The Great Epic of the Bhārata dynasty 1.55

Vulgate (Nīlakaṇṭha's text) 1.55

āstīka uvāca |
somasya yajño varuṇasya yajñaḥ prajāpateryajña āsītprayāge |
tathā yajño'yaṃ tava bhāratāgrya
pārikṣita svasti no'stu priyebhyaḥ ||

śakrasya yajñaḥ śatasaṅkhya ukta-
stathāparaṃ tulyasaṅkhyaṃ śataṃ vai |
tathā yajño'yaṃ tava bhāratāgrya
pārikṣita svasti no'stu priyebhyaḥ ||

yamasya yajño harimedhasaśca
yathā yajño rantidevasya rājñaḥ |
tathā yajño'yaṃ tava bhāratāgrya
pārikṣita svasti no'stu priyebhyaḥ ||

gayasya yajñaḥ śaśabindośca rājño
yajñastathā vaiśravaṇasya rājñaḥ |
tathā yajño'yaṃ tava bhāratāgrya
pārikṣita svasti no'stu priyebhyaḥ ||

nṛgasya yajñastvajamīḍhasya cāsī-
dyathā yajño dāśaratheśca rājñaḥ |
tathā yajño'yaṃ tava bhāratāgrya
pārikṣita svasti no'stu priyebhyaḥ ||

yajñaḥ śruto divi devasya sūno-
ryudhiṣṭhirasyājamīḍhasya rājñaḥ |
tathā yajño'yaṃ tava bhāratāgrya
pārikṣita svasti no'stu priyebhyaḥ ||

kṛṣṇasya yajñaḥ satyavatyāḥ sutasya
svayaṃ ca karma pracakāra yatra |
tathā yajño'yaṃ tava bhāratāgrya
pārikṣita svasti no'stu priyebhyaḥ ||

ime ca te sūryasamānavarcasaḥ
samāsate vṛtrahaṇaḥ kratuṃ yathā |
naiṣāṃ jñātuṃ vidyate jñānamadya
dattaṃ yebhyo na praṇaśyetkadācit ||

ṛtviksamo nāsti lokeṣu caiva
dvaipāyaneneti viniścitaṃ me |
etasya śiṣyā hi kṣitiṃ sañcaranti
sarvartvijaḥ karmasu sveṣu dīkṣāḥ ||

vibhāvasuścitrabhānurmahātmā
hiraṇyaretā hutabhukkṛṣṇavartmā |
pradakṣiṇāvartaśikhaḥ pradīpto
havyaṃ tavedaṃ hutabhugvaṣṭi devaḥ ||

neha tvadanyo vidyate jīvaloke
samo nṛpaḥ pālayitā prajānām |
dhṛtyā ca te prītamanāḥ sadāhaṃ
tvaṃ vā varuṇo dharmarājo yamo vā ||

śakraḥ sākṣādvajrapāṇiryatheha
trātā loke'smiṃstvaṃ tatheha prajānām |
matastvaṃ naḥ puruṣendreha loke
na ca tvadanyo bhūpatirasti jajñe ||

khaṭvāṅganābhāgadilīpakalpa
yayātimāndhātṛsamaprabhāva |
ādityatejaḥpratimānatejā
bhīṣmo yathā rājasi suvratastvam ||

vālmīkivatte nibhṛtaṃ svavīryaṃ
vasiṣṭhavatte niyataśca kopaḥ |
prabhutvamindratvasamaṃ mataṃ me
dyutiśca nārāyaṇavadvibhāti ||

yamo yathā dharmaviniścayajñaḥ
kṛṣṇo yathā sarvaguṇopapannaḥ |
śriyāṃ nivāso'si yathā vasūnāṃ
nidhānabhūto'si tathā kratūnām ||

dambhodbhavenāsi samo balena
rāmo yathā śastravidastravicca |
aurvatritābhyāmasi tulyatejā
duṣprekṣaṇīyo'si bhagīrathena ||

sautiruvāca |
evaṃ stutāḥ sarva eva prasannā
rājā sadasyā ṛtvijo havyavāhaḥ |
teṣāṃ dṛṣṭvā bhāvitānīṅgitāni
provāca rājā janamejayo'tha ||

Commentaries (5)