Harivamsha 2.7: saptamo'dhyāyaḥ

2.7.p1

yamalārjunabhaṅgaḥ

2.7.1

śrīkṛṣṇabalarāmābhyāṃ vraje jānubhyāṃ riṅgaṇaṃ evaṃ śrīkṛṣṇena ātmānaṃ ulūkhale baddhvā yamalārjunabhaṅgakaraṇaṃ vaiśampāyana uvāca |
kāle gacchati tau saumyau dārakau kṛtanāmakau |
kṛṣṇasaṅkarṣaṇau cobhau riṅgiṇau samapadyatām ||

Prajāpati Atri adopted Uttānapāda as his son;
from Uttānapāda, Sūnṛtā gave birth to four sons.

2.7.2

tāvanyonyagatau bālau bālyādevaikatāṃ gatau |
ekamūrtidharau kāntau bālacandrārkavarcasau ||

2.7.3

ekanirmāṇanirmuktāvekaśayyāsanāśanau |
ekaveṣadharāvekaṃ puṣyamāṇau śiśuvratam ||

2.7.4

ekakāryāntaragatāvekadehau dvidhākṛtau |
ekacaryau mahāvīryāvekasya śiśutāṃ gatau ||

2.7.5

ekapramāṇau lokānāṃ devavṛttāntamānuṣau |
kṛtsnasya jagato gopau saṃvṛttau gopadārakau ||

2.7.6

anyonyavyatiṣaktābhiḥ krīḍābhirabhiśobhitau |
anyonyakiraṇagrastau candrasūryāvivāmbare ||

2.7.7

visarpantau tu sarvatra sarpabhogabhujāvubhau |
rejatuḥ pāṃsudigdhāṅgau dṛptau kalabhakāviva ||

2.7.8

kvacid bhasmapradīptāṅgau karīṣaprokṣitau kvacit |
tau tatra paryadhāvetāṃ kumārāviva pāvakī ||

2.7.9

kvacijjānubhirudghṛṣṭaiḥ sarpamāṇau virejatuḥ |
krīḍantau vatsaśālāsu śakṛddigdhāṅgamūrdhajau ||

2.7.2.7.10

śuśubhāte śriyā juṣṭāvānandajananau pituḥ |
janaṃ ca viprakurvāṇau vihasantau kvacitkvacit ||

2.7.11

tau tatra kautūhalinau mūrdhajavyākulekṣaṇau |
rejatuścandravadanau dārakau sukumārakau ||

2.7.12

atiprasaktau tau dṛṣṭvā sarvavrajavicāriṇau |
nāśakat tau vārayituṃ nandagopaḥ sudurmadau ||

2.7.13

tato yaśodā saṅkruddhā kṛṣṇaṃ kamalalocanam |
ānāyya śakaṭīmūle bhartsayantī punaḥ punaḥ ||

2.7.14

dāmnā caivodare baddhvā pratyabandhadulūkhale |
yadi śakto'si gaccheti tamuktvā karma sākarot ||

2.7.15

vyagrāyāṃ tu yaśodāyāṃ nirjagāma tato'ṅgaṇāt |
śiśulīlāṃ tataḥ kurvankṛṣṇo vismāpayanvrajam |
so'ṅgaṇānniḥsṛtaḥ kṛṣṇaḥ karṣamāṇa ulūkhalam ||

2.7.16

yamalābhyāṃ pravṛddhābhyāmarjunābhyāṃ caran vane |
madhyānniścakrāma tayoḥ karṣamāṇa ulūkhalam ||

2.7.17

tattasya karṣato baddhaṃ tiryaggatamulūkhalam |
lagnaṃ tābhyāṃ samūlābhyāmarjunābhyāṃ cakarṣa ca ||

2.7.18

tāvarjunau kṛṣyamāṇau tena bālena raṃhasā |
samūlaviṭapau bhagnau sa tu madhye jahāsa vai ||

2.7.19

nidarśanārthaṃ gopānāṃ divyaṃ svabalamāsthitaḥ |
taddāma tasya bālasya prabhāvādabhavad dṛḍham ||

2.7.2.7.20

yamunātīramārgasthā gopyastaṃ dadṛśuḥ śiśum |
krandantyo vismayantyaśca yaśodāṃ yayuraṅganāḥ ||

2.7.21

tāstu sambhrāntavadanā yaśodāmūcuraṅganāḥ |
ehyāgaccha yaśode tvaṃ sambhramāt kiṃ vilambase ||

2.7.22

yau tāvarjunavṛkṣau tu vraje satyopayācanau |
putrasyopari tāvetau patitau te mahīruhau ||

2.7.23

dṛḍhena dāmnā tatraiva baddho vatsa ivodare |
jahāsa vṛkṣayormadhye tava putraḥ sa bālakaḥ ||

2.7.24

uttiṣṭha gaccha durmedhe mūḍhe paṇḍitamānini |
putramānaya jīvantaṃ muktaṃ mṛtyumukhādiva ||

2.7.25

sā bhītā sahasotthāya hāhākāraṃ prakurvatī |
taṃ deśamagamad yatra pātitau tāvubhau drumau ||

2.7.26

sā dadarśa tayormadhye drumayorātmajaṃ śiśum |
dāmnā nibaddhamudare karṣamāṇamulūkhalam ||

2.7.27

sagopīgopavṛddhaśca samuvāca vrajastadā |
paryāgacchanta te draṣṭuṃ gopeṣu mahadadbhutam ||

2.7.28

jajalpuste yathākāmaṃ gopā vanavicāriṇaḥ |
kenemau pātitau vṛkṣau ghoṣasyāyatanopamau ||

2.7.29

vinā vātaṃ vinā varṣaṃ vidyatprapatanaṃ vinā |
vinā hastikṛtaṃ doṣa kenemau pātitau drumau ||

2.7.2.7.30

aho bata na śobhetāṃ vimūlāvarjunāvimau |
bhūmau nipatitau vṛkṣau vitoyau jaladāviva ||

2.7.31

yadīmau ghoṣaracitau ghoṣakalyāṇakāriṇau |
nandagopa prasannau te drumāvevaṃ gatāvapi |
yacca te dārako mukto vipulābhyāmapi kṣitau ||

2.7.32

autpātikamidaṃ ghoṣe tṛtīyaṃ vartate tviha |
pūtanāyā vināśaśca drumayoḥ śakaṭasya ca ||

2.7.33

asmin sthāne ca vāso'yaṃ ghoṣasyāsya na yujyate |
utpātā hyatra dṛśyante kathayanto na śobhanam ||

2.7.34

nandagopastu sahasā muktvā kṛṣṇamulūkhalāt |
niveśya cāṅke suciraṃ mṛtaṃ punarivāgatam ||

2.7.35

nātṛpyat prekṣamāṇo vai kṛṣṇaṃ kamalalocanam |
tato yaśodāṃ garhan vai nandagopo viveśa ha ||

2.7.36

sa ca gopajanaḥ sarvo vrajameva jagāma ha |
sa ca tenaiva nāmnā tu kṛṣṇo vai dāmabandhanāt |
goṣṭhe dāmodara iti gopībhiḥ parigīyate ||

2.7.37

etadāścaryabhūtaṃ hi bālasyāsīd viceṣṭitam |
kṛṣṇasya bharataśreṣṭha ghoṣe nivasatastadā ||

2.7.37.c1

iti śrīmahābhārate khilamāge harivaṃśe viṣṇuparvaṇi śiśucaryāyāṃ yamalārjunabhaṅgo nāma saptamo'dhyāyaḥ ||