The Great Epic of the Bhārata dynasty 5.31: adhyāyaḥ 031

Southern recension 5.31

Language: Sanskrit

adhyāyaḥ 031

5.31.1

uta santamasantaṃ vā bālaṃ vṛddhaṃ ca sañjaya .
utābalaṃ balīyāṃsaṃ dhātā prakurute vaśe ..

5.31.2

uta bālāya pāṇḍityaṃ paṇḍitāyota bālatām .
dadāti sarvamīśānaḥ purastācchukramuccaran ..

5.31.3

balaṃ jijñāsamānasya ācakṣīthā yathātatham .
atha mantra mantrayitvā yāthātathyena hṛṣṭavat ..

5.31.4

gāvalgaṇe kurūngatvā dhṛtarāṣṭraṃ mahābalam .
abhivādyopasaṃgṛhya tataḥ pṛccheranāmayam ..

5.31.5

brūyāścainaṃ tvamāsīnaṃ kurubhiḥ parivāritam .
tavaiva rājanvīryeṇa sukhaṃ jīvanti pāṇḍavāḥ ..

5.31.6

tava prasādādbālāste prāptā rājyamarindama .
rājye tānsthāpayitvā'gre nopekṣasva vinaśyataḥ ..

5.31.7

sarvamapyetadekasya nālaṃ sañjaya kasyacit .
tāta saṃhatya jīvāmo dviṣatāṃ mā vaśaṃ gamaḥ ..

5.31.8

tathā bhīṣmaṃ śāntanavaṃ bhāratānāṃ pitāmaham .
śirasā'bhivadethāstvaṃ mama nāma prakīrtayan ..

5.31.9

abhivādya ca vaktavyastato'smākaṃ pitāmahaḥ .
bhavatā śantanorvaṃśo nimagnaḥ punaruddhṛtaḥ ..

5.31.10

sa tvaṃ kuru tathā tāta svamatena pitāmaha .
yathā jīvanti te pautrāḥ prītimantaḥ parasparam ..

5.31.11

tathaiva viduraṃ brūyāḥ kurūṇāṃ mantradhāriṇam .
ayuddhaṃ saumya bhāṣasva hitakāmo yudhiṣṭhire ..

5.31.12

atha duryodhanaṃ brūyā rājaputramamarṣaṇam .
madhye kurūṇāmāsīnamanunīya punaḥ punaḥ ..

5.31.13

apāpāṃ yadupaikṣastvaṃ kṛṣṇāmetāṃ sabhāgatām .
tadduḥkhamatitikṣāma mā vadhīṣma kurūniti ..

5.31.14

evaṃ pūrvāparānkleśānatitikṣanta pāṇḍavāḥ .
balīyāṃso'pi santo yattatsarvaṃ kuravo viduḥ ..

5.31.15

yannaḥ pravrājayeḥ saumya ajinaiḥ prativāsitān .
tadduḥkhamatitikṣāma mā vadhīṣaya kurūniti ..

5.31.16

yatkuntīṃ samatikramya kṛṣṇāṃ keśeṣvadharṣayat .
duḥśāsanaste'numate taccāsmābhirupekṣitam ..

5.31.17

athocitaṃ svakaṃ bhāgaṃ labhemahi parantapa .
nivartaya paradravyādbuddhiṃ gṛddhāṃ nararṣabha ..

5.31.18

śāntirevaṃ bhavedrājanprītiścaiva parasparam .
rājyaikadeśamapi naḥ prayaccha śamamicchatām ..

5.31.19

avisthalaṃ vṛkasthalaṃ mākandīṃ vāraṇāvatam .
avasānaṃ bhavatvatra kiṃcidekaṃ ca pañcamam ..

5.31.20

bhrātṝṇāṃ dehi pañcānāṃ pañca grāmānsuyodhana .
śāntirnostu mahāprājña jñātibhiḥ saha sañjaya ..

5.31.21

bhrātā bhrātaramanvetu pitā putreṇa yujyatām .
smayamānāḥ samāyāntu pāñcālāḥ kurubhiḥ saha ..

5.31.22

akṣatānkuru pāñcālānpaśyeyamiti kāmaye .
sarve sumanasastāta śāmyāya bharatarṣabha ..

5.31.23

alameva śamāyāsmi tathā yuddhāya sañjaya .
dharmārthayoralaṃ cāhaṃ mṛdave dāruṇāya ca .. ..

5.31.23_1

iti śrīmanmahābhārate udyogaparvaṇi sañjayayānaparvaṇi ekatriṃśo'dhyāyaḥ ..

5-31-1 santaṃ sādhum . asantaṃ duṣṭam . dhātā īśvaraḥ .. 1 .. 5-31-2 śukraṃ bījabhūtaṃ prācīnaṃ karma uccaran uddīpayan .. 2 .. 5-31-7 sarvaṃ brahmāṇḍam . saṃhatya ekībhūya .. 7 .. 5-31-13 atitikṣāma kṣāntavanto vayam tatra hetuḥ māṃ vadhīṣmeti .. 13 .. 5-31-17 gṛddhāṃ lubdhām .. 17 .. 5-31-18 avasānaṃ vasatisthānam ..

5.31.23_3

pāṇḍavānujñātena sañjayena rātrau dhṛtarāṣṭramupagamya abhivādanapūrvakaṃ yudhiṣṭirakṛtakuśalapraśnādikathanam .. 1 .. tathā dhṛtarāṣṭraṃ vigarhya yudhiṣṭhiravattanasya śvaḥkathanakathanapūrvakaṃ svabhavanagamanam .. 2 ..

5.31.23_4

vaiśaṃpāyana uvāca .

Other recensions (1)

Mahābhārata — Vyāsa, Sanskrit

Linked texts (1)

Smṛtikaustubha — Anantadeva 1638, Sanskrit