The Great Epic of the Bhārata dynasty 12.186
Bhāratabhāvadīpa 12.186
- Language
- Sanskrit
12.186.1
nityaṃ samidhyata iti jīvasyānaupādhikaṃ rūpaṃ dīpyata ityuktaṃ tallokāyatamate sthitvā ākṣipati- yadīti | prāṇayate jīvayate ||
12.186.2
āgneyo'gniguṇa ūṣmabhāva auṣṇyaṃ vahninā jāṭhareṇa antaḥsthena pacyate spaṣṭīkriyate iditvabhāve'pi nalopaḥ | agnirjāṭhara eva etat annam ||
12.186.3
evaṃ nityasya vastunaḥ sattve kāryaliṅgakamanumānaṃ nirasya pratyakṣamapi nirasyati - jantoriti | jantoḥ dehendriyabuddhisaṅghātasya pramīyamāṇasya naśyamānasya naivopalabhyate palālapṛthakkaraṇe bījamiva tasmādvāyuviyoga eṣa maraṇam ||
12.186.4
vāyumayo vāyupradhāno vāyoranyaḥ | vāyumaṇḍalavadvātyācakravadvāyunā saha dṛśyaḥ syādityarthaḥ ||
12.186.5
yathā pāṣāṇabaddhaṃ tumbīphalaṃ jale majjati cyutabandhaṃ tūnmajjati tadvajjīvaḥ jñānānmokṣo nāstīti jñānāvaraṇīyam | svaśāstrasya paraśāstreṇa samatvadarśanaṃ mohanīyam | parokṣajñānādapi kṛtakṛtyatvabuddhirantarīyamiti ghātikarmacatuṣṭayam | śukraśoṇitasaṃyoga āyuṣkam | tayoḥ kalalāvasthā gautrikaṃ, tasyādārḍhyaṃ nāmikaṃ tato dehākārapariṇāmo vedanīyamityaghātikarmacatuṣṭayam | aitena karmāṣṭakena baddho na pṛthagupādherdṛśyate iti digambaramatena parihāramāśaṅkyāha - saṃśleṣa iti | yadi vātena vātapradhānena saṅghātena jīvasya saṃśleṣo'sti tasmācca saṅghātādanyo jīvastarhi saṅghāte praṇaśyati sati mahārṇave pāṣāṇādinā vimuktaṃ tasya bhāvastattvaṃ tasmāddhetorjalabhājanamiva jīvo'nyat pṛthak syādityarthaḥ ||
12.186.6
brahmāṃśo jīva iti pakṣamāśaṅkyāha - kūpeti | saṅghātanāśe brahmāntargatasya jīvasya svarūpanāśa eva samudre nadīnāmivetyarthaḥ ||
12.186.7
iṣṭāpattimāśaṅkyāha - pañceti | pañcadhāraṇake pañcabhireva dhāraṇaṃ yasya | pañcasādhāraṇe ityādyaḥ pāṭhaḥ | jīvitaṃ jīvaḥ | mañcārūḍhapuruṣavadatiriktaṃ kutaḥ na kutaścidityarthaḥ | tatra hetuḥ - teṣāmiti | atiriktaścetsaṅghātaikadeśanāśe'pi dṛśyeta mañcaideśanāśe puruṣa iva | na ca dṛśyate | tasmātsaṅghātātmaiva jīvastadekadeśanāśe naśyati | mañcaikadeśanāśe mañca ivetyarthaḥ | caturṇāmabhāve nāsti saṃśayo jīvo naṣṭa iti | saṅgraha iti pāṭhaḥ svacchaḥ ||
12.186.8
koṣṭhabhedādvāyvādinā koṣṭhanirodhāt ||
12.186.9
varṇo vistāraḥ ucchūnatetyarthaḥ ||
12.186.10
tasminniti | saṅghātādyatirikte dhāvanazīvanādyadarśanāt | saṅghāta eva jīva ityarthaḥ ||
12.186.11
tataśca paralokādikaṃ nāstīti dānādervaiyarthyamityāha- eṣeti ||
12.186.14
līnamūlaśchinno vṛkṣo yathā punaḥ prarohati evaṃ līnakarmā saṅghāto naṣṭo'pi punarutpatsyate bījasattvādityāśaṅkyāha - chinnasyeti | vṛkṣamūlaṃ bījabhūtamupalabhyate | na dehamūlaṃ karmetyarthaḥ ||
12.186.15
śarīramūlaṃ tu bījamātraṃ pratyakṣadṛṣṭaṃ reta eva na tvadṛṣṭam aklṛptatvāt | pravartate deharūpeṇa pariṇamate | tathā ca bījaruhataruvannaṣṭānāṃ nāśa evetareṣām udbhava iti tasmānnityaṃ samidhyate ityanupapannam ||
Linked texts (1)
- Mahābhārata — Vyāsa, Sanskrit