Harivamsha 3.105: pañcādhikaśatatamo'dhyāyaḥ

3.105.p1

haṃsaḍimbhakayor varalābhaḥ

3.105.1

haṃsaḍimbhakābhyāṃ tapaścaraṇaṃ, varaprāptiḥ, janārdanasya sahitasya tayoḥ vivāhaḥ, teṣāṃ trayāṇāṃ kumārāṇāṃ dharmaniṣṭhā vaiśampāyana uvāca |
haṃsaśca ḍimbhakaścaivaṃ tapaścartuṃ mahāmatī |
manaścakraturātmāṃśau śaṅkarasya nṛpottama ||

Pākaśāsana remained seeking a lapse in her [conduct];
and when the hundred years were nearly complete, the infallible one saw a lapse.

3.105.2

gatvā tu himavatpārśvaṃ tapaścakraturañjasā |
uddiśya śaṅkaraṃ śarvaṃ nīlagrīvamumāpatim ||

3.105.3

vīryāstre caiva nau syātāmityādhāya tu mānase |
ekāgrau prayatau bhūtvā vāyvambuprāśinau nṛpa ||

3.105.4

namaste devadeveti śaṅkareti divāniśam |
hara śarva śivānanda nīlagrīva umāpate ||

3.105.5

vṛṣadhvaja virūpākṣa haryakṣa jagatāṃ pate |
bhaktapriya girīśeśa vāsudeva śivācyuta ||

3.105.6

sadyojāta mahādeva devadeva guhāśaya |
bhūtabhāvana deveśa praṇavātman sadāśiva ||

3.105.7

ityādināmabhirnityaṃ stuvantau śaṅkaraṃ bhavam |
hṛdi kṛtvā virūpākṣaṃ tapastepaturañjasā ||

3.105.8

nirmamau nirahaṅkārau maunavratasamāsthitau |
varṣāṇīha tadā rājan pañca cakraturojasā ||

3.105.9

tataḥ prīto'bhavaccharvastābhyāṃ saṃyamanena ca |
sa dadau darśanaṃ naijaṃ vyāghracarmāmbaro haraḥ ||

3.105.3.105.10

triyakṣaḥ śaṅkaraḥ śarvaḥ śūlapāṇirumāpatiḥ |
agrataḥ saṃsthitaṃ śarvaṃ candrārdhakṛtaśekharam |
tau dṛṣṭvā prītamanasau namaścakraturañjasā ||

3.105.11

śrībhagavānuvāca |
varaṃ varaya bhadraṃ vāṃ yathecchā vāṃ tathāstu vai |
tāvūcatustadā rājan prītastvaṃ bhagavan yadi ||

3.105.12

devāsuracamūmukhyairyakṣagandharvadānavaiḥ |
āvāmajayyau sarvātmanneṣa nau prathamo varaḥ ||

3.105.13

dvitīyo nau virūpākṣa raudrāstrāṇāṃ ca saṅgrahaḥ |
māheśvaraṃ tathā raudramastraṃ brahmaśiro mahat ||

3.105.14

abhedyaṃ kavacaṃ divyamacchedyaṃ cāpi kārmukam |
paraśuṃ ca tathā śarva sadā rakṣārthameva ca ||

3.105.15

sahāyau dvau mahādeva bhūtau yuddhe hi gacchatām |
evamastviti deveśa āha bhṛṅgiriṭī haraḥ ||

3.105.16

kuṇḍodaraṃ virūpākṣaṃ sarvaprāṇihite ratam |
yuvāmatha ca bhūteśau sahāyau satataṃ raṇe ||

3.105.17

saṅgrāmaṃ gacchatāṃ ghorametayorbalaśālinoḥ |
ityuktvā bhagavāñcharvastatraivāntaradhīyata ||

3.105.18

tatastau vīryasampannau haṃso ḍimbhaka eva ca |
kṛtāstrau śastrasampannau cāpinau vīryavattarau ||

3.105.19

āmuktakavacau vīrāvajayyau devadānavaiḥ |
atyantabhaktau deveśe śaṅkare nīlalohite ||

3.105.3.105.20

nityotsavakarau deve bhasmoddhūlanaśobhinau |
kṛtatripuṇḍrakau nityaṃ jaṭāyuktaśirodharau ||

3.105.21

rudrākṣārpitasarvāṅgau vyāghracarmāmbarāvṛtau |
namaḥ śivāya śāntāya mahādevāya dhīmate ||

3.105.22

ityādibhirmahādevaṃ stuvantau nāmabhiḥ śivam |
sākṣādiva mahādevau rejaturjaladhāriṇau ||

3.105.23

tataḥ svabhavanaṃ gatvā pituḥ pādāvagṛhyatām |
pituśca sakhyurbalinau mātuśca caraṇau tadā ||

3.105.24

janārdano'pi dharmātmā kālena mahatā nṛpa |
vidyāpāraṃ mahābuddhiryuktenāsāvupeyivān ||

3.105.25

sa ca viṣṇuṃ hṛṣīkeśaṃ pītakauśeyavāsasam |
brahmatattvaparo nityamupāste vijitendriyaḥ ||

3.105.26

haṃsaśca ḍimbhakaścaiva kṛtadāro babhūvatuḥ |
janārdano'pi dharmātmā kṛtadāro babhūva ha ||

3.105.27

sarve te yajñaniratāḥ pañcayajñaparāstathā |
svadāraniratāḥ sarve guruśuśrūṣaṇe ratāḥ |
dharma eva paraṃ śreya iti te menire nṛpa ||

3.105.27.c1

iti śrīmahābhārate khilabhāge harivaṃśe bhaviṣyaparvaṇi haṃsaḍimbhakopākhyāne pañcādhikaśatatamo'dhyāyaḥ ||