Harivamsha 3.110: daśādhikaśatatamo'dhyāyaḥ

3.110.p1

yatīnāṃ dvārakāgamanam

3.110.1

durvāsādīnāṃ munīnāṃ dvārakāgamanaṃ vaiśampāyana uvāca |
tatastau haṃsaḍimbhakau kruddhau kālena coditau |
śikyaṃ kamaṇḍaluṃ caiva dvidalaṃ dārumeva ca ||

Of those beings who had thus multiplied, O Janamejaya,
Hari appointed Prajāpatis over the various hosts,
[assigning] those realms in order, prior to Pṛthu, O Bhārata.

3.110.2

daṇḍān pātraviśeṣāṃśca chittvā bhittvā ca sarvaśaḥ |
tasmin deśe mahārāja vyādhairmāṃsānyadīdahan ||

3.110.3

bhakṣayitvā tato deśāt svapurīṃ tau prajagmatuḥ |
janārdanaśca dharmātmā snehādanuyayau tayoḥ ||

3.110.4

naṣṭāvimāviti tadā sa mene duḥkhitaḥ param |
gateṣu teṣu sarveṣu durvāsā yatisattamaḥ ||

3.110.5

palāyanaparān sarvānidaṃ prāha yatīśvarān |
ito deśādvinirgatya puṣkarātpuṇyasaṃyutāt ||

3.110.6

mandaṃ mandaṃ samāśvasya viśramya ca tatastataḥ |
praviśya dvārakāṃ devaṃ śaṅkhacakragadādharam ||

3.110.7

dṛṣṭvā ca tasmai prabhave vakṣyāmo yatisattamāḥ |
sa hi rakṣañjagadidaṃ dharmavartmani saṃsthitaḥ ||

3.110.8

ādyo lokagururviṣṇuryatātmā tattvavitpriyaḥ |
uddhṛtya kaṇṭakān sarvāñchaśāsa pṛthivīmimām ||

3.110.9

sa ca pāpān mahāghorān sarvān pāpakṛtān prabhuḥ |
rakṣennaḥ sakalān sarvāṃjñāneṣu niyatātmanaḥ ||

3.110.3.110.10

idamadya kṣamaṃ viprā yānamadya vidhīyatām |
sāhasaṃ yatkṛtaṃ tābhyāṃ pātrabhedādi sattamāḥ ||

3.110.11

etat sarvamaśeṣeṇa darśayāma janārdanam |
tatheti te pratijñāya yatayo jñānacakṣuṣaḥ ||

3.110.12

chinnaṃ tābhyāṃ samādāya śikyaṃ dārumayaṃ tathā |
dvidalaṃ karpaṭaṃ caiva kaupīnamatha valkalam ||

3.110.13

kamaṇḍaluṃ tathā rājannardhaprotakapālakam |
etānanyān samādāya draṣṭuṃ keśavamāyayuḥ ||

3.110.14

pañca caiva sahasrāṇi puraskṛtya mahāmunim |
durvāsasaṃ tapoyonimīśvarasyātmasambhavam ||

3.110.15

ahorātreṇa te sarve dvārakāṃ kṛṣṇapālitām |
yayurdāntā mahātmāno lomaśāḥ keśavarjitāḥ ||

3.110.16

prātaḥ praviśya rājendra vāpikāyāṃ yatīśvarāḥ |
snātvopaspṛśya te sarve yatnena mahatā tadā ||

3.110.17

draṣṭumabhyudyatā viṣṇuṃ kaṇṭakoddhṛtitatparam |
ekarūpaṃ samāsthāya sudharmāyāmavasthitam ||

3.110.17.c1

iti śrīmahābhārate khilabhāge harivaṃśe bhaviṣyaparvaṇi haṃsaḍimbhakopākhyāne yatīnāṃ dvārakāgamane daśādhikaśatatamo'dhyāyaḥ ||