The Great Epic of the Bhārata dynasty 3.297

Bhāratabhāvadīpa 3.297

Language: Sanskrit

3.297.1

atheti | kaṭhinaṃ sthālīṃ 'kaṭhinaṃ niṣṭhure sthālyām' iti viśvaḥ ||

vivasvataḥ vasyate ācchādyate iti vaḥ ācchādanaṃ tadvān vasvāṃstadanyo vivasvānnirāvaraṇo jagadātmā sūryaḥ | 'sūrya ātmā jagatastasthuṣaśca' iti śruteḥ | tasya tanayaḥ putraḥ atyantahita ityarthaḥ | samena śatrumitrāditāratamyahīnena tava dharmeṇa praśāsanena tāḥ prajāścaranti tvadājñāvaśagā ityarthaḥ | ata eva tava nāma dharmarāja iti | dharmeṇaiva rājate dharmo'sya rājata iti vā ||

3.297.42

laukikeṣvapi viśvāsaṃ kurvanniṣṭāsaddhiṃ prāpnoti kimuta tvayi dharmarājetyāśayenāha ātmanyapīti | praṇayaṃ prārthanām ||

3.297.44

te tvayā ||

3.297.45

mamātmajaṃ satyavataśca aurasaṃ na tu dhṛtarāṣṭrādivadanyato mayi jātāmityarthaḥ ||

3.297.47

śāśvato dharmaḥ patyuḥ sakāśādevāpatyotpādanaṃ satāṃ mādṛśānāṃ dārāṇāṃ tatraiva vṛttiḥ | nanu gatāyuṣi patyau kathaṃ tat syādityata āha santa iti | varaṃ datvā santo na vyathanti nāpi sīdanti kiṃ tu uptaṃ nirvahantyevetyarthaḥ | atyantāśakye'rthe kathaṃ syādityata āha | satāmiti | satāmaśakyamapi nāsti | bhayaṃ cānyasya tebhyo nāstīti tattvato'haṃ nirbhayā'smīti bhāvaḥ ||

3.297.48

tvayā'pi satyaṃ svīyaṃ rakṣaṇīyamityāha santo hīti | bhūtabhavyasya bhūtasya bhaviṣyasya ca ||

3.297.49

parasparamupakārapratyupakāram ||

3.297.50

etat trayaṃ prasādo'rtho mānaśca daridrasya prasādo nārthāya śrīmatāṃ prasādo'rthakṛdapi na mānadaḥ satāṃ tu mānada iti khaletu prasāda eva nāsti | atastrayaṃ tvayyeva sthitamiti tvaṃ rakṣitā'smākaṃ bhaveti bhāvaḥ ||

3.297.52

te tvattaḥ apavargaḥ putraphalaprāptiḥ sukṛtādvinā samīcīnāddāmpatyayogādṛte kṣetrajādiputrārpaṇena na kṛto niṣpādito bhavati | yathā'nyeṣu vareṣu bhartṛṣu madayantyāṃ vasiṣṭhasyeva na tadvat | yasmādevaṃ tasmādvaraṃ vṛṇe ||