The Great Epic of the Bhārata dynasty 1.194
Bhāratabhāvadīpa 1.194
- Language
- Sanskrit
1.194.1
caturnavatyadhikaśatatamo'dhyāyaḥ janyārthamiti | janyārthe varapakṣīyajanārtham | kṛṣṇāṃ ca tatraivāpnuvadhvaṃ pāṇigrahaṇavidhinā | kṛṣṇā ceti pāṭhe āpnotu annaṃ bhavadīyatvāt bhavadbhiḥ sahaiveti bhāvaḥ ||
1.194.3
pariyāpya prasthāpya ||
1.194.4
punaḥ kṣatriyatvaṃ parīkṣituṃ dravyāṇyupasañjahāra ekatra kṛtvā darśitavān ||
1.194.5
phalavarma gavādīni kramāttraivarṇikayogyāni ||
1.194.6
kṛntantīti kṛtyāni | kṛtī chedanesmāt kyap | śilpināṃ praharaṇāni vāsyādīni | krīḍānimittāni śuṣkeṣṭisadorañjanādirūpā brāhmaṇakṣatriyādīnāṃ krīḍāstāsāṃ sādhanāni | alpāni yajñapātrāṇi kṛtrimāśvādīni saraṅgapaṭāni ca | tatra deśe tatra kāle tatra parīkṣaṇe nimitte ||
1.194.8
uttamavastūni ratnakhacitatāmbūladhānīprabhṛtīni tadvanti | matormasyavattvamārṣam ||
1.194.10
gūḍhottarāṃsāngūḍhajanūn ||
1.194.13
sumṛṣṭaḥ abhyañjanavāsolaṅkaraṇādibhiḥ samyak pariṣkṛtaḥ pāṇḍavānāṃ veṣo yaiste sumṛṣṭaveṣāḥ | te ca sambhojakāśca yathāyogyaṃ tāmbūlādikamapūpādikaṃ cānnamadanīyam upājahruḥ ||
Linked texts (1)
- Mahābhārata — Vyāsa, Sanskrit