The Great Epic of the Bhārata dynasty 5.17: adhyāyaḥ 017

Southern recension 5.17

Language: Sanskrit

adhyāyaḥ 017

5.17.0

śalya uvāca .

5.17.1

atha saṃcintayānasya devarājasya dhīmataḥ .
nahuṣasya vadhopāyaṃ lokapālaiḥ sadaivataiḥ ..

5.17.2

tapasvī tatra bhagavānagastyaḥ pratyadṛśyata .
so'bravīdarcya devendraṃ diṣṭyā vai vardhate bhavān ..

5.17.3

viśvarūpavināśena vṛtrāsuravadhena ca .
diṣṭyādya nahuṣo bhraṣṭo devarājyātpurandara ..

5.17.4

diṣṭyā hatāriṃ paśyāmi bhavantaṃ valasūdana .
indra uvāca .
svāgataṃ te maharṣe'stu prīto'haṃ darśanāttata .
pādyamācamanīyaṃ ca gāmarghyaṃ ca pratīccha me ..
śalya uvāca .

5.17.5

pūjitaṃ copaviṣṭaṃ tamāsena munisattamam .
paryapṛcchata deveśaḥ prahṛṣṭo brāhmaṇarṣabham ..

5.17.6

śrotumicchāmi bhagavankathyamānaṃ dvijottama .
paribhraṣṭaḥ kathaṃ svargānnahuṣaḥ pāpaniścayaḥ ..
agastya uvāca .

5.17.7

śrṛṇu śakra priyaṃ vākyaṃ yathā rājā durātmavān .
svargādbhraṣṭo durācāro nahuṣo baladarpitaḥ ..

5.17.8

śramārtāśca vahantastaṃ nahuṣaṃ pāpakāriṇam .
devarṣayo mahābhāgāstathā brahmarṣayo'malāḥ ..

5.17.9

papracchurnahuṣaṃ devaṃ saṃśayaṃ jayatāṃ vara .
ya ime brahmaṇā proktā mantrā vai prokṣaṇe gavām ..

5.17.10

ete pramāṇaṃ bhavata utāho neti vāsava .
nahuṣo neti tānāha tamasā mūḍhacetanaḥ ..
ṛṣaya ūcuḥ .

5.17.11

adharme saṃpravṛttastvaṃ dharmaṃ na pratipadyase .
pramāṇametadasmākaṃ pūrvaṃ proktaṃ maharṣibhiḥ ..
agastya uvāca .

5.17.12

tato vivadamānaḥ sa munibhiḥ saha vāsava .
atha māmaspṛśanmūrdhni pādenādharmapīḍitaḥ ..

5.17.13

tenābhūddhatatejāśca niḥśrīkaśca mahīpatiḥ .
tatastaṃ tamasā vignamavocaṃ bhṛśapīḍitam ..

5.17.14

yasmātpūrvaiḥ kṛtaṃ rājanbrahmarṣibhiranuṣṭhitam .
adṛṣṭaṃ dūṣayasi me yacca mūrdhyraspṛśaḥ padā ..

5.17.15

yaccāpi tvamṛṣīnmūḍha brahmakalpāndurāsadān ..

5.17.16

vāhānkṛtvrā vāhayasi tena svargāddhataprabhaḥ .
dhvaṃsa pāpa paribhraṣṭaḥ kṣīṇapuṇyo mahītale ..

5.17.17

daśavarṣasahasrāṇi sarparūpadharo mahān .
vicariṣyasi pūrṇeṣu punaḥ svargamavāpsyasi ..

5.17.18

` dṛṣṭvā yudhiṣṭhiraṃ nāma tava vaṃśasamudbhavam . nihato brahmaśāpena prapadyasva triviṣṭapam ..'

5.17.19

evaṃ bhraṣṭo durātmā sa devarājyādarindama .
diṣṭyā vardhāmahe śakra hato brahmarṣikaṇṭakaḥ ..

5.17.20

triviṣṭapaṃ prapadyasva pāhi lokāñśacīpate .
jitendriyo jitāmitraḥ stūyamāno maharṣibhiḥ ..
śalya uvāca .

5.17.21

tato devā bhṛśaṃ tuṣṭā maharṣigaṇasaṃvṛtāḥ .
pitaraścaiva yakṣāśca bhujagā rākṣasāstathā ..

5.17.22

gandharvā devakanyāśca sarve cāpsarasāṃ gaṇāḥ .
sarāṃsi saritaḥ śailāḥ sāgarāśca viśāṃpate ..

5.17.23

upāgamyābruvansarve diṣṭyā vardhasi śakruhan . hataśca nahuṣaḥ pāpo diṣṭyāgastyena dhīmatā .
diṣṭyā pāpasamācāraḥ kṛtaḥ sarpo mahītale .. ..

5.17.23_1

iti śrīmanmahābhāte udyogaparvaṇi senodyogaparvaṇi saptadaśo'dhyāyaḥ ..

5.17.23_2

indreṇa punardevalokametya trailokyarājyapālanam .. 1 .. śalyena indravattāntakathanapūrvakaṃ yudhiṣṭhirādīnāśvāsya punarduryodhanasamīpagamanam .. 2 ..

Other recensions (1)

Mahābhārata — Vyāsa, Sanskrit