Harivamsha 2.113: trayodaśādhikaśatatamo'dhyāyaḥ
Vulgate 2.113
- Language
- Sanskrit
Contents
- 2.113.32 — 1 part
trayodaśādhikaśatatamo'dhyāyaḥ
2.113.p1
mṛtabrāhmaṇaputrasya punaḥ pratyānayanam
2.113.1
śrīkṛṣṇena brāhmaṇaputrāṇāṃ ānayanaṃ arjuna uvāca |
tataḥ parvatajālāni saritaśca vanāni ca |
apaśyaṃ samatikramya sāgaraṃ varuṇālayam ||
2.113.2
tato'rghyamudadhiḥ sākṣādupanīya janārdanam |
sa prāñjaliḥ samutthāya kiṅkaromīti cābravīt ||
2.113.3
pratigṛhya sa tāṃ pūjāṃ tamuvāca janārdanaḥ |
rathapanthānamicchāmi tvayā dattaṃ nadīpate ||
2.113.4
athābravīt samudrastu prāñjalirgaruḍadhvajam |
prasīda bhagavan naivamanyo'pyevaṃ gamiṣyati ||
2.113.5
tvayaiva sthāpitaḥ pūrvamagādho'smi janārdana |
tvayā pravartite mārge yāsyāmi gamanāyatām ||
2.113.6
anye'pyevaṃ gamiṣyanti rājāno darpamohitāḥ |
evaṃ sañcintya govinda yat kṣamaṃ tat samācara ||
2.113.7
vāsudeva uvāca |
brāhmaṇārthaṃ madartha ca kuru sāgara madvacaḥ |
madṛte na pumān kaścidanyastvāṃ dharṣayiṣyati ||
2.113.8
athābravīt samudrastu punareva janārdanam |
abhiśāpabhayād bhīto bāḍhamevaṃ bhaviṣyati ||
2.113.9
śoṣayāmyeṣa mārgaṃ te yena tvaṃ kṛṣṇa yāsyasi |
rathena saha sūtena sadhvajena tu keśava ||
2.113.10
vāsudeva uvāca |
mayā datto varaḥ pūrvaṃ na śoṣaṃ yāsyasīti ha |
mānuṣāste na jānīyurvividhān ratnasañcayāna ||
2.113.11
jalaṃ stambhaya sādho tvaṃ tato yāsyāmyahaṃ rathī |
na ca kaścit pramāṇaṃ te ratnānāṃ vetsyate naraḥ ||
2.113.12
sāgareṇa tathetyukte prasthitāḥ smo jalena vai |
stambhitena pathā bhūmau maṇivarṇena bhāsvatā ||
2.113.13
tato'rṇavaṃ samuttīrya kurūnapyuttarān vayam |
kṣaṇena samatikrāntā gandhamādanameva ca ||
2.113.14
tatastu parvatāḥ sapta keśavaṃ samupasthitāḥ |
jayanto vaijayantaśca nīlo rajataparvataḥ ||
2.113.15
mahāmeruḥ sakailāsa indrakūṭaśca nāmataḥ |
bibhrāṇā varṇarūpāṇi vividhānyadbhutāni ca ||
2.113.16
upasthāya ca govindaṃ kiṃ kurmetyabruvaṃstadā |
tāṃścaiva pratijagrāha vidhivanmadhusūdanaḥ ||
2.113.17
tānuvāca hṛṣīkeśaḥ praṇāmāvanatān sthitān |
vivaraṃ gacchato me'dya rathamārgaḥ pradīyatām ||
2.113.18
te kṛṣṇasya vacaḥ śrutvā pratigṛhya ca parvatāḥ |
pradaduḥ kāmato mārgaṃ gacchato bharatarṣabha ||
2.113.19
tatraivāntarhitāḥ sarve tadāścaryataraṃ mama |
asaktaṃ ca ratho yāti meghajñāleṣvivāṃśumān ||
2.113.20
sapta dvīpān sasindhuśca sapta sapta girīnatha |
lokālokaṃ tathātītya viveśa sumahattamaḥ ||
2.113.21
tataḥ kadācid duḥkhena rathamūhusturaṅgamāḥ |
paṅkabhūtaṃ hi timiraṃ sparśād vijñāyate nṛpa ||
2.113.22
atha parvatabhūtaṃ tat timiraṃ samapadyata |
tadāsādya mahārāja niṣprayatnā hayāḥ sthitāḥ ||
2.113.23
tataścakreṇa govindaḥ pāṭayitvā tamastadā |
ākāśaṃ darśayāmāsa rathapanthānamuttamam ||
2.113.24
niṣkramya tamasastasmādākāśe darśite tadā |
bhaviṣyāmīti saṃjñā me bhayaṃ ca vigataṃ mama ||
2.113.25
tatastejaḥ prajvalitamapaśyaṃ tat tadāmbare |
sarvalokaṃ samāviśya sthitaṃ puruṣavigraham ||
2.113.26
taṃ praviṣṭo hṛṣīkeśo dīptaṃ tejonidhiṃ tadā |
ratha eva sthitaścāhaṃ sa ca brāhmaṇasattamaḥ ||
2.113.27
sa muhūrtāt tataḥ kṛṣṇo niścakrāma tadā prabhuḥ |
caturo bālakān gṛhya brāhmaṇasyātmajāṃstadā ||
2.113.28
pradadau brāhmaṇāyātha putrān sarvāñjanārdanaḥ |
trayaḥ pūrvaṃ hṛtā ye ca sadyojātaśca bālakaḥ ||
2.113.29
prahṛṣṭo brāhmaṇastatra putrān dṛṣṭvā punaḥ prabho |
ahaṃ ca paramaprīto vismitaścābhavaṃ tadā ||
2.113.30
tato vayaṃ punaḥ sarve brāhmaṇasya ca te sutāḥ |
yathā gatā nivṛttāḥ sma tathaiva bharatarṣabha ||
2.113.31
tataḥ sma dvārakāṃ prāptāḥ kṣaṇena nṛpasattaṃ asamprāpte'rdhadivase vismito'haṃ punaḥ punaḥ ||
2.113.32
saputraṃ bhojayitvā tu dvijaṃ kṛṣṇo mahāyaśāḥ |
dhanena vardhayitvā ca gṛhaṃ prāsthāpayat tadā ||
2.113.32.c1
iti śrīmahābhārate khilabhāge harivaṃśe viṣṇuparvaṇi vāsudevamāhālaye brāhmaṇaputrānayane travodaśādhikaśatatamo'dhyāyaḥ ||
Linked texts (2)
- Mudgalapurāṇa — Sanskrit
- Bhāgavatapurāṇa — Vyāsa, Sanskrit