Harivamsha 3.67: saptaṣaṣṭitamo'dhyāyaḥ

3.67.p1

kaśyapādīnprati brahmavākyaṃ, kṣīrodasyottaretīraṃ kaśyapādergamanaṃ, tapaścaryā ca

3.67.1

brahmaṇaḥ ājñayā kaśyapena adityā saha devānāṃ kṣīrasāgarasya uttare tīre gatvā tapaḥkaraṇe saṃlagnatā |
brahmovāca |
yadarthamiha samprāptā bhavantaḥ sarva eva hi |
vijānāmyahamavyagra etat sarvaṃ mahābalāḥ ||

Marīci, Maghavat, Iḍā, Gargaśiras,
Vikṣobhaṇa, Ketu, Ketuvīrya, Śatahrada,

3.67.2

bhaviṣyati ca vaḥ so'rthaḥ kāṅkṣito yaḥ surottamāḥ |
balerdānavamukhyasya yo vijetā bhaviṣyati ||

3.67.3

na khalvasurasaṅghānāmeko jetā sa viśvakṛt |
trailokyasyāpi jetāsau devānāmapi cottamaḥ ||

3.67.4

dhātā caiva hi lokānāṃ viśvayoniḥ sanātanaḥ |
pūrvaṃ devaṃ sadā prāhurhemagarbhanidarśanam ||

3.67.5

ātmā devena vibhunā kṛto'jeyo mahātmanaḥ |
balerasuramukhyasya viśvasya jagatastathā ||

3.67.6

prabhavaḥ sa hi sarveṣāmasmākamapi pūrvajaḥ |
acintyaḥ sa hi viśvātmā yogayuktaḥ parantapaḥ ||

3.67.7

taṃ devāpi mahātmānaṃ na viduḥ ko'pyasāviti |
vedātmānaṃ ca viśvaṃ ca sa devaḥ puruṣottamaḥ ||

3.67.8

tasyaiva tu prasādena pravakṣye'haṃ parāṃ gatim |
yatra yogaṃ samāsthāya tapaścarati duścaram ||

3.67.9

kṣīrodasyottare kūle udīcyāṃ diśi devatāḥ |
amṛtaṃ nāma paramaṃ sthānamāhurmanīṣiṇaḥ ||

3.67.3.67.10

bhavantastatra vai gatvā tapasā saṃśitavratāḥ |
amṛtaṃ sthānamāsādya tapaścarata duścaram ||

3.67.11

tatra śroṣyatha vispaṣṭāṃ snigdhagambhīraniḥsvanām |
uṣṇage toyapūrṇasya toyadasya samasvanām ||

3.67.12

yuktākṣarapadasnigdhāṃ ramyāmabhayadāṃ śivām |
vāṇīṃ paramasaṃskārāṃ varadāṃ brahmavādinīm ||

3.67.13

divyāṃ sarasvatīṃ satyāṃ sarvakilbiṣanāśinīm |
sarvadevādhidevasya bhāṣitāṃ bhāvitātmanaḥ ||

3.67.14

tasya vratasamāptau tu yāvad vratavisarjanam |
amoghasya tu devasya viśvedevā mahātmanaḥ ||

3.67.15

svāgataṃ vaḥ suraśreṣṭhā matsakāśe vyavasthitāḥ |
kasya kiṃ vā varaṃ devā dadāmi varadaḥ sthitaḥ ||

3.67.16

taṃ kaśyapo'ditiścaiva varaṃ gṛhṇīta vai tataḥ |
praṇamya śirasā pādau tasmai yogātmane tadā ||

3.67.17

bhavāneva ca naḥ putro bhavatviti na saṃśayaḥ |
uktaśca parayā bhaktyā tathāstviti sa vakṣyati ||

3.67.18

devā bruvantu taṃ sarve bhrātā nastvaṃ bhaveti ha |
tathāstviti ca sa śrīmān vakṣyate sarvalokakṛt ||

3.67.19

tasmādevaṃ gṛhītvā tu varaṃ tridaśasattamāḥ |
kṛtakṛtyāḥ punaḥ sarve gacchadhvaṃ svaṃ svamālayam ||

3.67.3.67.20

tathāstviti surāḥ sarve kaśyapo'ditireva ca |
vanditvā brahmacaraṇau gatāḥ saumyāṃ diśaṃ prati ||

3.67.21

te'cireṇaiva samprāptāḥ kṣīrodasyottaraṃ taṭam |
yathoddiṣṭaṃ bhagavatā brahmaṇā brahmavādinā ||

3.67.22

te'tītya sāgarān sarvānparvatāṃśca bahūnkṣaṇāt |
nadyaśca vividhā divyāḥ pṛthivyāṃ surasattamāḥ ||

3.67.23

paśyanti ca sughorāṃ vai sarvasattvavivarjitām |
abhāskarāmamaryādāṃ tamasā saṃvṛtāṃ diśam ||

3.67.24

amṛtaṃ sthānamāsādya kaśyapena surāḥ saha |
dīkṣitāḥ kāmadaṃ divyaṃ vrataṃ varṣasahasrakam ||

3.67.25

prasādārthaṃ sureśāya tasmai yogāya dhīmate |
nārāyaṇāya devāya saddasrākṣāya dhīmate ||

3.67.26

brahmacaryeṇa maunena sthānavīrāsanena ca |
damena ca surāḥ sarve tapo duścaramāsthitāḥ ||

3.67.27

kaśyapastatra bhagavān prasādārthaṃ mahātmanaḥ |
udīrayati vedoktaṃ yamāhuḥ paramaṃ stavam ||

3.67.27.c1

iti śrīmahābhārate khilabhāge harivaṃśe bhaviṣyaparvaṇi vāmanaprādurbhābe saptaṣaṣṭitamo'dhyāyaḥ ||