Harivamsha 3.44: catuścatvāriṃśo'dhyāyaḥ

3.44.p1

nṛsiṃhasyopari daityānāṃ śastāstrapātaḥ

3.44.1

daityebhiḥ hiraṇyakaśipunā ca nṛsiṃhopari vibhinnānāṃ astrāṇāṃ prahāraḥ vaiśampāyana uvāca |
prahrādasya ca tacchrutvā hiraṇyakaśipurvacaḥ |
uvāca dānavān sarvān sagaṇāṃśca gaṇādhipaḥ ||

These are declared to be the eleven Rudras, the lords of the three worlds;
and a hundred Rudras of unmeasured splendor are likewise described

3.44.2

mṛgendro gṛhyatāṃ śīghramapūrvāṃ tanumāsthitaḥ |
yadi vā saṃśayaḥ kaścid vadhyatāṃ vanagocaraḥ ||

3.44.3

tacchutvā dānavāḥ sarve mṛgendraṃ bhīmavikramam |
parikṣipanto muditāstrāsayāmāsurojasā ||

3.44.4

siṃhanādaṃ naditvā tu punaḥ siṃho mahābalaḥ |
babhañja tāṃ sabhāṃ ramyāṃ vyāditāsya ivāntakaḥ ||

3.44.5

sabhāyāṃ bhajyamānāyāṃ hiraṇyakaśipuḥ svayam |
cikṣepāstrāṇi siṃhasya roṣavyākulalocanaḥ ||

3.44.6

sarvāstrāṇāmatha śreṣṭhaṃ daṇḍamastraṃ subhairavam |
kālacakraṃ tathātyugraṃ viṣṇucakraṃ tathaiva ca ||

3.44.7

dharmacakraṃ mahaccakramajitaṃ nāma nāmataḥ |
cakramaindraṃ tathā ghoramṛṣicakraṃ tathaiva ca ||

3.44.8

paitāmahaṃ tathā cakraṃ trailokyamahitasvanam |
vicitramaśanīṃ caiva śuṣkārdraṃ cāśanidvayam ||

3.44.9

raudraṃ tadugraṃ śūlaṃ ca kaṅkālaṃ musalaṃ tathā |
astraṃ brahmaśiraścaiva brāhmamastraṃ tathaiva ca ||

3.44.3.44.10

aiṣīkamastramaindraṃ ca āgneyaṃ śaiśiraṃ tathā |
vāyavyaṃ mathanaṃ nāma kāpālamatha kiṅkaram ||

3.44.11

tathā cāpratimāṃ śaktiṃ krauñcamastraṃ tathaiva ca |
astraṃ hayaśiraścaiva saumyamastraṃ tathaiva ca ||

3.44.12

paiśācamastramamitaṃ sārpyamastraṃ tathādbhutam |
mohanaṃ śoṣaṇaṃ caiva santāpanavilāpane ||

3.44.13

jṛmbhaṇaṃ prāpaṇaṃ caiva tvāṣṭraṃ caiva sudāruṇam |
kālamudgaramakṣobhyaṃ kṣobhaṇaṃ tu mahābalam ||

3.44.14

saṃvartanaṃ mohanaṃ ca tathā māyādharaṃ param |
gāndharvamastraṃ dayitamasiratnaṃ ca nandakam ||

3.44.15

prasvāpanaṃ pramathanaṃ vāruṇaṃ cāstramuttamam |
astraṃ pāśupataṃ caiva yasyāpratihatā gatiḥ ||

3.44.16

etānyastrāṇi sarvāṇi hiraṇyakaśipustadā |
cikṣepa nārasiṃhasya dīptasyāgneryathāhutiḥ ||

3.44.17

astraiḥ prajvalitaiḥ siṃhamāvṛṇodasurādhipaḥ |
vivasvān gharmasamaye himavantamivāṃśubhiḥ ||

3.44.18

sa hyamarṣānilodbhūto daityānāṃ sainyasāgaraḥ |
kṣaṇenāplāvayat siṃhaṃ mainākamiva sāgaraḥ ||

3.44.19

prāsaiḥ pāśaistathā śūlairgadābhirmusalaistathā |
vajrairaśanikalpaiśca śilābhiśca mahādrumaiḥ ||

3.44.3.44.20

mudgaraiḥ kūṭapāśaiśca śūlolūkhalaparvataiḥ |
śataghnībhiśca dīptābhirdaṇḍairapi sudāruṇaiḥ ||

3.44.21

parivārya samantāt tu nighnannastrairhariṃ tadā |
svalpamapyasya na kṣuṇṇamūrjitasya mahātmanaḥ ||

3.44.22

te dānavāḥ pāśagṛhītahastā mahendravajrāśanitulyavegāḥ |
samantato'bhyudyatabāhuśastrāḥ sthitāstriśīrṣā iva pannagendrāḥ ||

3.44.23

suvarṇamālākulabhūṣitāṅgā nānāṅgadābhogapinaddhagātrāḥ |
muktāvalīdāmavibhūṣitāṅgā haṃsā ivābhānti viśālapakṣāḥ ||

3.44.24

teṣāṃ tu vāyupratimaujasāṃ vai keyūramālāvalayotkaṭāni |
tānyuttamāṅgānyabhito vibhānti prabhātasūryāṃśusamaprabhāṇi ||

3.44.25

taiḥ prakṣipadbhirjvalitānalopamairmahāstrapūgaiḥ sa samāvṛto babhau |
giriryathā santatavarṣibhirghanaiḥ kṛtāndhakāro'dbhutakandaradrumaḥ ||

3.44.26

tairhanyamāno'pi mahāstrajālaiḥ sarvaistadā daityagaṇaiḥ sametaiḥ |
nākampatājau bhagavān pratāpavān sthitaḥ prakṛtyā himavānivācalaḥ ||

3.44.27

santāpitāste narasiṃharūpiṇā diteḥ sutāḥ pāvakadīptatejasā |
bhayād viceluḥ pavanoddhatā yathā mahormayaḥ sāgaravārisambhavāḥ ||

3.44.28

śatairdhanurbhiḥ sumahātivegā yugāntakālapratimāñcharaughān |
ekāyanasthā mumucurnṛsiṃhe mahāsurāḥ krodhavidīpitāṅgāḥ ||

3.44.28.c1

iti śrīmahābhārate khilabhāge harivaṃśe bhaviṣyaparvaṇi nārasiṃhe catuścatvāriṃśo'dhyāyaḥ ||