Harivamsha 2.3: tṛtīyo'dhyāyaḥ

2.3.p1

āryāstavaḥ

2.3.1

āryāyāḥ stutiḥ vaiśampāyana uvāca |
āryāstavaṃ pravakṣyāmi yathoktamṛṣibhiḥ purā |
nārāyaṇīṃ namasyāmi devīṃ tribhuvaneśvarīm ||

Having performed supreme, most difficult ascetic heat for ten thousand years,
she obtained the Puruṣa of blazing ascetic heat as her husband.

2.3.2

tvaṃ hi siddhirdhṛtiḥ kīrtiḥ śrīrvidyā sannatirmatiḥ |
sandhyā rātriḥ prabhā nidrā kālarātristathaiva ca ||

2.3.3

āryā kātyāyanī devī kauśikī brahmacāriṇī |
jananī siddhasenasya ugracārī mahābalā ||

2.3.4

jayā ca vijayā caiva puṣṭistuṣṭiḥ kṣamā dayā |
jyeṣṭhā yamasya bhaginī nīlakauśeyavāsinī ||

2.3.5

bahurūpā virūpā ca anekavidhicāriṇī |
virūpākṣī viśālākṣī bhaktānāṃ parirakṣiṇī ||

2.3.6

parvatāgreṣu ghoreṣu nadīṣu ca guhāsu ca |
vāsaste ca mahādevi vaneṣūpavaneṣu ca ||

2.3.7

śabarairbarbaraiścaiva pulindaiśca supūjitā |
mayūrapicchadhvajinī lokān kramasi sarvaśaḥ ||

2.3.8

kukuṭaiśchāgalairmeṣaiḥ siṃhairvyāghraiḥ samākulā |
ghaṇṭāninādabahulā vindhyavāsinyabhiśrutā ||

2.3.9

triśūlapaṭṭiśadharā sūryacandrapatākinī |
navamī kṛṣṇapakṣasya śuklasyaikādaśī tathā ||

2.3.2.3.10

bhaginī baladevasya rajanī kalahapriyā |
āvāsaḥ sarvabhūtānāṃ niṣṭhā ca paramā gatiḥ ||

2.3.11

nandagopasutā caiva devānāṃ vijayāvahā |
cīravāsāḥ suvāsāśca raudrī sandhyācarī niśā ||

2.3.12

prakīrṇakeśī mṛtyuśca surāmāṃsabalipriyā |
lakṣmīralakṣmīrūpeṇa dānavānāṃ vadhāya ca ||

2.3.13

sāvitrī cāpi devānāṃ mātā bhūtagaṇasya ca |
kanyānāṃ brahmacaryaṃ tvaṃ saubhāgyaṃ pramadāsu ca ||

2.3.14

antarvedī ca yajñānāmṛtvijāṃ caiva dakṣiṇā |
karṣakāṇāṃ ca sīteti bhūtānāṃ dharaṇīti ca ||

2.3.14.p1

siddhiḥ sāṃyātrikāṇāṃ tu velā tvaṃ sāgarasya ca ||

2.3.15

yakṣāṇāṃ prathamā yakṣī nāgānāṃ suraseti ca ||

2.3.16

brahmavādinyatho dīkṣā śobhā ca paramā tathā |
jyotiṣāṃ tvaṃ prabhā devi nakṣatrāṇāṃ ca rohiṇī ||

2.3.17

rājadvāreṣu tīrtheṣu nadīnāṃ saṅgameṣu ca |
pūrṇā ca pūrṇimā candre kṛttivāsā iti smṛtā ||

2.3.18

sarasvatī ca vālmīke smṛtirdvaipāyane tathā |
ṛṣīṇāṃ dharmabuddhistu devānāṃ mānasī tathā ||

2.3.19

surā devī tu bhūteṣu stūyase tvaṃ svakarmabhiḥ |
indrasya cārudṛṣṭistvaṃ sahasranayaneti ca ||

2.3.2.3.20

tāpasānāṃ ca devī tvamaraṇī cāgnihotriṇām |
kṣudhā ca sarvabhūtānāṃ tṛptistvaṃ daivateṣu ca ||

2.3.21

svāhā tṛptirdhṛtirmedhā vasūnāṃ tvaṃ vasūmatī |
āśā tvaṃ mānuṣāṇāṃ ca puṣṭiśca kṛtakarmaṇām ||

2.3.22

diśaśca vidiśaścaiva tathā hyagniśikhā prabhā |
śakunī pūtanā tvaṃ ca revatī ca sudāruṇā ||

2.3.23

nidrāpi sarvabhūtānāṃ mohinī kṣatriyā tathā |
vidyānāṃ brahmavidyā tvamoṅkāro'tha vaṣaṭ tathā ||

2.3.24

nārīṇāṃ pārvatīṃ ca tvāṃ paurāṇīmṛṣayo viduḥ |
arundhatī ca sādhvīnāṃ prajāpativaco yathā ||

2.3.25

paryāyanāmabhirdivyairindrāṇī ceti viśrutā |
tvayā vyāptamidaṃ sarvaṃ jagat sthāvarajaṅgamam ||

2.3.26

saṅgrāmeṣu ca sarveṣu agniprajvaliteṣu ca |
nadītīreṣu caureṣu kāntāreṣu bhayeṣu ca ||

2.3.27

pravāse rājabandhe ca śatrūṇāṃ ca pramardane |
praṇātyayeṣu sarveṣu tvaṃ hi rakṣā na saṃśayaḥ ||

2.3.28

tvayi me hadayaṃ devi tvayi cittaṃ manastvayi |
rakṣa māṃ sarvapāpebhyaḥ prasādaṃ kartumarhasi ||

2.3.29

imaṃ yaḥ sustavaṃ divyamiti vyāsaprakalpitam |
yaḥ paṭhet prātarutthāya śuciḥ prayatamānasaḥ ||

2.3.2.3.30

tribhirmāsaiḥ kāṅkṣitaṃ ca phalaṃ vai samprayacchasi |
ṣaḍbhirmāsairvariṣṭhaṃ tu varamekaṃ prayacchasi ||

2.3.31

arcitā tu tribhirmāsairdivyaṃ cakṣuḥ prayacchasi |
saṃvatsareṇa siddhiṃ tu yathākāmaṃ prayacchasi ||

2.3.32

satyaṃ brahma ca divyaṃ ca dvaipāyanavaco yathā |
nṛṇāṃ bandhaṃ vadhaṃ ghoraṃ putranāśaṃ dhanakṣayam ||

2.3.33

vyādhimṛtyubhayaṃ caiva pūjitā śamayiṣyasi |
bhaviṣyasi mahābhāge varadā kāmarūpiṇī ||

2.3.34

mohayitvā ca taṃ kaṃsamekā tvaṃ bhokṣyase jagat |
ahamapyātmano vṛttiṃ vidhāsye goṣu gopavat ||

2.3.35

samṛddhyarthamahaṃ caiva kariṣye kaṃsagopatām |
evaṃ tāṃ sa samādiśya gato'ntardhānamīśvaraḥ ||

2.3.36

sā cāpi taṃ namaskṛtya tathāstviti ca niścitā ||

2.3.37

yaścaitat paṭhate stotraṃ śṛṇuyād vāpyabhīkṣṇaśaḥ |
sarvārthasiddhiṃ labhate naro nāstyatra saṃśayaḥ ||

2.3.37.c1

iti śrīmahābhārate khilabhāge harivaṃśe viṣṇuparvaṇi svapnagarbhavidhāne āryāstutau tṛtīyo'dhyāyaḥ ||