Harivamsha 3.43: tricatvāriṃśo'dhyāyaḥ

3.43.p1

nṛsiṃhaṃ dṛṣṭvā dānavānāṃ vismayaḥ, prahrādavākyaṃ ca

3.43.1

prahlādena narasiṃhavigrahe samastāyāḥ trilokyāḥ darśanaṃ vaiśampāyana uvāca |
tato dṛṣṭvā mahābāhuṃ kālacakramivāgatam |
nārasiṃhavapuśchannaṃ bhasmācchannamivānalam ||

as well as Hara, Bahurūpa, Tryambaka, Aparājita,
Vṛṣākapi, Śaṃbhu, Kapardin, and Raivata,

3.43.2

vikuñcitasaṭaṃ tasya nārasiṃhasya bhārata |
rūpaudāryaṃ vabhau tatra sahasraśaśisannibham ||

3.43.3

aho rūpamidaṃ citraṃ śaṅkhakundendusannibham |
abruvan dānavāḥ sarve hiraṇyakaśipuśca saḥ ||

3.43.4

evaṃ hi bruvatāṃ teṣāṃ nirdagdhānāṃ mahātmanām |
nārasiṃhena cakṣurbhyāṃ coditāḥ kāladharmaṇā ||

3.43.5

hiraṇyakaśipoḥ putraḥ prahrādo nāma vīryavān |
divyena cakṣuṣā siṃhamapaśyad devamāgatam ||

3.43.6

taṃ dṛṣṭvā rukmaśailābhamapūrvāṃ tanumāsthitam |
vismitā dānavāḥ sarve hiraṇyakaśipuśca saḥ ||

3.43.7

prahlāda uvāca |
mahārāja mahābāho daityānāmādisambhava |
na śrutaṃ naiva dṛṣṭaṃ ca nārasiṃhamidaṃ vapuḥ ||

3.43.8

avyaktaprabhavaṃ divyaṃ kimidaṃ rūpamadbhutam |
daityāntakaraṇaṃ ghoraṃ śaṃsantīva manāṃsi naḥ ||

3.43.9

asya devāḥ śarīrasthāḥ sāgarā saritastathā |
himavān pāriyātraśca ye cānye kulaparvatāḥ ||

3.43.3.43.10

candramāḥ saha nakṣatrairādityāścāśvinau tathā |
dhanado varuṇaścaiva yamaḥ śakraḥ śacīpatiḥ ||

3.43.11

maruto devagandharvā munayaśca tapodhanāḥ |
nāgā yakṣāḥ piśācāśca rākṣasā bhīmavikramāḥ ||

3.43.12

brahmadevaḥ paśupatirlalāṭasthā vibhānti vai |
sthāvarāṇi ca bhūtāni jaṅgamāni tathaiva ca ||

3.43.13

bhavāṃśca sahito'smābhiḥ sarvairdaityagaṇairvṛtaḥ |
vimānaśatasaṅkīrṇā tathābhyantarajā sabhā ||

3.43.14

sarvaṃ tribhuvanaṃ rājam̐llokadharmaśca śāśvataḥ |
dṛśyate nārasiṃhe'smin yathendau vimale jagat ||

3.43.15

prajāpatiścātra manurmahātmā grahāśca yogāśca mahī nabhaśca |
utpātakālaśca dhṛtiḥ smṛtiśca rajaśca sattvaṃ ca tapo damaśca ||

3.43.16

sanatkumāraśca mahānubhāvo viśve ca devāpsarasaśca sarvāḥ |
krodhaśca kāmaśca tathaiva harṣo darpaśca mohaḥ pitaraśca sarve ||

3.43.17

ityevamuktvā sa ca daityarājaṃ hiraṇyanāmānamavismayena |
dadhyau ca daityeśvaraputra ugraṃ mahāmatiḥ kiñcidadhomukhaḥ prāk ||

3.43.17.c1

iti śrīmahābhārate khilabhāge harivaṃśe bhaviṣyaparvaṇi nārasiṃhe prahrādavākye tricatvāriṃśo'dhyāyaḥ ||