[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [The Mahābhārata and its versions](https://indike.org/pramana/in.lit.mahabharata) › [The Nārāyaṇa section of the Śāntiparvan](https://indike.org/pramana/in.lit.mahabharata.narayaniya) › 12.322 # The Nārāyaṇa section of the Śāntiparvan 12.322 Nārāyaṇīya 12.322 - **Language:** Sanskrit ### [12.322.1](https://indike.org/pramana/in.lit.mahabharata.narayaniya.12.322.1) bhīṣma uvāca: sa evam ukto dvipadāṃ variṣṭho nārāyaṇenottamapuruṣeṇa jagāda vākyaṃ dvipadāṃ variṣṭhaṃ nārāyaṇaṃ lokahitādhivāsam ### [12.322.2](https://indike.org/pramana/in.lit.mahabharata.narayaniya.12.322.2) yadartham ātmaprabhaveha janma tavottamaṃ dharmagṛhe caturdhā tat sādhyatāṃ lokahitārtham adya gacchāmi draṣṭuṃ prakṛtiṃ tavādyām ### [12.322.3](https://indike.org/pramana/in.lit.mahabharata.narayaniya.12.322.3) vedāḥ svadhītā mama lokanātha taptaṃ tapo nānṛtam uktapūrvam pūjāṃ gurūṇāṃ satataṃ karomi parasya guhyaṃ na ca bhinnapūrvam ### [12.322.4](https://indike.org/pramana/in.lit.mahabharata.narayaniya.12.322.4) guptāni catvāri yathāgamaṃ me śatrau ca mitre ca samo 'smi nityam taṃ cādidevaṃ satataṃ prapanna ekāntabhāvena vṛṇomy ajasram ebhir viśeṣaiḥ pariśuddhasattvaḥ kasmān na paśyeyam anantam īśam ### [12.322.5](https://indike.org/pramana/in.lit.mahabharata.narayaniya.12.322.5) tat pārameṣṭhyasya vaco niśamya nārāyaṇaḥ sātvatadharmagoptā gaccheti taṃ nāradam uktavān sa saṃpūjayitvātmavidhikriyābhiḥ ### [12.322.6](https://indike.org/pramana/in.lit.mahabharata.narayaniya.12.322.6) tato visṛṣṭaḥ parameṣṭhiputraḥ so 'bhyarcayitvā tam ṛṣiṃ purāṇam kham utpapātottamavegayuktas tato 'dhimerau sahasā nililye ### [12.322.7](https://indike.org/pramana/in.lit.mahabharata.narayaniya.12.322.7) tatrāvatasthe ca munir muhūrtam ekāntam āsādya gireḥ sa śṛṅge ālokayann uttarapaścimena dadarśa cātyadbhutarūpayuktam ### [12.322.8](https://indike.org/pramana/in.lit.mahabharata.narayaniya.12.322.8) kṣīrodadher uttarato hi dvīpaḥ śvetaḥ sa nāmnā prathito viśālaḥ meroḥ sahasraiḥ sa hi yojanānāṃ dvātriṃśatordhvaṃ kavibhir niruktaḥ ### [12.322.9](https://indike.org/pramana/in.lit.mahabharata.narayaniya.12.322.9) atīndriyāś cānaśanāś ca tatra niṣpandahīnāḥ susugandhinaś ca śvetāḥ pumāṃso gatasarvapāpāś cakṣurmuṣaḥ pāpakṛtāṃ narāṇām ### [12.322.10](https://indike.org/pramana/in.lit.mahabharata.narayaniya.12.322.10) vajrāsthikāyāḥ samamānonmānā divyānvayarūpāḥ śubhasāropetāḥ chattrākṛtiśīrṣā meghaughaninādāḥ satpuṣkaracatuṣkā rājīvaśatapādāḥ ### [12.322.11](https://indike.org/pramana/in.lit.mahabharata.narayaniya.12.322.11) ṣaṣṭyā dantair yuktāḥ śuklair aṣṭābhir daṃṣṭrābhir ye jihvābhir ye viṣvagvaktraṃ lelihyante sūryaprakhyam // ### [12.322.12](https://indike.org/pramana/in.lit.mahabharata.narayaniya.12.322.12) bhaktyā devaṃ viśvotpannaṃ yasmāt sarve lokāḥ sūtāḥ vedā dharmā munayaḥ śāntā devāḥ sarve tasya visargāḥ // ### [12.322.13](https://indike.org/pramana/in.lit.mahabharata.narayaniya.12.322.13) yudhi-ṣṭhira uvāca: atīndriyā nirāhārā aniṣpandāḥ sugandhinaḥ kathaṃ te puruṣā jātāḥ kā teṣāṃ gatir uttamā // ### [12.322.14](https://indike.org/pramana/in.lit.mahabharata.narayaniya.12.322.14) ye vimuktā bhavantīha narā bharatasattama teṣāṃ lakṣaṇam etad dhi yac chvetadvīpavāsinām // ### [12.322.15](https://indike.org/pramana/in.lit.mahabharata.narayaniya.12.322.15) tasmān me saṃśayaṃ chindhi paraṃ kautūhalaṃ hi me tvaṃ hi sarvakathārāmas tvāṃ caivopāśritā vayam // ### [12.322.16](https://indike.org/pramana/in.lit.mahabharata.narayaniya.12.322.16) bhīṣma uvāca: vistīrṇaiṣā kathā rājañ śrutā me pitṛsaṃnidhau saiṣā tava hi vaktavyā kathāsāro hi sa smṛtaḥ // ### [12.322.17](https://indike.org/pramana/in.lit.mahabharata.narayaniya.12.322.17) rājoparicaro nāma babhūvādhipatir bhuvaḥ ākhaṇḍalasakhaḥ khyāto bhakto nārāyaṇaṃ harim // ### [12.322.18](https://indike.org/pramana/in.lit.mahabharata.narayaniya.12.322.18) dhārmiko nityabhaktaś ca pitṝn nityam atandritaḥ sāmrājyaṃ tena saṃprāptaṃ nārāyaṇavarāt purā // ### [12.322.19](https://indike.org/pramana/in.lit.mahabharata.narayaniya.12.322.19) sātvataṃ vidhim āsthāya prāksūryamukhaniḥsṛtam pūjayām āsa deveśaṃ taccheṣeṇa pitāmahān // ### [12.322.20](https://indike.org/pramana/in.lit.mahabharata.narayaniya.12.322.20) pitṛśeṣeṇa viprāṃś ca saṃvibhajyāśritāṃś ca saḥ śeṣānnabhuk satyaparaḥ sarvabhūteṣv ahiṃsakaḥ sarvabhāvena bhaktaḥ sa devadevaṃ janārdanam // ### [12.322.21](https://indike.org/pramana/in.lit.mahabharata.narayaniya.12.322.21) tasya nārāyaṇe bhaktiṃ vahato 'mitrakarśana ekaśayyāsanaṃ śakro dattavān devarāṭ svayam // ### [12.322.22](https://indike.org/pramana/in.lit.mahabharata.narayaniya.12.322.22) ātmā rājyaṃ dhanaṃ caiva kalatraṃ vāhanāni ca etad bhagavate sarvam iti tat prekṣitaṃ sadā // ### [12.322.23](https://indike.org/pramana/in.lit.mahabharata.narayaniya.12.322.23) kāmyanaimittikā-jasraṃ yajñiyāḥ paramakriyāḥ sarvāḥ sātvatam āsthāya vidhiṃ cakre samāhitaḥ // ### [12.322.24](https://indike.org/pramana/in.lit.mahabharata.narayaniya.12.322.24) pañcarātravido mukhyās tasya gehe mahātmanaḥ prāyaṇaṃ bhagavatproktaṃ bhuñjate cāgrabhojanam // ### [12.322.25](https://indike.org/pramana/in.lit.mahabharata.narayaniya.12.322.25) tasya praśāsato rājyaṃ dharmeṇā-mitraghātinaḥ nānṛtā vāk samabhavan mano duṣṭaṃ na cābhavat na ca kāyena kṛtavān sa pāpaṃ param aṇv api // ### [12.322.26](https://indike.org/pramana/in.lit.mahabharata.narayaniya.12.322.26) ye hi te munayaḥ khyātāḥ sapta citraśikhaṇḍinaḥ tair ekamatibhir bhūtvā yat proktaṃ śāstram uttamam // ### [12.322.27](https://indike.org/pramana/in.lit.mahabharata.narayaniya.12.322.27) marīcir atryaṅgirasau pulastyaḥ pulahaḥ kratuḥ vasiṣṭhaś ca mahātejā ete citraśikhaṇḍinaḥ // ### [12.322.28](https://indike.org/pramana/in.lit.mahabharata.narayaniya.12.322.28) sapta prakṛtayo hy etās tathā svāyaṃbhuvo 'ṣṭamaḥ etābhir dhāryate lokas tābhyaḥ śāstraṃ viniḥsṛtam // ### [12.322.29](https://indike.org/pramana/in.lit.mahabharata.narayaniya.12.322.29) ekāgramanaso dāntā munayaḥ saṃyame ratāḥ idaṃ śreya idaṃ brahma idaṃ hitam anuttamam lokān saṃcintya manasā tataḥ śāstraṃ pracakrire // ### [12.322.30](https://indike.org/pramana/in.lit.mahabharata.narayaniya.12.322.30) tatra dharmārthakāmā hi mokṣaḥ paścāc ca kīrtitaḥ maryādā vividhāś caiva divi bhūmau ca saṃsthitāḥ // ### [12.322.31](https://indike.org/pramana/in.lit.mahabharata.narayaniya.12.322.31) ārādhya tapasā devaṃ hariṃ nārāyaṇaṃ prabhum divyaṃ varṣasahasraṃ vai sarve te ṛṣibhiḥ saha // ### [12.322.32](https://indike.org/pramana/in.lit.mahabharata.narayaniya.12.322.32) nārāyaṇānuśāstā hi tadā devī sarasvatī viveśa tān ṛṣīn sarvāṃl lokānāṃ hitakāmyayā // ### [12.322.33](https://indike.org/pramana/in.lit.mahabharata.narayaniya.12.322.33) tataḥ pravartitā samyak tapovidbhir dvijātibhiḥ śabde cārthe ca hetau ca eṣā prathamasargajā // ### [12.322.34](https://indike.org/pramana/in.lit.mahabharata.narayaniya.12.322.34) ādāv eva hi tac chāstram oṃkārasvarabhūṣitam ṛṣibhir bhāvitaṃ tatra yatra kāruṇiko hy asau // ### [12.322.35](https://indike.org/pramana/in.lit.mahabharata.narayaniya.12.322.35) tataḥ prasanno bhagavān anirdiṣṭaśarīragaḥ\_1 ṛṣīn uvāca tān sarvān adṛśyaḥ puruṣottamaḥ // ### [12.322.36](https://indike.org/pramana/in.lit.mahabharata.narayaniya.12.322.36) kṛtaṃ śatasahasraṃ hi ślokānām idam uttamam lokatantrasya kṛtsnasya yasmād dharmaḥ pravartate // ### [12.322.37](https://indike.org/pramana/in.lit.mahabharata.narayaniya.12.322.37) pravṛttau ca nivṛttau ca yonir etad bhaviṣyati ṛgyajuḥsāmabhir juṣṭam atharvāṅgirasais tathā // ### [12.322.38](https://indike.org/pramana/in.lit.mahabharata.narayaniya.12.322.38) tathāpramāṇaṃ hi mayā kṛto brahmā prasādajaḥ rudraś ca krodhajo viprā yūyaṃ prakṛtayas tathā // ### [12.322.39](https://indike.org/pramana/in.lit.mahabharata.narayaniya.12.322.39) sūryācandramasau vāyur bhūmir āpo 'gnir eva ca sarve ca nakṣatragaṇā yac ca bhūtābhiśabditam // ### [12.322.40](https://indike.org/pramana/in.lit.mahabharata.narayaniya.12.322.40) adhikāreṣu vartante yathāsvam brahmavādinaḥ sarve pramāṇaṃ hi yathā tathaitac chāstram uttamam // ### [12.322.41](https://indike.org/pramana/in.lit.mahabharata.narayaniya.12.322.41) bhaviṣyati pramāṇaṃ vai etan madanuśāsanam asmāt pravakṣyate dharmān manuḥ svāyaṃbhuvaḥ svayam // ### [12.322.42](https://indike.org/pramana/in.lit.mahabharata.narayaniya.12.322.42) uśanā bṛhaspatiś caiva yadotpannau bhaviṣyataḥ tadā pravakṣyataḥ śāstraṃ yuṣmanmatibhir uddhṛtam // ### [12.322.43](https://indike.org/pramana/in.lit.mahabharata.narayaniya.12.322.43) svāyaṃbhuveṣu dharmeṣu śāstre cośanasā kṛte bṛhaspatimate\_1 caiva lokeṣu pravicārite // ### [12.322.44](https://indike.org/pramana/in.lit.mahabharata.narayaniya.12.322.44) yuṣmatkṛtam idaṃ śāstraṃ prajāpālo vasus tataḥ bṛhaspatisakāśād vai prāpsyate dvijasattamāḥ // ### [12.322.45](https://indike.org/pramana/in.lit.mahabharata.narayaniya.12.322.45) sa hi madbhāvito rājā madbhaktaś ca bhaviṣyati tena śāstreṇa lokeṣu kriyāḥ sarvāḥ kariṣyati // ### [12.322.46](https://indike.org/pramana/in.lit.mahabharata.narayaniya.12.322.46) etad dhi sarvaśāstrāṇāṃ śāstram uttamasaṃjñitam etad arthyaṃ ca dharmyaṃ ca yaśasyaṃ caitad uttamam // ### [12.322.47](https://indike.org/pramana/in.lit.mahabharata.narayaniya.12.322.47) asya pravartanāc caiva prajāvanto bhaviṣyatha sa ca rājā śriyā yukto bhaviṣyati mahān vasuḥ // ### [12.322.48](https://indike.org/pramana/in.lit.mahabharata.narayaniya.12.322.48) saṃsthite tu nṛpe\_2 tasmiñ śāstram etat sanātanam antar dhāsyati tat satyam etad vaḥ kathitaṃ mayā // ### [12.322.49](https://indike.org/pramana/in.lit.mahabharata.narayaniya.12.322.49) etāvad uktvā vacanam adṛśyaḥ puruṣottamaḥ visṛjya tān ṛṣīn sarvān kāmapi prasthito diśam // ### [12.322.50](https://indike.org/pramana/in.lit.mahabharata.narayaniya.12.322.50) tatas te lokapitaraḥ sarvalokārthacintakāḥ prāvartayanta tac chāstraṃ dharmayoniṃ sanātanam // ### [12.322.51](https://indike.org/pramana/in.lit.mahabharata.narayaniya.12.322.51) utpanne āṅgirase caiva yuge prathamakalpite sāṅgopaniṣadaṃ śāstraṃ sthāpayitvā bṛhaspatau // ### [12.322.52](https://indike.org/pramana/in.lit.mahabharata.narayaniya.12.322.52) jagmur yathepsitaṃ deśaṃ tapase kṛtaniścayāḥ dhāraṇāt sarvalokānāṃ sarvadharmapravartakāḥ // ## Linked texts (2) - [Critical edition (BORI)](https://indike.org/pramana/in.lit.mahabharata.vyasa*crit.12.322.1) — Sanskrit - [Skandamahāpurāṇa (vulgate)](https://indike.org/pramana/in.purana.skanda*vulgate.2.9.4.2) — Sanskrit --- Source: [https://indike.org/pramana/in.lit.mahabharata.narayaniya.12.322](https://indike.org/pramana/in.lit.mahabharata.narayaniya.12.322) · Pramāṇa