Pramāṇa · Search · About · API

The Great Epic of the Bhārata dynasty 1.196

Vulgate (Nīlakaṇṭha's text) 1.196

Language
Sanskrit

1.196.1

vaiśampāyana uvāca |
tataste pāṇḍavāḥ sarve pāñcālyaśca mahāyaśāḥ |
pratyutthāya mahātmānaṃ kṛṣṇaṃ sarvebhyavādayan ||

1.196.2

pratinandya sa tāṃ pūjāṃ pṛṣṭvā kuśalamantataḥ |
āsane kāñcane śuddhe niṣasāda mahāmanāḥ ||

1.196.3

anujñātāstu te sarve kṛṣṇenāmitatejasā |
āsaneṣu mahārheṣu niṣedurdvipadāṃ varāḥ ||

1.196.4

tato muhūrtānmadhurāṃ vāṇīmuccārya pārṣataḥ |
papraccha taṃ mahātmānaṃ draupadyarthaṃ viśāmpate ||

1.196.5

kathamekā bahūnāṃ syāddharmapatnī na saṅkaraḥ |
etanme bhagavānsarvaṃ prabravītu yathātatham ||

1.196.6

vyāsa uvāca |
asmindharme vipralabdhe lokavedavirodhake |
yasya yasya mataṃ yadyacchrotumicchāmi tasya tat ||

1.196.7

drupada uvāca |
adharmo'yaṃ mama mato viruddho lokavedayoḥ |
na hyekā vidyate patnī bahūnāṃ dvijasattama ||

1.196.8

na cāpyācaritaḥ pūrvairayaṃ dharmo mahātmabhiḥ |
na cāpyadharmo vidvadbhiścaritavyaḥ kathañcana ||

1.196.9

tatohaṃ na karomyenaṃ vyavasāyaṃ kriyāṃ prati |
dharmaḥ sadaiva sandigdhaḥ pratibhāti hi me tvayam ||

1.196.10

dhṛṣṭadyumna uvāca |
yavīyasaḥ kathaṃ bhāryāṃ jyeṣṭho bhrātā dvijarṣabha |
brahmansamabhivarteta savṛttaḥ saṃstapodhana ||

1.196.11

na tu dharmasya sūkṣmatvādgatiṃ vidmaḥ kathañcana |
adharmo dharma iti vā vyavasāyo na śakyate ||

1.196.12

kartumasmadvidhairbrahmaṃstato'yaṃ na vyavasyate |
pañcānāṃ mahiṣī kṛṣṇā bhavatviti kathañcana ||

1.196.13

yudhiṣṭhira uvāca |
na me vāganṛtaṃ prāha nādharme dhīyate matiḥ |
vartate hi mano me'tra naiṣo dharmaḥ kathañcana ||

1.196.14

śrūyate hi purāṇe'pi jaṭilā nāma gautamī |
ṛṣīnadhyāsitavatī sapta dharmabhṛtāṃ varā ||

1.196.15

tathaiva munijā vārkṣī tapobhirbhāvitātmanaḥ |
saṅgatābhūddaśa bhrātṝnekanāmnaḥ pracetasaḥ ||

1.196.16

gurorhi vacanaṃ prāhurdharmyaṃ dharmajñasattama |
gurūṇāṃ caiva sarveṣāṃ mātā paramako guruḥ ||

1.196.17

sā cāpyuktavatī vācaṃ bhaikṣavadbhujyatāmiti |
tasmādetadahaṃ manye paraṃ dharmaṃ dvijottama ||

1.196.18

kuntyuvāca |
etametadyathā prāha dharmacārī yudhiṣṭhiraḥ |
anṛtānme bhayaṃ tīvraṃ mucye'hamanṛtātkatham ||

1.196.19

vyāsa uvāca |
anṛtānmokṣyase bhadre dharmaścaiva sanātanaḥ |
nanu vakṣyāmi sarveṣāṃ pāñcāla śṛmu me svayam ||

1.196.20

yathāyaṃ vihito dharmo yataścāyaṃ sanātanaḥ |
yathā ca prāha kaunteyastathā dharmo na saṃśayaḥ ||

1.196.21

vaiśampāyana uvāca |
tata utthāya bhagavānvyāso dvaipāyanaḥ prabhuḥ |
kare gṛhītvā rājānaṃ rājaveśma samāviśat ||

1.196.22

pāṇḍavāścāpi kuntī ca dhṛṣṭadyumnaśca pārṣataḥ |
viviśuryatra tatraiva pratīkṣante sma tāvubhau ||

1.196.23

tato dvaipāyanastasmai narendrāya mahātmane |
ācakhyau tadyathā dharmo bahūnāmekapatnitā ||

Other recensions (1)