[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [The Mahābhārata and its versions](https://indike.org/pramana/in.lit.mahabharata) › [The Nārāyaṇa section of the Śāntiparvan](https://indike.org/pramana/in.lit.mahabharata.narayaniya) › 12.323 # The Nārāyaṇa section of the Śāntiparvan 12.323 Nārāyaṇīya 12.323 - **Language:** Sanskrit ### [12.323.1](https://indike.org/pramana/in.lit.mahabharata.narayaniya.12.323.1) bhīṣma uvāca: tato 'tīte mahākalpe utpanne 'ṅgirasaḥ sute babhūvur nirvṛtā devā jāte devapurohite // ### [12.323.2](https://indike.org/pramana/in.lit.mahabharata.narayaniya.12.323.2) bṛhad brahma mahac ceti śabdāḥ paryāyavācakāḥ ebhiḥ samanvito rājan guṇair vidvān bṛhaspatiḥ // ### [12.323.3](https://indike.org/pramana/in.lit.mahabharata.narayaniya.12.323.3) tasya śiṣyo babhūvāgryo rājoparicaro vasuḥ adhītavāṃs tadā śāstraṃ samyak citraśikhaṇḍijam // ### [12.323.4](https://indike.org/pramana/in.lit.mahabharata.narayaniya.12.323.4) sa rājā bhāvitaḥ pūrvaṃ daivena vidhinā vasuḥ pālayām āsa pṛthivīṃ divam ākhaṇḍalo yathā // ### [12.323.5](https://indike.org/pramana/in.lit.mahabharata.narayaniya.12.323.5) tasya yajño mahān āsīd aśvamedho mahātmanaḥ bṛhaspatir upādhyāyas tatra hotā babhūva ha // ### [12.323.6](https://indike.org/pramana/in.lit.mahabharata.narayaniya.12.323.6) prajāpatisutāś cātra sadasyās tv abhavaṃs trayaḥ ekataś ca dvitaś caiva tritaś caiva mahar2ṣayaḥ // ### [12.323.7](https://indike.org/pramana/in.lit.mahabharata.narayaniya.12.323.7) dhanuṣākṣo 'tha raibhyaś ca arvāvasuparāvasū ṛṣir medhātithiś caiva tāṇḍyaś caiva mahān ṛṣiḥ // ### [12.323.8](https://indike.org/pramana/in.lit.mahabharata.narayaniya.12.323.8) ṛṣiḥ śaktir mahābhāgas tathā vedaśirāś ca yaḥ kapilaś ca ṛṣiśreṣṭhaḥ śālihotrapitāmahaḥ // ### [12.323.9](https://indike.org/pramana/in.lit.mahabharata.narayaniya.12.323.9) ādyaḥ kaṭhas taittiriś ca vaiśaṃpāyanapūrvajaḥ kaṇvo 'tha devahotraś ca ete ṣoḍaśa kīrtitāḥ saṃbhṛtāḥ sarvasaṃbhārās tasmin rājan mahākratau // ### [12.323.10](https://indike.org/pramana/in.lit.mahabharata.narayaniya.12.323.10) na tatra paśughāto 'bhūt sa rājaivaṃ sthito 'bhavat ahiṃsraḥ śucir akṣudro nirāśīḥ karmasaṃstutaḥ āraṇyakapadodgītā bhāgās tatropakalpitāḥ // ### [12.323.11](https://indike.org/pramana/in.lit.mahabharata.narayaniya.12.323.11) prītas tato 'sya bhagavān devadevaḥ purātanaḥ sākṣāt taṃ darśayām āsa so 'dṛśyo 'nyena kenacit // ### [12.323.12](https://indike.org/pramana/in.lit.mahabharata.narayaniya.12.323.12) svayaṃ bhāgam upāghrāya puroḍāśaṃ gṛhītavān adṛśyena hṛto bhāgo devena harimedhasā // ### [12.323.13](https://indike.org/pramana/in.lit.mahabharata.narayaniya.12.323.13) bṛhaspatis tataḥ kruddhaḥ sruvam udyamya vegitaḥ ākāśaṃ ghnan sruvaḥ pātai roṣād aśrūṇy avartayat // ### [12.323.14](https://indike.org/pramana/in.lit.mahabharata.narayaniya.12.323.14) uvāca coparicaraṃ mayā bhāgo 'yam udyataḥ grāhyaḥ svayaṃ hi devena matpratyakṣaṃ na saṃśayaḥ // ### [12.323.15](https://indike.org/pramana/in.lit.mahabharata.narayaniya.12.323.15) udyatā yajñabhāgā hi sākṣāt prāptāḥ surair iha kimartham iha na prāpto darśanaṃ sa harir vibhuḥ // ### [12.323.16](https://indike.org/pramana/in.lit.mahabharata.narayaniya.12.323.16) tataḥ sa taṃ samuddhūtaṃ bhūmipālo mahān vasuḥ prasādayām āsa muniṃ sadasyās te ca sarvaśaḥ // ### [12.323.17](https://indike.org/pramana/in.lit.mahabharata.narayaniya.12.323.17) ūcuś cainam asaṃbhrāntā na roṣaṃ kartum arhasi naiṣa dharmaḥ kṛtayuge yas tvaṃ roṣam acīkṛthāḥ // ### [12.323.18](https://indike.org/pramana/in.lit.mahabharata.narayaniya.12.323.18) aroṣaṇo hy asau devo yasya bhāgo 'yam udyataḥ na sa śakyas tvayā draṣṭum asmābhir vā bṛhaspate yasya prasādaṃ kurute sa vai taṃ draṣṭum arhati // ### [12.323.19](https://indike.org/pramana/in.lit.mahabharata.narayaniya.12.323.19) ekatadvitatritā ūcuḥ: vayaṃ hi brahmaṇaḥ putrā mānasāḥ parikīrtitāḥ gatā niḥśreyasārthaṃ hi kadācid diśam uttarām // ### [12.323.20](https://indike.org/pramana/in.lit.mahabharata.narayaniya.12.323.20) taptvā varṣasahasrāṇi catvāri tapa uttamam ekapādasthitāḥ samyak kāṣṭhabhūtāḥ samāhitāḥ // ### [12.323.21](https://indike.org/pramana/in.lit.mahabharata.narayaniya.12.323.21) meror uttarabhāge tu kṣīrodasyānukūlataḥ sa deśo yatra nas taptaṃ tapaḥ paramadāruṇam kathaṃ paśyemahi vayaṃ devaṃ nārāyaṇaṃ tv iti // ### [12.323.22](https://indike.org/pramana/in.lit.mahabharata.narayaniya.12.323.22) tato vratasyāvabhṛthe vāg uvācā-śarīriṇī sutaptaṃ vas tapo viprāḥ prasannenāntarātmanā // ### [12.323.23](https://indike.org/pramana/in.lit.mahabharata.narayaniya.12.323.23) yūyaṃ jijñāsavo bhaktāḥ kathaṃ drakṣyatha taṃ prabhum kṣīrodadher uttarataḥ śvetadvīpo mahāprabhaḥ // ### [12.323.24](https://indike.org/pramana/in.lit.mahabharata.narayaniya.12.323.24) tatra nārāyaṇaparā mānavāś candravarcasaḥ ekāntabhāvopagatās te bhaktāḥ puruṣottamam // ### [12.323.25](https://indike.org/pramana/in.lit.mahabharata.narayaniya.12.323.25) te sahasrārciṣaṃ devaṃ praviśanti sanātanam atīndriyā nirāhārā aniṣpandāḥ sugandhinaḥ // ### [12.323.26](https://indike.org/pramana/in.lit.mahabharata.narayaniya.12.323.26) ekāntinas te puruṣāḥ śvetadvīpanivāsinaḥ gacchadhvaṃ tatra munayas tatrātmā me prakāśitaḥ // ### [12.323.27](https://indike.org/pramana/in.lit.mahabharata.narayaniya.12.323.27) atha śrutvā vayaṃ sarve vācaṃ tām aśarīriṇīm yathākhyātena mārgeṇa taṃ deśaṃ pratipedire // ### [12.323.28](https://indike.org/pramana/in.lit.mahabharata.narayaniya.12.323.28) prāpya śvetaṃ mahādvīpaṃ taccittās taddidṛkṣavaḥ tato no dṛṣṭiviṣayas tadā pratihato 'bhavat // ### [12.323.29](https://indike.org/pramana/in.lit.mahabharata.narayaniya.12.323.29) na ca paśyāma puruṣaṃ tattejohṛtadarśanāḥ tato naḥ prādur abhavad vijñānaṃ devayogajam // ### [12.323.30](https://indike.org/pramana/in.lit.mahabharata.narayaniya.12.323.30) na kilā-taptatapasā śakyate draṣṭum añjasā tataḥ punar varṣaśataṃ taptvā tātkālikaṃ mahat // ### [12.323.31](https://indike.org/pramana/in.lit.mahabharata.narayaniya.12.323.31) vratāvasāne suśubhān narān dadṛśire vayam śvetāṃś candrapratīkāśān sarvalakṣaṇalakṣitān // ### [12.323.32](https://indike.org/pramana/in.lit.mahabharata.narayaniya.12.323.32) nityāñjalikṛtān brahma japataḥ prāgudaṅmukhān mānaso nāma sa japo japyate tair mahātmabhiḥ tenaikāgramanastvena prīto bhavati vai hariḥ // ### [12.323.33](https://indike.org/pramana/in.lit.mahabharata.narayaniya.12.323.33) yā bhaven muniśārdūla bhāḥ sūryasya yugakṣaye ekaikasya prabhā tādṛk sābhavan mānavasya ha // ### [12.323.34](https://indike.org/pramana/in.lit.mahabharata.narayaniya.12.323.34) tejonivāsaḥ sa dvīpa iti vai menire vayam na tatrābhyadhikaḥ kaścit sarve te samatejasaḥ\_1 // ### [12.323.35](https://indike.org/pramana/in.lit.mahabharata.narayaniya.12.323.35) atha sūryasahasrasya prabhāṃ yugapadutthitām sahasā dṛṣṭavantaḥ sma punar eva bṛhaspate // ### [12.323.36](https://indike.org/pramana/in.lit.mahabharata.narayaniya.12.323.36) sahitāś cābhyadhāvanta tatas te mānavā drutam kṛtāñjalipuṭāḥ hṛṣṭā nama ity eva vādinaḥ // ### [12.323.37](https://indike.org/pramana/in.lit.mahabharata.narayaniya.12.323.37) tato 'bhivadatāṃ teṣām aśrauṣma vipulaṃ dhvanim baliḥ kilopahriyate tasya devasya tair naraiḥ // ### [12.323.38](https://indike.org/pramana/in.lit.mahabharata.narayaniya.12.323.38) vayaṃ tu tejasā tasya sahasā hṛtacetasaḥ na kiṃcid api paśyāmo hatadṛṣṭibalendriyāḥ // ### [12.323.39](https://indike.org/pramana/in.lit.mahabharata.narayaniya.12.323.39) ekas tu śabdo 'virataḥ śruto 'smābhir udīritaḥ jitaṃ te puṇḍarīkākṣa namas te viśvabhāvana // ### [12.323.40](https://indike.org/pramana/in.lit.mahabharata.narayaniya.12.323.40) namas te 'stu hṛṣīkeśa mahāpuruṣapūrvaja iti śabdaḥ śruto 'smābhiḥ śikṣā-kṣarasamīritaḥ // ### [12.323.41](https://indike.org/pramana/in.lit.mahabharata.narayaniya.12.323.41) etasminn antare vāyuḥ sarvagandhavahaḥ śuciḥ divyāny uvāha puṣpāṇi karmaṇyāś cauṣadhīs tathā // ### [12.323.42](https://indike.org/pramana/in.lit.mahabharata.narayaniya.12.323.42) tair iṣṭaḥ\_2 pañcakālajñair harir ekāntibhir naraiḥ nūnaṃ tatrāgato devo yathā tair vāg udīritā vayaṃ tv enaṃ na paśyāmo mohitās tasya māyayā // ### [12.323.43](https://indike.org/pramana/in.lit.mahabharata.narayaniya.12.323.43) mārute saṃnivṛtte ca balau ca pratipādite cintāvyākulitātmāno jātāḥ smo 'ṅgirasāṃ vara // ### [12.323.44](https://indike.org/pramana/in.lit.mahabharata.narayaniya.12.323.44) mānavānāṃ sahasreṣu teṣu vai śuddhayoniṣu asmān na kaścin manasā cakṣuṣā vāpy apūjayat // ### [12.323.45](https://indike.org/pramana/in.lit.mahabharata.narayaniya.12.323.45) te 'pi svasthā munigaṇā ekabhāvam anuvratāḥ nāsmāsu dadhire bhāvaṃ brahmabhāvam anuṣṭhitāḥ // ### [12.323.46](https://indike.org/pramana/in.lit.mahabharata.narayaniya.12.323.46) tato 'smān supariśrāntāṃs tapasā cāpi karśitān uvāca khasthaṃ kimapi bhūtaṃ tatrā-śarīrakam // ### [12.323.47](https://indike.org/pramana/in.lit.mahabharata.narayaniya.12.323.47) dṛṣṭā vaḥ puruṣāḥ śvetāḥ sarvendriyavarjitāḥ dṛṣṭo bhavati deveśa ebhir dṛṣṭair dvijottamāḥ // ### [12.323.48](https://indike.org/pramana/in.lit.mahabharata.narayaniya.12.323.48) gacchadhvaṃ munayaḥ sarve yathāgatam ito 'cirāt na sa śakyo abhaktena draṣṭuṃ devaḥ kathaṃcana // ### [12.323.49](https://indike.org/pramana/in.lit.mahabharata.narayaniya.12.323.49) kāmaṃ kālena mahatā ekāntitvaṃ samāgataiḥ śakyo draṣṭuṃ sa bhagavān prabhāmaṇḍaladurdṛśaḥ // ### [12.323.50](https://indike.org/pramana/in.lit.mahabharata.narayaniya.12.323.50) mahat kāryaṃ tu kartavyaṃ yuṣmābhir dvijasattamāḥ itaḥ kṛtayuge 'tīte viparyāsaṃ gate\_1 'pi ca // ### [12.323.51](https://indike.org/pramana/in.lit.mahabharata.narayaniya.12.323.51) vaivasvate 'ntare viprāḥ prāpte tretāyuge tataḥ surāṇāṃ kāryasiddhyarthaṃ sahāyā vai bhaviṣyatha // ### [12.323.52](https://indike.org/pramana/in.lit.mahabharata.narayaniya.12.323.52) tatas tad adbhutaṃ vākyaṃ niśamyaivaṃ sma somapa\_1 tasya prasādāt prāptāḥ smo deśam īpsitam añjasā // ### [12.323.53](https://indike.org/pramana/in.lit.mahabharata.narayaniya.12.323.53) evaṃ sutapasā caiva havyakavyais tathaiva ca devo 'smābhir na dṛṣṭaḥ sa kathaṃ tvaṃ draṣṭum arhasi nārāyaṇo mahad bhūtaṃ viśvasṛg ghavyakavyabhuk // ### [12.323.54](https://indike.org/pramana/in.lit.mahabharata.narayaniya.12.323.54) bhīṣma uvāca: evam ekatavākyena dvitatritamatena ca anunītaḥ sadasyaiś ca bṛhaspatir udāradhīḥ samānīya tato yajñaṃ daivataṃ samapūjayat // ### [12.323.55](https://indike.org/pramana/in.lit.mahabharata.narayaniya.12.323.55) samāptayajño rājāpi prajāḥ pālitavān vasuḥ brahmaśāpād divo bhraṣṭaḥ praviveśa mahīṃ tataḥ // ### [12.323.56](https://indike.org/pramana/in.lit.mahabharata.narayaniya.12.323.56) antarbhūmigataś caiva satataṃ dharmavatsalaḥ nārāyaṇaparo bhūtvā nārāyaṇapadaṃ jagau // ### [12.323.57](https://indike.org/pramana/in.lit.mahabharata.narayaniya.12.323.57) tasyaiva ca prasādena punar evotthitas tu saḥ mahītalād gataḥ sthānaṃ brahmaṇaḥ samanantaram parāṃ gatim anuprāpta iti naiṣṭhikam añjasā // ## Linked texts (2) - [Critical edition (BORI)](https://indike.org/pramana/in.lit.mahabharata.vyasa*crit.12.323.1) — Sanskrit - [Laghubhāgavatāmṛta](https://indike.org/pramana/in.sampradaya.vaisnava.gaudiya.siddhanta.laghubhagavatamrta.1.5.416) — Rūpa Gosvāmin 1530, Sanskrit --- Source: [https://indike.org/pramana/in.lit.mahabharata.narayaniya.12.323](https://indike.org/pramana/in.lit.mahabharata.narayaniya.12.323) · Pramāṇa