The Great Epic of the Bhārata dynasty 3.4
Bhāratabhāvadīpa 3.4
- Language
- Sanskrit
3.4.1
nanu evaṃ karmajasiddhyapekṣayā yogajasiddheḥ prābalyaṃ cet kimiti sarve'pi tāṃ nādriyanta ityāśaṅkya mūḍhāḥ dṛṣṭadvārakaphaleṣvartheṣu hitopadeṣṭāraṃ dviṣanti kimutādṛṣṭadvārakeṣvityāha vanaṃ praviṣṭeṣvityadhyāyena | āmbikeya iti pūrvarūpamārṣam ||
3.4.2
sūkṣmo dharmo jñānaṃ tadvattvādeva tvaṃ kauravāṇāṃ pāṇḍavadhārttarāṣṭrāṇāṃ samaḥ pakṣapātaśūnyaḥ | eṣāṃ pāṇḍavānāṃ mama ca saputrasyeti śeṣaḥ ||
3.4.3
evaṃ gate evaṃ pāṇḍavapravrājanādyuktarūpe saṅkaṭe gate prāpte sati | uddhareyuḥ unmūlayeyuḥ ||
3.4.5
sa iti | ya uktavidhaḥ sa eva dharmo yudhiṣṭhirarūpo vipralabdhaḥ vañcitaḥ akṣavatyāṃ dyūtakrīḍāyāṃ satyā sandhā pratijñā yasya tam ||
3.4.6
duṣpraṇītasya durātmabhiḥ kṛtasya śeṣasya pāṇḍavamānahānilakṣaṇasya vadhasya upāya doṣapraśāntiprakāram ||
3.4.7
abhisṛṣṭaṃ dattaṃ svakena dhaneneti śeṣaḥ ||
3.4.8
evaṃ kṛte sati tvāṃ dharmo na syāditi naiva kiṃ tu syādeva | syādityavyayaṃ sajjedityarthe ||
3.4.9
evaṃ kṛtvā śeṣaṃ naṣṭāvaśiṣṭaṃ bhāgyam ||
3.4.12
cakartha kṛtavān idaṃ ca vakṣyamāṇaṃ ca kartā kariṣyasi ||
3.4.13
ekarājyaṃ yadi anumantā tarhi tāpā na bhavitā | na cet yadi vānumantā tarhi sutaṃ nigṛhṇīṣva ||
3.4.14
pakṣāntaramāha duryodhanamiti ||
3.4.16
yācatu madaparādhaṃ kṣamasveti prārthayatu ||
3.4.18
nāvaiti nāṅgīkaroti ||
3.4.19
tatra hetumāha idamiti | tathā duryodhanabandhanaṃ yudhiṣṭhirāya rājyapradānamityevaṃ prakārakaṃ sukhopāyaṃ yat āttha tat idaṃ kuta eva niścitaṃ na kutaścit | gata iti pāṭhe pāṇḍavānāmarthe gataḥ prāpta ityarthaḥ labdhapadāḥ pāṇḍavā madīyān na hiṃsyurityatra niyāmakaṃ nāstīti bhāvaḥ ||
3.4.21
jihmaṃ kuṭilam ||
3.4.22
nedamasti idaṃ kulam ||
Linked texts (1)
- Mahābhārata — Vyāsa, Sanskrit