Pramāṇa · Search · About · API

Harivamsha 2.112: dvādaśādhikaśatatamo'dhyāyaḥ

Vulgate 2.112

Language
Sanskrit

Contents

dvādaśādhikaśatatamo'dhyāyaḥ

2.112.p1

kṛṣṇasyodicīgamanaḥ

2.112.1

brāhmaṇabālakasya rakṣaṇe arjunasya viphalatā, brāhmaṇena arjunasya tiraskāraṃ, teṣāṃ śrīkṛṣṇena saha uttarāṃ diśāyāṃ gamanaṃ arjuna uvāca |
muhūrtena vayaṃ grāmaṃ taṃ prāpya bharatarṣabha |
viśrāntavāhanāḥ sarve nivāsāyopasaṃsthitāḥ ||

2.112.2

tato grāmasya madhye'haṃ niviṣṭaḥ kurunandana |
samantād vṛṣṇisainyena mahatā parivāritaḥ ||

2.112.3

tataḥ śakunayo dīptā mṛgāśca krūrabhāṣiṇaḥ |
dīptāyāṃ diśi vāśanto bhayamāvedayanti me ||

2.112.4

sandhyārāgo japāvarṇo bhānumāṃścaiva niṣprabhaḥ |
papāta mahatī colkā pṛthivī cāpyakampata ||

2.112.5

tānsamīkṣya mahotpātān dāruṇām̐llomaharṣaṇān |
yogamājñāpayaṃstatra janasyotsukacetasaḥ ||

2.112.6

yuyudhānapurogāśca vṛṣṇyandhakamahārathāḥ |
sarve yuktarathāḥ sajjāḥ svayaṃ cāhaṃ tathābhavam ||

2.112.7

gate'rdharātrasamaye brāhmaṇo bhayaviklavaḥ |
upāgamya bhayādasmānidaṃ vacanamabravīt ||

2.112.8

kālo'yaṃ samanuprāpto brāhmaṇyāḥ prasavasya me |
tathā bhavantastiṣṭhantu na bhaved vañcanaṃ yathā ||

2.112.9

muhūrtādeva cāśrauṣaṃ kṛpaṇaṃ ruditasvanam |
tasya viprasya bhavane hriyate'hriyateti ca ||

2.112.2.112.10

athākāśe punarvācamaśrauṣaṃ bālakasya vai |
ūm̐heti hriyamāṇasya na ca paśyāmi rākṣasam ||

2.112.11

tato'smābhistadā tāta śaravarṣaiḥ samantataḥ |
viṣṭambhitā diśaḥ sarvā hṛta eva sa bālakaḥ ||

2.112.12

brāhmaṇo''rtasvaraṃ kṛtvā hṛte tasmin kumārake |
vācaḥ sa paruṣāstīvrāḥ śrāvayāmāsa māṃ tadā ||

2.112.13

vṛṣṇayo hatasaṅkalpāstathāhaṃ naṣṭacetanaḥ |
māmevaṃ hi viśeṣeṇa brāhmaṇaḥ pratyabhāṣata ||

2.112.14

rakṣiṣyāmīti coktaṃ te na ca rakṣitavānasi |
śṛṇu vākyamidaṃ śeṣaṃ yat tvamarhasi durmate ||

2.112.15

vṛthā tvaṃ spardhase nityaṃ kṛṣṇenāmitabuddhinā |
yadi syādiha govindo naitadatyāhitaṃ bhavet ||

2.112.16

yathā caturthaṃ dharmasya rakṣitā labhate phalam |
pāpasyāpi tathā mūḍha bhāgaṃ prāpnotyarakṣitā ||

2.112.17

rakṣiṣyāmīti coktaṃ te na ca śakto'si rakṣitum |
moghaṃ gāṇḍīvametatte moghaṃ vīryaṃ yaśaśca te ||

2.112.18

akiñciduktvā taṃ vipraṃ tato'haṃ prasthitastathā |
saha vṛṣṇyandhakasutairyatra kṛṣṇo mahādyutiḥ ||

2.112.19

tato dvāravatīṃ gatvā dṛṣṭvā madhunighātinam |
vrīḍitaḥ śokasantapto govindenopalakṣitaḥ ||

2.112.2.112.20

sa tu māṃ vrīḍitaṃ dṛṣṭvā vinindan kṛṣṇasannidhau |
mauḍhyaṃ paśyata me yo'haṃ śraddadhe klībakatthanam ||

2.112.21

taṃ pradyumno nāniruddho na rāmo na ca keśavaḥ |
yatra śaktāḥ paritrātuṃ ko'nyastadavaneśvaraḥ ||

2.112.22

dhigarjunaṃ vṛthāvādaṃ dhigātmaślāghino dhanuḥ |
daivopasṛṣṭo yo maurkhyādāgacchati ca durmatiḥ ||

2.112.23

evaṃ śapati viprarṣau vidyāmāsthāya vaiṣṇavīm |
yayau saṃyaminīṃ vīro yatrāste bhagavān yamaḥ ||

2.112.24

viprāpatyamacakṣāṇastata aindrīmagāt purīm |
āgneyīṃ nairṛtīṃ saumyāmudīcīṃ vāruṇīṃ tathā ||

2.112.25

rasātalaṃ nākapṛṣṭhaṃ dhiṣṇyānyanyānyudāyudhaḥ |
tato'labdhvā dvijasutamanistīrṇapratiśravaḥ ||

2.112.26

agniṃ vivikṣuḥ kṛṣṇena pradyumnena niṣedhitaḥ |
darśaye dvijasūnuṃ te māvajñātmānamātmanā ||

2.112.27

kīrtiṃ ta ete vipulāṃ sthāpayiṣyanti mānavāḥ |
iti sambhāṣya māṃ snehāt samāśvāsya ca mādhavaḥ ||

2.112.28

sāntyayitvā tu taṃ vipramidaṃ vacanamabravīt |
sugrīvaṃ caiva śaibyaṃ ca meghapuṣpabalāhakau ||

2.112.29

yojayāśvāniti tadā dārukaṃ pratyabhāṣata |
āropya brāhmaṇaṃ kṛṣṇo hyavaropya ca dārukam ||

2.112.2.112.30

māmuvāca tataḥ śauriḥ sārathyaṃ kriyatāmiti |
tataḥ samāsthāya rathaṃ kṛṣṇo'haṃ brāhmaṇaḥ sa ca |
prayātāḥ sma diśaṃ saumyāmudīcīṃ kauravarṣabha ||

2.112.2.112.30.c1

iti śrīmahābhārate khilabhāge harivaṃśe viṣṇuparvaṇi vāsudevamāhātmye śrīkṛṣṇasyodīcīgamane dvādaśādhikaśatatamo'dhyāyaḥ ||

Linked texts (1)