The Great Epic of the Bhārata dynasty 1.201

Vulgate (Nīlakaṇṭha's text) 1.201

dhṛtarāṣṭra uvāca |
ahamapyevamevaitaccikīrṣāmi yathā yuvām |
vivektuṃ nāhamicchāmi tvākāraṃ viduraṃ prati ||

tatasteṣāṃ guṇāneva kīrtayāmi viśeṣataḥ |
nāvabudhyeta viduro mamābhiprāyamiṅgitaiḥ ||

yacca tvaṃ manyase prāptaṃ tadbravīhi suyodhana |
rādheya manyase yacca prāptakālaṃ vadāśu me ||

duryodhana uvāca |
adya tānkuśalairvipraiḥ suguptairāptakāribhiḥ |
kuntīputrānbhedayāmo mādrīputrau ca pāṇḍavau ||

athavā drupado rājā mahadbhirvittasañcayaiḥ |
putrāścāsya pralobhyantāmamātyāścaiva sarvaśaḥ ||

parityajedyathā rājā kuntīputraṃ yudhiṣṭhiram |
atha tatraiva vā teṣāṃ nivāsaṃ rocayantu te ||

ihaiṣāṃ doṣavadvāsaṃ varṇayantu pṛthakpṛthak |
te bhidyamānāstatraiva manaḥ kurvantu pāṇḍavāḥ ||

athavā kuśalāḥ kecidupāyanipuṇā narāḥ |
itaretarataḥ pārthānbhedayantvanurāgataḥ ||

vyutthāpayantu vā kṛṣṇāṃ bahutvātsukaraṃ hi tat |
athavā pāṇḍavāṃstasyāṃ bhedayantu tataśca tām ||

bhīmasenasya vā rājannupāyakuśalairnaraiḥ |
mṛtyurvidhīyatāṃ channaiḥ sa hi teṣāṃ balādhikaḥ ||

tamāśritya hi kaunteyaḥ purā cāsmānna manyate |
sa hi tīkṣṇaśca śūraśca teṣāṃ caiva parāyaṇam ||

tasmiṃstvabhihate rājan hatotsāhā hataujasaḥ |
yatiṣyante na rājyāya sa hi teṣāṃ vyapāśrayaḥ ||

ajeyo hyarjunaḥ saṅkhye pṛṣṭhagope vṛkodare |
tamṛte phālguno yuddhe rādheyasya na pādabhāk ||

te jānānāstu daurbalyaṃ bhīmasenamṛte mahat |
asmānbalavato jñātvā na yatiṣyanti durbalāḥ ||

ihāgateṣu vā teṣu nideśavaśavartiṣu |
pravartiṣyāmahe rājan yathāśāstraṃ nibarhaṇam ||

athavā darśanīyābhiḥ pramadābhirvilobhyatām |
ekaikastatra kaunteyastataḥ kṛṣṇā virajyatām ||

preṣyatāṃ caiva rādheyasteṣāmāgamanāya vai |
taistaiḥ prakāraiḥ sannīya pātyantāmāptakāribhiḥ ||

eteṣāmapyupāyānāṃ yaste nirdoṣavānmataḥ |
tasya yaprogamātiṣṭha purā kālo'tivartate ||

yāvaddhyakṛtaviśvāsā drupade pārthivarṣabhe |
tāvadeva hi te śakyā na śakyāstu tataḥ param ||

eṣā mama matistāta nigrahāya pravartate |
sādhvī vā yadi vā'sādhvī kiṃ vā rādheya manyase ||

Other recensions (1)