The Great Epic of the Bhārata dynasty 4.8: adhyāyaḥ 008

Southern recension 4.8

Language: Sanskrit

adhyāyaḥ 008

4.8.1

virāṭanagaraṃ ramyaṃ gacchamāno yudhiṣṭhiraḥ .
astuvanmanasā devīṃ durgāṃ tribhuvaneśvarīm .. 1 ..

4.8.2

yaśodāgarbhasaṃbhūtāṃ nārāyaṇavarapriyām .
nandagopakule jātāṃ maṅgalyāṃ kulavardhanīm .. 2 ..

4.8.3

kaṃsavidrāvaṇakarīmasurāṇāṃ kṣayaṃkarīm .
śilātaṭavinikṣiptāmākāśaṃ prati gāminīm .. 3 ..

4.8.4

vāsudevasya bhaginīṃ divyamālyavibhūṣitām .
divyāmbaradharāṃ devīṃ khaṅgakheṭakadhāriṇīm .. 4 ..

4.8.5

bhārāvataraṇe puṇye ye smaranti sadā śivām .
tānvai tārayate pāpātpaṅke gāmiva durbalām .. 5 ..

4.8.6

stotuṃ pracakrame bhūyo vividhaiḥ stotrasaṃbhavaiḥ .
āmantrya darśanākāṅkṣī rājā devīṃ sahānujaḥ .. 6 ..

4.8.7

namostu varade kṛṣṇe kumāri brahmacāriṇi .
bālārkasadṛśākāre pūrṇacandranibhānane .. 7 ..

4.8.8

caturbhuje caturvakre pīnaśroṇipayodhare .
mayūrapicchavalaye keyūrāṅgadadhāriṇi .. 8 ..

4.8.9

bhāsi devi yathā padmā nārāyaṇaparigrahaḥ .
svarūpaṃ brahmacaryaṃ ca viśadaṃ tava khecari .. 9 ..

4.8.10

kṛṣṇacchavisamā kṛṣṇā saṃkarṣaṇasamānanā .
bibhratī vipulau bāhu śakradhvajasamucchrayau .. 10 ..

4.8.11

pātrī ca paṅkajī ghaṇṭī strī viśuddhā ca yā bhuvi .
pāśaṃ dhanurmahācakraṃ vividhānyāyudhāni ca .. 11 ..

4.8.12

kuṇḍalābhyāṃ supūrṇābhyāṃ karṇābhyāṃ ca vibhūṣitā .
candravispardhinā devi mukhena tvaṃ virājase .. 12 ..

4.8.13

mukuṭena vicitreṇa keśabandhena śobhinā .
bhujaṅgābhogavāsena śroṇisūtreṇa rājatā .. 13 ..

4.8.14

vibhrājase cā''baddhena bhogeneveha mandaraḥ .
dhvajena śikhipicchānāmucchritena virājase .. 14 ..

4.8.15

kaumāraṃ vratamāsthāya tridivaṃ pāvitaṃ tvayā .
tena tvaṃ stūyase devi tridaśaiḥ pūjyase'pi ca .. 15 ..

4.8.16

trailokyarakṣaṇārthāya mahiṣāsuranāśini .
prasannā me suraśreṣṭhe dayāṃ kuru śivā bhava .. 16 ..

4.8.17

jayā tvaṃ vijayā caiva saṃgrāme ca jayapradā .
mamāpi vijayaṃ dehi varadā tvaṃ ca sāṃpratam .. 17 ..

4.8.18

vindhye caiva nagaśreṣṭhe tava sthānaṃ hi śāśvatam .
kāli kāli mahākāli śīdhumāṃsapaśupriye .. 18 ..

4.8.19

kṛtānuyātrā bhūtaistvaṃ varadā kāmacāriṇī .
bhārāvatāre ye ca tvāṃ saṃsmariṣyanti mānavāḥ .. 19 ..

4.8.20

praṇamanti ca ye tvāṃ hi prabhāte tu narā bhuvi .
na teṣāṃ durlabhaṃ kiṃcitputrato dhanatopi vā .. 20 ..

4.8.21

durgāttārayase durge tattvaṃ durgā smṛtā janaiḥ . kāntāreṣvavasannānāṃ magrānāṃ ca mahārṇave .
dasyubhirvā niruddhānāṃ tvaṃ gatiḥ paramā nṛṇām .. 21 ..

4.8.22

jalaprataraṇe caiva kāntāreṣvaṭavīṣu ca .
ye smaranti mahādevi na ca sīdanti te narāḥ .. 22 ..

4.8.23

tvaṃ kīrtiḥ śrīrdhṛtiḥ siddhirhrīrvidyā saṃtatirmatiḥ .
saṃdhyā rātriḥ prabhā nidrā jyotsnā kāṃtiḥkṣamādayā .. 23 ..

4.8.24

nṛṇāṃ ca bandhanaṃ mohaṃ putranāśaṃ dhanakṣayam .
vyādhiṃ mṛtyuṃ bhayaṃ caiva pūjitā nāśayiṣyasi .. 24 ..

4.8.25

sohaṃ rājyātparibhraṣṭaḥ śaraṇaṃ tvāṃ prapannavān .
praṇataśca yathā mūrdhnā tava devi sureśvari .. 25 ..

4.8.26

trāhi māṃ padmapatrākṣi satye satyā bhavasva naḥ .
śaraṇaṃ bhava me durge śaraṇye bhaktavatsale .. 26 ..

4.8.27

evaṃ stutā hi sā devī darśayāmāsa pāṇḍavam .
upagamya tu rājānamidaṃ vacanamabravīt .. 27 ..
devyuvāca .

4.8.28

śṛṇu rājanmahābāho madīyaṃ vacanaṃ prabho .
bhaviṣyatyacirādeva saṃgrāme vijayastava .. 28 ..

4.8.29

mama prasādānnirjitya hatvā kauravavāhinīm .
rājyaṃ niṣkaṇṭakaṃ kṛtvā bhokṣyase medinīṃ punaḥ .. 29 ..

4.8.30

bhrātṛbhiḥ sahito rājanprītiṃ prāpsyasi puṣkalām .
matprasādācca te saukhyamārogyaṃ ca bhaviṣyati .. 30 ..

4.8.31

ye ca saṃkīrtayiṣyanti loke vigatakalmaṣāḥ .
teṣāṃ tuṣṭā pradāsyāmi rājyamāyurvapuḥ sutam .. 31 ..

4.8.32

pravāse nagare vā'pi saṃgrāme śatrusaṃkaṭe .
aṭavyāṃ durgakāntāre sāgare gahane girau .. 32 ..

4.8.33

ye smariṣyanti māṃ rājanyathā'haṃ bhavatā smṛtā .
na teṣāṃ durlabhaṃ kiṃcitasmim̐lloke bhaviṣyati .. 33 ..

4.8.34

idaṃ stotravaraṃ bhaktyā śṛṇuyādvā paṭheta vā .
tasya sarvāṇi kāryāṇi siddhiṃ yāsyanti pāṇḍavāḥ .. 34 ..

4.8.35

matprasādācca vaḥ sarvānvirāṭanagare sthitān .
na prajñāsyanti kurako narā vā tannivāsinaḥ .. 35 ..

4.8.36

ityuktvā varadā devī yudhiṣṭhiramariṃdamam .
rakṣāṃ kṛtvā ca pāṇḍūnāṃ tatraivāntaradhīyata ..] 36 .. ..

4.8.36_1

iti śrīmanmahābhārate virāṭaparvaṇi pāṇḍavapraveśaparvaṇi aṣṭamo'dhyāyaḥ .. 8 ..

4-8-3 śilātaṭe kaṃsenaiva vinikṣiptā satī ākāśaṃ gatā tām .. 3 .. 4-8-6 stotrārthameva saṃbhava udbhavo yeṣāṃ nāmnāṃ varade ityādīnāṃtaiḥ . āmantrya saṃbodhya .. 6 .. 4-8-9 padmā lakṣmīṃ ata eva nārāyaṇaparigraho viṣṇukāntā .. 9 .. 4-8-10 kṛṣṇacchavirnīlameghastena samā ata eva kṛṣṇā . aṣṭabhujāmāha bibhratīti . vipulau varābhayapradatvena ūrjitau dvau bāhū .. 10 .. 4-8-11 tata ekaḥ pātrī pātravānpaṅkajī paṅkajavān ghaṇṭī ghaṇṭāvān pañcamaḥ pāśaṃ dhanurmahācakraṃ ca bibhratīti pūrveṇānvayaḥ .. 11 ..

4.8.36_3

yudhiṣṭhireṇa yativeṣaparigraheṇa virāṭasabhāpraveśaḥ .. 1 .. pratyutthānādinā satkṛtena yudhiṣṭhireṇa virāṭabhavane nivāsaḥ .. 2 ..

Linked texts (1)

Pañcarakṣā edition of 1937 — Sanskrit