[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [The Mahābhārata and its versions](https://indike.org/pramana/in.lit.mahabharata) › [The Nārāyaṇa section of the Śāntiparvan](https://indike.org/pramana/in.lit.mahabharata.narayaniya) › 12.326 # The Nārāyaṇa section of the Śāntiparvan 12.326 Nārāyaṇīya 12.326 - **Language:** Sanskrit ### [12.326.1](https://indike.org/pramana/in.lit.mahabharata.narayaniya.12.326.1) bhīṣma uvāca: evaṃ stutaḥ sa bhagavān guhyais tathyaiś ca nāmabhiḥ taṃ muniṃ darśayām āsa nāradaṃ viśvarūpadhṛk // ### [12.326.2](https://indike.org/pramana/in.lit.mahabharata.narayaniya.12.326.2) kiṃcic candraviśuddhātmā kiṃcic candrād viśeṣavān kṛśānuvarṇaḥ kiṃcic ca kiṃcid dhiṣṇyākṛtiḥ prabhuḥ // ### [12.326.3](https://indike.org/pramana/in.lit.mahabharata.narayaniya.12.326.3) śukapatravarṇaḥ kiṃcic ca kiṃcit sphaṭikasaprabhaḥ nīlāñjanacayaprakhyo jātarūpaprabhaḥ kvacit // ### [12.326.4](https://indike.org/pramana/in.lit.mahabharata.narayaniya.12.326.4) pravālāṅkuravarṇaś ca śvetavarṇaḥ kvacid babhau kvacit suvarṇavarṇābho vaiḍūryasadṛśaḥ kvacit // ### [12.326.5](https://indike.org/pramana/in.lit.mahabharata.narayaniya.12.326.5) nīlavaiḍūryasadṛśa indranīlanibhaḥ kvacit mayūragrīvāvarṇābho muktāhāranibhaḥ kvacit // ### [12.326.6](https://indike.org/pramana/in.lit.mahabharata.narayaniya.12.326.6) etān varṇān bahuvidhān rūpe bibhrat sanātanaḥ sahasranayanaḥ śrīmāñ śataśīrṣaḥ sahasrapāt // ### [12.326.7](https://indike.org/pramana/in.lit.mahabharata.narayaniya.12.326.7) sahasrodarabāhuś ca avyakta iti ca kvacit oṃkāram udgiran vaktrāt sāvitrīṃ ca tadanvayām // ### [12.326.8](https://indike.org/pramana/in.lit.mahabharata.narayaniya.12.326.8) śeṣebhyaś caiva vaktrebhyaś caturvedodgataṃ vasu āraṇyakaṃ jagau devo harir nārāyaṇo vaśī // ### [12.326.9](https://indike.org/pramana/in.lit.mahabharata.narayaniya.12.326.9) vedīṃ kamaṇḍaluṃ darbhān maṇirūpān athopalān ajinaṃ daṇḍakāṣṭhaṃ ca jvalitaṃ ca hutāśanam dhārayām āsa deveśo hastair yajñapatis tadā // ### [12.326.10](https://indike.org/pramana/in.lit.mahabharata.narayaniya.12.326.10) taṃ prasannaṃ prasannātmā nārado dvijasattamaḥ vāgyataḥ prayato bhūtvā vavande parameśvaram tam uvāca nataṃ mūrdhnā devānām ādir avyayaḥ // ### [12.326.11](https://indike.org/pramana/in.lit.mahabharata.narayaniya.12.326.11) ekataś ca dvitaś caiva tritaś caiva mahar2ṣayaḥ imaṃ deśam anuprāptā mama darśanalālasāḥ // ### [12.326.12](https://indike.org/pramana/in.lit.mahabharata.narayaniya.12.326.12) na ca māṃ te dadṛśire na ca drakṣyati kaścana ṛte hy ekāntikaśreṣṭhāt tvaṃ caivaikāntiko mataḥ // ### [12.326.13](https://indike.org/pramana/in.lit.mahabharata.narayaniya.12.326.13) mamaitās tanavaḥ śreṣṭhā jātā dharmagṛhe dvija tās tvaṃ bhajasva satataṃ sādhayasva yathāgatam // ### [12.326.14](https://indike.org/pramana/in.lit.mahabharata.narayaniya.12.326.14) vṛṇīṣva ca varaṃ vipra mattas tvaṃ yam ihecchasi prasanno 'haṃ tavādyeha viśvamūrtir ihā-vyayaḥ // ### [12.326.15](https://indike.org/pramana/in.lit.mahabharata.narayaniya.12.326.15) nārada uvāca: adya me tapaso deva yamasya niyamasya ca sadyaḥ phalam avāptaṃ vai dṛṣṭo yad bhagavān mayā // ### [12.326.16](https://indike.org/pramana/in.lit.mahabharata.narayaniya.12.326.16) vara eṣa mamātyantaṃ dṛṣṭas tvaṃ yat sanātanaḥ bhagavān viśvadṛk siṃhaḥ sarvamūrtir mahāprabhuḥ // ### [12.326.17](https://indike.org/pramana/in.lit.mahabharata.narayaniya.12.326.17) bhīṣma uvāca: evaṃ saṃdarśayitvā tu nāradaṃ parameṣṭhijam uvāca vacanaṃ bhūyo gaccha nārada māciram ### [12.326.18](https://indike.org/pramana/in.lit.mahabharata.narayaniya.12.326.18) ime hy anindriyāhārā madbhaktāś candravarcasaḥ ekāgrāś cintayeyur māṃ naiṣāṃ vighno bhaved iti // ### [12.326.19](https://indike.org/pramana/in.lit.mahabharata.narayaniya.12.326.19) siddhāś caite mahābhāgāḥ purā hy ekāntino 'bhavan tamorajovinirmuktā māṃ pravekṣyanty asaṃśayam // ### [12.326.20](https://indike.org/pramana/in.lit.mahabharata.narayaniya.12.326.20) na dṛśyaś cakṣuṣā yo 'sau na spṛśyaḥ sparśanena ca na ghreyaś caiva gandhena rasena ca vivarjitaḥ // ### [12.326.21](https://indike.org/pramana/in.lit.mahabharata.narayaniya.12.326.21) sattvaṃ rajas tamaś caiva na guṇās taṃ bhajanti vai yaś ca sarvagataḥ sākṣī lokasyātmeti kathyate // ### [12.326.22](https://indike.org/pramana/in.lit.mahabharata.narayaniya.12.326.22) bhūtagrāmaśarīreṣu naśyatsu na vinaśyati ajo nityaḥ śāśvataś ca nirguṇo niṣkalas tathā // ### [12.326.23](https://indike.org/pramana/in.lit.mahabharata.narayaniya.12.326.23) dvir dvādaśebhyas tattvebhyaḥ khyāto yaḥ pañcaviṃśakaḥ puruṣo niṣkriyaś caiva jñānadṛśyaś ca kathyate // ### [12.326.24](https://indike.org/pramana/in.lit.mahabharata.narayaniya.12.326.24) yaṃ praviśya bhavantīha muktā vai dvijasattama sa vāsudevo vijñeyaḥ paramātmā sanātanaḥ // ### [12.326.25](https://indike.org/pramana/in.lit.mahabharata.narayaniya.12.326.25) paśya devasya māhātmyaṃ mahimānaṃ ca nārada śubhā-śubhaiḥ karmabhir yo na lipyati kadācana // ### [12.326.26](https://indike.org/pramana/in.lit.mahabharata.narayaniya.12.326.26) sattvaṃ rajas tamaś caiva guṇān etān pracakṣate ete sarvaśarīreṣu tiṣṭhanti vicaranti ca // ### [12.326.27](https://indike.org/pramana/in.lit.mahabharata.narayaniya.12.326.27) etān guṇāṃs tu kṣetrajño bhuṅkte naibhiḥ sa bhujyate nirguṇo guṇabhuk caiva guṇasraṣṭā guṇādhikaḥ // ### [12.326.28](https://indike.org/pramana/in.lit.mahabharata.narayaniya.12.326.28) jagatpratiṣṭhā devar1ṣe pṛthivy apsu pralīyate jyotiṣy āpaḥ pralīyante jyotir vāyau pralīyate // ### [12.326.29](https://indike.org/pramana/in.lit.mahabharata.narayaniya.12.326.29) khe vāyuḥ pralayaṃ yāti manasy ākāśam eva ca mano hi paramaṃ bhūtaṃ tad avyakte pralīyate // ### [12.326.30](https://indike.org/pramana/in.lit.mahabharata.narayaniya.12.326.30) avyaktaṃ puruṣe brahman niṣkriye saṃpralīyate nāsti tasmāt parataraṃ puruṣād vai sanātanāt // ### [12.326.31](https://indike.org/pramana/in.lit.mahabharata.narayaniya.12.326.31) nityaṃ hi nāsti jagati bhūtaṃ sthāvarajaṅgamam ṛte tam ekaṃ puruṣaṃ vāsudevaṃ sanātanam sarvabhūtātmabhūto hi vāsudevo mahābalaḥ // ### [12.326.32](https://indike.org/pramana/in.lit.mahabharata.narayaniya.12.326.32) pṛthivī vāyur ākāśam āpo jyotiś ca pañcamam te sametā mahātmānaḥ śarīram iti saṃjñitam // ### [12.326.33](https://indike.org/pramana/in.lit.mahabharata.narayaniya.12.326.33) tadāviśati yo brahmann adṛśyo laghuvikramaḥ utpanna eva bhavati śarīraṃ ceṣṭayan prabhuḥ // ### [12.326.34](https://indike.org/pramana/in.lit.mahabharata.narayaniya.12.326.34) na vinā dhātusaṃghātaṃ śarīraṃ bhavati kvacit na ca jīvaṃ vinā brahman dhātavaś ceṣṭayanty uta // ### [12.326.35](https://indike.org/pramana/in.lit.mahabharata.narayaniya.12.326.35) sa jīvaḥ parisaṃkhyātaḥ śeṣaḥ saṃkarṣaṇaḥ prabhuḥ tasmāt sanatkumāratvaṃ yo labheta svakarmaṇā // ### [12.326.36](https://indike.org/pramana/in.lit.mahabharata.narayaniya.12.326.36) yasmiṃś ca sarvabhūtāni pralayaṃ yānti saṃkṣaye sa manaḥ sarvabhūtānāṃ pradyumnaḥ paripaṭhyate // ### [12.326.37](https://indike.org/pramana/in.lit.mahabharata.narayaniya.12.326.37) tasmāt prasūto yaḥ kartā kāryaṃ kāraṇam eva ca yasmāt sarvaṃ prabhavati jagat sthāvarajaṅgamam so 'niruddhaḥ sa īśāno vyaktiḥ sā sarvakarmasu // ### [12.326.38](https://indike.org/pramana/in.lit.mahabharata.narayaniya.12.326.38) yo vāsudevo bhagavān kṣetrajño nirguṇātmakaḥ jñeyaḥ sa eva bhagavāñ jīvaḥ saṃkarṣaṇaḥ prabhuḥ // ### [12.326.39](https://indike.org/pramana/in.lit.mahabharata.narayaniya.12.326.39) saṃkarṣaṇāc ca pradyumno manobhūtaḥ sa ucyate pradyumnād yo 'niruddhas tu so 'haṃkāro maheśvaraḥ // ### [12.326.40](https://indike.org/pramana/in.lit.mahabharata.narayaniya.12.326.40) mattaḥ sarvaṃ saṃbhavati jagat sthāvarajaṅgamam akṣaraṃ ca kṣaraṃ caiva sac cā-sac caiva nārada // ### [12.326.41](https://indike.org/pramana/in.lit.mahabharata.narayaniya.12.326.41) māṃ praviśya bhavantīha muktā bhaktās tu ye mama ahaṃ hi puruṣo jñeyo niṣkriyaḥ pañcaviṃśakaḥ // ### [12.326.42](https://indike.org/pramana/in.lit.mahabharata.narayaniya.12.326.42) nirguṇo niṣkalaś caiva nirdvaṃdvo niṣparigrahaḥ etat tvayā na vijñeyaṃ rūpavān iti dṛśyate icchan muhūrtān naśyeyam īśo 'haṃ jagato guruḥ // ### [12.326.43](https://indike.org/pramana/in.lit.mahabharata.narayaniya.12.326.43) māyā hy eṣā mayā sṛṣṭā yan māṃ paśyasi nārada sarvabhūtaguṇair yuktaṃ naivaṃ tvaṃ jñātum arhasi mayaitat kathitaṃ samyak tava mūrticatuṣṭayam // ### [12.326.44](https://indike.org/pramana/in.lit.mahabharata.narayaniya.12.326.44) siddhā hy ete mahābhāgā narā hy ekāntino 'bhavan tamorajobhyāṃ nirmuktāḥ pravekṣyanti ca māṃ mune // ### [12.326.45](https://indike.org/pramana/in.lit.mahabharata.narayaniya.12.326.45) ahaṃ kartā ca kāryaṃ ca kāraṇaṃ cāpi nārada ahaṃ hi jīvasaṃjño vai mayi jīvaḥ samāhitaḥ maivaṃ te buddhir atrābhūd dṛṣṭo jīvo mayeti ca // ### [12.326.46](https://indike.org/pramana/in.lit.mahabharata.narayaniya.12.326.46) ahaṃ sarvatrago\_1 brahman bhūtagrāmāntarātmakaḥ bhūtagrāmaśarīreṣu naśyatsu na naśāmy aham // ### [12.326.47](https://indike.org/pramana/in.lit.mahabharata.narayaniya.12.326.47) hiraṇyagarbho lokādiś caturvaktro niruktagaḥ\_1 brahmā sanātano devo mama bahvarthacintakaḥ // ### [12.326.48](https://indike.org/pramana/in.lit.mahabharata.narayaniya.12.326.48) paśyaikādaśa me rudrān dakṣiṇaṃ pārśvam āsthitān dvādaśaiva tathādityān vāmaṃ pārśvaṃ samāsthitān // ### [12.326.49](https://indike.org/pramana/in.lit.mahabharata.narayaniya.12.326.49) agrataś caiva me paśya vasūn aṣṭau surottamān nāsatyaṃ caiva dasraṃ ca bhiṣajau paśya pṛṣṭhataḥ // ### [12.326.50](https://indike.org/pramana/in.lit.mahabharata.narayaniya.12.326.50) sarvān prajāpatīn paśya paśya sapta ṛṣīn api vedān yajñāṃś ca śataśaḥ paśyā-mṛtam athauṣadhīḥ // ### [12.326.51](https://indike.org/pramana/in.lit.mahabharata.narayaniya.12.326.51) tapāṃsi niyamāṃś caiva yamān api pṛthagvidhān tathāṣṭaguṇam aiśvaryam ekasthaṃ paśya mūrtimat // ### [12.326.52](https://indike.org/pramana/in.lit.mahabharata.narayaniya.12.326.52) śriyaṃ lakṣmīṃ ca kīrtiṃ ca pṛthivīṃ ca kakudminīm vedānāṃ mātaraṃ paśya matsthāṃ devīṃ sarasvatīm // ### [12.326.53](https://indike.org/pramana/in.lit.mahabharata.narayaniya.12.326.53) dhruvaṃ ca jyotiṣāṃ śreṣṭhaṃ paśya nārada khecaram ambhodharān samudrāṃś ca sarāṃsi saritas tathā // ### [12.326.54](https://indike.org/pramana/in.lit.mahabharata.narayaniya.12.326.54) mūrtimantaḥ pitṛgaṇāṃś caturaḥ paśya sattama trīṃś caivemān guṇān paśya matsthān mūrtivivarjitān // ### [12.326.55](https://indike.org/pramana/in.lit.mahabharata.narayaniya.12.326.55) devakāryād api mune pitṛkāryaṃ viśiṣyate devānāṃ ca pitṝṇāṃ ca pitā hy eko 'ham āditaḥ // ### [12.326.56](https://indike.org/pramana/in.lit.mahabharata.narayaniya.12.326.56) ahaṃ hayaśiro bhūtvā samudre paścimottare pibāmi suhutaṃ havyaṃ kavyaṃ ca śraddhayānvitam // ### [12.326.57](https://indike.org/pramana/in.lit.mahabharata.narayaniya.12.326.57) mayā sṛṣṭaḥ purā brahmā madyajñam ayajat svayam tatas tasmai varān prīto dadāv aham anuttamān // ### [12.326.58](https://indike.org/pramana/in.lit.mahabharata.narayaniya.12.326.58) matputratvaṃ ca kalpādau lokādhyakṣatvam eva ca ahaṃkārakṛtaṃ caiva nāma paryāyavācakam // ### [12.326.59](https://indike.org/pramana/in.lit.mahabharata.narayaniya.12.326.59) tvayā kṛtāṃ ca maryādāṃ nātikrāmyati kaścana tvaṃ caiva varado brahman varepsūnāṃ bhaviṣyasi // ### [12.326.60](https://indike.org/pramana/in.lit.mahabharata.narayaniya.12.326.60) surāsuragaṇānāṃ ca ṛṣīṇāṃ ca tapodhana pitṝṇāṃ ca mahābhāga satataṃ saṃśitavrata vividhānāṃ ca bhūtānāṃ tvam upāsyo bhaviṣyasi // ### [12.326.61](https://indike.org/pramana/in.lit.mahabharata.narayaniya.12.326.61) prādurbhāvagataś cāhaṃ surakāryeṣu nityadā anuśāsyas tvayā brahman niyojyaś ca suto yathā // ### [12.326.62](https://indike.org/pramana/in.lit.mahabharata.narayaniya.12.326.62) etāṃś cānyāṃś ca rucirān brahmaṇe 'mitatejase ahaṃ dattvā varān prīto nivṛttiparamo 'bhavam // ### [12.326.63](https://indike.org/pramana/in.lit.mahabharata.narayaniya.12.326.63) nirvāṇaṃ sarvadharmāṇāṃ nivṛttiḥ paramā smṛtā tasmān nivṛttim āpannaś caret sarvāṅganirvṛtaḥ // ### [12.326.64](https://indike.org/pramana/in.lit.mahabharata.narayaniya.12.326.64) vidyāsahāyavantaṃ mām ādityasthaṃ sanātanam kapilaṃ prāhur ācāryāḥ sāṃkhyaniścitaniścayāḥ // ### [12.326.65](https://indike.org/pramana/in.lit.mahabharata.narayaniya.12.326.65) hiraṇyagarbho bhagavān eṣa chandasi suṣṭutaḥ so 'haṃ yogagatir brahman yogaśāstreṣu śabditaḥ // ### [12.326.66](https://indike.org/pramana/in.lit.mahabharata.narayaniya.12.326.66) eṣo 'haṃ vyaktim āgamya tiṣṭhāmi divi śāśvataḥ tato yugasahasrānte saṃhariṣye jagat punaḥ kṛtvātmasthāni bhūtāni sthāvarāṇi carāṇi ca // ### [12.326.67](https://indike.org/pramana/in.lit.mahabharata.narayaniya.12.326.67) ekākī vidyayā sārdhaṃ vihariṣye dvijottama tato bhūyo jagat sarvaṃ kariṣyāmīha vidyayā // ### [12.326.68](https://indike.org/pramana/in.lit.mahabharata.narayaniya.12.326.68) asmanmūrtiś caturthī yā sāsṛjac cheṣam avyayam sa hi saṃkarṣaṇaḥ proktaḥ pradyumnaṃ so 'py ajījanat // ### [12.326.69](https://indike.org/pramana/in.lit.mahabharata.narayaniya.12.326.69) pradyumnād aniruddho 'haṃ sargo mama punaḥ punaḥ aniruddhāt tathā brahmā tatrādikamalodbhavaḥ // ### [12.326.70](https://indike.org/pramana/in.lit.mahabharata.narayaniya.12.326.70) brahmaṇaḥ sarvabhūtāni carāṇi sthāvarāṇi ca etāṃ sṛṣṭiṃ vijānīhi kalpādiṣu punaḥ punaḥ // ### [12.326.71](https://indike.org/pramana/in.lit.mahabharata.narayaniya.12.326.71) yathā sūryasya gaganād udayāstamayāv iha naṣṭau punar balāt kālae ānayaty amitadyutiḥ tathā balād ahaṃ pṛthvīṃ sarvabhūtahitāya vai // ### [12.326.72](https://indike.org/pramana/in.lit.mahabharata.narayaniya.12.326.72) sattvair ākrāntasarvāṅgāṃ naṣṭāṃ sāgaramekhalām ānayiṣyāmi svaṃ sthānaṃ vārāhaṃ rūpam āsthitaḥ // ### [12.326.73](https://indike.org/pramana/in.lit.mahabharata.narayaniya.12.326.73) hiraṇyākṣaṃ haniṣyāmi daiteyaṃ balagarvitam nārasiṃhaṃ vapuḥ kṛtvā hiraṇyakaśipuṃ punaḥ surakārye haniṣyāmi yajñaghnaṃ ditinandanam // ### [12.326.74](https://indike.org/pramana/in.lit.mahabharata.narayaniya.12.326.74) virocanasya balavān baliḥ putro mahāsuraḥ bhaviṣyati sa śakraṃ ca svarājyāc cyāvayiṣyati // ### [12.326.75](https://indike.org/pramana/in.lit.mahabharata.narayaniya.12.326.75) trailokye 'pahṛte tena vimukhe ca śacīpatau adityāṃ dvādaśaḥ putraḥ saṃbhaviṣyāmi kaśyapāt // ### [12.326.76](https://indike.org/pramana/in.lit.mahabharata.narayaniya.12.326.76) tato rājyaṃ pradāsyāmi śakrāyā-mitatejase devatāḥ sthāpayiṣyāmi sveṣu sthāneṣu nārada baliṃ caiva kariṣyāmi pātālatalavāsinam // ### [12.326.77](https://indike.org/pramana/in.lit.mahabharata.narayaniya.12.326.77) tretāyuge bhaviṣyāmi rāmo bhṛgukulodvahaḥ kṣatraṃ cotsādayiṣyāmi samṛddhabalavāhanam // ### [12.326.78](https://indike.org/pramana/in.lit.mahabharata.narayaniya.12.326.78) saṃdhau tu samanuprāpte tretāyāṃ dvāparasya ca rāmo dāśarathir bhūtvā bhaviṣyāmi jagatpatiḥ // ### [12.326.79](https://indike.org/pramana/in.lit.mahabharata.narayaniya.12.326.79) tritopaghātād vairūpyam ekato 'tha dvitas tathā prāpsyato vānaratvaṃ hi prajāpatisutāv ṛṣī // ### [12.326.80](https://indike.org/pramana/in.lit.mahabharata.narayaniya.12.326.80) tayor ye tv anvaye jātā bhaviṣyanti vanaukasaḥ te sahāyā bhaviṣyanti surakārye mama dvija // ### [12.326.81](https://indike.org/pramana/in.lit.mahabharata.narayaniya.12.326.81) tato rakṣaḥpatiṃ ghoraṃ pulastyakulapāṃsanam haniṣye rāvaṇaṃ saṃkhye sagaṇaṃ lokakaṇṭakam // ### [12.326.82](https://indike.org/pramana/in.lit.mahabharata.narayaniya.12.326.82) dvāparasya kaleś caiva saṃdhau paryavasānike prādurbhāvaḥ kaṃsahetor māthurāyāṃ bhaviṣyati // ### [12.326.83](https://indike.org/pramana/in.lit.mahabharata.narayaniya.12.326.83) tatrāhaṃ dānavān hatvā subahūn devakaṇṭakān kuśasthalīṃ kariṣyāmi nivāsaṃ dvārakāṃ purīm // ### [12.326.84](https://indike.org/pramana/in.lit.mahabharata.narayaniya.12.326.84) vasānas tatra vai puryām aditer vipriyaṃkaram haniṣye narakaṃ bhaumaṃ muraṃ pīṭhaṃ ca dānavam // ### [12.326.85](https://indike.org/pramana/in.lit.mahabharata.narayaniya.12.326.85) prāgjyotiṣapuraṃ ramyaṃ nānādhanasamanvitam kuśasthalīṃ nayiṣyāmi hatvā vai dānavottamān // ### [12.326.86](https://indike.org/pramana/in.lit.mahabharata.narayaniya.12.326.86) śaṃkaraṃ ca mahāsenaṃ bāṇapriyahitaiṣiṇam parājeṣyāmy athodyuktau devalokanamaskṛtau // ### [12.326.87](https://indike.org/pramana/in.lit.mahabharata.narayaniya.12.326.87) tataḥ sutaṃ baler jitvā bāṇaṃ bāhusahasriṇam vināśayiṣyāmi tataḥ sarvān saubhanivāsinaḥ // ### [12.326.88](https://indike.org/pramana/in.lit.mahabharata.narayaniya.12.326.88) yaḥ kālayavanaḥ khyāto gargatejoabhisaṃvṛtaḥ bhaviṣyati vadhas tasya matta eva dvijottama // ### [12.326.89](https://indike.org/pramana/in.lit.mahabharata.narayaniya.12.326.89) jarāsaṃdhaś ca balavān sarvarājavirodhakaḥ bhaviṣyaty asuraḥ sphīto bhūmipālo girivraje mama buddhiparispandād vadhas tasya bhaviṣyati // ### [12.326.90](https://indike.org/pramana/in.lit.mahabharata.narayaniya.12.326.90) samāgateṣu baliṣu pṛthivyāṃ sarvarājasu vāsaviḥ susahāyo vai mama hy eko bhaviṣyati // ### [12.326.91](https://indike.org/pramana/in.lit.mahabharata.narayaniya.12.326.91) evaṃ lokā vadiṣyanti naranārāyaṇāv ṛṣī udyuktau dahataḥ kṣatraṃ lokakāryārtham īśvarau // ### [12.326.92](https://indike.org/pramana/in.lit.mahabharata.narayaniya.12.326.92) kṛtvā bhārāvataraṇaṃ vasudhāyā yathepsitam sarvasātvatamukhyānāṃ dvārakāyāś ca sattama kariṣye pralayaṃ ghoram ātmajñātivināśanam // ### [12.326.93](https://indike.org/pramana/in.lit.mahabharata.narayaniya.12.326.93) karmāṇy aparimeyāni caturmūrtidharo hy aham kṛtvā lokān gamiṣyāmi svān ahaṃ brahmasatkṛtān // ### [12.326.94](https://indike.org/pramana/in.lit.mahabharata.narayaniya.12.326.94) haṃso hayaśirāś caiva prādurbhāvā dvijottama yadā vedaśrutir naṣṭā mayā pratyāhṛtā tadā savedāḥ saśrutīkāś ca kṛtāḥ pūrvaṃ kṛte yuge // ### [12.326.95](https://indike.org/pramana/in.lit.mahabharata.narayaniya.12.326.95) atikrāntāḥ purāṇeṣu śrutās te yadi vā kvacit atikrāntāś ca bahavaḥ prādurbhāvā mamottamāḥ lokakāryāṇi kṛtvā ca punaḥ svāṃ prakṛtiṃ gatāḥ // ### [12.326.96](https://indike.org/pramana/in.lit.mahabharata.narayaniya.12.326.96) na hy etad brahmaṇā prāptam īdṛśaṃ mama darśanam yat tvayā prāptam adyeha ekāntagatabuddhinā // ### [12.326.97](https://indike.org/pramana/in.lit.mahabharata.narayaniya.12.326.97) etat te sarvam ākhyātaṃ brahman bhaktimato mayā purāṇaṃ ca bhaviṣyaṃ ca sarahasyaṃ ca sattama // ### [12.326.98](https://indike.org/pramana/in.lit.mahabharata.narayaniya.12.326.98) evaṃ sa bhagavān devo viśvamūrtidharo 'vyayaḥ etāvad uktvā vacanaṃ tatraivāntaradhīyata // ### [12.326.99](https://indike.org/pramana/in.lit.mahabharata.narayaniya.12.326.99) nārado 'pi mahātejāḥ prāpyānugraham īpsitam naranārāyaṇau draṣṭuṃ prādravad badarāśramam // ### [12.326.100](https://indike.org/pramana/in.lit.mahabharata.narayaniya.12.326.100) idaṃ mahopaniṣadaṃ caturvedasamanvitam sāṃkhyayogakṛtaṃ tena pañcarātrānuśabditam // ### [12.326.101](https://indike.org/pramana/in.lit.mahabharata.narayaniya.12.326.101) nārāyaṇamukhodgītaṃ nārado 'śrāvayat punaḥ brahmaṇaḥ sadane tāta yathā dṛṣṭaṃ yathā śrutam // ### [12.326.102](https://indike.org/pramana/in.lit.mahabharata.narayaniya.12.326.102) yudhi-ṣṭhira uvāca: etad āścaryabhūtaṃ hi māhātmyaṃ tasya dhīmataḥ kiṃ brahmā na vijānīte yataḥ śuśrāva nāradāt // ### [12.326.103](https://indike.org/pramana/in.lit.mahabharata.narayaniya.12.326.103) pitāmaho hi bhagavāṃs tasmād devād anantaraḥ kathaṃ sa na vijānīyāt prabhāvam amitaujasaḥ // ### [12.326.104](https://indike.org/pramana/in.lit.mahabharata.narayaniya.12.326.104) bhīṣma uvāca: mahākalpasahasrāṇi mahākalpaśatāni ca samatītāni rājendra sargāś ca pralayāś ca ha // ### [12.326.105](https://indike.org/pramana/in.lit.mahabharata.narayaniya.12.326.105) sargasyādau smṛto brahmā prajāsargakaraḥ prabhuḥ jānāti devapravaraṃ bhūyaś cāto 'dhikaṃ nṛpa\_2 param ātmānam īśānam ātmanaḥ prabhavaṃ tathā // ### [12.326.106](https://indike.org/pramana/in.lit.mahabharata.narayaniya.12.326.106) ye tv anye brahmasadane siddhasaṃghāḥ samāgatāḥ tebhyas tac chrāvayām āsa purāṇaṃ vedasaṃmitam // ### [12.326.107](https://indike.org/pramana/in.lit.mahabharata.narayaniya.12.326.107) teṣāṃ sakāśāt sūryaś ca śrutvā vai bhāvitātmanām ātmānugāmināṃ brahma śrāvayām āsa bhārata // ### [12.326.108](https://indike.org/pramana/in.lit.mahabharata.narayaniya.12.326.108) ṣaṭṣaṣṭir hi sahasrāṇi ṛṣīṇāṃ bhāvitātmanām sūryasya tapato lokān nirmitā ye puraḥsarāḥ teṣām akathayat sūryaḥ sarveṣāṃ bhāvitātmanām // ### [12.326.109](https://indike.org/pramana/in.lit.mahabharata.narayaniya.12.326.109) sūryānugāmibhis tāta ṛṣibhis tair mahātmabhiḥ merau samāgatā devāḥ śrāvitāś cedam uttamam // ### [12.326.110](https://indike.org/pramana/in.lit.mahabharata.narayaniya.12.326.110) devānāṃ tu sakāśād vai tataḥ śrutvāsito dvijaḥ śrāvayām āsa rājendra pitṝṇāṃ munisattamaḥ // ### [12.326.111](https://indike.org/pramana/in.lit.mahabharata.narayaniya.12.326.111) mama cāpi pitā tāta kathayām āsa śaṃtanuḥ tato mayaitac chrutvā ca kīrtitaṃ tava bhārata // ### [12.326.112](https://indike.org/pramana/in.lit.mahabharata.narayaniya.12.326.112) surair vā munibhir vāpi purāṇaṃ yair idaṃ śrutam sarve te paramātmānaṃ pūjayanti punaḥ punaḥ // ### [12.326.113](https://indike.org/pramana/in.lit.mahabharata.narayaniya.12.326.113) idam ākhyānam ārṣeyaṃ pāraṃparyāgataṃ nṛpa\_2 nā-vāsudevabhaktāya tvayā deyaṃ kathaṃcana // ### [12.326.114](https://indike.org/pramana/in.lit.mahabharata.narayaniya.12.326.114) matto 'nyāni ca te rājann upākhyānaśatāni vai yāni śrutāni dharmyāṇi teṣāṃ sāro 'yam uddhṛtaḥ // ### [12.326.115](https://indike.org/pramana/in.lit.mahabharata.narayaniya.12.326.115) surāsurair yathā rājan nirmathyā-mṛtam uddhṛtam evam etat purā vipraiḥ kathā-mṛtam ihoddhṛtam // ### [12.326.116](https://indike.org/pramana/in.lit.mahabharata.narayaniya.12.326.116) yaś cedaṃ paṭhate nityaṃ yaś cedaṃ śṛṇuyān naraḥ ekāntabhāvopagata ekānte susamāhitaḥ // ### [12.326.117](https://indike.org/pramana/in.lit.mahabharata.narayaniya.12.326.117) prāpya śvetaṃ mahādvīpaṃ bhūtvā candraprabho naraḥ sa sahasrārciṣaṃ devaṃ praviśen nātra saṃśayaḥ // ### [12.326.118](https://indike.org/pramana/in.lit.mahabharata.narayaniya.12.326.118) mucyed ārtas tathā rogāc chrutvemām āditaḥ kathām jijñāsur labhate kāmān bhakto bhaktagatiṃ vrajet // ### [12.326.119](https://indike.org/pramana/in.lit.mahabharata.narayaniya.12.326.119) tvayāpi satataṃ rājann abhyarcyaḥ puruṣottamaḥ sa hi mātā pitā caiva kṛtsnasya jagato guruḥ // ### [12.326.120](https://indike.org/pramana/in.lit.mahabharata.narayaniya.12.326.120) brahmaṇyadevo bhagavān prīyatāṃ te sanātanaḥ yudhiṣṭhira mahābāho mahābāhur janārdanaḥ // ### [12.326.121](https://indike.org/pramana/in.lit.mahabharata.narayaniya.12.326.121) vaiśaṃpāyana uvāca: śrutvaitad ākhyānavaraṃ dharmarāḍ janamejaya bhrātaraś cāsya te sarve nārāyaṇaparāabhavan // ### [12.326.122](https://indike.org/pramana/in.lit.mahabharata.narayaniya.12.326.122) jitaṃ bhagavatā tena puruṣeṇeti bhārata nityaṃ japyaparā bhūtvā sarasvatīm udīrayan // ### [12.326.123](https://indike.org/pramana/in.lit.mahabharata.narayaniya.12.326.123) yo hy asmākaṃ guruḥ śreṣṭhaḥ kṛṣṇadvaipāyano muniḥ sa jagau paramaṃ japyaṃ nārāyaṇam udīrayan // ### [12.326.124](https://indike.org/pramana/in.lit.mahabharata.narayaniya.12.326.124) gatvāntarikṣāt satataṃ kṣīrodam amṛtāśayam pūjayitvā ca deveśaṃ punar āyāt svam āśramam // ## Linked texts (6) - [Critical edition (BORI)](https://indike.org/pramana/in.lit.mahabharata.vyasa*crit.12.326.1) — Sanskrit - [Skandamahāpurāṇa (vulgate)](https://indike.org/pramana/in.purana.skanda*vulgate.2.9.18.44) — Sanskrit - [Sāmbapurāṇa](https://indike.org/pramana/in.purana.upa.surya.samba.4.33) — Sanskrit - [Brahmapurāṇa](https://indike.org/pramana/in.purana.brahma.30.86) — Vyāsa, Sanskrit - [Vedāntasiddhāntasaṃgraha](https://indike.org/pramana/in.darsana.dvaitadvaita.vedantasiddhantasamgraha.5.20) — Vanamālī Miśra 1660, Sanskrit - [Brahmavidyāvijaya](https://indike.org/pramana/in.darsana.visistadvaita.vadakalai.brahmavidyavijaya.2.p3) — Mahācārya 1509, Sanskrit --- Source: [https://indike.org/pramana/in.lit.mahabharata.narayaniya.12.326](https://indike.org/pramana/in.lit.mahabharata.narayaniya.12.326) · Pramāṇa