Harivamsha 3.13: trayodaśo'dhyāyaḥ

3.13.p1

madhukaiṭabhavarapradānam

3.13.1

madhukaiṭabhayoḥ brahmaṇā saha saṃvādaṃ, bhagavatā viṣṇunā vadhaṃ vaiśampāyana uvāca |
caturyugādisambhūtau sahasrayugaparyaye |
vighnastamasi sambhūto madhurnāma mahāsuraḥ ||

Then Dakṣa gave his dear daughter to Parameṣṭhin;
the seer Nārada was born upon her once more out of fear of the curse.

3.13.1_2

madhukaiṭabhayoḥ brahmaṇā saha saṃvādaṃ, bhagavatā viṣṇunā vadhaṃ vaiśampāyana uvāca |
caturyugādisambhūtau sahasrayugaparyaye |
vighnastamasi sambhūto madhurnāma mahāsuraḥ ||

3.13.2

tasyaiva ca sahāyo'nyo bhūto rajasi kaiṭabhaḥ |
tau rajastamasāviṣṭau sambhūtau kāmarūpiṇau ||

3.13.3

ekārṇavajalaṃ sarvaṃ kṣobhayantau mahāsurau |
kṛṣṇaraktāmbaradharau śvetadīptogradaṃṣṭriṇau ||

3.13.4

ubhau madakaṭodagrau keyūravalayojjvalau |
mahāvikṛtatāmrākṣau pīnoraskau mahābhujau ||

3.13.5

mahacchiraḥsaṃhananau jaṅgamāviva parvatau |
nīlameghābhrasaṅkāśāvādityapratimānanau ||

3.13.6

vidyudambhodatāmrābhyāṃ karābhyāmatibhīṣaṇau |
pādasañcāravegābhyāmutkṣipantāvivārṇavam ||

3.13.7

kampayantāviva hariṃ śayānamarisūdanam |
tau tatra viharantau sma puṣkare viśvatomukham ||

3.13.8

paśyatāṃ dīptavapuṣaṃ yogināṃ śreṣṭhamuttamam |
nārāyaṇasamājñaptaṃ sṛjantamakhilāḥ prajāḥ |
daivatāni ca viśvāni mānasāṃśca sutānṛṣīn ||

3.13.9

tatastāvūcatustatra brahmāṇamasurottamau |
dṛptau yuyutsukau kruddhau roṣasaṃraktalocanau ||

3.13.10

kastvaṃ puṣkaramadhyasthaḥ sitoṣṇīṣaścaturmukhaḥ |
āvāmagaṇayan mohādāsse tvaṃ vigatajvaraḥ ||

3.13.11

ehyāvayorbāhuyuddhaṃ prayaccha kamalodbhava |
āvābhyāmativīrābhyāṃ na śakyaṃ sthātumāhave ||

3.13.12

kastvaṃ kaścodbhavastubhyaṃ kena vāsīha coditaḥ |
kaḥ sraṣṭā kaśca vai goptā kena nāmnābhidhīyase ||

3.13.13

brahmovāca |
yaḥ ka ityucyate loke hyavijñātaḥ sahasraśaḥ |
tatsambhavaṃ yogavantaṃ kiṃ māṃ nābhyavagacchathaḥ ||

3.13.14

madhukaiṭabhāvūcatuḥ
nāvayoḥ paramaṃ loke kiñcidasti mahāmate |
āvābhyāṃ chādyate viśvaṃ tamasā rajasā tathā ||

3.13.15

rajastamomayāvāvāṃ yatīnāṃ duḥkhalakṣaṇau |
chalakau dharmaśīlānāṃ dustarau sarvadehinām ||

3.13.16

āvābhyāṃ muhyate loka ucchritābhyāṃ yuge yuge |
āvāmarthaśca kāmaśca yajñāḥ sarvaparigrahāḥ ||

3.13.17

sukhaṃ yatra mudo yatra yatra śrīḥ sannatirnayaḥ |
eṣāṃ yatkāṅkṣitaṃ caiva tattadāvāṃ vicintaya ||

3.13.18

brahmovāca |
yat tad yogavatāṃ śreṣṭhaṃ yacca pūrvaṃ mayārcitam |
tatsamādhāya guṇavānsattve cāsmi pratiṣṭhitaḥ ||

3.13.19

yatparaṃ yogayuktānāmakṣaraṃ sattvameva ca |
rajasastamasaścaiva yatsraṣṭā jīvasambhavaḥ ||

3.13.20

yato bhūtāni jāyante sāttvikānītarāṇi ca |
sa eva yuddhvā samare vaśī vāṃ śamayiṣyati ||

3.13.21

vaiśampāyana uvāca |
tataḥ śayānaṃ śrīmantaṃ bahuyojanavistṛtam |
padmanābhaṃ hṛṣīkeśaṃ praṇamyāvocatāmubhau ||

3.13.22

jānīvastvāṃ viśvayonimekaṃ puruṣasattamam |
tavopāsanahetvarthamidaṃ nau viddhi kāraṇam ||

3.13.23

amoghadarśanaṃ satyaṃ yatastvāṃ vidurīśvaram |
tatastvāmabhito deva kaṅkṣāvaḥ prativīkṣitum ||

3.13.24

tadicchāvo varaṃ dattaṃ tvayā hyāvāmarindama |
amoghaṃ darśanaṃ deva namaste'stvajitañjaya ||

3.13.25

śrībhagavānuvāca |
tānicchatho drutaṃ brūtaṃ varānasurasattamau |
dattāyuṣau mayā bhūyastvaho jīvitumicchathaḥ ||

3.13.26

tasmād yadeṣa vāṃ yatnastatprāpnutaṃ mahābalau |
vadhyau bhavantau tu syātāṃ tāvityevābravīddhariḥ |
ubhāvapi mahātmānāvūrjitau kṣatavarjitau ||

3.13.27

madhukaiṭabhāvūcatuḥ
yasminna kaścinmṛtavāṃstasmindeśe vibho vadham |
icchāvaḥ putratāṃ yātuṃ tava caiva surādhipa ||

3.13.28

śrībhagavānuvāca |
bāḍhaṃ sutau me pravarau bhaviṣye kalpasambhave |
bhaviṣyatho na sandehaḥ satyametad bravīmi vām ||

3.13.29

vaiśampāyana uvāca |
varaṃ pradāyātha mahāsurābhyāṃ sanātano viśvavarottamo vibhuḥ |
rajastamobhyāṃ bhavabhāvanopamau mamantha tāvūrutale surārihā ||

3.13.29.c1

iti śrīmahābhārate khilabhāge harivaṃśe bhaviṣyaparvaṇi madhukaiṭabhavarapradāne trayodaśo'dhyāyaḥ ||