[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [The Mahābhārata and its versions](https://indike.org/pramana/in.lit.mahabharata) › [The Nārāyaṇa section of the Śāntiparvan](https://indike.org/pramana/in.lit.mahabharata.narayaniya) › 12.328 # The Nārāyaṇa section of the Śāntiparvan 12.328 Nārāyaṇīya 12.328 - **Language:** Sanskrit ### [12.328.1](https://indike.org/pramana/in.lit.mahabharata.narayaniya.12.328.1) janam-ejaya uvāca: astauṣīd yair imaṃ vyāsaḥ saśiṣyo madhusūdanam nāmabhir vividhair eṣāṃ niruktaṃ bhagavan mama // ### [12.328.2](https://indike.org/pramana/in.lit.mahabharata.narayaniya.12.328.2) vaktum arhasi śuśrūṣoḥ prajāpatipater hareḥ śrutvā bhaveyaṃ yat pūtaḥ śaraccandra ivā-malaḥ // ### [12.328.3](https://indike.org/pramana/in.lit.mahabharata.narayaniya.12.328.3) vaiśaṃpāyana uvāca: śṛṇu rājan yathācaṣṭa phalgunasya harir vibhuḥ prasannātmātmano nāmnāṃ niruktaṃ guṇakarmajam // ### [12.328.4](https://indike.org/pramana/in.lit.mahabharata.narayaniya.12.328.4) nāmabhiḥ kīrtitais tasya keśavasya mahātmanaḥ pṛṣṭavān keśavaṃ rājan phalgunaḥ paravīrahā // ### [12.328.5](https://indike.org/pramana/in.lit.mahabharata.narayaniya.12.328.5) arjuna uvāca: bhagavan bhūtabhavyeśa sarvabhūtasṛg avyaya lokadhāma jagannātha lokānām abhayaprada // ### [12.328.6](https://indike.org/pramana/in.lit.mahabharata.narayaniya.12.328.6) yāni nāmāni te deva kīrtitāni mahar2ṣibhiḥ vedeṣu sapurāṇeṣu yāni guhyāni karmabhiḥ // ### [12.328.7](https://indike.org/pramana/in.lit.mahabharata.narayaniya.12.328.7) teṣāṃ niruktaṃ tvatto 'haṃ śrotum icchāmi keśava na hy anyo vartayen nāmnāṃ niruktaṃ tvām ṛte prabho // ### [12.328.8](https://indike.org/pramana/in.lit.mahabharata.narayaniya.12.328.8) śrī-bhagavān uvāca: ṛgvede sayajurvede tathaivātharvasāmasu purāṇe sopaniṣade tathaiva jyotiṣe 'rjuna // ### [12.328.9](https://indike.org/pramana/in.lit.mahabharata.narayaniya.12.328.9) sāṃkhye ca yogaśāstre ca āyurvede tathaiva ca bahūni mama nāmāni kīrtitāni mahar2ṣibhiḥ // ### [12.328.10](https://indike.org/pramana/in.lit.mahabharata.narayaniya.12.328.10) gauṇāni tatra nāmāni karmajāni ca kānicit niruktaṃ karmajānāṃ ca śṛṇuṣva prayato 'nagha kathyamānaṃ mayā tāta tvaṃ hi me 'rdhaṃ smṛtaḥ purā // ### [12.328.11](https://indike.org/pramana/in.lit.mahabharata.narayaniya.12.328.11) namo 'tiyaśase tasmai dehināṃ paramātmane nārāyaṇāya viśvāya nirguṇāya guṇātmane // ### [12.328.12](https://indike.org/pramana/in.lit.mahabharata.narayaniya.12.328.12) yasya prasādajo brahmā rudraś ca krodhasaṃbhavaḥ yo 'sau yonir hi sarvasya sthāvarasya carasya ca // ### [12.328.13](https://indike.org/pramana/in.lit.mahabharata.narayaniya.12.328.13) aṣṭādaśaguṇaṃ yat tat sattvaṃ sattvavatāṃ vara prakṛtiḥ sā parā mahyaṃ rodasī yogadhāriṇī ṛtā satyā-marā-jayyā lokānām ātmasaṃjñitā // ### [12.328.14](https://indike.org/pramana/in.lit.mahabharata.narayaniya.12.328.14) tasmāt sarvāḥ pravartante sargapralayavikriyāḥ tato yajñaś ca yaṣṭā ca purāṇaḥ puruṣo virāṭ aniruddha iti prokto lokānāṃ prabhavāpyayaḥ // ### [12.328.15](https://indike.org/pramana/in.lit.mahabharata.narayaniya.12.328.15) brāhme rātrikṣaye prāpte tasya hy amitatejasaḥ\_1 prasādāt prādur abhavat padmaṃ padmanibhekṣaṇa tatra brahmā samabhavat sa tasyaiva prasādajaḥ // ### [12.328.16](https://indike.org/pramana/in.lit.mahabharata.narayaniya.12.328.16) ahnaḥ kṣaye lalāṭāc ca suto devasya vai tathā krodhāviṣṭasya saṃjajñe rudraḥ saṃhārakārakaḥ // ### [12.328.17](https://indike.org/pramana/in.lit.mahabharata.narayaniya.12.328.17) etau dvau vibudhaśreṣṭhau prasādakrodhajau smṛtau tadādeśitapanthānau sṛṣṭisaṃhārakārakau nimittamātraṃ tāv atra sarvaprāṇivarapradau // ### [12.328.18](https://indike.org/pramana/in.lit.mahabharata.narayaniya.12.328.18) kapardī jaṭilo muṇḍaḥ śmaśānagṛhasevakaḥ ugravratadharo rudro yogī tripuradāruṇaḥ // ### [12.328.19](https://indike.org/pramana/in.lit.mahabharata.narayaniya.12.328.19) dakṣakratuharaś caiva bhaganetraharas tathā nārāyaṇātmako jñeyaḥ pāṇḍaveya yuge yuge // ### [12.328.20](https://indike.org/pramana/in.lit.mahabharata.narayaniya.12.328.20) tasmin hi pūjyamāne vai devadeve maheśvare saṃpūjito bhavet pārtha devo nārāyaṇaḥ prabhuḥ // ### [12.328.21](https://indike.org/pramana/in.lit.mahabharata.narayaniya.12.328.21) aham ātmā hi lokānāṃ viśvānāṃ pāṇḍunandana tasmād ātmānam evāgre rudraṃ saṃpūjayāmy aham // ### [12.328.22](https://indike.org/pramana/in.lit.mahabharata.narayaniya.12.328.22) yady ahaṃ nārcayeyaṃ vai īśānaṃ varadaṃ śivam ātmānaṃ nārcayet kaścit iti me bhāvitaṃ manaḥ mayā pramāṇaṃ hi kṛtaṃ lokaḥ samanuvartate // ### [12.328.23](https://indike.org/pramana/in.lit.mahabharata.narayaniya.12.328.23) pramāṇāni hi pūjyāni tatas taṃ pūjayāmy aham yas taṃ vetti sa māṃ vetti yo 'nu taṃ sa hi mām anu // ### [12.328.24](https://indike.org/pramana/in.lit.mahabharata.narayaniya.12.328.24) rudro nārāyaṇaś caiva sattvam ekaṃ dvidhākṛtam loke carati kaunteya vyaktisthaṃ sarvakarmasu // ### [12.328.25](https://indike.org/pramana/in.lit.mahabharata.narayaniya.12.328.25) na hi me kenacid deyo varaḥ pāṇḍavanandana iti saṃcintya manasā purāṇaṃ viśvam īśvaram putrārtham ārādhitavān ātmānam aham ātmanā // ### [12.328.26](https://indike.org/pramana/in.lit.mahabharata.narayaniya.12.328.26) na hi viṣṇuḥ praṇamati kasmaicid vibudhāya tu ṛtae ātmānam eveti tato rudraṃ bhajāmy aham // ### [12.328.27](https://indike.org/pramana/in.lit.mahabharata.narayaniya.12.328.27) sabrahmakāḥ sarudrāś ca sendrā devāḥ sahar7ṣibhiḥ arcayanti suraśreṣṭhaṃ devaṃ nārāyaṇaṃ harim // ### [12.328.28](https://indike.org/pramana/in.lit.mahabharata.narayaniya.12.328.28) bhaviṣyatāṃ vartatāṃ ca bhūtānāṃ caiva bhārata sarveṣām agraṇīr viṣṇuḥ sevyaḥ pūjyaś ca nityaśaḥ // ### [12.328.29](https://indike.org/pramana/in.lit.mahabharata.narayaniya.12.328.29) namasva havyadaṃ viṣṇuṃ tathā śaraṇadaṃ nama varadaṃ namasva kaunteya havyakavyabhujaṃ nama // ### [12.328.30](https://indike.org/pramana/in.lit.mahabharata.narayaniya.12.328.30) caturvidhā mama janā bhaktā evaṃ hi te śrutam teṣām ekāntinaḥ śreṣṭhās te caivānanyadevatāḥ aham eva gatis teṣāṃ nirāśīḥkarmakāriṇām // ### [12.328.31](https://indike.org/pramana/in.lit.mahabharata.narayaniya.12.328.31) ye ca śiṣṭās trayo bhaktāḥ phalakāmā hi te matāḥ sarve cyavanadharmāṇaḥ pratibuddhas tu śreṣṭhabhāk // ### [12.328.32](https://indike.org/pramana/in.lit.mahabharata.narayaniya.12.328.32) brahmāṇaṃ śitikaṇṭhaṃ ca yāś cānyā devatāḥ smṛtāḥ prabuddhavaryāḥ sevante mām evaiṣyanti yatparam bhaktaṃ prati viśeṣas te eṣa pārthānukīrtitaḥ // ### [12.328.33](https://indike.org/pramana/in.lit.mahabharata.narayaniya.12.328.33) tvaṃ caivāhaṃ ca kaunteya naranārāyaṇau smṛtau bhārāvataraṇārthaṃ hi praviṣṭau mānuṣīṃ tanum // ### [12.328.34](https://indike.org/pramana/in.lit.mahabharata.narayaniya.12.328.34) jānāmy adhyātmayogāṃś ca yo 'haṃ yasmāc ca bhārata nivṛttilakṣaṇo dharmas tathābhyudayiko 'pi ca // ### [12.328.35](https://indike.org/pramana/in.lit.mahabharata.narayaniya.12.328.35) narāṇām ayanaṃ khyātam aham ekaḥ sanātanaḥ āpo nārā iti proktā āpo vai narasūnavaḥ ayanaṃ mama tat pūrvam ato nārāyaṇo hy aham // ### [12.328.36](https://indike.org/pramana/in.lit.mahabharata.narayaniya.12.328.36) chādayāmi jagad viśvaṃ bhūtvā sūrya ivāṃśubhiḥ sarvabhūtādhivāsaś ca vāsudevas tato hy aham // ### [12.328.37](https://indike.org/pramana/in.lit.mahabharata.narayaniya.12.328.37) gatiś ca sarvabhūtānāṃ prajānāṃ cāpi bhārata vyāptā me rodasī pārtha kāntiś cābhyadhikā mama // ### [12.328.38](https://indike.org/pramana/in.lit.mahabharata.narayaniya.12.328.38) adhibhūtāni cānte 'haṃ tad icchaṃś cāsmi bhārata kramaṇāc cāpy ahaṃ pārtha viṣṇur ity abhisaṃjñitaḥ // ### [12.328.39](https://indike.org/pramana/in.lit.mahabharata.narayaniya.12.328.39) damāt siddhiṃ parīpsanto māṃ janāḥ kāmayanti hi divaṃ corvīṃ ca madhyaṃ ca tasmād dāmodaro hy aham // ### [12.328.40](https://indike.org/pramana/in.lit.mahabharata.narayaniya.12.328.40) pṛśnir ity ucyate cānnaṃ vedā āpo 'mṛtaṃ tathā mamaitāni sadā garbhe pṛśnigarbhas tato hy aham // ### [12.328.41](https://indike.org/pramana/in.lit.mahabharata.narayaniya.12.328.41) ṛṣayaḥ prāhur evaṃ māṃ tritakūpābhipātitam pṛśnigarbha tritaṃ pāhīty ekatadvitapātitam // ### [12.328.42](https://indike.org/pramana/in.lit.mahabharata.narayaniya.12.328.42) tataḥ sa brahmaṇaḥ putra ādyo ṛṣivaras tritaḥ uttatārodapānād vai pṛśnigarbhānukīrtanāt // ### [12.328.43](https://indike.org/pramana/in.lit.mahabharata.narayaniya.12.328.43) sūryasya tapato lokān agneḥ somasya cāpy uta aṃśavo ye prakāśante mama te keśasaṃjñitāḥ sarvajñāḥ keśavaṃ tasmān mām āhur dvijasattamāḥ // ### [12.328.44](https://indike.org/pramana/in.lit.mahabharata.narayaniya.12.328.44) svapatnyām āhito garbha utathyena mahātmanā utathye 'ntarhite caiva kadācid devamāyayā bṛhaspatir athāvindat tāṃ patnīṃ tasya bhārata // ### [12.328.45](https://indike.org/pramana/in.lit.mahabharata.narayaniya.12.328.45) tato vai tam ṛṣiśreṣṭhaṃ maithunopagataṃ tathā uvāca garbhaḥ kaunteya pañcabhūtasamanvitaḥ // ### [12.328.46](https://indike.org/pramana/in.lit.mahabharata.narayaniya.12.328.46) pūrvāgato 'haṃ varada nārhasy ambāṃ prabādhitum etad bṛhaspatiḥ śrutvā cukrodha ca śaśāpa ca // ### [12.328.47](https://indike.org/pramana/in.lit.mahabharata.narayaniya.12.328.47) maithunopagato yasmāt tvayāhaṃ vinivāritaḥ tasmād andho jāsyasi tvaṃ macchāpān nātra saṃśayaḥ // ### [12.328.48](https://indike.org/pramana/in.lit.mahabharata.narayaniya.12.328.48) sa śāpād ṛṣimukhyasya dīrghaṃ tama upeyivān sa hi dīrghatamā nāma nāmnā hy āsīd ṛṣiḥ purā // ### [12.328.49](https://indike.org/pramana/in.lit.mahabharata.narayaniya.12.328.49) vedān avāpya caturaḥ sāṅgopāṅgān sanātanān prayojayām āsa tadā nāma guhyam idaṃ mama // ### [12.328.50](https://indike.org/pramana/in.lit.mahabharata.narayaniya.12.328.50) ānupūrvyeṇa vidhinā keśaveti punaḥ punaḥ sa cakṣuṣmān samabhavad gautamaś cābhavat punaḥ // ### [12.328.51](https://indike.org/pramana/in.lit.mahabharata.narayaniya.12.328.51) evaṃ hi varadaṃ nāma keśaveti mamārjuna devānām atha sarveṣām ṛṣīṇāṃ ca mahātmanām // ### [12.328.52](https://indike.org/pramana/in.lit.mahabharata.narayaniya.12.328.52) agniḥ somena saṃyukta ekayoni mukhaṃ kṛtam agnīṣomātmakaṃ tasmāj jagat kṛtsnaṃ carā-caram // ### [12.328.53](https://indike.org/pramana/in.lit.mahabharata.narayaniya.12.328.53) api hi purāṇe bhavati ekayonyātmakāv agnīṣomau devāś cāgnimukhā iti ekayonitvāc ca parasparaṃ mahayanto lokān dhārayata iti ## Linked texts (3) - [Critical edition (BORI)](https://indike.org/pramana/in.lit.mahabharata.vyasa*crit.12.328.1) — Sanskrit - [Vedāntasiddhāntasaṃgraha](https://indike.org/pramana/in.darsana.dvaitadvaita.vedantasiddhantasamgraha.5.35) — Vanamālī Miśra 1660, Sanskrit - [Brahmavidyāvijaya](https://indike.org/pramana/in.darsana.visistadvaita.vadakalai.brahmavidyavijaya.2.p6) — Mahācārya 1509, Sanskrit --- Source: [https://indike.org/pramana/in.lit.mahabharata.narayaniya.12.328](https://indike.org/pramana/in.lit.mahabharata.narayaniya.12.328) · Pramāṇa