The Great Epic of the Bhārata dynasty 2.6

Bhāratabhāvadīpa 2.6

Language: Sanskrit

divyasabhālābhādgarvito yudhiṣṭhira uvāca bhavāniti | sañcarate samo gamyṛcchīti sūtre gamergatyarthamātropalakṣaṇaparatvāt carerapi taṅkarmavyatihāre vā taṅ | tvaṃ hi lokeṣu sañcarasi | lokāśca hārddākāśaniṣṭhe tvayi sañcarantīti vārthaḥ tena sarvajñatvamuktam pūrvaṃ manuṣyasṛṣṭeḥ prāk nirmitān devalokānityarthaḥ ||

2.6.8

kvaciditi | devalokāpekṣayā manuṣyaloke kvacitkāle vā bhavitā bhavitrī anāgatada‌rśitvāttava tadapi viditamevetyarthaḥ ||

2.6.9

smayan yudhiṣṭhirasyāpi garvobhūt devatāmahābhāgyājñānaṃ ceti vismayaṃ prāpnuvan ||

2.6.10

mānuṣeṣu na dṛṣṭā na śruteti agrepi na drakṣyate na śroṣyate pūrvakalpasamānarūpatvāduttarasyāpītyarthaḥ ||

2.6.11

kailāseti | kuberasyetyarthaḥ ||

2.6.12

gataklamām avidyādikleśairvajitāṃ tena pūrvāsu tatsattvaṃ jñāyate | divyādivyairiti | divyā divibhavāḥ rambhorvaśyādayaḥ adivyāstadanye mānuṣāḥ pitrādayaḥ | 'sa yadi pitṛlokakāmo bhavati saṅkalpādevāsya pitaraḥ samuttiṣṭhanti tena sa pitṛlokena sampanno mahīyata' iti brahmaloke tatsattvasyāpi śravaṇāt | abhipreyante saṅkalpyante ityabhiprāyāḥ viṣayāḥ taiḥ viśvarūpiṇīṃ bhāvakasaṅkalpānusāri nānārūpavatīṃ mānasīmityarthaḥ ||

2.6.13

juṣṭāṃ sevitāṃ yadi śravaṇe buddhirvartate tarhi kathayiṣye iti pūrvaṇa sambandhaḥ ||

Linked texts (1)

Mahābhārata — Vyāsa, Sanskrit