bhavatyeva hīti | dharmādharmaphalayorviparyayaṃ dṛṣṭvā puruṣaḥ karmaṇaḥ phalaṃ kathaṃsvidaśnāti īśvaro vā kathaṃsvit kartā'stīti dharmeśvarayorākṣepaḥ | ṛddhyataḥ samṛddhiyutān ||

3.183.58

kuto veti | svabhāvāt karmaṇo vā | antye ihaiva paratrāpi vā | kṛtaṃ karmaṇā sādhitaṃ sukhamanvetītyarthaḥ ||

śubhāśubhaiḥ karmabhiḥ sadyo vināśibhiriha vā kārīryādibhirvṛṣṭyādyarthe vihitaiḥ | paratra vā dehatyāge sati kathaṃ saṃyujyate kimāśritya ca karmāṇi tiṣṭhantīti phalasya vyabhicārādāśuvināśitvādāśrayābhāvācceti tredhā prākkarmasadbhāvākṣepaḥ ||

3.183.61

sthityarthaṃ lokarakṣārtham ||

3.183.64

tatra dharmādharmaphalayostāvadavyabhicāraṃ darśayan prathamaṃ doṣaṃ nirasyati nirmalānītyādinā ||

3.183.69

māyā kūṭakārṣāpaṇādiḥ | vyājaṃ dambhaḥ tadevopajīvanti na tu dharmam | te māyāvyājopajīvinaḥ ||

3.183.73

nāthantaḥ prārthayamānāḥ | kāmānāṃ kāmān ||

3.183.74

antyaṃ praśnamanuvadati jantoḥ pretasyeti dvābhyām ||

3.183.75

anunayaṃ siddhāntam ||

3.183.76

tasyottareṇaivārthāt karmaṇāmāśuvināśitvadoṣo nirasto bhavatītyabhisandhāyāha ayamādīti | ādiśarīreṇa liṅgadehena yāvanmokṣaṃ sthāyinā devasṛṣṭena dharmādharmasaṃsṛṣṭena | yadvā | dharmādyanurodhinā īśvareṇa vā sṛṣṭena āviṣkṛtena sarvavāsanāmayaṃ liṅgameva karmaṇāmāśraya ityarthaḥ ||

3.183.77

kalevaraṃ sthūladeham | yugapat dehadvayena | sambhavati saṃyujyate pūrvatyāgāt prāgeva tṛṇajalaukānyāyenāparamādatte na tu tadanantaram | ata eva antarā madhye kṣaṇamātramapi abhavo'saṃsāro nāsti ||

3.183.78

tatra sthūladehāntare | yattu maraṇānantaraṃ madhye yāvadgarbhavāsamātivāhikaśarīrārūḍho divi bhuvyantarikṣe barake vā bhavatīti tat sthūladṛṣṭyaiva jñeyam | ubhayatra bhogasāmyena sthūlātivāhikayorbhedābhāvāt | yathoktaṃ vasiṣṭhena 'ātivāhika evāyaṃ tvādṛśaiścittadehakaḥ | ādhibhautikayā buddhyā gṛhītaścirabhāvanāt' iti ||

3.183.79

kṛtānto yamastatsambandhī vidhiḥ puṇyapāpaphalabhoge niyogastena saṃyuktastamanutiṣṭhan nirādānaḥ prāptaṃ sukhaṃ duḥkhaṃ vā dūrīkartumaśaktaḥ | 'do'vakhaṇḍane ' ityasya rūpam ||

3.183.80

abuddhīnāṃ tattvajñānahīnānāṃ gatiḥ svarganarakarūpā | uttamāṃ punarāvṛttivarjitām ||

3.183.82

śuklajātīyāḥ śuklo yogajo dharmastatprakārāstadekārjanaparāḥ 'prakāravacane jātīyar' | yonyantaramātivāhikayonyapekṣayā'nyāmādhibhautikīṃ yonim ||

3.183.83

vaśina īśvarāḥ | mandarogiṇo nīrogāḥ 'na tatra śoko na jarā na mṛtyuḥ prāptasya yogāgnimayaṃ śarīram' iti śruteḥ | prārabdhakarmaprābalyāt kadācit prāptameva cāpakvayogināṃ rogādikaṃ cettatrāha alpeti | alpaṃ dvaitadarśanam 'atha yatrānyat paśyatyanyacchṛṇoti tadalpam' iti śruteḥ | tasmāt ābādho duḥkhaṃ tatastrāsāt nirupadravā upa samīpe sthitvā dravati svīyaṃ dharmamāsiñcatītyupadravo'ntaḥkaraṇam | tadrahitāḥ etena prārabdhasyāpi pratighātāya nirbījaḥ samādhiḥ prabhavatīti darśitam ||

3.183.84

nanu tādṛśo'pyapāntaratamā nāma vedācāryaḥ kalidvāparayoḥ sandhau satyavatyāṃ vyāsatayā samajani iti mokṣadharmeṣu | ataḥ śuklajātīyānāmapi utkrāntigatyā gatayo'parihāryā ityāśaṅkyāha cyavantamiti | adhikāriṇāṃ teṣāṃ lokānugrahārthaṃ svecchayā gṛhādgṛhāntarapraveśavadiha paratra ca sañcāro na karmādhīnatayā'smākabhitra duḥkhāya bhavatītyāśayaḥ | tathā nirṇītaṃ yāvadadhikāramavasthitirādhikārikāṇāmityatra ||

Linked texts (1)

Mahābhārata — Vyāsa, Sanskrit