[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [The Mahābhārata and its versions](https://indike.org/pramana/in.lit.mahabharata) › [The Nārāyaṇa section of the Śāntiparvan](https://indike.org/pramana/in.lit.mahabharata.narayaniya) › 12.332 # The Nārāyaṇa section of the Śāntiparvan 12.332 Nārāyaṇīya 12.332 - **Language:** Sanskrit ### [12.332.1](https://indike.org/pramana/in.lit.mahabharata.narayaniya.12.332.1) naranārāyaṇāv ūcatuḥ: dhanyo 'sy anugṛhīto 'si yat te dṛṣṭaḥ svayaṃ prabhuḥ na hi taṃ dṛṣṭavān kaścit padmayonir api svayam // ### [12.332.2](https://indike.org/pramana/in.lit.mahabharata.narayaniya.12.332.2) avyaktayonir bhagavān durdarśaḥ puruṣottamaḥ nāradaitad dhi te satyaṃ vacanaṃ samudāhṛtam // ### [12.332.3](https://indike.org/pramana/in.lit.mahabharata.narayaniya.12.332.3) nāsya bhaktaiḥ priyataro loke kaścana vidyate tataḥ svayaṃ darśitavān svam ātmānaṃ dvijottamam // ### [12.332.4](https://indike.org/pramana/in.lit.mahabharata.narayaniya.12.332.4) tapo hi tapyatas tasya yat sthānaṃ paramātmanaḥ na tat saṃprāpnute kaścid ṛte hy āvāṃ dvijottama // ### [12.332.5](https://indike.org/pramana/in.lit.mahabharata.narayaniya.12.332.5) yā hi sūryasahasrasya samastasya bhaved dyutiḥ sthānasya sā bhavet tasya svayaṃ tena virājatā // ### [12.332.6](https://indike.org/pramana/in.lit.mahabharata.narayaniya.12.332.6) tasmād uttiṣṭhate vipra devād viśvabhuvaḥ pateḥ kṣamā kṣamāvatāṃ śreṣṭha yayā bhūmis tu yujyate // ### [12.332.7](https://indike.org/pramana/in.lit.mahabharata.narayaniya.12.332.7) tasmāc cottiṣṭhate devāt sarvabhūtahito rasaḥ āpo yena hi yujyante dravatvaṃ prāpnuvanti ca // ### [12.332.8](https://indike.org/pramana/in.lit.mahabharata.narayaniya.12.332.8) tasmād eva samudbhūtaṃ tejo rūpaguṇātmakam yena sma yujyate sūryas tato lokān virājate // ### [12.332.9](https://indike.org/pramana/in.lit.mahabharata.narayaniya.12.332.9) tasmād devāt samudbhūtaḥ sparśas tu puruṣottamāt yena sma yujyate vāyus tato lokān vivāty asau // ### [12.332.10](https://indike.org/pramana/in.lit.mahabharata.narayaniya.12.332.10) tasmāc cottiṣṭhate śabdaḥ sarvalokeśvarāt prabhoḥ ākāśaṃ yujyate yena tatas tiṣṭhaty asaṃvṛtam // ### [12.332.11](https://indike.org/pramana/in.lit.mahabharata.narayaniya.12.332.11) tasmāt cottiṣṭhate devāt sarvabhūtagataṃ manaḥ candramā yena saṃyuktaḥ prakāśaguṇadhāraṇaḥ // ### [12.332.12](https://indike.org/pramana/in.lit.mahabharata.narayaniya.12.332.12) ṣaḍbhūtotpādakaṃ nāma tat sthānaṃ vedasaṃjñitam vidyāsahāyo yatrāste bhagavān havyakavyabhuk // ### [12.332.13](https://indike.org/pramana/in.lit.mahabharata.narayaniya.12.332.13) ye hi niṣkalmaṣā loke puṇyapāpavivarjitāḥ teṣāṃ vai kṣemam adhvānaṃ gacchatāṃ dvijasattama sarvalokatamohantā ādityo dvāram ucyate // ### [12.332.14](https://indike.org/pramana/in.lit.mahabharata.narayaniya.12.332.14) ādityadagdhasarvāṅgā adṛśyāḥ kenacit kvacit paramāṇubhūtā bhūtvā tu taṃ devaṃ praviśanty uta // ### [12.332.15](https://indike.org/pramana/in.lit.mahabharata.narayaniya.12.332.15) tasmād api vinirmuktā aniruddhatanau sthitāḥ manobhūtās tato bhūyaḥ pradyumnaṃ praviśanty uta // ### [12.332.16](https://indike.org/pramana/in.lit.mahabharata.narayaniya.12.332.16) pradyumnāc cāpi nirmuktā jīvaṃ saṃkarṣaṇaṃ tathā viśanti viprapravarāḥ sāṃkhyā bhāgavataiḥ saha // ### [12.332.17](https://indike.org/pramana/in.lit.mahabharata.narayaniya.12.332.17) tatas traiguṇyahīnās te paramātmānam añjasā praviśanti dvijaśreṣṭha kṣetrajñaṃ nirguṇātmakam sarvāvāsaṃ vāsudevaṃ kṣetrajñaṃ viddhi tattvataḥ // ### [12.332.18](https://indike.org/pramana/in.lit.mahabharata.narayaniya.12.332.18) samāhitamanaskāś ca niyatāḥ saṃyatendriyāḥ ekāntabhāvopagatā vāsudevaṃ viśanti te // ### [12.332.19](https://indike.org/pramana/in.lit.mahabharata.narayaniya.12.332.19) āvām api ca dharmasya gṛhe jātau dvijottama ramyāṃ viśālām āśritya tapa ugraṃ samāsthitau // ### [12.332.20](https://indike.org/pramana/in.lit.mahabharata.narayaniya.12.332.20) ye tu tasyaiva devasya prādurbhāvāḥ surapriyāḥ bhaviṣyanti trilokasthās teṣāṃ svastīty ato dvija // ### [12.332.21](https://indike.org/pramana/in.lit.mahabharata.narayaniya.12.332.21) vidhinā svena yuktābhyāṃ yathāpūrvaṃ dvijottama āsthitābhyāṃ sarvakṛcchraṃ vrataṃ samyak tad uttamam // ### [12.332.22](https://indike.org/pramana/in.lit.mahabharata.narayaniya.12.332.22) āvābhyām api dṛṣṭas tvaṃ śvetadvīpe tapodhana samāgato bhagavatā saṃjalpaṃ kṛtavān yathā // ### [12.332.23](https://indike.org/pramana/in.lit.mahabharata.narayaniya.12.332.23) sarvaṃ hi nau saṃviditaṃ trailokye sacarā-care yad bhaviṣyati vṛttaṃ vā vartate vā śubhā-śubham // ### [12.332.24](https://indike.org/pramana/in.lit.mahabharata.narayaniya.12.332.24) vaiśaṃpāyana uvāca: etac chrutvā tayor vākyaṃ tapasy ugre 'bhyavartata nāradaḥ prāñjalir bhūtvā nārāyaṇaparāyaṇaḥ // ### [12.332.25](https://indike.org/pramana/in.lit.mahabharata.narayaniya.12.332.25) jajāpa vidhivan mantrān nārāyaṇagatān bahūn divyaṃ varṣasahasraṃ hi naranārāyaṇāśrame // ### [12.332.26](https://indike.org/pramana/in.lit.mahabharata.narayaniya.12.332.26) avasat sa mahātejā nārado bhagavān ṛṣiḥ tam evābhyarcayan devaṃ naranārāyaṇau ca tau // ## Linked texts (2) - [Critical edition (BORI)](https://indike.org/pramana/in.lit.mahabharata.vyasa*crit.12.332.1) — Sanskrit - [Madhvamukhālaṃkāra](https://indike.org/pramana/in.darsana.dvaita.tika.madhvamukhalamkara.2.p52) — Vanamālī Miśra 1660, Sanskrit --- Source: [https://indike.org/pramana/in.lit.mahabharata.narayaniya.12.332](https://indike.org/pramana/in.lit.mahabharata.narayaniya.12.332) · Pramāṇa