತಾಯ್ಗೆರಗಿ ನುಡಿದನು ವ್ಯಾಸಮುನಿರಾಯ || ೪||

### [1.4.5](https://indike.org/pramana/in.lit.mahabharata.bhasa.kumaravyasa.1.4.5)

ನೆನೆದಿರೇನೌತಾಯೆ ಕೃತ್ಯವ  
ನೆನಗೆ ಬೆಸಸೆನೆ ಮಗನೆ ಭಾರತ  
ವಿನುತಕುಲ ಜಲರಾಶಿಯೆಡೆವರಿತುದು ವಿಚಿತ್ರನಲಿ ||  
ತನುಜ ನೀನೇ ಬಲ್ಲೆಯೆನೆ ಕೇಳ್  
ಜನನಿ ನಿಮ್ಮಡಿಯಾಜ್ಞೆಯಲಿ ಸಂ  
ಜನಿಪುವೆನು ವೈಚಿತ್ರವೀರ್ಯ ಕ್ಷೇತ್ರದಲಿ ಸುತರ || ೫ ||

### [1.4.6](https://indike.org/pramana/in.lit.mahabharata.bhasa.kumaravyasa.1.4.6)

ಎಂದು ಬಳಿಕೇಕಾಂತ ಭವನದೊ  
ಳಂದು ಮುನಿಯಿರಲಂಬಿಕೆಯನರ  
ವಿಂದಮುಖಿಯಟ್ಟಿದಳು ಸೊಸೆಯನು ಮುನಿಯ ಪೂರೆಗಾಗಿ ||  
ಬಂದು ಮುನಿಪನ ದಿವ್ಯರೂಪವ  
ನಿಂದುಮುಖಿ ಕಂಡಕ್ಷಿಗಳ ಭಯ  
ದಿಂದ ಮುಚ್ಚಿದಳಾಕೆ ತಿರುಗಿದಳರಸ ಕೇಳೆಂದ || ೬ ||

### [1.4.7](https://indike.org/pramana/in.lit.mahabharata.bhasa.kumaravyasa.1.4.7)

ಬಳಿಕಲಂಬಾಲಿಕೆಯನಲ್ಲಿಗೆ  
ಕಳುಹಲಾಕೆಗೆ ಭಯದಿ ಮುಖದಲಿ  
ಬಿಳುಪು ಮಸಗಿತು ಮುನಿಯ ರೌದ್ರಾಕಾರದರ್ಶನದಿ ||  
ಲಲನೆ ಮರಳಿದಳೊಬ್ಬ ಸತಿಯನು  
ಕಳುಹಲಾ ವಧು ಚಪಲದೃಷ್ಟಿಯೊ  
ಳಳುಕದೀಕ್ಷಿಸಲಾಯ್ತು ಗರ್ಭಾದಾನವನಿಬರಿಗೆ || ೭ ||

### [1.4.8](https://indike.org/pramana/in.lit.mahabharata.bhasa.kumaravyasa.1.4.8)

ಬಂದು ಮುನಿಪತಿ ತಾಯ್ಗೆ ಕೈಮುಗಿ  
ದೆಂದನಂಬಿಕೆಯಲ್ಲಿ ಜನಿಸುವ  
ನಂದನನು ಜಾತ್ಯಂಧನಂಬಾಲಿಕೆಗೆ ಪಾಂಡುಮಯ ||  
ಬಂದ ಬಳಿಕಿನ ಚಪಲೆಗತಿಬಲ  
ನೆಂದು ಹೇಳಿದು ತನಗೆ ನೇಮವೆ  
ಯೆಂದು ತನ್ನಾಶ್ರಮಕೆ ಸರಿದನು ಬಾದರಾಯಣನು || ೮ ||

### [1.4.9](https://indike.org/pramana/in.lit.mahabharata.bhasa.kumaravyasa.1.4.9)

ತುಂಬಿದುದು ನವಮಾಸ ಜನಿಸಿದ  
ನಂಬಿಕೆಯ ಬಸುರಿನಲಿ ಸೂನು ಗ  
ತಾಂಬಕನು ಮಗನಾದನಂಬಾಲಿಕೆಗೆ ಪಾಂಡುಮಯ ||  
ಚುಂಬಿಸಿತು ಪರಿತೋಷ ನವ ಪುಳ  
ಕಾಂಬುಗಳು ಜನಜನಿತವದನೇ  
ನೆಂಬೆನುತ್ಸವವನು ಕುಮಾರೋದ್ಭವದ ವಿಭವದಲಿ || ೯ ||

### [1.4.10](https://indike.org/pramana/in.lit.mahabharata.bhasa.kumaravyasa.1.4.10)

ಜಾತಕರ್ಮಾದಿಯನು ಪಾರ್ಥಿವ  
ಜಾತಿ ವಿಧಿವಿಹಿತದಲಿ ಗಂಗಾ  
ಜಾತ ಮಾಡಿಸಿ ತುಷ್ಟಿಪಡಿಸಿದ ನಿಖಿಳ ಯಾಚಕರ ||  
ಈತನೇ ಧೃತರಾಷ್ಟ್ರನೆರಡನೆ  
ಯಾತ ಪಾಂಡು ವಿಲಾಸಿನೀ ಸಂ  
ಭೂತನೀತನು ವಿದುರನೆಂದಾಯ್ತುವರಿಗಭಿಧಾನ || ೧೦ ||

### [1.4.11](https://indike.org/pramana/in.lit.mahabharata.bhasa.kumaravyasa.1.4.11)

ಬೆಳೆವುತಿರ್ದರು ಹರಿಣಪಕ್ಷದ  
ನಳಿನರಿಪುವಿನವೊಲ್ ಕುಮಾರರು  
ಕುಲವಿಹಿತ ಚೌಲೋಪನಯನವನಿಬ್ಬರಿಗೆ ರಚಿಸಿ ||  
ಕಲಿತ ವಿದ್ಯರ ಮಾಡಿ ತಾಯು  
ಮ್ಮಳಿಸದಂತಿರೆ ಸೋಮವಂಶದ  
ಬೆಳವಿಗೆಯನೇ ಮಾಡಿಕೊಂಡಾಡಿದನು ಕಲಿಭೀಷ್ಮ || ೧೧ ||

### [1.4.12](https://indike.org/pramana/in.lit.mahabharata.bhasa.kumaravyasa.1.4.12)

ಧಾರುಣೀಪತಿ ಚಿತ್ತವಿಸು ಗಾಂ  
ಧಾರದೇಶದ ಸುಬಲರಾಜ ಕು  
ಮಾರಿ ಕುಲವಧುವಾದಳಾ ಧೃತರಾಷ್ಟ್ರ ಭೂಪತಿಗೆ ||  
ನಾರಿಯರೊಳುತ್ತಮೆಯಲಾ ಗಾಂ  
ಧಾರಿಯೆನಿಸಿ ಪತಿವ್ರತಾ ವಿ  
ಸ್ತಾರಗುಣದಲಿ ಮೆರೆದಳಬಲೆ ಸಮಸ್ತಜನ ಹೊಗಳೆ || ೧೨ ||

### [1.4.13](https://indike.org/pramana/in.lit.mahabharata.bhasa.kumaravyasa.1.4.13)

ಇತ್ತ ಕುಂತೀಭೋಜನನೆಂಬ ನೃ  
ಪೋತ್ತಮನ ಭವನದಲಿ ಮುರಹರ  
ನತ್ತೆ ಬೆಳೆವುತ್ತಿರ್ದಳಾ ವಸುದೇವನೃಪನನುಜೆ ||  
ಹೆತ್ತವರಿಗೋಲೈಸುವರಿಗೆ ಮ  
ಹೋತ್ತಮರಿಗುಳಿದಖಿಳ ಲೋಕದ  
ಚಿತ್ತಕಹುದೆನೆ ನಡೆವ ಗುಣದಲಿ ಮೆರೆದಳಾ ಕುಂತಿ || ೧೩ ||

### [1.4.14](https://indike.org/pramana/in.lit.mahabharata.bhasa.kumaravyasa.1.4.14)

ಒಂದು ದಿನ ದೂರ್ವಾಸಮುನಿ ನೃಪ  
ಮಂದಿರಕೆ ಬರಲಾ ಮಹೀಪತಿ  
ಬಂದ ಬರವಿನಲವರ ಮರೆದನು ರಾಜಕಾರ್ಯದಲಿ ||  
ಇಂದು ಕುಂತೀಭೋಜನೊಡೆತನ  
ಬೆಂದುಹೋಗಲಿಯೆಂಬ ಶಾಪವ  
ನಿಂದುಮುಖಿ ನಿಲಿಸಿದಳು ಹೊರಳಿದಳವರ ಚರಣದಲಿ || ೧೪ ||

### [1.4.15](https://indike.org/pramana/in.lit.mahabharata.bhasa.kumaravyasa.1.4.15)

ತರುಣಿಯೊಡಗೊಂಡೊಯ್ದು ಕನ್ಯಾ  
ಪರಮ ಭವನದಲಾ ಮುನಿಯನುಪ  
ಚರಿಸಿದಳು ವಿವಿಧಾನ್ನ ಪಾನ ರಸಾಯನಂಗಳಲಿ ||  
ಹರ ಮಹಾದೇವೀ ಮಗುವಿನಾ  
ದರಣೆಗೀ ವಿನಯೋಪಚಾರಕೆ  
ಹಿರಿದು ಮೆಚ್ಚಿದೆನೆಂದು ತಲೆದೂಗಿದನು ದೂರ್ವಾಸ || ೧೫ ||

### [1.4.16](https://indike.org/pramana/in.lit.mahabharata.bhasa.kumaravyasa.1.4.16)

ಮಗಳೆ ಬಾ ಕೊಳ್ ಐದು ಮಂತ್ರಾ  
ಳಿಗುಳನಿವು ಸಿದ್ದಪ್ರಯೋಗವು  
ಸೊಗಸು ದಿವಿಜರೊಳಾರ ಮೇಲುಂಟವರ ನೆನೆ ಸಾಕು ||  
ಮಗನು ಜನಿಸುವನೆಂದು ಮುನಿ ಕುಂ  
ತಿಗೆ ರಹಸ್ಯದೊಳರುಹಿ ಮುನಿ ಮೌ  
ಳಿಗಳ ಮಣಿ ಪರಿತೋಷದಲಿ ಸರಿದನು ನಿಜಾಶ್ರಮಕೆ || ೧೬ ||

### [1.4.17](https://indike.org/pramana/in.lit.mahabharata.bhasa.kumaravyasa.1.4.17)

ಮಗುವುತನದಲಿ ಬೊಂಬೆಯಾಟಕೆ  
ಮಗುವನೇ ತಹೆನೆಂದು ಬಂದಳು  
ಗಗನನದಿಯಲಿ ಮಿಂದಳುಟ್ಟಳು ಲೋಹಿತಾಂಬರವ ||  
ವಿಗಡಮುನಿಪನ ಮಂತ್ರವನು ನಾ  
ಲಗೆಗೆ ತಂದಳು ರಾಗರಸದಲಿ  
ಗಗನಮಣಿಯನು ನೋಡಿ ಕಣ್ಮುಚ್ಚಿದಳು ಯೋಗದಲಿ || ೧೭ ||

### [1.4.18](https://indike.org/pramana/in.lit.mahabharata.bhasa.kumaravyasa.1.4.18)

ಅರಸ ಕೇಳ್ ಮುನಿಯಿತ್ತ ಮಂತ್ರಾ  
ಕ್ಷರದ ಕರಹಕೆ ತಳುವಿದರೆ ದಿನ  
ಕರನ ತೇಜವ ಕೊಂಬನೇ ದೂರ್ವಾಸ ವಿಗಡನಲ ||  
ಧರೆಗೆ ಬಂದನು ಸೂರ್ಯನಾತನ  
ಕಿರಣ ಲಹರಿಯ ಹೊಯ್ಲಿನಲಿ ಸರ  
ಸಿರುಹಮುಖಿ ಬೆಚ್ಚಿದಳು ಬಿಜಯಂಗೈಯಿ ನೀವೆನುತ ||೧೮ ||

### [1.4.18\_7](https://indike.org/pramana/in.lit.mahabharata.bhasa.kumaravyasa.1.4.18_7)

ಸೂರ್ಯನು ಕುಂತಿಗೆ ಮಗನನ್ನು ಕರುಣಿಸಿದನು

### [1.4.19](https://indike.org/pramana/in.lit.mahabharata.bhasa.kumaravyasa.1.4.19)

ಎನ್ನಬಾರದಲೇ ಋಷಿಪ್ರತಿ  
ಪನ್ನ ಮಂತ್ರವಮೋಘವದರಿಂ  
ದೆನ್ನ ತೂಕದ ಮಗನಹನು ನೀನಂಜಬೇಡೆನುತ ||  
ಕನ್ನಿಕೆಯ ಮುಟ್ಟಿದನು ಮುನ್ನಿನ  
ಕನ್ನೆತನ ಕೆಡದಿರಲಿಯೆನುತವೆ  
ತನ್ನ ರಥವಿದ್ದೆಡೆಗೆ ರವಿ ತಿರುಗಿದನು ವಹಿಲದಲಿ || ೧೯ ||

### [1.4.20](https://indike.org/pramana/in.lit.mahabharata.bhasa.kumaravyasa.1.4.20)

ಅರಸ ಕೇಳ್ ಆಶ್ಚರ್ಯವನು ತಾ  
ವರೆಯ ಮಿತ್ರನ ಕರಗಿ ಕರುವಿನೊ  
ಳೆರೆದರೆಂದೆನೆ ಥಳಥಳಿಸಿ ತೊಳಗುವ ತನುಚ್ಛವಿಯ ||  
ಕುರುಳುದಲೆ ನಿಟ್ಟೆಸಳುಗಂಗಳ  
ಚರಣ ಕರಪಲ್ಲವದ ಕೆಂಪಿನ  
ವರಕುಮಾರನ ಕಂಡು ಬೆರಗಿನೊಳಿರ್ದಳಾ ಕುಂತಿ || ೨೦ ||

### [1.4.21](https://indike.org/pramana/in.lit.mahabharata.bhasa.kumaravyasa.1.4.21)

ಅಳುವ ಶಿಶುವನು ತೆಗೆದು ತೆಕ್ಕೆಯ  
ಪುಳಕ ಜಲದಲಿ ನಾದಿ ಹರುಷದ  
ಬಳಿಯ ಲಜ್ಜೆಯ ಭಯದ ಹೋರಟೆಗಳುಕಿ ಹಳುವಾಗಿ ||  
ಕುಲದ ಸಿರಿ ತಪ್ಪುವುದಲಾ ಸಾ  
ಕಿಳುಹ ಬೇಕೆಂದೆನುತ ಗಂಗಾ  
ಜಲದೊಳಗೆ ಹಾಯ್ಕಿದಳು ಜನದಪವಾದ ಭೀತಿಯಲಿ || ೨೧ ||

### [1.4.22](https://indike.org/pramana/in.lit.mahabharata.bhasa.kumaravyasa.1.4.22)

ತಾಯೆ ಬಲ್ಲಂದದಲಿ ಕಂದನ  
ಕಾಯಿ ಮೇಣ್ ಕೊಲ್ಲೆನುತ ಕಮಲ ದ  
ಳಾಯತಾಕ್ಷಿ ಕುಮಾರಕನ ಹಾಯ್ಕಿದಳು ಮಡುವಿನಲಿ ||  
ರಾಯ ಕೇಳೈ ಸಕಲ ಲೋಕದ  
ತಾಯಲಾ ಜಾಹ್ನವಿ ತರಂಗದಿ  
ನೋಯಲೀಯದೆ ಮುಳುಗಲೀಯದೆ ಚಾಚಿದಳು ತಡಿಗೆ || ೨೨ ||

### [1.4.23](https://indike.org/pramana/in.lit.mahabharata.bhasa.kumaravyasa.1.4.23)

ಕೆದರಿ ಕಾಲಲಿ ಮಳಲ ರಾಶಿಯ  
ನೊದೆದು ಕೈಗಳ ಕೊಡಹಿ ಭೋಯೆಂ  
ದೊದದುರುತಿರ್ದನು ಶಿಶುಗಳರಸನು ರವಿಯನೀಕ್ಷಿಸುತ ||  
ಇದನು ಕಂಡನು ಸೂತನೊಬ್ಬನು  
ಮುದದ ಮದದಲಿ ತನ್ನ ಮರೆದು  
ಬ್ಬಿದನಿದೆತ್ತಣ ನಿಧಿಯೊ ಶಿವಶಿವಯೆಂದು ನಡೆತಂದ || ೨೩ ||

### [1.4.24](https://indike.org/pramana/in.lit.mahabharata.bhasa.kumaravyasa.1.4.24)

ತರಣಿಬಿಂಬದ ಮರಿಯೊ ಕೌಸ್ತುಭ  
ವರಮಣಿಯ ಖಂಡದ ಕಣಿಯೊ ಮ  
ರ್ತ್ಯರಿಗೆ ಮಗನಿವನಲ್ಲ ಮಾಯಾ ಬಾಲಕನೊ ಮೇಣು ||  
ಇರಿಸಿ ಹೋದವಳಾವಳೋ ಶಿಶು  
ವರನ ತಾಯ್ ನಿರ್ಮೋಹೆಯೈ ಹರ  
ಹರ ಮಹಾದೇವೆನುತ ತೆಗೆದಪ್ಪಿದನು ಬಾಲಕನ || ೨೪ ||

### [1.4.24\_8](https://indike.org/pramana/in.lit.mahabharata.bhasa.kumaravyasa.1.4.24_8)

ಸೂತನ ಮನೆಯಲ್ಲಿ ಕರ್ಣ ಬೆಳೆಯುತ್ತಿದ್ದನು

### [1.4.25](https://indike.org/pramana/in.lit.mahabharata.bhasa.kumaravyasa.1.4.25)

ತೃಣವಲಾ ತ್ರೈಲೋಕ್ಯ ರಾಜ್ಯವ  
ಗಣಿಸುವೆನೆ ತಾನಿನ್ನು ತನ್ನಲಿ  
ಋಣವಿಶೇಷವಿದೇನೊ (ಪಾ-; ಋಣವಿಶೇಷವಿದೇನೋ) ಮೇಣ್ ಈ ಬಾಲಕಂಗೆನುತ||  
ಕ್ಷಣದೊಳೊದಗುವ ಬಾಷ್ಪ ಲುಳಿತೇ  
ಕ್ಷಣನು ಬಂದನು ಮನೆಗೆ ಪರುಷದ  
ಕಣಿಯ ತಂದೆನು ರಮಣಿ ಕೊಳ್ಳೆಂದಿತ್ತನರ್ಭಕನ || ೨೫ ||

### [1.4.26](https://indike.org/pramana/in.lit.mahabharata.bhasa.kumaravyasa.1.4.26)

ಆದರಿಸಿದನು ರಾಧೆಯಲಿ ಮಗ  
ನಾದನೆಂದುತ್ಸವವ ಮಾಡಿ ಮ  
ಹೀ ದಿವಿಜರನು ದಾನ ಮಾನಂಗಳಲಿ ಸತ್ಕರಿಸಿ ||  
ಆ ದಿನಂ ಮೊದಲಾಗಿ ಉಧ್ಬವ  
ವಾದುದವನೈಶ್ವರ್ಯ ಉನ್ನತ  
ವಾದನಾ ರವಿನಂದನನು ರಾಧೇಯ ನಾಮದಲಿ || ೨೬ ||

### [1.4.27](https://indike.org/pramana/in.lit.mahabharata.bhasa.kumaravyasa.1.4.27)

ಹೊಳೆ ಹೊಳೆದು ಹೊಡೆಮರಳಿ ನಡು ಹೊ  
ಸ್ತಿಲಲಿ ಮಂಡಿಸಿ ಬೀದಿ ಬೀದಿಗ  
ಳೊಳಗೆ ಸುಳಿವರ ಸನ್ನೆಯಲಿ ಕರೆಕರೆದು ನಸುನಗುತ ||  
ಲಲಿತರತ್ನದ ಬಾಲದೊಡಿಗೆಯ  
ಕಳಚಿ ಹಾಯ್ಕುವ ಹೆಸರು ಜಗದಲಿ  
ಬೆಳೆವುತಿರ್ದುದು ಹಬ್ಬಿದುದು ಜನಜನದ ಕರ್ಣದಲಿ || ೨೭ ||

### [1.4.28](https://indike.org/pramana/in.lit.mahabharata.bhasa.kumaravyasa.1.4.28)

ಅರಸ ಕೇಳೈ ಕರ್ಣ ಪಾರಂ  
ಪರೆಯೊಳೀತನ ಹೆಸರು ಜಗದಲಿ  
ಹರಿದುದಲ್ಲಿಂ ಬಳಿಕಲೀತನ ನಾಮಕರಣದಲಿ ||  
ಸುರನರೋರಗ ನಿಕರವೇ ವಿ  
ಸ್ತರಿಸಿದುದು ಕರ್ಣಾಭಿಧಾನವ  
ಗುರುಪರಾಕ್ರಮಿ ಬೆಳೆವುತಿರ್ದನು ಸೂತಭವನದಲಿ || ೨೮ ||

### [1.4.28\_9](https://indike.org/pramana/in.lit.mahabharata.bhasa.kumaravyasa.1.4.28_9)

♦  
♦♣♣♣♣♣♣♣♣♣♣♣♣♣♣♣♣♣♣♣♦  
ॐ

### [1.4.28\_10](https://indike.org/pramana/in.lit.mahabharata.bhasa.kumaravyasa.1.4.28_10)

ನೋಡಿ

### [1.4.28\_11](https://indike.org/pramana/in.lit.mahabharata.bhasa.kumaravyasa.1.4.28_11)

\*ಕುಮಾರವ್ಯಾಸ ಭಾರತ  
\* ಕುಮಾರವ್ಯಾಸಭಾರತ-ಸಟೀಕಾ  
\* ಕುಮಾರವ್ಯಾಸ ಭಾರತ/ಸಟೀಕಾ (ಪರ್ವ-೧::ಸಂಧಿ-೧)  
\* ಕುಮಾರವ್ಯಾಸ ಭಾರತ/ಸಟೀಕಾ (ಪರ್ವ-೧::ಸಂಧಿ-೨)  
\* ಕುಮಾರವ್ಯಾಸ ಭಾರತ/ಸಟೀಕಾ (ಪರ್ವ-೧::ಸಂಧಿ-೩)  
\*ಕುಮಾರವ್ಯಾಸ ಭಾರತ/ಸಟೀಕಾ (ಪರ್ವ-೧::ಸಂಧಿ-೪)  
\*ಕುಮಾರವ್ಯಾಸ ಭಾರತ/ಸಟೀಕಾ (ಪರ್ವ-೧::ಸಂಧಿ-೫)  
\*ಕುಮಾರವ್ಯಾಸ ಭಾರತ/ಸಟೀಕಾ (ಪರ್ವ-೧::ಸಂಧಿ-೬)  
\*ಕುಮಾರವ್ಯಾಸ ಭಾರತ/ಸಟೀಕಾ (ಪರ್ವ-೧::ಸಂಧಿ-೭)  
\*ಕುಮಾರವ್ಯಾಸ ಭಾರತ/ಸಟೀಕಾ (ಪರ್ವ-೧::ಸಂಧಿ-೮)  
\*ಕುಮಾರವ್ಯಾಸ ಭಾರತ/ಸಟೀಕಾ (೪-ವಿರಾಟಪರ್ವ::ಸಂಧಿ-೯)  
\*ಕುಮಾರವ್ಯಾಸ ಭಾರತ/ಸಟೀಕಾ (೪-ವಿರಾಟಪರ್ವ::ಸಂಧಿ-೧೦)

### [1.4.28\_12](https://indike.org/pramana/in.lit.mahabharata.bhasa.kumaravyasa.1.4.28_12)

ಪರಿವಿಡಿ

### [1.4.28\_13](https://indike.org/pramana/in.lit.mahabharata.bhasa.kumaravyasa.1.4.28_13)

ಉಲ್ಲೇಖ

---
Source: [https://indike.org/pramana/in.lit.mahabharata.bhasa.kumaravyasa.1.4](https://indike.org/pramana/in.lit.mahabharata.bhasa.kumaravyasa.1.4) · Pramāṇa
