The Great Epic of the Bhārata dynasty 13.13
Bhāratabhāvadīpa 13.13
- Language
- Sanskrit
13.13.1
tadevaṃ gautamīsudarśanaśukaprabhṛtīnāmākhyānairyadṛcchopagateṣu duḥkheṣu anudvignamanā atithibhakta ānṛśaṃsyādidharmavān śriyaṃ prāpnoti tasyāśca phalaṃ kāmaḥ indriyaprītirūpaḥ sā ca strīṇāmeva bhūyasī puṃsastvalpataretyetāvatā granthenoktam | tamimaṃ kāmaṃ tucchīkṛtya paramasukhāvāptikāmasya pūrvoktānanudvegādīnupāsīnasya vakṣyamāṇavidhinā parameśvaramārādhayiṣyato heyaṃ doṣajātaṃ vaktumayamadhyāya ārabhyate- kimiti | lokayātrā aihikaśiṣṭavyavahāraḥ, hitaṃ ca pāralaukikaṃ śreyastadarthinā kiṃ kartavyaṃ kimavaśyamanuṣṭheyaṃ lokayātrāṃ lokadvayaśreyaḥsādhanam ||
13.13.2
karmapathān svābhāvikakarmamārgān ||
13.13.3
prāṇātipāto hiṃsā ||
13.13.4
asatpralāpaṃ grāmyavārttādiṃ pāruṣyaṃ niṣṭhurabhāṣaṇaṃ paiśunyaṃ rājadvārādau paradoṣasūcanam anṛtaṃ mithyāvādaḥ parapīḍākaraḥ manasāpyevaṃ vadiṣyāmīti nānucintayet ||
13.13.5
anabhidhyeti ślokena paradravyeṣvabhidhyānaṃ parasyāniṣṭacintanaṃ vedavādeṣu nāstikyamiti trīṇi tyājyāni lakṣayet daśa tyajedityupakramāt ||
13.13.6
śubham ahiṃsādi āstikyāntam aśubhaṃ hiṃsādi nāstikyāntaṃ phalam abhayaduḥkhādi svarganarakāntam ||
Linked texts (1)
- Mahābhārata — Vyāsa, Sanskrit