The Great Epic of the Bhārata dynasty 1.199

Vulgate (Nīlakaṇṭha's text) 1.199

vaiśampāyana uvāca |
pāṇḍavaiḥ saha saṃyogaṃ gatasya drupadasya ha |
na babhūva bhayaṃ kiñciddevebhyo'pi kathañcana ||

kuntīmāsādya tā nāryo drupadasya mahātmanaḥ |
nāma saṅkīrtayantyo'syā jagmuḥ pādau svamūrdhabhiḥ ||

kṛṣṇā ca kṣaumasaṃvītā kṛtakautukamaṅgalā |
kṛtābhivādanā śvaśrvā tasthau prahvā kṛtāñjaliḥ ||

rūpalakṣaṇasampannāṃ śīlācārasamanvitām |
draupadīmavadatpremṇā pṛthāśīrvacanaṃ snuṣām ||

yathendrāṇī harihaye svāhā caiva vibhāvasau |
rohiṇī ca yathā some damayantī yathā nale ||

yathā vaiśravaṇe bhadrā vasiṣṭhe cāpyarundhatī |
yathā nārāyaṇe lakṣmīstathā tvaṃ bhava bhartṛṣu ||

jīvasūrvīrasūrbhadre bahusaukhyasamanvitā |
subhagā bhogasampannā yajñapatnī pativratā ||

atithīnāgatānsādhūnvṛddānbālāṃstathā gurūn |
pūjayantyā yathānyāyaṃ śaśvadgacchantu te samāḥ ||

kurujāṅgalamukhyeṣu rāṣṭreṣu nagareṣu ca |
anu tvamabhiṣicyasva nṛpatiṃ dharmavatsalā ||

patibhirnirjitāmurvīṃ vikrameṇa mahābalaiḥ |
kuru brāhmaṇasātsarvāmaśvamedhe mahākratau ||

pṛthivyāṃ yāni ratnāni guṇavanti guṇānvite |
tānyāpnuhi tvaṃ kalyāṇi sukhinī śaradāṃ śatam ||

yathā ca tvābhinandāmi vadhvadya kṣaumasaṃvṛtām |
tathā bhūyo'bhinandiṣye jātaputrāṃ guṇānvitām ||

vaiśampāyana uvāca |
tatastu kṛtadārebhyaḥ pāṇḍubhyaḥ prāhiṇoddhariḥ |
vaidūryamaṇicitrāṇi haimānyābharaṇāni ca ||

vāsāṃsi ca mahārhāṇi nānādeśyāni mādhavaḥ |
kambalājinaratnāni sparśavanti śubhāni ca ||

śayanāsanayānāni vividhāni mahānti ca |
vaidūryavajracitrāṇi śataśo bhājanāni ca ||

rūpayauvanadākṣiṇyairupetāśca svalaṅkṛtāḥ |
preṣyāḥ sampradadau kṛṣṇo nānādeśyāḥ svalaṅkṛtāḥ ||

gajānvinītānbhadrāṃśca sadaśvāṃśca svalaṅkṛtān |
rathāṃśca dāntānsauvarṇaiḥ śubhraiḥ paṭṭairalaṅkṛtān ||

koṭiśaśca suvarṇaṃ ca teṣāmakṛtakaṃ tathā |
vīthīkṛtamameyātmā prāhiṇonmadhusūdanaḥ ||

tatsarvaṃ pratijagrāha dharmarājo yudhiṣṭhiraḥ |
mudā paramayā yukto govindapriyakāmyayā ||

Commentaries (5)